01/06/2026
⦿做伙來講台語、學台文⦿
▷ #拜一 #曹家洋樓 #台語讀冊會◁
寫予黃仁勳先生 ê 公開批：感謝你提醒世界，台灣囡仔需要學台語
* 英文版、中文版 請看留話區
黃仁勳先生你好：
阮是台灣台語路協會，一陣長久佇家庭、社群 kap 教育場所推動台語復振 ê 家長。
這站仔阮看著你佇公開場所自然講台語，嘛聽著你講：
“You need to learn Taiwanese.”
這對真濟台語家庭來講，是真大 ê 鼓舞。
感謝你予逐家重新看著台語；感謝你予濟濟人注意著：台語是台灣囡仔應該有 ê 能力。
雖然真濟人「感覺」台灣猶 koh 有真濟人咧講台語，毋過，殘酷 ê 事實是，十歲以下聽有台語 ê 囡仔，已經愈來愈少；會自然開喙講台語 ê 囡仔，免講嘛閣較稀罕。
這毋是囡仔無聰明，嘛毋是囡仔無願意學，這其實是因為，規个社會無予囡仔感覺「台語重要、有價值、值得使用」。
長久以來，家長甘願開時間 kap 資源予囡仔學英文，soah 罕咧思考：
咱 ê 囡仔，敢有法度用家己 ê 語言了解這片土地？
敢有法度用台語 kap 阿公阿媽講話、唱歌、講笑詼、表達愛？
語言毋但是溝通 ê 工具。語言是文化 ê 根基，嘛是咱了解家己對佗位來 ê 重要元素。
阮遮 ê 台語家庭，是因為愛，才選擇逐工佇食飯、洗身軀、講故事、冤家 kap 和好 ê 時，一句一句將台語留予囡仔。
阮向望台灣 ê 根毋通斷，向望後一代毋但會曉講世界 ê 語言，嘛聽有家己土地 ê 聲音。
你彼句 “You need to learn Taiwanese. ” 湠 kah 規四界，會引起遮大 ê 迴響，其實是因為，伊摃醒濟濟人，提醒逐家看著心內彼个遺憾。
阮嘛想欲知影，台語對你來講是啥物？
是親人 ê 聲音？是囡仔時代 ê 回憶？是佇世界各地拍拚 ê 時陣，會共你 kap 台灣牽做伙 ê 線？
毋管答案是啥物，阮攏誠心感謝你成做一个光彩 koh 珍貴 ê 模範。
佇台灣，台語定定予人誤會是過去 ê 語言、序大 ê 語言，甚至是較無正式、較無現代感、較無競爭力 ê 語言。
毋過你的展現，改變這个想像。
一位徛佇世界科技舞台上頭前 ê 人，自然講台語、重視台語，閣提醒咱 “You need to learn Taiwanese”，這件代誌本身就是咧對社會講：
台語會使是自信 ê 、現代 ê 、面向世界 ê 語言。
希望這句 “You need to learn Taiwanese.” 毋是暫時 ê 網路風潮，閣會發展做真濟家庭重新起步 ê 機會。
台語毋但是懷念，伊是台灣囡仔應該愛會曉 ê 能力。
Jensen阿伯，感謝你提醒咱，嘛感謝你予較濟人聽著。
台灣台語路協會 敬上
