20/07/2025
การสร้างคุณงามความดี กับการสร้างความซั่วนี้ มันสร้างได้คือกัน แม่ชีแก้วเพิ่นว่า โลกนี้โลกหาได้ หาดีใส่เจ้าของกะได้ หาซั่วใส่เจ้าของกะได้ หานรกสวรรค์ หานรกอเวจีใส่ตนเองกะได้ หาสวรรค์นิพพานใส่ตนเองกะได้ หาทรัพย์สมบัติใส่ตัวเองกะได้ หาทุกข์หาจนใส่ตัวเองกะได้ หายศถาบรรดาศักดิ์ใส่ตนเองกะได้ หาคุกหาตารางใส่ตนเองกะได้ เฮาเกิดมาเป็นมนุษย์ ฮู้จักเดียงสาภาวะ ฮู้จักดีฮู้จักซั่ว ฮู้จักบาปบุญคุณโทษ ประโยชน์และไม่ใช่ประโยชน์ มีสัมมาคารวะทุกอย่าง
เฮาได้ศึกษาหลักธรรมะ หลักธรรมคำสอนของพระพุทธเจ้าจากพ่อแม่ครูบาอาจารย์แล้ว เฮาสิหาหยังใส่เจ้าของบัดนี้ เฮาสิหาดีหรือหาซั่วใส่เจ้าของ ควรจะหาความดีใส่เจ้าของนะ แนวใด๋จะเจริญรุ่งเรือง แนวใด๋สิมีความสุขความเจริญใส่เจ้าของ กะควรสิหาใส่เจ้าของนั่นล่ะ บ่ควรสิหาความเลวความซั่วใส่เจ้าของ จะหาความเลวความซั่วใส่เจ้าของกะอย่างว่านั่นล่ะ มีแต่ตกทุกข์ได้ยาก เป็นมนุษย์กะตกทุกข์ได้ยาก ตายไปแล้วกะตกทุกข์ได้ยากคือกัน เพราะความซั่วให้ผล
อย่างที่พระพุทธเจ้าเพิ่นตรัสเพิ่นกล่าวไว้ว่า อกตํ ทุกฺกฏํ เสยฺโย ปจฺฉา ตปฺปติ ทุกฺกฏํ การคิดซั่ว ทำซั่ว พูดซั่ว อย่าทำเสียเลยดีกว่า เมื่อเฮาคิดซั่ว ทำซั่ว พูดซั่วลงไปแล้ว กรรมซั่วที่เฮาทำนั้นจะตามให้ผล ตนเองนั่นแลจะเดือดร้อนเมื่อภายหลัง อันนี้คือพระพุทธเจ้าเพิ่นกล่าวเพิ่นตรัสไว้ เพราะฉะนั้นพวกเฮาควรจะประกอบคุณงามความดี สร้างบุญสร้างกุศลใส่เจ้าของ
หลวงพ่ออินทร์ถวาย สันตุสสโก
จากพระธรรมเทศนา “โกหกกรรมไม่ได้”
แสดงธรรมเมื่อวันที่ ๒๖ พฤษภาคม ๒๕๖๘
