Core Group Transparency, Dili (2026)

11/11/2024

VAGA servisu ho posizaun Media Officer no Komunikasaun (1) ba Core Group Transparency Timor-Leste (CGT-TL)

A. KONTESTU

Core Group Transparency (CGT), nu’udar rede koligasaun Sosiedade Sivil ida ne’ebé harii ho objektivu atu tau matan ba politika publikas, liu husi prosesu Rendimentu, Orsamentu Estadu, to’o iha despeza hodi bele lao tuir mekanismu ne’ebé iha. Timor-Leste nudar nasaun mais joven maibé louva ho nia prinsipiu hodi kontinua luta ba asuntu transparansia, ita bele hare’e husi nia envolvimentu nudar membru ba Ekstrativa Industria Transparensia Internasional (EITI), nudar nasaun terseiru mundu ba asuntu transparensia liu husi rendimentu mina no gas.
Orsamentu Geral do Estadu, asuntu ida ne’ebé importante mos ba Core Group Transparency hodi tau matan, atu nune’e Orsamentu Estado bele lao tuir nia dalan no liu husi despeza kada tinan bele fo benefisia ba povu hodi hetan prosperidade, hanesan iha objetivu prinsipal husi Fundu Minarai, atu fo benefisia ba jerasaun ohin no iha futuru, atu garantia prosesu hirak ne’e, alende Core Group Transparency no nia membru mak akonpanha no monitoriza, Core Group Transparency sei sai mos hanesan ponte entre komunidade no haforsa komunidade liu husi formasaun hodi komunidade partisipa direta iha prosesu dezenvolvimentu hodi kontinua promove transparensia, akuntabilidade no boa gevernasaun iha Timor-Leste. Nune’e CGT mós nu’udar Sekretariadu Nasional Publish What You Pay (PWYP) Timor-Leste.

B. KNAAR NO RESPONSABILIDADE

1. Iha nia kompotensia tomak, Official Media no Komunikasaun sei responsabiliza direita ba Koordenadór Core Group Transparency (CGT) Timor-Leste.
2. Offisial Media no Komunikasaun tulun servisu Core Group Transparency (CGT), nian ne’ebé prevé ona iha proposta aprovadu CGT nian ho parseiru
3. Offisial Media no Komunikasaun nia knar mak responsabiliza atu halo dokumentasaun husi atividade hotu-hotu CGT nian no públika informasaun husi atividade no programa CGT ba públiku, liu husi media emprimi no eletroniku
4. Garante públikasaun atividade hotu CGT nian iha media social (FB, Block Spot no Website) CGT nian iha lian tetun, portuguesa no ingles
5. Responsabilidade ba produsaun News Letter CGT nian (Lian Transperensia)
6. Responsavel ba kompilla dokumentu atividade CGT nian hodi haruka ba PWYP Internasional hodi públika iha news Letter PWYP Internasional nian bainhira sira husu
7. Organiza no modera programa iha Media TV (TVTL, GMN no Seluk tan.
8. Halo lobby ho Parlamentu no Governu, Sociedade Sivil, atu partisipa iha programa media CGT.
9. Halo koordenasaun servisu ho media sira hotu (Nasional no Internasional) hodi halo kobertura ba atividade CGT nian
10. Halo relatoriu seminal, mensal, no produz livru (kuandu nesesita) kona ba atividade CGT nian.
11. Hala’o knar seluk wainhira Organizasaun CGT presiza.

C. KRITERIA SELESAUN

1. Ema Sidadaun Timor Oan Mane no Feto (enkoraza liu ba feto) lisensiatura ekuivalensia iha Komunikasaun Sosial.
2. Minimu iha esperensia servisu durante tinan 2 iha Instituisaun Governu ka Instituisaun Media sira iha Timor-Leste.
3. Iha esperiensia hakerek notisia no kobertura atividade CGT
4. Iha esperiensia halo servisu kampaña liu husi media sosial, hakerek pareser, minutas enkontru, komunikadu imprensa, nsst…
5. Iha kuiñesimentu diak kona ba uza programa hotu iha komputadór, meius komunikasaun hotu hanesan, internet, website, page, no searching google, tools, google drive no nsst…
6. Iha abilidade koalia no hakerek (konseptu) abilidade komunikasaun, bele koalia no hakerek diak iha lian Tetun, Ingles, Indonesia no Portuguesa.

D. OINSA ATU APLIKA

Se ita-boot iha interese, halo favor haruka dokumentus sira, hanesan tuir mai ne’e:
1. Karta aplikasaun dirije ba Sr. Jemicarter Moniz dos Reis, Koordenadór Nasional CGT-Timor-Leste
2. Curriculum Vitae (CV), labele liu pajina tolu (3), referensia minimu ema nain rua (2) anexu ho dokuemntus komprovativu.
3. Tempu submete dokumentus hahu loron Segunda 11 /11/2024 to’o Sexta 15/11/2024
4. Aplikante ne’ebé tama short list, mak sei hetan kontaktu husi ekipa selesaun CGT-Timor-Leste hodi kontinua ba teste intervista.
5. Ami enkoraja maluk feto sira atu aplika
6. Dokumentu bele submete mai iha Sekretariadu CGT, Rua Campaun Caicoli Dili Timor-Leste.

E. DIRESAUN KONTAKTU

Asuntu konfirmasaun, favor liga ba CGT-TL:
1. Sra. Mariquita Soares ( Finanasas CGT-TL) +67078068883
2. Sra. Merita D. dos Santos de Deus ( Administrasaun CGT-TL) +67077418622

07/10/2024

Core Group Transparency (CGT) – Membru Publish What You Pay (PWYP) iha Timor-Leste, nudar rede servisu ba asuntu transparensia no akuntabilidade sosial, servisu hamutuk ho Oxfam TL, ADTL, RHTO no Grupu Promotor ba Progarama Open the Book (OtB)

OtB hanesan projetu ida husi pilar justisa ekonomia hodi foka ba orsamentu inklusivu ne’ebe servisu hamutuk ho parseiru sira hodi halo advokasia no influensia ba guvernu, parlamentu nasional hodi nune’e bele integra direitu EhD iha programa Orsamentu Jeral Estadu (OJE).

Semana kotuk, OtB hala’o espasu dialogue ho Membru Guvernu IX Konstituisiaonal liu liu ministeriu relelavantes sira hanesan Ministeriu Solidaridade Sosial no Inklusivu (MSSI), Ministeriu Edukasaun (ME), Ministeriu Transporte no Komunikasaun (MTK) no Sekretariu Estadu ba Igualidade no Inkluzaun (SEI).

Espasu dialogu ne’e ho tema “Espasu Dialogu Inkluzivu entre Sosiedade Sivil ho Guvernu (Ministeriu relevantes (MSSI, ME, MTK no SEI) kona ba Programa no Orsamentu Jeral Estadu (OJE) 2025 ne’ebe Inklusivu ba Direitu Ema ho Defisiensia iha IX Guvernu Konstitusional.”

Orador ba Espasu dialogu ne’e mak Pontu Fokal husi SEI, Napoleão de A, Diretor DMEIASE Fernando Santos husi ME, Xeve Almerindo Martins husi MSSI, no Ambasador ba EhD. Marcal Pinto husi MTK.

Iha Espasu dialogu ne’e, Ambasador ba EhD, Sr Marcal Pinto hatete katak oras ne’e MTK estabelese ona rampa 4, toilet nomos projetu asesivel seluk ne’ebe instala iha MSSI, ADTL, Palasiu Guvernu nian oin, Organizasaun Ahisaun nomos ministeriu balun.

Tuir koodenador OtB, Sabino Fitun hatete katak Ministeriu balun hanesan ME no MTK komesa aloka ona orsamentu ba EhD iha sira nia programa nomos tinan hirak liu ba ADTL hetan konvite hodi partisipa no diskute iha parorama orsamentu jeral maibe Ministeriu 3 mak sei tau osan kiik liu ba asuntu EhD mak MOP, Ministeriu Justisa no Saude, no iha espasu dialogu tuir mai sira tenke mai esplika iha ne’e.

Espasu dialogu ne’e hetan apoiu finanseiru husi Oxfam Timor-Leste, ne’ebe hetan partisipasaun hamutuk ema nain 40 husi feto 20 no mane 20.

Espasau dialogu ne’e hala’o iha salaun Yayasan HAK, Farol, Dili, Timor-Leste iha Tersa Feira (04/10/2024).

23/09/2024

Core Group Transparensia (CGT) – Membru Publish What Your Pay (PWYP) iha Timor Leste, núdar rede servisu ba asuntu transparensia no akuntabilidade social, servisu hamutuk ho Oxfam TL, ADTL, RHTO no Grupu Promotor ba Programa Open the Book (OtB)

OtB hanesan projetu ida husi pilar justisa ekonomia hodi foka ba orsamentu inklusivu ne’ebe servisu hamutuk ho parseiru sira hodi halo advokasia atu fo influensia ba guvernu, parlamentu nasional hodi nune’e bele integra direitu EhD iha programa OJE nian.

Semana kotuk OtB hala’o refreshing training/formasaun refreskamente ba membru no parseiru estratejiku sira kona ba monitorizasaun, analiza no advokasia ba Orsamentu Jeral Estadu (OJE). Atividade ne’e fasilita husi Koodenador Open the Book CGT, Sabino Gusmao Fitun ho materia espesifiku mak hanesan Formasaun Refreskamente kona ba Monitorizasaun, Analiza no Advokasia ba OJE no Oinsa Hakerek Submisaun ba Orgaun Estadu sira Inklui mos Siklu OJE.

Formasaun refereskante ne’e, atu fo hanoin hikas membru no parseiru estratejiku sira kona ba prosesu no mekanizmu politika OJE no politika dezenvolvimentu iha Timor Leste. Liu husi atividade ne’e, membru no parseiru estratejiku sira, defini ona estratejia kona ba partisipasaun sosiedade sivil nian iha prosesu politika OJE no politika dezenvolvimentu, núdar parseiru ba governu hodi apoiu desempeñu no prestasaun servisu husi orgaun estadu nian, liu-liu governu hodi fo etendementu servisu ne’ebé diak liu ba sidadaun sira hotu ho politika ne’ebé iha transparensia no akuntabilidade sosial, hodi fo benefisiu ba ema hotu liu-liu ba grupu minoria sira hanesan ema ho defisiensia.

Formasaun refereskante ne’e hetan apoiu finanseiru husi OXFAM Timor-Leste, ne’ebé hetan partisipasaun hamutuk ema na’in 27 husi Feto 15 Mane 12

Formasaun refreskamente ne’e hala’o iha Salaun Yayasan HAK, Farol, Dili, Timor-Leste iha Sesta Feira (20/09/2024)

22/08/2024

Core Group Transparency Timor-Leste (CGT-TL) hala'o enkontru ho Koodenadora Extractive Industry Transparency Initiative Timor-Leste (EITI-TL), Sra. Emilia dos Santos de Jesus hodi ko'alia kona ba kooperasaun servisu entre CGT-TL ho EITI-TL ba tempu ohin no ba futuru.

Asuntu importante ne'ebe parte rua sita iha enkotru ne'e maka:
1. Transparensia no akuntabilidade sosial ba industria estrativa iha TL.
2. Atu haree no tau matan ba atividade industria, inklui lukru husi industria estrativa ne'e rasik.
3. Atu planeia formasaun no kapasitasaun ba Sosiedade Sivil kona ba estandarizasaun EITI iha Timor-Leste

Enkotru ne'e hala'o horseik, Kuartu-Feira (21/08/2024) iha Palm Business and Trade Center, Hudi Laran, Dili, Timor-Leste.

Endereço

Dili

Telefone

+67077405488

Website

http://www.cgt-pwyp-tl.org/

Notificações

Seja o primeiro a receber as novidades e deixe-nos enviar-lhe um email quando Core Group Transparency publica notícias e promoções. O seu endereço de email não será utilizado para qualquer outro propósito, e pode cancelar a subscrição a qualquer momento.

Core Group Transparency