07/03/2026
*ՊԷՇԻԿԹԱՇԻ ՄԷՋ ԱՐԵՒԱԳԱԼ*
Պէշիկթաշի Ս. Աստուածածին Եկեղեցւոյ մէջ, 6 Մարտ 2026, Ուրբաթ առաւօտ կատարուած արեւագալի արարողութեանց նախագահեց Պէյօղլուի Ս. Եկեղեղեաց քարոզիչ Հոգշ. Տ. Յարութիւն Վրդ. Տամատեան։ Արարողութեան մասնակցեցան նաեւ եկեղեցւոյ երէց Արժ. Տ. Սարգիս Աւ. Քհնյ. Գույումճեան եւ դպրապետ Բրշ. Արման Սրկ. Մարաշլեան։ Երգեցողութիւնները կատարուեցան Նարեկացի Դպրաց Դասու կողմէ, առաջնորդութեամբ Բրշ. Էտվին Սրկ.Կալիպեանի։ Պոլսոյ զանազան թաղերէ փութացած ուխտաւորներ եւ Կարօ Վարժապետեանի ատենապետած թաղային խորհուրդը եւս մասնակցեցան արարողութեանց։
Հայր Սուրբը, արարողութեան աւարտին քարոզեց Անառակի Կիրակիին խորհուրդին անդրադառնալով։ Յիշեցուց, որ անկում կը նշանակէ ժառանգէ մը զրկուած ըլլալ։ Մինչ այդ սատանան կը մօտենայ ժառանգութեան տէր անձերուն, որպէսզի խլէ իրենց ժառանգը։ Իսկ եկեղեցական իմաստով իւրաքանչիւր անհատ հարուստ կը նկատուի հոգեպէս, արժանացած ըլլալով Տիրոջ շունչին եւ պատկերը ըլլալու շնորհքին։ Հետեւաբար մեղաւորը այն անձն է, որ այս հարստութեան շնորհքէն զրկուած կը մնայ։ Իսկ ապաշխարողը այն անձն է, որ վերստին կը վերագտնէ իր հոգեւոր այս արժանիքը, շնորհիւ՝ Խաչեալի եւ իր փրկութեան վարդապետութեան։
Իր խօսքերու ընդացքին անդրադարձաւ նաեւ Ս. Աստուածածնին ունեցած կարեւորութեան, առաջին եկեղեցւոյ կազմաւորման մէջ։ Յիշեցուց, որ Ս. Աստուածածինը նաեւ եղած է այն հաւատացեալը, որ հետեւելով Քրիստոստի վարդապետութեան միասնական պահած է առաքեալները եւ հաստատ պահած՝ եկեղեցին։ Մաղթեց, որ Ս. Աստուածածինը բարեխօս դառնայ Հայ ժողովուրդին համար եւ անհատական ու միասնական հոգեւոր ու բարոյական մեր գանձերը կրկին անգամ վերագտնելու շնորհքին արժանանք։
Արարողութեան աւարտին կատարուեցաւ խաչահանգիստի արարղութիւն։ Կրօնական արարողութեան աւարտին ներկաներ տիկնանց կազմին կողմէ հիւրասիրուեցան եկեղեցւոյ սրահին մէջ։
