03/06/2026
【資訊分享】
各位朋友大家好，𠊎(ngaiˇ)兜這隻學年開始編寫个專書，到最近總算係出版了！
歡迎各位朋友到唐山書店購買，抑係私訊𠊎(ngaiˇ)等聯繫～
【唐山新書書訊】
書名：一路里來：台大客家社創社35週年紀念專書
作者：台大客家社 編
出版社：唐山出版社
ISBN：978-986-307-277-5
出版日期：2026.06.10
◎ 作者簡介
作者簡歷
國立台灣大學客家研究社
台大客家研究社，簡稱「台大客家社」。創立在1991年，解嚴之後个還涯母語運動浪潮裡背，係全台最早創辦个大學客家社團之一。社團宗旨係傳承、發揚、創新客家个歷史、語言、文化，希望分社會變啊較多元、和諧同進步。初開始社團創辦，識做過客話教學班、舉辦客話演講比賽、山歌教唱這兜行動；後來漸漸仔轉做較多元个活動，像係討論都市客家認同、舉辦客庄踏查社遊、在校內辦理客家週這兜活動；到了今下，識辦理過紹介異國个客家社群、醫護客話、用客話搞桌遊、粄食體驗這兜主題。三十五年來，煞猛在該維繫校內个客家社群，希望在台北創造一隻細細个客庄。
★本書文案使用眾多客語字，礙於讀者電腦可能沒有安裝專用字體，故節錄文章部分客語字特轉為相近用字，方便讀者閱讀，萬請見諒。
◎ 內容簡介
創立在1991年，解嚴之後个還涯母語運動浪潮裡肚，2026年係台大客家社創社35週年，現任社員組成紀念專書个籌備團隊，整理社團歷史，還過邀請曾經參與客家社个學長姐，回望學生時代參加客家社，緬想這段時間對佢等有麼个意義？客家社對佢等个人生有仰般个影響？這本書毋單止紀錄了台大客家社一路里來个歷史，同時乜編入頭擺个社員參與客家社个後生回憶，係台灣客家運動史个靑年見證。
在台灣，以前識有過異多个大學客家社團，毋過到了今這下，既經伸著台大同成大了，做麼涯兜還有辦法延續呢？為著恁仔，這本書尋到了當多以前參加過台大客家社个學長姐，想愛試看啊用紀念性質个回憶錄，來去鬥出一段代代相傳个社團歷史，留分後人參照。
◎ 內文試閱
〈一路里來：序〉／李冠霖
對1991年創立社團，到今乜差毋多35年了，一路里來，到底係仰般延續到這下个呢？這係涯做社長之後，緊在該愐想个問題。
涯想了盡久，包尾涯得著个答案，可能就係緣分。一代過一代，可能係使命感抑係歸屬感、有可能係分人拜託（情緒勒索）、乜有可能係頭那去撞著壁（做社長恁𤸁，發癲了正會想愛做），涯俚尋著了一屆又一屆个社長，分社團个脈流傳承到今下，還過建立起逐屆社員獨一無二个大學經驗。
會有機會去聯絡著恁多以前个學姐學長，應該係對沅臻同脩閔該央時開始累積个連結。脩閔2020年該時還在該做台大意識報个專題，主題大概係「台大客家人」，邀請到佩暄、子軒、同該時節个社長沅臻共下受訪，初開始就係透過這擺記錄，分涯有機會透過報導，去了解著以前个歷史，還過有線索去尋著這幾屆个社長。正過來係2022年舉辦个當代客家文藝沙龍，該時其中一場阿蘭妹先生主持个講座，邀請到錦勳同正揚學長來分享佢兜該時在大學客家社个經驗，經過幾下年到2025年二月个時節，涯在國家語言生活節透過某一間獨立書店，拿到了收集成書个系列沙龍，尋到了另外一方面个線索。
毋過最特別个連結，應該還係2022年底，客家社邀請正揚學長來分享客家社創社初期个歷史同文史資料，這一擺个分享可能在某一種程度項，餳著了𫣆俚个主編穗風來到客家社，分這隻社團第一擺出現了二代社員，實在係還難得个事情。後來就愛到2024年，廷宇摎社長交分涯過後，康宏哥摎佢整理出來个歷屆社團登記資料拿分涯，還過同涯解說哪一儕係有可能連絡个，毋過該央時涯還正經想毋著去尋該兜學長姐。
係一直到2025年初，涯兜在擺社團博覽會个時節，堵著了一儕學長同涯兜講，佩暄學姐轉到台大來教書了，做得尋佢來分享，故所後來幾經聯絡，正辦理了社友轉屋个活動，邀請秀婷、佩暄、沅臻、脩閔。在佩暄學姐該場活動，佢同涯講做得去尋繼泓學長，想毋著蓋堵好，繼泓學長該時在該同主持人朋友穎珍共下主持《新聞懂喜劇》，還過佢兜堵好乜共下參演《新客報到2.0》，故所透過該擺佢等表演，又熟事到繼泓學長。
到這下，三十年前、二十年前、還有最近十年个社長，大概都尋著了。幾下十年來，可能係第一擺有恁難得个連結，故所涯同穗風討論過後，決定愛把扼這擺機會，摎各位先輩邀稿仔，來嘗試編一擺社刊。可能係天意，涯等在安排个過程當中算係異順序，需要个人才都堵好尋得著，大部分學長姐乜願意𢯭手寫稿仔，算係記錄下了社團个一段口述歷史。
像係錦勳學長寫个社辦歷史，寫著社辦其實係該時佢兜對氣窗爬入去，換忒門鎖之後同學校對抗，正搶到這下活大246个社團辦公室，還有像係中杰學長寫到以前社團裡背在反水庫運動个時節，社團對社運無共樣个方針，係講無這擺機會去寫出來，應該係涯等現下个社員一生人都毋會知得个歷史。
在社辦裡背，涯兜最近整理出了蓋多以前个社本，還過在網路頂項个PTT客家版，乜查到了非常多以前个貼文，一直到最近幾年，涯俚開始經營社群媒體，三十零年來个痕跡，都透過各式各樣个媒介，流流傳傳到今這下。希望涯俚之後還做得邀請到還較多个學姐學長，同佢兜个故事寫下來，分涯俚做得了解一路裡來，涯俚係仰般行過。
★本書文案使用眾多客語字，礙於讀者電腦可能沒有安裝專用字體，故節錄文章部分客語字特轉為相近用字，方便讀者閱讀，萬請見諒。
節錄自〈台大客家莊，他鄉變故鄉〉／張穗風
台大客家社係涯第二个故鄉。
涯係高雄瀰濃人，乜係一个客人。還細个時節在客庄大，在屋下都講客話，到學校之後正開始聽著朋友用河洛話打嘴鼓，故所涯个河洛話講啊毋好。做為一个鄉下大个細人仔，國中畢業之前都留啊瀰濃讀書，高中開始正走到市區讀書，感受著一種從來無感受過个孤寂感。周圍个朋友平常尞升學、尞網路、尞遊戲，根本無人陪涯尞農村个生活，乜無人陪涯用客話打嘴鼓。時常感著無陣，乜頭一擺發現瀰濃係涯个「故鄉」。涯个鄉愁應該係從該時節開始走出來个。
在幾啊擺个擺攤活動當中，涯發現著，假使大家行啊在路上看攤位，斯看毋出麼人係客人。毋過當客家社擺攤个人開始用客話撖民眾打嘴鼓，就會發現有兜人其實曉得講客，甚至有堵著過講啊蓋好个人。續下來就會尞著厥屋下麼人係客人，故所佢正曉得講客。涯認為，打造一个自然使用客話个環境，做得發現蓋多「隱形个客家人」，佢等毋係毋曉得講客，淨係尋毋著人、尋毋著機會講客，分享佢等个客家經驗。
時間緊行緊遠，台大客家社乜來到創社35週年吔。涯希望為客家社留下歷史紀錄，故所涯邀請了現任社長冠霖擔任副編，映臻、睿芸、筱彤、毓琳擔任文字編輯，還有邀請師大同學意茹擔任美術編輯，再過邀請脩閔學姊擔任顧問，大家共下來編一本創社35週年个紀念專書。在這本書底背，做得看著頭擺客家社个學長姊撖佢等參與客家社个經驗寫成稿仔，乜做得看著涯同冠霖為了客家社整理个客家社歷任社長和導師名單。希望透過這本專書个出版，分過多人看著台大客家社个故事。為客家社編一本書个同時，乜係為了涯个學生生活做一擺回憶个存檔。
★本書文案使用眾多客語字，礙於讀者電腦可能沒有安裝專用字體，故節錄文章部分客語字特轉為相近用字，方便讀者閱讀，萬請見諒。
◎ 目次
一路里來-序／李冠霖
【關於台大客家社】
台大客家社簡介／黃脩閔、張穗風
關於歷屆社長與社團導師／張穗風
一個來自關西鄉下客家同學的台大記憶／陳隆昊
見證台大客家社36年成長歷程／陳康宏
【緬想當時客家社】
台大客家社創社細故事／吳錦勳
歸鄉對客家社開始／張正揚
客社人生路／吳中杰
相遇．台大客家社／賴佩暄
隱形的客家人，慢慢現身──我的客家社單傳歲月／張繼泓
伏流／邱子軒
有客家社 客人正尋有伴／李沅臻
承蒙台大客家研究社／黃脩閔
隱微的相遇：我在台大客家社那二年／吳廷宇
台大客家庄，他鄉變故鄉／張穗風
【附錄】
再論大學裡的客家社：為什麼要研究客家？／洪馨蘭
轉屋對客家社開始—1990年代客家社社史分享／黃脩閔
台大客家社歷任社長與在任時期
