25/10/2026
موش في الساحل برك بل في مارشيات الحوت متع تونس الكل بما فيها المدن اللي تبعد ميتين وثلاثمائة كيلومتر على البحر تلقى اسوام الحوت خاضعة للعرض والطلب بمعنى كيف البحر يعطي خيرو اسعار السمك ترخص واللي في سراه ياكل والزوالي ياكل كان في ها الخربة متع المهدية فمة أربعة جشعين محتكرين السوق وبازقين في افام بعضهم باش لا يرحموا حد ما تلقى كان الغشة والسوم اللي طالع في السماء قال شنوا قال اللي يدللوا على سلعتهم الفرشكة والليكس واللي هي قسما بالله في اغلب الحالات ما فيها كان الغلاء والنتونة وزيد كيف تبدا ولد بلاد وحشام والقشار يعرفك يعملك "براكاج" ويشريك بالسيف من غير لا حشمة ولا جعرة.
يا عباد ربي احشموا على رواحكم واعملوا ربي في بالكم واستقنعوا راهو الايامات هاذي مثلا الشوفرات في قفصة والقيروان والقصرين وسليانة وسيدي بوزيد وغيرها من أسواق المناطق الداخلية بشطر السوم اللي تبيعوا بيه في بلاد الحوت وراهو الفايسبوك عرى كل شيء وفضح حقيقتكم وكشف الواقع وما عاد حتى شيء مخبي.
لذا ندعو المستهلك اللي ينجم يتنقل للمدن المجاورة باش يتوجه للأسواق القريبة من طبلبة وصيادة والمستير بل وحتى رجيش وسلقطة والشابة وخليولهم حوتهم ينتن على قلوبهم ثماش ما الجماعة يرجعلهم شاهد العقل وينقصوا من برشا جشع وبرشا استغلال للمستهلك.
