12/08/2026
မတူညီတဲ့ လမ်းတွေပေါ်က တူညီတဲ့ အိပ်မက်များ
လူငယ်ဆိုတာ အသက်အရွယ်တစ်ခုကိုပဲ ခေါ်တာမဟုတ်ဘူး။ အိပ်မက်ရှိသူ၊ ပြောင်းလဲချင်စိတ်ရှိသူ၊ မဖြစ်နိုင်ဘူးဆိုတဲ့ စကားကို “ဖြစ်နိုင်အောင် ဘယ်လိုလုပ်မလဲ” လို့ ပြန်မေးရဲသူတိုင်းဟာ လူငယ်ပါပဲ။
ဩဂုတ်လ (၁၂) ရက်နေ့ ဖြစ်တဲ့ ဒီနေ့ဟာ အပြည်ပြည်ဆိုင်ရာ လူငယ်များနေ့ (International Youth Day) ပဲ ဖြစ်ပါတယ်။ အပြည်ပြည်ဆိုင်ရာလူငယ်များနေ့ကို ၁၉၉၁ ခုနှစ်တွင် သြစတြီးယားနိုင်ငံ ဗီယင်နာမြို့ (Vienna) ၌ ကျင်းပတဲ့ ကမ္ဘာ့ကုလသမဂ္ဂ လူငယ်များဆိုင်ရာ ဖိုရမ် (World Youth Forum of the United Nations System) တွင် လူငယ်အများအပြားက အကြံပေး တင်ပြခဲ့ကြတာ ဖြစ်ပါတယ်။ ၁၉၉၈ ခုနှစ်၊ လစ္စဘွန်းမြို့ (Lisbon) မှာ ကျင်းပခဲ့တဲ့ ကမ္ဘာ့လူငယ်ရေးရာ ဝန်ကြီးများ ညီလာခံမှာ ဒီအဆိုပြုတင်ပြချက်ကို ထောက်ခံခဲ့ကြပြီး၊ ၁၉၉၉ ခုနှစ်တွင် ကုလသမဂ္ဂက မီးစိမ်းပြခဲ့ကာ ဩဂုတ်လ (၁၂) ရက်နေ့ကို "အပြည်ပြည်ဆိုင်ရာ လူငယ်များနေ့" အဖြစ် တရားဝင်အတည်ပြု သတ်မှတ်ပေးခဲ့တာပဲဖြစ်ပါတယ်။ ပထမဆုံး တရားဝင် အခမ်းအနားကို ၂၀၀၀ ခုနှစ် သြဂုတ်လ ၁၂ ရက်နေ့တွင် ကမ္ဘာတစ်ဝန်း စတင်ကျင်းပခဲ့ကြပါတယ်။ ဒီနေ့မှာဆိုရင် လူငယ်ဖွံ့ဖြိုး တိုးတက်ရေးအတွက် ကမ္ဘာတစ်ဝန်းမှာ လူငယ်အခမ်းအနားများနှင့် လှုပ်ရှားမှုများကို နှစ်စဉ်နှစ်တိုင်း ကျင်းပလေ့ရှိကြပါတယ်။
ကျင်းပရသော ရည်ရွယ်ချက်
• လူငယ်များ ရင်ဆိုင်နေရသော ပြဿနာများနှင့် စိန်ခေါ်မှုများကို ကမ္ဘာသိစေရန်၊ လူငယ်များ၏ အခန်းကဏ္ဍနှင့် အကြံဉာဏ် များကို လူ့အဖွဲ့အစည်း တည်ဆောက်ရေးတွင် အဓိက မိတ်ဖက်အဖြစ် အသိအမှတ်ပြုရန်တို့ ဖြစ်ပါတယ်။
၂၀၂၆ ဆောင်ပုဒ်
• ယနေ့ကျရောက်သည့် International Youth Day 2026 အပြည်ပြည်ဆိုင်ရာ လူငယ်များနေ့အတွက် ကုလသမဂ္ဂမှ ချမှတ်ထားသော အဓိကဆောင်ပုဒ်မှာ “Different Contexts, Common Aspirations” (“နောက်ခံမတူငြား၊ ရည်မှန်းတူထား၊ လူငယ်အား”) ဖြစ်ပါတယ်။
ဆောင်ပုဒ်၏ အနှစ်သာရ အနေဖြင့် ကမ္ဘာတစ်ဝန်းရှိ လူငယ်များသည် မတူညီသော နိုင်ငံရေး၊ စီးပွားရေး၊ လူမှုရေးနှင့် ဒေသန္တရ အခြေအနေအမျိုးမျိုးတွင် ကြီးပြင်းရှင်သန်နေကြရပြီး မတူကွဲပြားသည့် ပတ်ဝန်းကျင်နောက်ခံ ရှိကြသော်လည်း လူငယ်အားလုံး၏ အနာဂတ်မျှော်မှန်းချက်များဖြစ်သော ဂုဏ်သိက္ခာရှိမှု၊ အလုပ်အကိုင် အခွင့်အလမ်းကောင်းများ၊ အရည်အသွေးပြည့်ဝသည့် ပညာရေး နှင့် ရေရှည်တည်တံ့မည့် အနာဂတ်တို့ကို တူညီစွာ လိုလားကြတာပဲဖြစ်ပါတယ်။
ကမ္ဘာပေါ်မှာ လူငယ်တွေဟာ အခြေအနေချင်း မတူကြပါဘူး။ တချိုက စစ်ပွဲတွေကြားမှာ တိုက်ရင်းခိုက်ရင်း ရှင်သန်နေကြတယ်။ တချို့က ဗုံးသံ သေနတ်သံတွေကြား အသက်ရှင်သန်နိုင်ဖို့ ခိုလုံစရာရှာရင်း ပြေးလွှားနေကြရတယ်။၊ တချို့က စာသင်ခန်းထဲမှာ အနာဂတ်ကို ရှာဖွေနေကြတယ်။ တချို့က အလုပ်ခွင်ထဲမှာ မိသားစုနှင့် ဘဝအတွက် ရုန်းကန်နေကြရတယ်။ တချို့ကတော့ အိပ်မက်တွေနောက်ကို လျှောက်လိုက်ရင်း နေ့ရက်တွေကို ဖြတ်သန်းနေကြတယ်။
ဒီလို လမ်းတွေ မတူကြပေမယ့်… မျှော်လင့်ချက်တွေကတော့ တူကြတယ်။ ပိုကောင်းတဲ့ဘဝ၊ လုံခြုံမှု၊ စစ်ပွဲတွေမရှိတဲ့နေရာ၊ တရားမျှတမှု၊ လွတ်လပ်စွာ ရပ်တည်ခွင့်၊ ကိုယ့်ရဲ့အသံကို ကိုယ်တိုင် ပြောခွင့်ရချင်ကြတယ်ဆိုတာ အတူတူပါပဲ။ အနာဂတ်မှာ ကိုယ့်နောက်က မျိုးဆက်တွေအတွက် ပိုကောင်းတဲ့ ကမ္ဘာတစ်ခုကို ချန်ထားခဲ့ချင်ကြတာကလည်း ဆန္ဒတစ်ခုပါပဲ။
ဒီနေ့ အပြည်ပြည်ဆိုင်ရာ လူငယ်များနေ့ မှာ ကမ္ဘာတစ်ဝှမ်းက လူငယ်များအပြင် မတရားမှုများနှင့် ဖိနှိပ်မှုများကို ကြံ့ကြံ့ခံရင်ဆိုင် နေကြရသော လူငယ်များအတွက် အားပေးစကားပြောချင်တာကတော့ —
မင်းတို့ရဲ့အသံတွေ၊ မင်းတို့ရဲ့အိပ်မက်တွေ ဘယ်လောက်ပဲသေးငယ်နေပါစေ အရေးမကြီးတာ တန်ဖိုးမရှိတာ မဟုတ်ပါဘူး။ ပြောင်းလဲမှုကြီးတိုင်းဟာ တစ်စုံတစ်ယောက်ရဲ့ သေးငယ်တဲ့ ယုံကြည်မှုကနေစခဲ့တာပါ။ မင်းတို့ရဲ့ တီထွင်ဖန်တီးမှုကြီးဟာ အံ့မခန်း လောက်ပါပဲ။
ဒါကြောင့်… မင်းဘယ်နေရာမှာပဲရှိရှိ၊ ဘယ်လိုအခြေအနေမှာပဲရှိရှိ၊ မင်းရဲ့ အသံကို မတိတ်လိုက်ပါနဲ့၊ မင်းရဲ့ အိပ်မက်တွေကို မစွန့်လွှတ်လိုက်ပါနဲ့။ တီထွင်မှုတွေကို မရပ်တန့်လိုက်ပါနဲ့။ စဉ်ဆက်မပြတ်လေ့လာပါ၊ အများအကျိုးဆောင်ရွက်ပါ၊ စိတ်ကျန်းမာရေး ဂရုစိုက်ပါ။
ဒီကမ္ဘာကြီးရဲ့ အနာဂတ်ကို “ဒီနေ့ကစပြီး ငါ ဘာလုပ်နိုင်မလဲ” ဆိုတဲ့ မေးခွန်းနဲ့ပဲ တည်ဆောက်လိုက်ပါ။
လူငယ်တွေဟာ အနာဂတ်ရဲ့ ခေါင်းဆောင်တွေဖြစ်လာဖို့အတွက် ဒီနေ့ရဲ့ ပြောင်းလဲမှုကို ဖန်တီးနေသူတွေအဖြစ် ရှင်သန်လိုက်ကြဖို့ ဖြစ်ပါတယ်။ ✊🌱
အပြည်ပြည်ဆိုင်ရာ လူငယ်များနေ့ တွင် မတရားမှုများနှင့် ဖိနှိပ်မှုများကို ကြံ့ကြံ့ခံရင်ဆိုင်နေကြရသော လူငယ်များအတွက် လွတ်မြောက်ရေး၊ တရားမျှတရေးနှင့် ငြိမ်းချမ်းရေးတို့ကို ဦးတည်သည့် လူငယ်တိုင်းရဲ့
အိပ်မက်တွေ မပျောက်ဆုံးပါစေနဲ့။
အခက်အခဲတွေကြားမှာ မျှော်လင့်ချက် မပျက်ပါစေနဲ့။
ကိုယ့်အနာဂတ်ကို ကိုယ်တိုင်ဖန်တီးနိုင်တဲ့ ခွန်အားနဲ့ သတ္တိတွေ ပြည့်ဝကြပါစေ။
ခေတ်စနစ်ဆိုးတွေကြား မည်မျှပင် ဖိနှိပ်ချုပ်ချယ်ပါစေ၊ လူငယ်တို့၏ လွတ်လပ်လိုစိတ်၊ တန်းတူညီမျှမှု တောင်းဆိုသံများကို မည်သည့်အာဏာကမှ ဖုံးကွယ်မထားနိုင်တာကြောင့် အမှောင်ဆုံးအချိန်သည် မနက်ခင်းမတိုင်မီ အနီးစပ်ဆုံးအချိန်ဖြစ်သဖြင့် မျှော်လင့်ချက် မီးတောက်ကို ဆက်လက်ထွန်းညှိထားနိုင်ကြပါစေ။
မတူညီတဲ့လမ်းတွေကနေ တူညီတဲ့ ပိုကောင်းတဲ့ အနာဂတ်ဆီ အတူတူ လျှောက်လှမ်းနိုင်ကြပါစေ။ ❤️ ကြောင်း Fight For Justice အဖွဲ့သားများက လေးနက်စွာ ဂုဏ်ပြုဆုတောင်းပေးလိုက်ပါတယ်… ရှင်
Happy International Youth Day! ✨
#လူငယ်များနေ့
#လူငယ်များရဲ့အနာဂတ်
