Centro Quesadhip Ruak Timor-leste

20/09/2026

Dili, dia 16 Setembro 2026;
Centro Quesadhip Ruak (CQR) haksolok simu vizita hosi Sr. Yusuke Ito, Sekretáriu-Jerál “Sainokuni Takumi Business Cooperative Association” (agensia Japaun), akompania hosi ekipa SEFOPE.
Objetivu hosi vizita mak atu hasoru estudante kursu lian Japaun no fahe informasaun direitamente ba sira liuliu kona-ba serbisu iha Japaun liuhosi ninia agensia.

Sr. Ito dala uluk mai vizita Timor-Leste hodi halo intervista iha SEFOPE. Nia dehan katak agora ninia agensia oferese uluk serbisu agrikultura nian ba Timor-oan sira, maibe agensia ne’e mos iha serbisu seluk hanesan serbisu konstrusaun nian, serbisu fabrika nian (produs hahan) n.s.t., no aban bainrua iha possibilidade hodi oferese mos serbisu hirak ne’e. Nia mos dehan katak sira iha serbisu ba feto no mane hotu, no iha mos serbisu ba ema idade liu 30.

Hanesan agensia sira seluk, Sr. Ito mos esplika katak xavi importante liu mak abilidade lian Japaun. Tinan oin mai hahu hosi fulan Abril regra Japaun sei muda, no simu de’it traballadores ne’ebe pasa ona teste lian Japaun (JLPT). Nune’e kandidatu sira di’ak liu estuda didi’ak nafatin no tuir teste refere. Sr. Ito mos fo hanoin ba estudante sira oinsa kandidatu sira bele fo impresaun di’ak ba empregador sira iha intervista laran, esplika kona-ba maneira tuur no maneira hatan ba perguntas. Nia mos dehan katak kandidatu sira di’ak liu hatudu oin hamnasa (smile).

Ami agradese tebes tanba Sr. Ito fahe tempu no mai vizita CQR maske okupadu. Obrigada wa’in.

17/09/2026

Centro Quesadhip Ruak Hahu Fali Kursu Inglés Etapa Segundu ho Apoiu GASC

CQR; 17/09/2026 — Centro Quesadhip Ruak (CQR) ofisialmente hahu fali klase ba etapa segundu ba Kursu Inglés, ne'ebé hetan apoiu finanseiru husi GASC Gabinete de Apoio à Sociedade Civil - GASC IX Governo

Programa ne'e kontinua sai hanesa n dalan di'ak ida hodi ajuda joven no komunidade sira dezenvolve abilidade komunikasaun nian, liuliu iha lian internasional.
Kursu ne'ebé sei la'o ho durasaun fulan tolu (3) nia laran ne'e hetan partisipasaun ne'ebé di'ak husi estudante sira. Atu asigura kualidade ensinu no fasilidade ne'ebé di'ak, partisipante sira fahe ba klase rua, ne'ebé mak fahe ba klase dader no klase lokraik.

Ho implementasaun etapa segundu ne'e, CQR espera katak estudante sira bele aproveita tempu fulan tolu nia laran ne'e ho maximu, hodi domina liután lian Inglés ne'ebé sai mós kbiit no esensiál ida iha mundu globalizasaun no merkadu traballu ohin loron nian.

17/09/2026

Tarde Publika

Kursu Komputador etapa II/2026
CQR; 07/09/2026, Centro Quesadhip Ruak (CQR) ofisialmente hahu fali klase ba etapa segundu ba Kursu Komputadór, ne'ebé hetan apoiu finanseiru husi GASC Gabinete de Apoio à Sociedade Civil - GASC IX Governo

Programa ne'e kontinua sai hanesan oportunidade importante ida ba komunidade no joven sira atu asesu ba matenek teknolojia no informátika.
Iha etapa segundu ne'e, totál estudante hamutuk na'in 40 mak partisipante hodi tuir formasaun ne'e.
Atu garante kualidade aprendizajen no fasilidade sufisiente, estudante sira fahe ba klase rua: na'in 20 tuir klase dader nian no na'in 20 fali tuir klase lokraik nian.
Ho hahu fali klase ne'e, CQR espera katak partisipante sira hotu bele aproveita di'ak oportunidade ne'e ho dedikasaun to'o remata hodi bele eleva sira-nia kapasidade rasik iha área teknolojia.

16/09/2026

Centro Quesadhip Ruak Simu Vizita Eis-Embaixadór Japaun no OISCA, Destaka Parceria ba Foin-Sa'e Timor-Leste

DÍLI ; 14/09/2026, Centro Quesadhip Ruak (CQR) simu ho laran-haksolok vizita espesiál husi eis-Embaixadór Japaun no mós Na'in ba Asosiasaun Nippon Lorosae, Sr. Iwao Kitahara, hamutuk ho Diretór OISCA no ekipa.

Vizita ne'e sai momentu importante atu hametin liután parseria ne'ebé fó ona rezultadu konkretu.
Hahú husi 2022 to'o 2026, estudante na'in 5 husi CQR konsege ba tuir ona formasaun agricultura no lian Japaun iha OISCA, Japaun. No iha planu ba tinan 2027, estudante ida tan sei aranka hodi tuir formasaun agrikultura nian durante tinan ida.
Kona-ba Kolaborasaun:
OISCA (Organization for Industrial, Spiritual and Cultural Advancement) mak ONG Japaun nian ne'ebé apoiu formasaun prátika, agrikultura organika, no lideransa foin-sa'e.

Asosiasaun Nippon Lorosae, liuhusi Sr. Iwao Kitahara, kontinua sai papel importante hodi hametin relasaun amizade metin entre Japaun no Timor-Leste.

Vizita ne'e remata ho interasaun no inspiradora entre parseiru internasionál sira no estudante CQR sira.
Atividade ne'e hetan prezensa husi Fundadór CQR, Prezidente Konsellu Administrasaun CQR, Direitor OISCA, manorin lian Japaun sira no estudante lian-Japaun sira.

08/09/2026

Ola belun sira !
Kursu Lian Ingles sei kontinua simu estudante foun

07/09/2026

Dili, 06 Agostu 2026 — Centro Quesadhip Ruak ho kontente fó sai katak sira-nia membru na’in tolu simu ona oportunidade hodi kontinua estudu no servisu iha Korea Sul.
Estudante lian Korea na’in tolu ne'ebé kompostu husi feto rua no mane ida, ho naran 𝑴𝒂𝒓𝒈𝒂𝒓𝒊𝒅𝒂 𝑴𝒂𝒊𝒂 𝑮𝒐𝒏𝒄̧𝒂𝒍𝒗𝒆𝒔, 𝑨𝒎𝒂̀𝒍𝒊𝒂 𝑺𝒐𝒂𝒓𝒆𝒔, 𝒏𝒐 𝑴𝒐𝒊𝒔𝒆𝒔 𝑫𝒐𝒔 𝒔𝒂𝒏𝒕𝒐𝒔, desloka ba Korea Sul hodi tuir programa estudu iha nível universitáriu. Sira na’in tolu sei utiliza Viza D-2, ne’ebé mak viza espesífiku ba estudante estranjeiru sira ne’ebé hakarak foti grau akadémiku iha universidade sira iha Korea Sul.
Tuir planu, estudante na’in tolu ne'e sei hela iha Korea durante tinan haat (4) hodi finaliza sira-nia estudu iha Changshin University, ne’ebe lokaliza iha provínsia Busan. Alende foka ba aspetu akadémiku, Viza D-2 ne’e mós fó oportunidade ba sira hodi bele halo servisu part-time (tempu balu) hodi apoia sira-nia moris lor-loron no aumenta esperiénsia servisu iha ne’ebá.
Reprezentante husi Centro Quesadhip Ruak hateten katak susesu ne’e sai hanesan motivasaun boot ba estudante sira seluk ne’ebé agora daudaun aprende hela lian Korea iha Centro Quesadhip Ruak. Ne'e prova katak ho dedikasaun no esforsu, dalan ba futuru iha nasaun dezenvolvidu ida nakloke luan.
Iha sorin seluk, estudante sira mós hato'o sira-nia gratidaun no promete katak sei uza oportunidade furak ne’e ho di'ak hodi bele fila mai fali ho koñesimentu ne’ebé kle’an liután, nune’e bele kontribui ba dezenvolvimentu rai-doben Timor-Leste. Nu'udar ezemplu, liuliu ba feto maluk sira, hatudu katak mehi atu eskola iha estranjeiru bele sai duni realidade se iha determinasaun.
Sira na'in tolu hein katak liuhusi programa ne'e, relasaun di'ak entre Timor-Leste no instituisaun sira iha Korea Sul sei kontinua metin liután iha futuru.

Boa sorte ba sira iha estudu no aproveita oportunidade ne'e ho susesu!

Kursu lian Korea CQR hetan apoio husi Gabinete de Apoio à Sociedade Civil - GASC IX Governo

01/09/2026

Hametin Amizade: Estudante Lian Japaun no Voluntariu JICA Foun hala’o Intercambiu iha CQR

Dili, 29 Agostu 2026 — Estudante kursu lian Japaun husi Centro Quesadhip Ruak (CQR) hala’o interkambiu ho voluntariu JICA foun sira iha Fundasaun Centro Quesadhip Ruak, Taibesi.
Voluntariu JICA foun hamutuk na’in ualu ne’ebé to’o iha Timor-Leste iha loron 5 fulan-Agostu, sei destaka ba organizasaun oioin iha Dili, Aileu, Baukau, no Maliana. Sira sei apoiu atividade iha área edukasaun, saúde, dezenvolvimentu komunitáriu, no juventude. Antes hahú sira-nia knar, sira estuda hela lian Tetun durante fulan ida nia laran.
Iha eventu ne’e, voluntariu foun sira aprezenta-an ho lian Tetun hodi nune’e estudante sira koñese sira di'ak liu. Enkuantu estudante CQR aprezenta-an ho lian Japaun, no hala'o mós knar nu'udar MC (mestre serimónia), esplika kona-ba Tais, organiza jogu no dansa tebe-tebe, no hato'o liafuan badak sira hotu uza lian Japaun.
Momentu importante ida mak bainhira estudante sira fó hatais Tais (husi munisipíu Bobonaro) ba representante voluntariu na’in rua, no esplika kona-ba signifikadu no utilizasaun Tais iha eventu importante sira.
Iha sorin seluk, representante estudante na’in haat mós koko hatais Yukata no Happi (roupa tradisionals Japaun nian). Estudante sira kontente tebes tanba hetan oportunidade atu tenta roupa tradisional Japaun no konhese di’ak liután significadu no kultura Japaun nian. Sira hotu haksolok liu husi atividade kanta hamutuk, tebe-tebe, no halimar jogu hamutuk.
Iha rohan, representante estudante, Tonivio, hato’o agradese ba voluntariu JICA foun sira-nia dedikasaun no amizade. Nia dehan, “Ami-nia deseju mak partisipante sira aprende buat barak iha loron ohin no aumenta tan motivasaun atu esforsu estuda lian Japaun no lian Tetun.”
Representante husi voluntariu JICA mós hateten katak sira haksolok tebes no enkoraja estudante sira atu kontinua estuda lian Japaun hodi bele hatene kle'an liután kona-ba Japaun.

30/08/2026

Hafoun espíritu 30 de Agostu!
Ita hanoin hikas povu nia aten-brani hodi simu independénsia, no mai ita la'o hamutuk ba oin ho dame no progresu

27/08/2026

27/08/2026

Ekipa KOICA Realiza Vizita Monitorizasaun no Avaliasaun ba Atividade Voluntáriu iha Centro Quesadhip Ruak

DÍLI; 27/08/2026, Centro Quesadhip Ruak (CQR) simu vizita importante ida husi ekipa Agénsia Kooperasaun Internasionál Korea (KOICA) hodi avalia direta progresu no servisu husi voluntáriu ne'ebé hala'o hela knaar iha CQR.

Delegasaun KOICA ne'ebé vizita CQR mak hanesan Coordenador Programa, Francisco Alves, Program Manager, Mikyung Shin, no Country Director, Youn Hwa Kang. Enkontru ne'e mós hetan prezensa husi Prezidente Konsellu Administrasaun CQR, Leonildo Tomas da Costa, hamutuk ho Voluntáriu KOICA, Mr. Shin Jiksoo.

Objetivu prinsipál husi vizita ne'e mak atu hare fila fali atividade sira ne'ebé voluntáriu KOICA halo ona iha CQR nia laran, avalia nivel suporta husi instituisaun nian ba voluntáriu nia servisu, no rona direta fali feedback, komentáriu, ka kualkér dezafius no nesesidade suporta seluk husi parte direksaun no CQR.
Liuhusi diskusaun ne'e, parte rua bele haree di'ak liu tan oinsa atu hamenus dezafius sira no haforsa tan kooperasaun iha futuru hodi garante programa treinamentu no formasaun sira iha CQR la'o ho susesu liu tan.