Бахши кор бо ҷавонон ва варзиши н. Шоҳмансури ш. Душанбе

28/05/2026

28/05/2026

28/05/2026

28 МАЙ - РӮЗИ ҚӮШУНҲОИ САРҲАДӢ

28/05/2026

#ШОҲМАНСУР: ВОХӮРӢ БАХШИДА БА РӮЗИ ТАЪСИСЁБИИ ҚӮШУНҲОИ САРҲАДӢ

Ба муносибати Рӯзи таъсисёбии Қӯшунҳои сарҳадии Кумитаи давлатии амнияти миллии Ҷумҳурии Тоҷикистон дар қисми ҳарбии №0125 вохӯрӣ ва мусобиқаҳои варзишӣ баргузор гардид.

Дар вохӯрӣ намояндаи Кумитаи кор бо ҷавонон ва варзиши назди Ҳукумати Ҷумҳурии Тоҷикистон, масъулини бахши кор бо ҷавонон ва варзиши ноҳияи Шоҳмансур, инчунин афсарону сарбозон иштирок намуда, оид ба нақши муҳими Қӯшунҳои сарҳадӣ дар ҳифзи марзу буми кишвар ва таҳкими ҳисси ватандӯстии ҷавонон ибрози назар карданд.

Ҳамзамон байни афсарону сарбозон мусобиқаҳои варзишӣ баргузор гардида, иштирокчиён маҳорати ҷисмонӣ ва омодагии ҳарбии худро нишон доданд.

Дар анҷом ба ғолибони мусобиқаҳо ва як қатор хизматчиёни фаъол сипоснома ва туҳфаҳои хотиравӣ тақдим карда шуд.

27/05/2026

Паёми шодбошии Раиси ноҳияи Шоҳмансури шаҳри Душанбе Олимзода Сафар Маҳмадшо ба муносибати иди Қурбон

Муҳтарам сокинон ва меҳмонони ноҳияи Шоҳмансур!
Ҳамшаҳриёни азиз!
​Аз номи Мақомоти иҷроияи ҳокимияти давлатии ноҳияи Шоҳмансури шаҳри Душанбе ва шахсан аз номи худам, тамоми шумо ва дар симои шумо кулли мардуми шарифи Тоҷикистонро ба муносибати Иди саиди Қурбон — иди покиву озодагӣ, хайру саховат ва ҳамбастагию бародарӣ самимона табрику таҳният мегӯям.
​Иди Қурбон яке аз суннатҳои муқаддаси ниёгон ва арзишҳои волои фарҳангии мо буда, инсонҳоро ба сӯи ваҳдату ҳамдилӣ, бахшишу меҳрубонӣ ва дастгирии якдигар ҳидоят менамояд. Ин айёми шариф ба мо таъкид мекунад, ки нисбат ба ятимону маъюбон, ниёзимандону камбизоатон ва калонсолон бештар таваҷҷуҳ зоҳир намуда, бо амалҳои хайру саховатмандонаи худ хотири онҳоро шод гардонем.
​Тавре ки Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Раиси шаҳри Душанбе муҳтарам Рустами Эмомалӣ доимо таъкид менамоянд, ки мо бояд дар ин рӯзҳои муборак аз исрофкорӣ ва худнамоӣ худдорӣ карда, бештар ободии диёр, таълиму тарбияи фарзандон ва кумаки воқеӣ ба эҳтиёҷмандон дошта бошем.
​Дар ин рӯзи саид ба шумо, ба ҳар як хонадони шумо сулҳу осоиш, файзу баракат ва саломатии бардавом хоҳонам.
​Бигзор дар кишвари маҳбубамон — Тоҷикистон ҳамеша сулҳу ваҳдат ва пешрафту шукуфоӣ пойдор бошад.
Барои рушду ободии пойтахти азизамон — шаҳри Душанбе ва ноҳияи Шоҳмансур ба ҳар кадоми шумо неруву илҳоми нав хоҳонам.
​Иди саиди Қурбон ба тамоми хонадони шумо муборак ва хуҷаста бод, ҳамшаҳриёни азиз!

27/05/2026

ПАЁМИ ШОДБОШИИ РАИСИ МАҶЛИСИ МИЛЛИИ МАҶЛИСИ ОЛИИ ҶУМҲУРИИ ТОҶИКИСТОН, РАИСИ ШАҲРИ ДУШАНБЕ МУҲТАРАМ РУСТАМИ ЭМОМАЛӢ БА МУНОСИБАТИ ИДИ ҚУРБОН

Ҳамдиёрони азиз!
Сокинони муҳтарами пойтахт,
Бо эҳтирому самимият фарорасии Иди Қурбонро, ки аз ҷумлаи арзишмандтарин суннатҳои маънавию фарҳангии миллати тоҷик ба шумор меравад, ба ҳамаи шумоён табрик менамоям.
Иди Қурбон таҷассумгари фазилатҳои инсонӣ, аз қабили меҳру шафқат, ҳамдигарфаҳмӣ, саховатмандӣ ва арҷгузорӣ ба арзишҳои ахлоқиву маънавӣ мебошад.
Моҳияти асилу инсонпарваронаи ин иди саид мардумро ба ваҳдату ҳамбастагӣ, эҳтироми якдигар ва дастгирии табақаҳои ниёзманди ҷомеа ҳидоят менамояд.
Дар баробари иҷрои суннатҳои ин айёми муборак, кумаку дастгирии ятимону бепарасторон, шахсони имконияташон маҳдуд, беморон, оилаҳои камбизоат ва дигар амалҳои хайрхоҳона аз анъанаҳои деринаи мардуми мо ба ҳисоб меравад.
Итминони комил дорам, ки сокинони мамлакат дар доираи таҷлили бошукӯҳи 35-солагии Истиқлоли давлатӣ ва Соли вусъат додани корҳои ободониву созандагӣ ва тақвияту таҳкими худшиносиву худогоҳии миллӣ софдилона заҳмат кашида, барои боз ҳам ободу пешрафта гардонидани кишвари маҳбубамон саҳми арзишманди худро мегузоранд.
Бо истифода аз ин фурсати муносиб кулли мардуми кишвар ва ҳамватанони бурунмарзиро ба муносибати Иди саиди Қурбон самимона муборакбод гуфта, ба ҳар як хонадон фазои сулҳу оромӣ, хайру баракат ва ба Ватани азизамон пешрафту шукуфоии рӯзафзунро орзумандам.
Иди Қурбон муборак, ҳамдиёрони гиромӣ!

26/05/2026

ҶОИЗАИ БАЙНАЛМИЛАЛИИ АБӮАЛӢ ИБНИ СИНО - ҚАДАМИ ТАЪРИХӢ.

​Абӯалӣ ибни Сино (980–1037) яке аз бузургтарин донишмандон ва пизишкони таърихи башарият аст, ки бо тадқиқот ва асарҳои худ тамаддуни ҷаҳониро такон додааст. Нақши ӯ дар тибби муосир то ҳол бориз ва беназир арзёбӣ мешавад.
​«Қонуни тиб» (Ал-Қонун фи-т-тиб)
Ин асар барои чандин асрҳо (аз асри XII то XVII) китоби аввалиндараҷаи таълимӣ дар донишгоҳҳои Аврупо (ба монанди Монпелйе ва Лувен) маҳсуб меёфт. Сино дар ин китоб тамоми донишҳои тиббии замони худро низомнок ва ҷамъбаст кард.
Ибни Сино аввалин шуда табиати сироятии баъзе бемориҳо (ба мисли обила ва сурхча)-ро муайян кард, нақши об ва хокро дар паҳншавии сироятҳо нишон дод ва асосҳои аввалини карантинро гузошт.
Ӯ робитаи зичи байни саломатии рӯҳӣ ва ҷисмониро кашф кард ва дар ҷарроҳӣ аз маводҳои мадҳушкунанда (анестезия) ва таскинбахш васеъ истифода мебурд.

​Фармони Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон аз 23-юми майи соли 2026 дар бораи таъсиси Ҷоизаи байналмилалии Абӯалӣ ибни Сино як рӯйдоди бузурги фарҳангӣ ва илмӣ дар таърихи муосири кишвар ба шумор меравад.

Ин ташаббус на танҳо барои эҳё ва арҷгузорӣ ба мероси бузурги ниёгон, балки барои муаррифии Тоҷикистон ҳамчун маркази тамаддун ва илму маърифат дар сатҳи ҷаҳонӣ хизмат мекунад.

​ Ҷоиза ба олимон, табибон ва тадқиқотчиёни барҷастаи ватанӣ ва байналмилалӣ, ки дар соҳаи тиб ва фармакология кашфиёти нав мекунанд, супорида мешавад.
​Ин ҷоиза робитаҳои илмии Тоҷикистонро бо марказҳои бузурги тиббии ҷаҳон мустаҳкам менамояд.
Таъсиси ин ҷоиза нишон медиҳад, ки Тоҷикистон анъанаҳои гаронбаҳои тиббии Синоро ҳифз намуда, ба рушди инноватсияҳои муосири тиббӣ такон мебахшад.

Хулоса:
​Ин иқдоми Пешвои миллат муҳтарам Эмомалӣ Раҳмон бори дигар собит месозад, ки мероси Ибни Сино моликияти умумибашарист ва Тоҷикистон парчамдори ин ганҷинаи илмӣ боқӣ мемонад.

Халилзода Суҳроб Аҳмад - омӯзгорӣ муассисаи таҳсилоти миёнаи умумии №100-и ноҳияи Шоҳмансури шаҳри Душанбе.

26/05/2026

ҶОИЗАИ БАЙНАЛМИЛАЛИИ АБӮАЛӢ ИБНИ СИНО - АҲАМИЯТ ВА МАҚСАД

Иқдоми нави Президенти Ҷумҳурии Тоҷикистон, муҳтарам Эмомалӣ Раҳмон, дар бораи таъсиси Ҷоизаи байналмилалии Ибни Сино дар соҳаи тиб аз 23-юми майи соли 2026, як қадами таърихӣ ва боиси ифтихори миллӣ аст. Ин ташаббус на танҳо барои қадрдонии заҳматҳои олимони муосир, балки барои зиндаву ҷовид нигоҳ доштани мероси бузурги фарзанди фарзонаи халқи тоҷик — Абуалӣ ибни Сино хидмат мекунад.
Таъсиси ин ҷоиза дар соли 2026 нишонаи таваҷҷуҳи олии давлат ба рушди илми тиб ва эҳтиром ба таърихи бойи фарҳангии мост.
Ин мақом имкон медиҳад, ки Тоҷикистон ба як маркази муҳими илмӣ табдил ёфта, олимон, пизишкон ва пажӯҳишгарони шинохтаи ҷаҳонро барои кашфиётҳои нав дар соҳаи тиб қадрдонӣ кунад.
Ҷоиза ҳамчун ангезае барои табибони ҷавони тоҷик хизмат мекунад, то дар роҳи илм устувор бошанд ва номи Синои бузургро дар асри XXI баланд бардоранд.
Абӯалӣ Ибни Сино (Ависенна) дар тамоми ҷаҳон ҳамчун "Шоҳи табибон" маъруф аст. Ин ҷоиза бренди илмию фарҳангии Тоҷикистонро дар сатҳи ҷаҳонӣ боз ҳам қавитар мегардонад.
Абуалӣ ибни Сино (980–1037) на танҳо як табиб, балки реформатори илми тибби ҷаҳонӣ буд. Асарҳои усулии у тиббро аз як ҳунари оддӣ ба як илми дақиқи баррасӣ ва таҷрибавӣ табдил доданд.
1. Китоби "Қонуни илми тиб" (Ал-Қонун фи-т-тиб)
Ин асар зиёда аз 600 сол ҳамчун китоби аввалиндараҷаи дарсии тиббӣ дар тамоми донишгоҳҳои Аврупо (зери номи The Canon of Medicine) ва Шарқ хизмат кардааст. Китоб панҷ қисмро дар бар мегирад:
Назарияи тиб ва анатомияи бадани инсон.
Доруҳои оддӣ (гиёҳшиносӣ ва фармакология).
Бемориҳои узвҳои алоҳида (аз сар то по).
Бемориҳои умумӣ (табларза, омосҳо) ва ҷарроҳӣ.
Доруҳои мураккаб (рецептҳо).
Ибни Сино асрҳо аз илми замони худ пеш гузашта буд.
Интиқоли бемориҳо тавассути обу хок. Ӯ аввалин шуда пай бурд, ки бемориҳои сироятӣ (мисли вабо ва тоун) тавассути мавҷудоти хеле хурди ноаён (микроорганизмҳо), ки дар обу ҳаво ҳастанд, паҳн мешаванд.
Сино усули ҷудокунии беморонро (изолятсия) барои пешгирии паҳншавии сироятҳо асос гузошт, ки имрӯз ҳам асоси мубориза бо пандемияҳост.
Ӯ алоқамандии зичи байни саломатии рӯҳӣ (эҳсосот, стресс) ва бемориҳои ҷисмониро исбот кард.
Сино сохтори чашм ва мушакҳои онро бо дақиқии зиёд тасвир намуда, усулҳои ҷарроҳии оби чашмро (катаракта) пешниҳод кард.
Барои кам кардани дарди беморон ҳангоми ҷарроҳӣ, ӯ истифодаи афюн ва дигар гиёҳҳои мадҳушкунандаро ҷорӣ намуд.
Мероси Сино ва Тоҷикистони Муосир
Имрӯз дар Тоҷикистон номи Ибни Сино бо ифтихори бузург гирифта мешавад. Донишгоҳи давлатии тиббии Тоҷикистон, шаҳракҳо, кӯчаҳо ва созмонҳои тиббӣ номи ӯро доранд.
Хулоса:
Фармони Президенти мамлакат дар бораи таъсиси ин Ҷоизаи байналмилалӣ дар соли 2026, адолати таърихиро бори дигар барқарор мекунад: Тоҷикистон ҳамчун ватани Сино, маркази эътирофи хизматҳои бузурги табибони ҷаҳон мегардад. Ин иқдом пулҳои нави илмиро байни Тоҷикистон ва ҷомеаи ҷаҳонии тиббӣ эҷод хоҳад кард.

Исматулоева Холнисо - муовини директор оид ба корҳои таълиму тарбия дар муассисаи таҳсилоти миёнаи умумии №100-и ноҳияи Шоҳмансури шаҳри Душанбе.

26/05/2026

#ШОҲМАНСУР: АЁДАТИ ҶАВОНОНИ ИМКОНИЯТАШОН МАҲДУД ВА ШАХСОНИ АЗ ҶАНГ БАРГАШТА ДАР ДОИРАИ МОҲВОРАИ ҶАВОНОН

Дар доираи Моҳвораи ҷавонон ва нақшаи чорабиниҳои Мақомоти иҷроияи ҳокимияти давлатии ноҳияи Шоҳмансури шаҳри Душанбе ва Кумитаи кор бо ҷавонон ва варзиши назди Ҳукумати Ҷумҳурии Тоҷикистон аз ҷониби Бахши кор бо ҷавонон ва варзиши ноҳияи Шоҳмансур аёдати ҷавонони имконияташон маҳдуд ва шахсони аз ҷанг баргашта баргузор гардид.

Зимни аёдат масъулин аз ҳолу аҳволи онҳо бохабар гардида, иброз намуданд, ки дастгирии қишрҳои ниёзманди ҷомеа, бахусус ҷавонони имконияташон маҳдуд ва шахсони аз ҷанг баргашта, ҳамеша дар меҳвари сиёсати иҷтимоии давлату Ҳукумат қарор дорад.

Ҳамчунин ба аёдатшудагон кумакҳои моддӣ расонида шуда, ба онҳо саломатии бардавом, руҳияи қавӣ ва рӯзгори осуда таманно карда шуд.

26/05/2026

#Шоҳмансур: Ҷамъбасти мусобиқаи варзиши оид ба волейбол миёни донишҷӯ духтарон барои дарёфти Ҷоми Раиси ноҳияи Шоҳмансури шаҳри Душанбе бахшида Рӯзи ҷавонони Тоҷикистон

Дар доираи Нақша-чорабиниҳои Мақомоти иҷроияи ҳокимияти давлатии ноҳияи Шоҳмансури шаҳри Душанбе, Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Раёсати кор бо ҷавонон ва варзиши шаҳри Душанбе, бо дастгирии Раиси ноҳияи Шоҳмансур муҳтарам Олимзода Сафар Маҳмадшо аз ҷониби бахши кор бо ҷавонон ва варзиши ноҳияи Шоҳмансур аз санаи 11 то 20 май соли равон мусобиқаи варзиши оид ба волейбол миёни донишҷӯ духтарони муассисаҳои таҳсилоти олӣ, ибтидоӣ ва миёнаи касбии ҳудуди ноҳия барои дарёфти Ҷоми Раиси ноҳияи Шоҳмансури шаҳри Душанбе бахшида ба Рӯзи ҷавонони Тоҷикистон баргузор гардид.
Дар ҷамъбасти мусобиқа муовини Раиси ноҳияи Шоҳмансури шаҳри Душанбе - Заррина Зуҳурзода, намояндаи Кумитаи кор бо ҷавонон ва варзиши назди Ҳукумати Ҷумҳурии Тоҷикистон - Исломзода Икром намояндаи Раёсати кор бо ҷавонон ва варзиши шаҳри Душанбе - Файзуллоев Саймиддин ва мудири бахши кор бо ҷавонон ва варзиши ноҳия - Анушервон Исматов иштирок ва суханронӣ карданд.
Мусобиқаи мазкур дар фазои дӯстона, эҳтироми тарафайн ва рӯҳияи баланди варзишӣ миёни донишҷӯён баргузор гардида, ба таҳкими дӯстӣ, рушди тарзи ҳаёти солим ва ҷалби ҷавонон ба варзиш мусоидат намуд. Дар анҷоми мусобиқа дастаҳои ғолиб муайян гардида, бо Ҷом, медал, диплом ва туҳфаҳои хотиравӣ қадрдонӣ карда шуданд.

26/05/2026

Паёми шодбошии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба муносибати иди Қурбон
26.05.2026
https://president.tj/event/news/55730

Ҳамватанони азиз!

Ҳамаи шуморо ба муносибати иди Қурбон самимона табрик мегӯям.

Ба ҳар яки шумо саломативу хушҳолӣ ва дар хонадонатон осоишу оромӣ орзу менамоям.

Иди Қурбон яке аз муҳимтарин ойинҳои дини мубини ислом мебошад ва фазилатҳои зиёде дорад.

Тақвияти дӯстиву муҳаббати байниҳамдигарӣ, тарғиби арзишҳои ахлоқӣ, анҷом додани амалҳои хайр, поси эҳтироми падару модарон ва калонсолон, дастгирии камбизоатҳову ниёзмандон ва сарфаю сариштакорӣ аз зумраи фазилатҳои ин ид мебошанд.

Яъне ин ид дар баробари он, ки маросими сирф эътиқодӣ мебошад, фурсати муносибе барои анҷом додани амалҳои хайру савоб ба ҳисоб меравад.

Дар рӯзи иди Қурбон мардуми тоҷик мутобиқ ба талаботи мазҳаби ҳанафӣ се амалро ба иҷро мерасонанд: аввалан, дар ҳаққи гузаштагон дуои нек мекунанд, баъдан ба зиёрати падару модар, беморону ниёзмандон ва азодорон мераванд ва шахсоне, ки имкони мусоиди молиявӣ доранд, расми қурбониро ба ҷо меоваранд.

Қурбонӣ кардан – ғамхорӣ дар ҳаққи ҳамдигар, раҳму шафқат ба ятимону маъюбон ва дастгирии оилаҳои камбизоат аз ҷониби онҳое воҷиб мебошад, ки имкону тавони хайру садақа карданро доранд ва дар масъалаи таъминоти аҳли оилаи онҳо мушкиле вуҷуд надорад.

Шахсоне, ки имкону тавони қурбонӣ карданро надоранд, анҷом додани ин амал барои онҳо шарт нест!

Дар Қуръони маҷид амалҳои исрофкорона ва хароҷоти беҷое, ки муъмин бар зарари худ ва наздиконаш анҷом медиҳад, 23 маротиба қатъиян маҳкум шудааст.

Умуман, ҳамаи амалҳое, ки Худованд ба бандагонаш роиҷ донистааст, дар доираи имконияту шароити зиндагии инсон аст.

Дар ояти 286-уми сураи «Бақара» ин масъала возеҳан зикр шудааст, ки «Худо бар ҳеҷ кас ҷуз ба андозаи тавоноияш воҷиб намекунад»!

Дигар ин, ки дар шариати дини мубини ислом қурбонӣ кардани чорво дар давоми се рӯз ҷойиз аст.

Бинобар ин, шарт нест, ки ин кор дар як рӯз бо издиҳому бенизомӣ анҷом дода шавад, балки беҳтар аст, ки забҳи чорво дар ҷойҳои муқарраршуда ва бо риояи қоидаҳои беҳдоштӣ сурат гирад.

Хотирнишон месозам, ки дастгирии эҳтиёҷмандон, ятимону маъюбон ва камбизоатҳову беморон на танҳо як амали савоб, балки нишонаи имони комил, ахлоқи ҳамида ва масъулияти иҷтимоии афроди ҷомеа дар назди ҳамдигар мебошад.

Қобили зикр аст, ки тақрибан ду даҳсола қабл дар кишвари мо Қонуни миллӣ «Дар бораи танзими ҷашну маросим дар Ҷумҳурии Тоҷикистон» қабул гардида буд, ки он дар роҳи ба низоми муайян даровардани фарҳанги баргузории маъракаҳо ва пешгирӣ кардани зиёдаравию исрофкорӣ нақши назаррас гузошт.

Дар асоси муқаррароти ин қонун мо бояд ҳангоми баргузории ҷашну маъракаҳо ва хусусан дар рӯзҳои ид сарфаю сариштакор бошем, ба намоишкориву исрофкорӣ роҳ надиҳем ва маросими диниву эътиқодиро, ки мардумро ба хайру саховат ва сарфаю сариштакорӣ ҳидоят мекунад, ба намоиши хурофоту таассуб табдил насозем.

Сарфаи маблағҳо ва худдорӣ кардан аз хароҷоти беҳуда ба оилаҳо имконият медиҳад, ки ба таълиму тарбияи фарзандон, фароҳам овардани шароити беҳтари зиндагӣ барои аҳли хонадон ва ободонии рӯзгори хеш таваҷҷуҳи бештар диҳанд.

Аз хотир набарорем, ки Худованд дар маркази ҳама фарзиёту воҷибот ва маросиму ойинҳои эътиқодӣ манфиат ва саодати инсонро гузоштааст!

Ҳамватанони азизи мо аз вазъияти ноорому буҳронии ҷаҳони муосир хуб огоҳанд.

Маҳсулоти ғизоӣ дар бисёр кишварҳои олам рӯз ба рӯз камчин ва нархҳо босуръат боло рафта истодаанд.

Дар чунин шароит мо бояд, қабл аз ҳама, ба рушди иқтисоди ватанӣ, самаранок истифода бурдани ҳар як ваҷаб замин диққати аввалиндараҷа дода, дар фикри захираи дусолаи маводи ғизоӣ, яъне таъмини фарзандон ва аҳли оилаи худ бошем.

Мо бояд бо дарназардошти вазъи ҷаҳони имрӯза амал кунем, бештар заҳмат кашем, ҳарчи бештар маҳсулот истеҳсол кунем ва амнияти озуқавории кишварамонро, ки яке аз ҳадафҳои стратегии миллӣ мебошад, таъмин намоем.

Дар робита ба ин, такроран таъкид менамоям, ки иди Қурбон тӯй нест, балки як маросими динӣ ва ойини эътиқодӣ аст, ки бояд дар асоси арзишҳои ахлоқӣ ва бо риояи меъёрҳои сарфаю сариштакорӣ баргузор карда шавад.

Ҳамдиёрони азиз!

Ислом динест, ки ба тарбияи ахлоқӣ ва маънавии инсон равона шуда, ҳадафи он ташаккули инсони солеҳу донишманд ва худшиносу накукор аст.

Паёмбари ислом дар ҳадиси саҳеҳ таъкид намудаанд: «Ман фиристода шудам, то ахлоқи башарро комил гардонам».

Ахлоқу одоби инсонӣ, дар навбати худ, аз саводу дониш ва маърифатнокиву худшиносии ҳар як инсон вобаста мебошад.

Ин аст, ки дар Қуръони маҷид нахустин ояте, ки нозил шудааст, ба илму маърифат, яъне ҳидоят ба «хондан» бахшида шудааст.

Каломи раббонӣ ба бандагони Худо 70 маротиба аз тоату ибодат паём додааст, вале 779 маротиба аз зарурату аҳаммияти илму дониш ва ақлу хирад ҳукм кардааст.

Ин ҳама гувоҳи он аст, ки мақоми илму дониш ва маърифату саводнокӣ дар назди Худованд баландтар аз ҳар ибодат аст.

Бори дигар таъкид менамоям, ки мардум бояд арзишҳои асили эътиқодиро аз таассубу хурофот фарқ кунанд ва ин кор ба инсон танҳо тавассути саводу маърифат ва илму дониш муяссар мегардад.

Маҳз ба ҳамин хотир, дини мубини ислом мақоми илму донишро ҳамчун воситаи саодати инсон баланд муқаррар намуда, возеҳан эълом медорад, ки ба даст овардани илму маърифат ба ҳар фарди мусулмон – хоҳ зан ва хоҳ мард – фарз аст.

Худованд дар каломи осмонии худ дар мавриди тарғиби илму дониш фармудааст: «Онҳое, ки медонанд (яъне саводу дониш доранд) ва онҳое, ки намедонанд (яъне саводу маърифат надоранд), баробар нестанд».

Воқеан, вазифаи ҳама пайғамбарон ва ҷавҳари таълимоти ҳама динҳои ҷаҳонӣ низ ба роҳи саодат ҳидоят кардани мардум аз тариқи илму дониш ва ахлоқи ҳамида мебошад.

Ҳамватанони азиз!

Ҳоло мо дар давраи омодагӣ ба ҷашни бузурги миллӣ – 35-солагии истиқлоли давлатӣ қарор дорем.

Ба хотири истиқболи сазовори ин ҷашни муқаддас ҳар як фарди соҳибватан ва бонангу номуси ҷомеа вазифадор аст, ки дар таҳкими дастовардҳои истиқлол – сулҳу оромӣ, суботи сиёсӣ ва ваҳдати миллӣ саҳм гузорад ва барои ояндаи дурахшони Тоҷикистони соҳибистиқлол талош намояд.

Истиқлол дастоварди бузургу таърихӣ мебошад ва ҳимояи он масъулияти шаҳрвандӣ, рисолати инсонӣ ва қарзи фарзандии ҳар яки мо ба шумор меравад.

Мо бояд ҳамеша шукрона кунем, ки соҳиби Ватани ободу осуда ва давлати озоду соҳибихтиёр ҳастем ва ба шарофати давлати соҳибистиқлоламон ҳуқуқу озодиҳо ва боварҳои эътиқодии худро амалӣ менамоем.

Шукргузорӣ аз истиқлолу озодӣ танҳо бо сухан маҳдуд намешавад, балки он дар амали ҳаррӯзаи созандаи ҳар яки мо ва дар хизмати содиқона ба Ватан ифода меёбад.

Итминон дорам, ки кулли мардуми шарифи кишвар минбаъд низ саъйу талоши худро аз ҳар як хонаву кошона сар карда, барои ободии Ватани маҳбубамон, ҳимояи сулҳу субот, таҳкими пояҳои давлатдории тоҷикон ва болоравии мақоми Тоҷикистон дар арсаи байналмилалӣ дареғ намедоранд.

Бори дигар ҳамаи шумо – мардуми шарифи Тоҷикистон ва ҳамватанони бурунмарзиамонро бо фаро расидани иди Қурбон табрик гуфта, бароятон тандурустиву хушбахтӣ ва дили шоду хонаи обод орзу менамоям.

Фарорасии иди Қурбон муборак бошад, ҳамватанони азиз!