30/08/2026
🔴 جاءنا اتصال من وليّ لاعب من أصاغر جمعيتنا
اتصل بينا صديق للصفحة، وهو وليّ لاعب من أصاغر الجمعية، وكان عنده استفسار وعتاب بخصوص وضعية ولده، وخاصة علاش ما تمش تسهيل انتقاله باش يكون لاعب في أصاغر نادي كبير في القسم الوطني ، وزاد استفسر على موضوع الأموال اللي قيل إنها طُلبت منه.
خلّينا نوضّحوا بعض النقاط بكل هدوء:
أولًا، الرئيس السابق للهيئة التسييرية موش سمسار لاعبين، وما عمره كان يخدم بالعقلية هاذي. هو محاسب كبير في شركة معروفة، وعندو مسيرتو المهنية ومكانتو، وما عندوش لا المصلحة ولا العقلية باش يدخل في متاجرة بأبناء الجمعية.
ثانيًا، والأهم: الهيئة اللي نحنا كنا جزء منها ما عادش هي اللي تسير الجمعية حاليًا. وبالتالي ما عناش لا الصفة ولا الحق باش نتدخلوا في قرارات الإدارة الحالية، وخاصة في ملفات حساسة كيف انتقالات اللاعبين والقصر.
واللي نعرفوه ونؤمنوا بيه هو أن أي طلب مالي مقابل تسهيل انتقال لاعب صغير، إذا ثبت وجوده، لازم يتطرح عبر القنوات الرسمية وأهل الاختصاص، موش عبر الاتهامات والتجاذبات على مواقع التواصل الاجتماعي.
ونحنا أصلًا كنا ديما نقولوا:
أولاد مقرين موش ملك لأي هيئة، ولا لأي مسؤول، ولا لأي شخص. هاذم أولاد المنطقة ومستقبلها الرياضي، وحقهم يكونوا في بيئة تحترم الموهبة والقانون وتخدم مصلحتهم قبل كل شيء.
وبالنسبة للي قالوا إننا "نعطّلوا" ونحطوا "العصا في العجلة"، نقولولهم بكل وضوح:
وين العجلة؟
نحن نشكروا الصديق على ثقته وعلى تواصله معانا، أما بكل محبة نقولوله: غلطت العنوان.
الملف هذا يلزمو يتوجّه للجهات المسؤولة حاليًا، وإذا فما تجاوز، فما مؤسسات وقنوات قانونية تنجم تتثبت وتحاسب.
أما نحنا، إذا كتب ربي وصارت انتخابات نزيهة وشفافة، باش يكون من أولوياتنا إصلاح وضعية الأصاغر والشباب، والدفاع على حق كل موهبة من أبناء مقرين إنها تلقى فرصتها بعيدًا عن الحسابات الشخصية.
وفي الأخير، فما حاجة بصراحة ما فهمناهاش 🤔:
فما شكون يقول: "السيد يحب الصغار"...
نحبوا نفهموا فقط:
تحب الصغار بالمعنى الاجتماعي والرياضي والتربوي؟ ❤️⚽️
ولا فما معنى آخر للكلمة نحنا ما فهمناهوش؟
خاطر بصراحة... شوفوا وين وصلنا!
وأبناءنا الصغار يستحقوا منا حاجة واحدة فقط:
الحماية،
التكوين، والفرصة العادلة. 🇹🇳⚽️
