Association Ezzahra Pet's Lovers جمعية الزهراء لمحبي الحيوانات

09/05/2026

Notre passage sur Radio boukornine hammam lif حمام الأنف pour parler du problème des chiens errants .
Nous maintenons notre refus de l'abattage et espérons l'adoption prochaine d'une loi qui protége les animaux préconisant les solutions alternatives .

03/05/2026

عسلامة أفري بادي
دلندة من أغرب ألكلاب الي قابلتهم في حياتي عندها شخصية قوية وزيد دحنوسة وعاقلة وحنينة ... ملي شديناها وهي ماخذة موقف مغششة علينا للي أنا حسيت بالذنب لكن كي تذكرت الي البلدية وعدت وأنو الكلاب المعقمة ما تقنصهمش قلت نقوي قلبي وهذا الكل على خاطرها .
دلندة عملت عملية التعقيم وحطيناها عند شكون وفي المقابل احنا لاهين بيها لكن دلندة زادت كيكست وقطعت الماكلة والشراب وساعات ادور علينا وجهها للحيط
الكلب السائب يرفض الحصرة ويرفض الرباط اما احنا مجبورين بش تكملولها دواياتها ونداويو جرحها وزيد ما يلزمش تتمرغد في التراب تي حتى الكاركون في رقبتها نحاتو .
الحاصل ليوم بعد اضراب جوع كلات شوية دلندة والله بهت في روحي انا وبنتي عالفرحة الي فرحناها .
ان شاء الله فترة وتتعدى وربي يحفظها والجمعة الجاية ترجع لبقعتها وين المرشي معقمة ملقحة ومداوية.
المحطة الثانية ان شاء الله كلب ذكر لحقيقة دلندة اثرت في برشة وعمري في حياتي ما شفت كلبة كيفها تجمع بين الحنان والعقولية والشخصية القوية .

28/04/2026

هذي دلندة ، أم لولاد ، نهارت الي هزيناهم تبني هربت وزيد مضروبة على ساقها قلت نخليها ونهز نداويها ... نهارين نلوجو عليها و ليوم لقينا دلندة وحمد الله رجعت تمشي على ساقها وهزيناها للفيتو بش نعقموها ونلقحولها ونرجعوها منين هزيناها على خاطرها دحنوسة وحنينة والناس الكل تحبها .
ربي يحميها ويحفظها وتوة نكملولكم حكايتها على خاطر خليناها مغششة كيفاش حصرناها .

24/04/2026

Merci pour l'invitation Croissant Rouge Tunisien-Comité Local d'Ezzahra

في إطار الاستعداد لتنظيم ماراثون “إجري للخير – Edition 2”،
يسرّ الهلال الأحمر التونسي – الهيئة المحلية بالزهراء أن يعلن عن انضمام جمعية Ezzahra Pet’s Lovers

إلى فريق التنظيم، حيث سيكونون معنا كشريك فعّال في إنجاح هذه التظاهرة 💪🐾
كونوا في الموعد يوم 17 ماي،https://sportsense.tn/evenement/crt-run-%d8%a5%d8%ac%d8%b1%d9%8a-%d9%84%d9%84%d8%ae%d9%8a%d8%b1-2/

23/04/2026

Part 2
اولاد دلندة وصلو للسانية وغدوة يمشيو لدارهم الجديدة هزينالهم ماكلتهم وغدوة يمشيو عند فلاح بعيد على الكرطوش .
ربي يحميهم ويحمي كل بكمة .

ل

22/04/2026

كل تبني يعتبر تحدي مادي لينا على خاطر ما تعرفش اذا بش تلقى الكلاب الي بش تهزهم والا لا او تكون الام صعيبة ورافضه وأنها تدخل للقفص ... ولكن هو زادة تحدي عاطفي لينا على خاطر كي تكون مجبور ساعات تهز الصغار وتخلي الام والا واحد من الاخوة وتشوف غزرتهم الحزينة تقول يا ربي شنوة ذنبهم بش اكونوا كلاب شارع ؟ شنوة ذنبهم بش لعباد تنش عليهم البلدية بش تقنصهم ؟
ومن ناحية أخرى تقول من الأفضل يمشيو تبني خير ما اموتو بالكرطوش وساعات يقعدو معاقين وكي تطمان عليهم في بقعة باهية تقول على الاقل منعتهم من القنص.
ليوم بالتعاون مع ك نوف أكاديمي هزينا أولاد دلندة تبني وهي خليناها بش نهزوها تتعالج على خاطر ساقها مضروبة وبش نحاولو نعقموها ونعملولها فاكسان .
ونخليهم مع التصاور ولي فيديو الي يحكيو على لكسيون متع ليوم .
Jade Bourawi merci

21/04/2026

عسلامة افري بادي
الأحد الي فات كان عندنا موعد مع canitrail الي انتظم في زغوان.
السباق هذا شهد حضور برشة كلاب ومنهم كلبة عربي الي ورات وأنها تحفونة وعاقلة ومتميزة.
كانت فرصة زادة بش نعرفو بالجمعية ونحكيو على وجوب التلقيح والتعقيم للكلاب السائبة ولي انجمو نتبناووهم واكونوا من أوفى الأصدقاء لينا.
L'événement
كان محلاه وان شاء الله نهار نشوفو الكلاب العربي في كل التظاهرات.

14/01/2026

AVIS
Ceux qui veulent adhérer à l'association pour l'année 2026 sont priés de se faire connaître .
Le montant de l'adhésion est de 10d seulement .
Pour ceux qui veulent faire un don merci cela nous permet de sauver des animaux .

12/01/2026

كمالت حكاية البارح
ليوم "من غير اسم " وصلت هي وصغيراتها لدارها الجديدة وتهنيها عليها لا جيران تتهدد ولا بلدية بش تقنص . كل تبني هو خطوة نحو الحياة بعيد على اللاانسانية متع أشخاص انقطعت من قلبها الرحمة ونساو الي كل ما تعتدي على بكمة هي بش تولي عدائية وزيد هذاكة ذنوب بش احاسبك عليهم ربي.
وبعيد زادة على سياسة القنص العشوائية المنتهجة ولي أثبتت عدم نجاعتها .
احنا ما ناش بش نقعدو مربعين ايدينا رغم محدودية الامكانيات والمقر الي موش موجود اما احنا نأمنوا بثقاقة الحياة والرحمة.
بالمناسبة حبيت نشكر حسام وقمر والجيران متاعها الي قعدو يحكيو معانا وفما شكون جابلنا الغلة كي فتنا وقت الفطور والصغيرات الي عاونونا ... الحاجات هاذم تخليك تجنح وتطير وتواصل رغم كل الصعوبات .

11/01/2026

عسلامة يا جماعة ليوم كان عندنا موعد مع قمر الي قررت وأنها تلقى تبني لكلبة وثلاث جراو وتبعدهم على حومتها خاطر فما عباد ولاو يتهددو عليها بش يقتلوهم الحاصل كلمنا شكون وخذينا موعد بش نوصلهم قبل ماذي ثلاثة وفي الأثناء هي تفاهمت مع فاتس باش يعملولها كابتور وترنسبور.
مشينا للبقعة الي قالتلنا عليها هي بطحة كبيرة فيها كلاب وجراو برشة جراو يمكن فوق العشرة والكلبة الي باش نهزوها وهي الي لاهية بيهم مع بعض الجيران وجزء آخر متقلق وحضرنا على عرض متع التقلقات
سبحان الله هي راتنا وهي ولات تتنقل من بقعة لبقعة لا حبت تركح لا حبت تدخل للقفص في لخر ليرجنتيست متع فاتس قرر وانو يستعمل زريقة التخدير الأولى ما ختفتش فيها وضربت كلبة آخرى بعد درج داخت وهي قعدنا ندورو بالكرهبة بش نقمرو فيها وبعد مدة خطفت الزريقة لكن عطات على ساقيها ودخلت نهوجات وهي تجري وقمر وراها وأولاد الحومة اتبعوا .
وصلت الأربعة وولى ما عادش بكري علينا والبقعة الي ماشينلها بعيدة خلينا قمر تحاول تشدها هي ولرجنتيست وتفاهمنا نتواصلو دوب ما اشدوها وبعد ساعة كلمتني وقتلي راهو هي وصغيراتها عند فاتس بش اعديو الليلة وغدوة بش نهزوهم تبني
To be continued لخلاصة التعقيم هو الحل على خاطر يلزم تبقى كلاب في الحومة متاعها بش ما اجيوش كلاب اخرين والكلاب ما عادش تتكاثر اما شكون يفهم
ماغير اسم كلبة واعرة ودكاكة وذكية وأولادها ياسر مزيانين وما يستاهلوش اموتو
تبعو البقية متع حكاية ما غير اسم غدوة

01/01/2026

كل عام ومحبي الحيوانات بالف خير
عام جديد يبدأ وبيه في آخر جانفي نقفلوا عامين على تأسيس الجمعية
في الأول أحلامنا كانت كبيرة برشة لكن للأسف ما غير مقر خدمتنا ولات محدودة ورغم هذا ما قعدناش مربعين ايدينا
لقينا تبني لبرشة كلاب
عملنا حملة تلقيح
شاركنا في برشة تظاهرات بش نعرفو بالجمعية
قمنا بعمليات إنقاذ
كملنا نوكلوا في الكلاب والقطاطس
شاركنا مع منظمات أخرى في حملات تنظيف
قابلنا رئيس،مجلس النواب على مشروع قانون حماية الحيوانات وطلبنا يقع تشريك المجتمع المدني والجمعيات في مناقشته وصياغتو
قابلنا المسؤولين لوضع حد لعمليات القنص
لكن ديما تقعد مشكلة بقعة وين انجموا نعقموا الكلاب ولي البلدية رافضة وأنو توفرهالنا
ال الحاصل عام جديد داخل علينا أن شاء الله يا ربي تكون فيه البكمة في وضعية ما خير وديما معملين عليكم بش تساعدونا وتسندونا
ولي احب اجدد انخراطو او ينخرط في الجمعية يبعث ميساج توة نتصلوا بيه
وبوبو اقلكم عامكم مبروك سعيد