VSB Myanmar

ข้อมูลติดต่อ แผนที่และเส้นทาง แบบฟอร์มติดต่อ เวลาทำการ บริการ คะแนนรีวิว รูปภาพ วิดีโอ และข่าวสารจาก VSB Myanmar, องค์กรไม่แสวงหาผลกำไร, Chiang Mai

VSB Myanmar serves as a knowledge hub and a leading partner dedicated to enhancing vocational skills, promoting lifelong learning, and supporting community development.

22/09/2026

မလေးရှားပညာရေး အရည်အချင်းမူဘောင် အေဂျင်စီ - 𝐌𝐚𝐥𝐚𝐲𝐬𝐢𝐚𝐧 𝐐𝐮𝐚𝐥𝐢𝐟𝐢𝐜𝐚𝐭𝐢𝐨𝐧𝐬 𝐀𝐠𝐞𝐧𝐜𝐲 (𝐌𝐐𝐀)
မလေးရှားနိုင်ငံ၏ အဆင့်မြင့်ပညာရေးကဏ္ဍ အရည်အသွေးမြင့်မားစေရန်၊ စနစ်တကျရှိစေရန်နှင့် နိုင်ငံတကာအဆင့်မီစေရန်အတွက် Malaysian Qualifications Agency (MQA) သည် အဓိကကျသော တရားဝင် အစိုးရအဖွဲ့အစည်းတစ်ခုအဖြစ် ရပ်တည်လျက်ရှိသည်။ MQA ကို မလေးရှားပညာရေး အရည်အချင်းမူဘောင် အက်ဥပဒေ ၂၀၀၇ (Malaysian Qualifications Agency Act 2007) အရ ၂၀၀၇ ခုနှစ် နိုဝင်ဘာလ ၁ ရက်နေ့တွင် စတင်ဖွဲ့စည်းခဲ့ပြီး၊ မလေးရှား အဆင့်မြင့်ပညာရေးဝန်ကြီးဌာန (Ministry of Higher Education - MOHE) ၏ သီးခြား ပညာရေး အရည်အသွေးအာမခံအဖွဲ့အစည်းအဖြစ် လည်ပတ်လျက်ရှိသည်။
◾ MQA ၏ ပေါ်ပေါက်လာပုံ နောက်ခံ
MQA မဖွဲ့စည်းမီက မလေးရှားနိုင်ငံ၏ ပညာရေးအသိအမှတ်ပြုမှုစနစ်တွင် ပုဂ္ဂလိကတက္ကသိုလ်များအတွက် Lembaga Akreditasi Negara (LAN) မှ တာဝန်ယူဆောင်ရွက်ပြီး၊ အစိုးရတက္ကသိုလ်များအတွက် ပညာရေးဝန်ကြီးဌာန၏ အရည်အသွေးအာမခံမှုဌာနခွဲ (Quality Assurance Division - QAD) မှ သီးခြားစီ ဆောင်ရွက်ခဲ့ကြသည်။

ထိုသို့ ကွဲပြားနေသော စနစ်နှစ်ခုကို စနစ်တစ်ခုတည်းအောက်သို့ ပေါင်းစည်းရန်၊ ပုဂ္ဂလိကရော အစိုးရကဏ္ဍပါ အရည်အသွေး တူညီသည့် အမျိုးသားအဆင့် ပညာရေးမူဘောင်တစ်ခု ထူထောင်ရန်နှင့် နိုင်ငံတကာ စံချိန်စံညွှန်းများနှင့် ညီညွတ်စေရန်အတွက် LAN နှင့် QAD တို့ကို ပေါင်းစည်း၍ MQA ကို ဖွဲ့စည်းခဲ့ခြင်းဖြစ်သည်။
◾ MQA ၏ အဓိက တာဝန်နှင့် လုပ်ငန်းစဉ်များ
MQA ၏ အဓိကတာဝန်မှာ Malaysian Qualifications Framework (MQF) ခေါ် မလေးရှားပညာရေး အရည်အချင်းမူဘောင်ကို ဖော်ဆောင်၊ စောင့်ရှောက်နှင့် ထန်းသိမ်းရန်ဖြစ်သည်။ ၎င်း၏ အဓိက လုပ်ငန်းဆောင်ရွက်ချက်များမှာ အောက်ပါအတိုင်း ဖြစ်သည်။

သင်ရိုးညွှန်းတမ်းများ အသိအမှတ်ပြုခြင်း (𝑨𝒄𝒄𝒓𝒆𝒅𝒊𝒕𝒂𝒕𝒊𝒐𝒏 𝒐𝒇 𝑷𝒓𝒐𝒈𝒓𝒂𝒎𝒎𝒆𝒔): တက္ကသိုလ်၊ ကောလိပ်နှင့် သက်မွေးဝမ်းကျောင်း သင်တန်းကျောင်းများမှ သင်ကြားပေးနေသည့် သင်ရိုးညွှန်းတမ်းများကို အဆင့် ၂ ဆင့်ဖြင့် စိစစ်အသိအမှတ်ပြုသည်။

𝑷𝒓𝒐𝒗𝒊𝒔𝒊𝒐𝒏𝒂𝒍 𝑨𝒄𝒄𝒓𝒆𝒅𝒊𝒕𝒂𝒕𝒊𝒐𝒏 (ယာယီ အသိအမှတ်ပြုခြင်း): သင်ရိုးတစ်ခု စတင်ဖွင့်လှစ်ချိန်တွင် သတ်မှတ်ထားသော အနိမ့်ဆုံး စံချိန်စံညွှန်းများနှင့် လိုအပ်ချက်များ ပြည့်မီခြင်း ရှိမရှိ စစ်ဆေးအတည်ပြုခြင်း။

𝑭𝒖𝒍𝒍 𝑨𝒄𝒄𝒓𝒆𝒅𝒊𝒕𝒂𝒕𝒊𝒐𝒏 (အပြည့်အဝ အသိအမှတ်ပြုခြင်း): သင်တန်းစတင်ပြီး သင်ကြားရေးစနစ်၊ သင်ရိုးအရည်အသွေး၊ ဆရာ/မများ၏ အရည်အသွေးနှင့် စာမေးပွဲစနစ်တို့သည် MQF မူဘောင်၏ စံချိန်စံညွှန်းများနှင့် ကိုက်ညီကြောင်း အပြည့်အဝ အကဲဖြတ်အတည်ပြုခြင်း။

𝑴𝒂𝒍𝒂𝒚𝒔𝒊𝒂𝒏 𝑸𝒖𝒂𝒍𝒊𝒇𝒊𝒄𝒂𝒕𝒊𝒐𝒏𝒔 𝑹𝒆𝒈𝒊𝒔𝒕𝒆𝒓 (𝑴𝑸𝑹) ထိန်းသိမ်းခြင်း: MQA မှ အပြည့်အဝ အသိအမှတ်ပြုထားသော (Full Accreditation ရရှိထားသော) သင်တန်းများနှင့် ဘွဲ့ဒီဂရီများအားလုံးကို MQR ခေါ် တရားဝင် မှတ်ပုံတင်စာရင်းတွင် စုစည်းဖော်ပြထားသည်။ ကျောင်းသားများအနေဖြင့် မိမိတက်ရောက်မည့် ကျောင်း သို့မဟုတ် သင်တန်းသည် တရားဝင် အသိအမှတ်ပြုခံထားရခြင်း ရှိမရှိကို MQR ဝဘ်ဆိုက်တွင် တိုက်ရိုက် စစ်ဆေးနိုင်သည်။

လုပ်သက်နှင့် အတွေ့အကြုံများကို အသိအမှတ်ပြုခြင်း (𝑨𝑷𝑬𝑳 - 𝑨𝒄𝒄𝒓𝒆𝒅𝒊𝒕𝒂𝒕𝒊𝒐𝒏 𝒐𝒇 𝑷𝒓𝒊𝒐𝒓 𝑬𝒙𝒑𝒆𝒓𝒊𝒆𝒏𝒕𝒊𝒂𝒍 𝑳𝒆𝒂𝒓𝒏𝒊𝒏𝒈): တရားဝင် ဘွဲ့လက်မှတ် သို့မဟုတ် ပညာအရည်အချင်း လိုအပ်ချက် မပြည့်မီသော်လည်း၊ အလုပ်သင်အတွေ့အကြုံနှင့် အသက်မွေးဝမ်းကျောင်းဆိုင်ရာ ကျွမ်းကျင်မှုရှိသူများကို MQA မှ စိစစ်၍ အဆင့်မြင့်ပညာရေးသို့ ဆက်လက်တက်ရောက်နိုင်ရန် APEL စနစ်ဖြင့် အခွင့်အလမ်း လမ်းကြောင်းဖွင့်ပေးထားသည်။

နိုင်ငံတကာ ဘွဲ့လက်မှတ်များ နှိုင်းယှဉ်စစ်ဆေးခြင်း : ပြည်ပနိုင်ငံများမှ ရရှိလာသော ဘွဲ့လက်မှတ်များနှင့် ပညာအရည်အချင်းများသည် မလေးရှားနိုင်ငံ၏ ပညာရေးအဆင့်အတန်း (MQF Level) တွင် မည်သည့်အဆင့်နှင့် ညီမျှသည်ကို စိစစ်တွက်ချက် စာရင်းထုတ်ပေးသည်။
◾ MQA ၏ အရေးပါမှု
ကျောင်းသားများအတွက်: မိမိတို့တက်ရောက်သည့် သင်တန်းသည် တရားဝင် အသိအမှတ်ပြုထားသော သင်တန်းဖြစ်ကြောင်း သေချာစေခြင်း၊ ကျောင်းပြောင်းရွှေ့ရာတွင် ခရက်ဒစ် (Credit Transfer) ပြောင်းရွှေ့ရလွယ်ကူခြင်းနှင့် ရစရာရှိသော အစိုးရပညာသင်ဆု/ချေးငွေများ (ဥပမာ - PTPTN) လျှောက်ထားနိုင်ခြင်းတို့ ရရှိသည်။

အလုပ်ရှင်များအတွက်: MQA အသိအမှတ်ပြု ဘွဲ့ရရှိထားသော ဝန်ထမ်းများ၏ အရည်အသွေးနှင့် ကျွမ်းကျင်မှုကို အပြည့်အဝ ယုံကြည်စိတ်ချစွာ ခန့်အပ်နိုင်စေသည်။

နိုင်ငံတကာ အဆင့်အတန်း: MQA ၏ စံချိန်စံညွှန်းများသည် နိုင်ငံတကာ ပညာရေးအဖွဲ့အစည်းများနှင့် ချိတ်ဆက်ထားသဖြင့် မလေးရှားနိုင်ငံတွင် ရရှိခဲ့သော ဘွဲ့လက်မှတ်များသည် ကမ္ဘာ့နိုင်ငံအသီးသီးတွင် တရားဝင်အသိအမှတ်ပြုမှု ရရှိရန် အထောက်အကူပြုသည်။

Reference Links
Malaysian Qualifications Agency (MQA) Official Website:
https://www.mqa.gov.my
Malaysian Qualifications Register (MQR) Online Database:
https://www2.mqa.gov.my/mqr/
StudyMalaysia - Guide on MQA and MQF Standards:
https://studymalaysia.com/education/higher-education-in-malaysia/MQA-Malaysian-Qualifications-Agency-Higher-Education-Study-Pathways

#

06/09/2026

"အချို့နိုင်ငံများတွင် TVET စနစ် ဘာ့ကြောင့် မအောင်မြင်ရသလဲ"
နည်းပညာနှင့် သက်မွေးပညာရေးနှင့် လေ့ကျင့်ရေး (Technical and Vocational Education and Training - TVET) သည် နိုင်ငံတစ်နိုင်ငံ၏ စီးပွားရေးဖွံ့ဖြိုးတိုးတက်မှု၊ အလုပ်အကိုင် အခွင့်အလမ်းဖန်တီးမှုနှင့် လူငယ်များ၏ ကျွမ်းကျင်မှု မြှင့်တင်ရေးအတွက် လွန်စွာအရေးပါသော မဏ္ဍိုင်တစ်ခု ဖြစ်ပါ၏။ သို့သော်လည်း အချို့သော နိုင်ငံများတွင် TVET စနစ်ကို ထိရောက်စွာ အကောင်အထည်မဖော်နိုင်ဘဲ ကျရှုံးခြင်း သို့မဟုတ် မျှော်မှန်းသလောက် မအောင်မြင်ခြင်းများနှင့် ရင်ဆိုင်နေရတတ်၏။ ထိုသို့ မအောင်မြင်ရသည့် အဓိက အကြောင်းအရင်းအချို့ကို အောက်ပါအတိုင်း လေ့လာတွေ့ရှိရပါသည်။

🔳 ၁။ လူမှု့အသိုင်းအဝိုင်း၏ အမြင်နှင့် အဆင့်အတန်း ခွဲခြားမှု (𝗦𝗼𝗰𝗶𝗮𝗹 𝗦𝘁𝗶𝗴𝗺𝗮)
လူအများစု၏ စိတ်ဓာတ်တွင် TVET သင်တန်းများကို တက္ကသိုလ်ဝင်ခွင့် မရသူများ သို့မဟုတ် ပညာရေးညံ့ဖျင်းသူများသာ တက်ရောက်သည့် "ဒုတိယတန်းစား ပညာရေး" ဟု အယူရှိကြသည်။ တက္ကသိုလ်ဘွဲ့ရရှိရေးကိုသာ အဓိက ဦးစားပေးလေ့ရှိကြပြီး စက်ရုံ၊ အလုပ်ရုံများနှင့် အသက်မွေးဝမ်းကျောင်းဆိုင်ရာ ကျွမ်းကျင်မှုများကို နိမ့်ကျသည်ဟု ယူဆလေ့ရှိကြသဖြင့် အရည်အချင်းရှိသော လူငယ်များ TVET စနစ်သို့ ဝင်ရောက်ရန် ဝန်လေးတတ်ကြသည်။
🔳 ၂။ လုပ်ငန်းခွင် လိုအပ်ချက်နှင့် သင်ရိုးညွှန်းတမ်း မကိုက်ညီမှု (𝗠𝗶𝘀𝗺𝗮𝘁𝗰𝗵 𝘄𝗶𝘁𝗵 𝗜𝗻𝗱𝘂𝘀𝘁𝗿𝘆 𝗡𝗲𝗲𝗱𝘀)
TVET စနစ် မအောင်မြင်ရသည့် အဓိက အချက်မှာ အလုပ်အကိုင်ဈေးကွက် (Industry/Labor Market) နှင့် သင်တန်းကျောင်းများကြား ချိတ်ဆက်ပေါင်းကူးဆက်သွယ်မှု အားနည်းခြင်းဖြစ်သည်။ သင်တန်းကျောင်းများတွင် သင်ကြားပေးနေသည့် သင်ရိုးညွှန်းတမ်းများသည် ခေတ်နောက်ကျနေပြီး၊ လက်တွေ့လုပ်ငန်းခွင်တွင် အမှန်တကယ် အသုံးပြုနေသည့် နည်းပညာများနှင့် ကင်းကွာနေသဖြင့် သင်တန်းဆင်းများအတွက် အလုပ်အကိုင်ရရှိရန် ခက်ခဲစေသည်။
🔳 ၃။ဘတ်ဂျက်နှင့် အရင်းအမြစ် မလုံလောက်မှု (𝗜𝗻𝗮𝗱𝗲𝗾𝘂𝗮𝘁𝗲 𝗙𝘂𝗻𝗱𝗶𝗻𝗴 𝗮𝗻𝗱 𝗜𝗻𝗳𝗿𝗮𝘀𝘁𝗿𝘂𝗰𝘁𝘂𝗿𝗲)
Vocational ပညာရေး‌ေလ့ကျင့်‌ေရးသည် တက္ကသိုလ်ပညာရေးထက် လက်တွေ့လေ့ကျင့်ရသည့် စက်ပစ္စည်းများ၊ စိစစ်စမ်းသပ်ခန်းများ၊ ကိရိယာများနှင့် ကုန်ကြမ်းပစ္စည်းများ ပိုမိုလိုအပ်သဖြင့် ကုန်ကျစရိတ် မြင့်မားသည်။ အချို့နိုင်ငံများတွင် TVET ကဏ္ဍအတွက် ဘတ်ဂျက်ခွဲဝေမှု လျှော့နည်းခြင်းကြောင့် စက်ပစ္စည်းများ ဟောင်းနွမ်းနေခြင်း၊ အလုပ်ရုံလေ့ကျင့်ခန်းများ မလုပ်နိုင်ခြင်းနှင့် သင်တန်းဆရာများအား နည်းပညာအသစ်များ အမြဲမပြတ် လေ့ကျင့်ပေးနိုင်မှု မရှိခြင်းတို့ကို ဖြစ်ပေါ်စေသည်။
🔳 ၄။ စီမံအုပ်ချုပ်မှုနှင့် မူဝါဒဆိုင်ရာ မညီမျှခြင်း (𝗚𝗼𝘃𝗲𝗿𝗻𝗮𝗻𝗰𝗲 𝗮𝗻𝗱 𝗦𝘁𝗿𝘂𝗰𝘁𝘂𝗿𝗮𝗹 𝗙𝗹𝗮𝘄𝘀)
TVET စနစ် မအောင်မြင်ရခြင်း၏အဓိကအချက်တချက်မှာ စီမံခန့်ခွဲမှု ပုံစံ မှားယွင်းခြင်းကြောင့်ဖြစ် သည်။ ဝန်ကြီးဌာနများစွာက ချိတ်ဆက်ညှိနိုင်းမှုမရှိပဲ စီမံခန့်ခွဲမှုလုပ်နေခြင်း (Fragmentation) ကြောင့် မူဝါဒများ ထပ်နေပြီး ထိရောက်မှု အားနည်းသွားနိုင်သလို၊ တစ်ဖက်တွင်လည်း အစိုးရက သို့မဟုက် ဝန်ကြီးဌာနတခုမှ သို့မဟုက် ကောင်စီတခုမှ စသဖြင့် ဗဟိုမှ အကုန်လုံးကို တပေါင်းတည်း ချုပ်ကိုင်လွန်းခြင်း (Over-Centralization) ကြောင့် လည်းဒေသနှင့် စက်မှုဇုန်တစ်ခုချင်းစီ၏ မတူညီသော လိုအပ်ချက်များကို အချိန်နဲ့တပြေးညီ တုံ့ပြန်နိုင်စွမ်း မရှိတော့ပဲထိရောက်မှုနည်းပါးသွားနိုင်ပါ၏။ များသောအားဖြင့် အောင်မြင်သော TVET စနစ်တစ်ခုဖြစ်ရန် အမျိုးသားအဆင့်မူဝါဒနှင့် စံချိန်စံညွှန်းများကို ဗဟိုမှ သတ်မှတ်ပေးပြီး သင်တန်းကျောင်းများနှင့် ပုဂ္ဂလိကကဏ္ဍသို့ လေ့ကျင့်ရေးဆိုင်ရာ လုပ်ပိုင်ခွင့်များ ခွဲဝေပေးသည့် (Centralized Standards, Decentralized Delivery) မျှတဟန်ချက်ညီသော စီမံအုပ်ချုပ်မှုစနစ်နှင့်အလေ့အထ လိုအပ်ပါသည်။ပုဂ္ဂလိကလုပ်ငန်းရှင်များ၏ပူးပေါင်းပါဝင်မှုသည်လည်း အခြေခံကြသော အချက်တချက်ဖြစ်ပါသည်။
🔳 ၅။ အရည်အသွေးမြင့် သင်တန်းဆရာများ ရှားပါးခြင်း (𝗟𝗮𝗰𝗸 𝗼𝗳 𝗤𝘂𝗮𝗹𝗶𝗳𝗶𝗲𝗱 𝗧𝗩𝗘𝗧 𝗧𝗿𝗮𝗶𝗻𝗲𝗿𝘀)
TVET သင်တန်းဆရာများသည် စာတွေ့သာမက လက်တွေ့လုပ်ငန်းခွင် အတွေ့အကြုံပါ ပြည့်ဝရန် လိုအပ်သည်။ သို့သော်လည်း လုပ်ငန်းခွင်တွင် ကျွမ်းကျင်မှုရှိသူများသည် လစာကောင်းမွန်သည့် ပုဂ္ဂလိကကဏ္ဍများသို့သာ သွားရောက်လုပ်ကိုင်ကြပြီး၊ သင်တန်းကျောင်းများတွင် သင်တန်းဆရာအဖြစ် တည်မြဲစွာ လုပ်ကိုင်နိုငါရန် ဆွဲဆောင်ထားနိုင်မှုမရှိခြင်းကြောင့် အရည်အသွေးပြည့်မီသော ဆရာ၊ ဆရာမများ မလုံလောက်မှုကိုဖြစ်ပေါ်လာစေသည်။

အချုပ်အားဖြင့်ဆိုရလျှင်
TVET စနစ် အောင်မြင်ရန်အတွက် ငွေကြေးစိုက်ထုတ်ရင်းနှီးမှု တစ်ခုတည်းဖြင့် မလုံလောက်ပါ။ စနစ်တစ်ခုလုံးကို ပြန်လည်ဆန်းစစ်ရန် လိုအပ်ပါသည်။ အများပြည်သူ၏ အမြင်ကို ပြောင်းလဲပေးခြင်း၊ ပုဂ္ဂလိက လုပ်ငန်းရှင်များနှင့် ပူးပေါင်း၍ သင်ရိုးညွှန်းတမ်းများကို ခေတ်မီအောင် ပြင်ဆင်ခြင်း၊ ထိရောက်သော အရည်အသွေးထိန်းချုပ်မှုစနစ် (Quality Assurance System) ထူထောင်ခြင်း၊ အလုပ်ရှင်များနှင့် ပုဂ္ဂလိကကဏ္ဍဦးဆောင်မှုကို နေရာပေးခြင်းတို့ဖြင့်သာ TVET ကဏ္ဍကို အောင်မြင်စွာ တည်ဆောက်နိုင်မည် ဖြစ်ပါသည်။

References

1. UNESCO-UNEVOC. (2012). Transforming TVET: From potential to success. United Nations Educational, Scientific and Cultural Organization.

2. International Labour Organization (ILO). (2020). Skilling, reskilling and upskilling for a resilient future: Challenges and opportunities for TVET systems. ILO Geneva.

3. World Bank. (2013). Skills for the Labor Market in Sub-Saharan Africa: Challenges and Policies for TVET. World Bank Publications.

# #𝐒𝐤𝐢𝐥𝐥𝐬𝐃𝐞𝐯𝐞𝐥𝐨𝐩𝐦𝐞𝐧𝐭 #

04/09/2026

𝗙𝗮𝗰𝗶𝗹𝗶𝘁𝗮𝘁𝗶𝗼𝗻 အခြေခံသဘောတရား အပိုင်း(၄) - 𝐅𝐨𝐮𝐧𝐝𝐚𝐭𝐢𝐨𝐧𝐬 𝐨𝐟 𝐅𝐚𝐜𝐢𝐥𝐢𝐭𝐚𝐭𝐢𝐨𝐧
🔳 သင်ခန်းစာကို ပြန်လည်သုံးသပ်ခြင်း (The Debriefing Framework)

သင်တန်းတစ်ခုအတွင်း လှုပ်ရှားမှုများ၊ ဂိမ်းများနှင့် လေ့ကျင့်ခန်းများ ပြုလုပ်ခြင်းသည် သင်ယူမှု၏ တစ်ဝက် မျှသာ ရှိပါသေးသည်။ အဆိုပါ လှုပ်ရှားမှုများမှ တကယ်စစ်မှန်သော သင်ယူမှုအနှစ်သာရ ရရှိစေရန်အတွက် ပြန်လည်သုံးသပ်ဆွေးနွေးခြင်း (Debriefing) ကို မဖြစ်မနေ လုပ်ဆောင်ရပါမည်။ "အတွေ့အကြုံ + ပြန်လည်သုံးသပ်ခြင်း = သင်ယူမှု" (Experience + Reflection = Learning) ဟု ဆိုသကဲ့သို့ Debriefing မပါဝင်ပါက လှုပ်ရှားမှုတစ်ခုသည် ပျော်ရွှင်စရာ ဂိမ်းတစ်ခုအဆင့်ထက် မပိုနိုင်ပါ။

▪ ၁။ Debriefing ပြုလုပ်ရခြင်း၏ အဓိက ရည်ရွယ်ချက်
Debriefing ပြုလုပ်ခြင်းသည် သင်တန်းသားများအား မိမိတို့ပြုလုပ်ခဲ့သော လုပ်ငန်းစဉ်ကို ပြန်လည်ဆန်းစစ်စေပြီး သင်ခန်းစာ၏ အနှစ်သာရကို ကိုယ်တိုင်ရှာဖွေဖော်ထုတ်နိုင်
ရန် ကူညီပေးသည်။ Facilitator က အဖြေကို တိုက်ရိုက်ပြောပြခြင်းထက် သင်တန်းသားများကိုယ်တိုင် မေးခွန်းများမှတစ်ဆင့် အဖြေကို ရှာဖွေတွေ့ရှိသွားအောင် လမ်းပြပေးခြင်းသည် သင်ယူမှုကို ပိုမိုခိုင်မာစေပါသည်။ ထို့အပြင် သင်တန်းခန်းမအတွင်း ကြုံတွေ့ခဲ့ရသော အတွေ့အကြုံများကို လက်တွေ့လုပ်ငန်းခွင် သို့မဟုတ် နေ့စဉ်ဘဝနှင့် မည်သို့ ချိတ်ဆက်အသုံးပြုရမည်ကို သဘောပေါက်သွားစေပါသည်။
▪ ၂။ ORID နည်းလမ်းဖြင့် မေးခွန်းထုတ် သုံးသပ်ခြင်း (The ORID Method)
ကျွမ်းကျင်သော Facilitator တစ်ဦးသည် Debriefing ပြုလုပ်သည့်အခါ စနစ်ကျသော မေးခွန်းအစဉ်လိုက် မေးမြန်းခြင်း နည်းလမ်းတစ်ခုဖြစ်သည့် ORID Model ကို အသုံးပြုလေ့ရှိပါသည်။ ဤနည်းလမ်းသည် သင်တန်းသားများ၏ အတွေးအခေါ်ကို ရိုးရှင်းသော အချက်အလက်များမှသည် လက်တွေ့အသုံးချနိုင်သော ဆုံးဖြတ်ချက်များအထိ အဆင့်ဆင့် ဦးဆောင်ခေါ်ဆောင်ပေးပါသည်။

☑ (က) Objective (အချက်အလက် အခြေပြု မေးခွန်းများ)
ပထမဆုံး အဆင့်တွင် ဖြစ်ပျက်ခဲ့သည့် လက်တွေ့အချက်အလက်များကို သာမန်အတိုင်း ပြန်လည်ဖော်ထုတ်ရပါမည်။ ကိုယ်ပိုင်အမြင် သို့မဟုတ် ခံစားချက်များကို မမေးသေးဘဲ ကြုံတွေ့ခဲ့ရသည့် အဖြစ်အပျက်များကိုသာ ဦးတည်မေးမြန်းရပါမည်။
မေးခွန်းနမူနာများ: "ခုနက လေ့ကျင့်ခန်း လုပ်တုန်းက ဘာတွေ ဖြစ်ပျက်ခဲ့သလဲ"၊ "ဘယ်အဆင့်တွေကို အဓိက လုပ်ဆောင်ခဲ့ကြသလဲ"၊ "ဘယ်လို ရလဒ်တွေ ထွက်ပေါ်လာခဲ့သလဲ"။

☑ (ခ) Reflective (စိတ်ခံစားမှု အခြေပြု မေးခွန်းများ)
ဒုတိယ အဆင့်တွင် အဆိုပါ လှုပ်ရှားမှုအတွင်း သင်တန်းသားများ၏ စိတ်ခံစားမှု၊ တုံ့ပြန်မှုများနှင့် မမျှော်လင့်ဘဲ ကြုံတွေ့ခဲ့ရသည့် အရာများကို မေးမြန်းရပါမည်။

မေးခွန်းနမူနာများ: "ဒီလေ့ကျင့်ခန်း လုပ်နေချိန်မှာ ဘယ်လို ခံစားခဲ့ရသလဲ"၊ "ဘယ်နေရာမှာ အခက်အခဲဆုံးလို့ ခံစားရသလဲ"၊ "ဘယ်အရာက သင့်ကို အံ့အားသင့်စေခဲ့သလဲ"။

☑ (ဂ) Interpretive (အဓိပ္ပာယ် ဖော်ထုတ်သည့် မေးခွန်းများ)
တတိယ အဆင့်တွင် ဖြစ်ပျက်ခဲ့သည့် အချက်အလက်များနှင့် ခံစားချက်များကို အခြေခံ၍ သင်ခန်းစာ၏ အဓိပ္ပာယ်ကို စတင်ဖော်ထုတ်ရပါမည်။ ဤအဆင့်သည် သင်ယူမှုအနှစ်သာရကို ရှာဖွေသည့် အရေးကြီးဆုံး အဆင့်ဖြစ်ပါသည်။

မေးခွန်းနမူနာများ: "ဒီအတွေ့အကြုံကနေ ကျွန်တော်တို့ ဘာသင်ခန်းစာ ရလိုက်သလဲ"၊ "ဒီလေ့ကျင့်ခန်းက ကျွန်တော်တို့ရဲ့ လက်တွေ့အလုပ်ခွင်နဲ့ ဘယ်လို ဆက်စပ်နေသလဲ"၊ "အောင်မြင်ရတဲ့ သို့မဟုတ် မအောင်မြင်ရတဲ့ အဓိက အကြောင်းရင်းက ဘာလဲ"။

☑ (ဃ) Decisional (ဆုံးဖြတ်ချက်နှင့် လက်တွေ့အသုံးချမှု မေးခွန်းများ)
နောက်ဆုံး အဆင့်တွင် ရရှိခဲ့သော သင်ခန်းစာများကို အနာဂတ် လက်တွေ့ဘဝတွင် မည်သို့ ပြောင်းလဲအသုံးပြုမည်ဆိုသည့် ဆုံးဖြတ်ချက်များကို ချမှတ်စေရပါမည်။

မေးခွန်းနမူနာများ: "မနက်ဖြန် လုပ်ငန်းခွင် ပြန်ရောက်တဲ့အခါ ဒီသင်ခန်းစာကို မတူညီတဲ့ နည်းလမ်းနဲ့ ဘယ်လို အသုံးပြုမလဲ"၊ "နောင်မှာ ဒီလို အခြေအနေမျိုး ကြုံရရင် ဘာကို ပိုကောင်းအောင် လုပ်မလဲ"၊ "ဘာအပြုအမူတွေကို ချက်ချင်း စတင် လုပ်ဆောင်မလဲ"။
▪ ၃။ ထိရောက်သော Debriefing ဖြစ်စေရန် လိုက်နာရမည့် နည်းဗျူဟာများ
Debriefing လုပ်ငန်းစဉ် ချောမွေ့စေရန် Facilitator အနေဖြင့် အောက်ပါ နည်းလမ်းများကို ထည့်သွင်း ကျင့်သုံးသင့်ပါသည် -

ပွင့်လင်း မေးခွန်းများ အသုံးပြုပါ: "ဟုတ်ပါတယ်" သို့မဟုတ် "မဟုတ်ပါဘူး" ဟုသာ ဖြေဆိုရသော မေးခွန်းများကို ရှောင်ကြဉ်ပြီး "ဘာကြောင့်လဲ"၊ "ဘယ်လိုလဲ" ဟု စတင်သော ပွင့်လင်းမေးခွန်းများကို အသုံးပြုပါ။

သင်တန်းသားများကို အဖြေရှာပါစေ: Facilitator က သင်ခန်းစာကို တိုက်ရိုက် ရေးပြ၊ ပြောပြခြင်း မပြုဘဲ သင်တန်းသားများ၏ နှုတ်မှ အဖြေထွက်လာအောင် မေးခွန်းများဖြင့် လမ်းကြောင်းပေးပါ။

အဖြေအားလုံးကို လေးစားပါ: သင်တန်းသားများထံမှ ထွက်ပေါ်လာသော အမြင်အမျိုးမျိုးကို Flipchart ပေါ်တွင် ချရေးပြပြီး တန်ဖိုးထားကြောင်း ပြသပါ။
သင်ခန်းစာကို ချိတ်ဆက်ပေးပါ: အုပ်စုဆွေးနွေးမှုများ ပြီးဆုံးပါက Facilitator အနေဖြင့် အဓိက သင်ခန်းစာ အချက်အလက် (Key Takeaways) များကို မူလ သင်တန်းရည်မှန်းချက်နှင့် ပေါင်းစပ်၍ လှပစွာ အနှစ်ချုပ် ပေးရပါမည်။

16/08/2026

GEDSI သဘောတရားနှင့် နည်းပညာနှင့် သက်မွေးဝမ်းကျောင်း ပညာရေး (TVET) ကဏ္ဍတွင် နိုင်ငံတကာ အောင်မြင် မှု ဥပမာများ
-----------
GEDSI ဆိုသည်မှာ ကျားမ တန်းတူညီမျှမှု (Gender Equality)၊ မသန်စွမ်းသူများ ပါဝင်နိုင်မှု (Disability Inclusion) နှင့် လူမှုရေးအရ ပါဝင်နိုင်မှု (Social Inclusion) တို့ကို ပေါင်းစပ်ထားသည့် လူတိုင်း တန်းတူအခွင့်အရေးနှင့် အခွင့်အလမ်းများ ရရှိစေရေးဆိုင်ရာ ချဉ်းကပ်နည်းတစ်ခု ဖြစ်သည်။ နည်းပညာနှင့် သက်မွေးဝမ်းကျောင်း ပညာရေးနှင့် သင်တန်း (TVET) ကဏ္ဍတွင် GEDSI ကို ထည့်သွင်းကျင့်သုံးခြင်းသည် ဘေးဖယ်ခံထားရသော အုပ်စုများ၊ အမျိုးသမီးများနှင့် မသန်စွမ်းသူများအတွက် အလုပ်အကိုင် ကျွမ်းကျင်မှုများကို တန်းတူညီမျှ သင်ယူခွင့်ရရှိစေကာ "မည်သူမျှ နောက်ကျမကျန်ရစ်စေရေး" (No one is left behind) ဟူသော ရည်မှန်းချက်ကို အကောင်အထည်ဖော်ရာ၌ လွန်စွာ အဓိကကျလှသည်။
ကမ္ဘာတစ်ဝန်းရှိ TVET စနစ်များတွင် GEDSI ကို အကောင်အထည်ဖော်ရာ၌ ထင်ရှားသော အောင်မြင်မှုများစွာ ရှိခဲ့သည်။ ကင်ညာနိုင်ငံရှိ Machakos Technical Institute for the Blind (MTIB) သည် စာသင်ခန်းနှင့် လက်တွေ့ပေါင်းစပ် သင်ကြားသည့် Dual Training ပုံစံ၊ Braille အခြေပြု သင်ထောက်ကူများနှင့် ဒစ်ဂျစ်တယ် စခရင်ဖတ်ကိရိယာများကို အသုံးပြု၍ မသန်စွမ်းသူများနှင့် အမျိုးသမီးများအား STEM နှင့် ICT နယ်ပယ်များသို့ ကူးပြောင်းနိုင်ရေး အားပေးခဲ့ရာ ဘွဲ့ရသူများအတွက် အလုပ်အကိုင် အခွင့်အလမ်းများကို သိသိသာသာ တိုးတက်စေခဲ့သည်။ ထို့ပြင် ဖီဂျီနိုင်ငံတွင် Australia Pacific Training Coalition (APTC) နှင့် ဖီဂျီအမျိုးသားတက္ကသိုလ် (FNU) တို့ ပူးပေါင်း၍ GEDSI မဟာဗျူဟာ (၂၀၂၄-၂၀၂၆) ကို ရေးဆွဲကာ ဝေးလံခေါင်သီသော ဒေသမှ ပြည်သူများ၊ မသန်စွမ်းသူများနှင့် လိင်ကွဲပြားသူများ ပါဝင်နိုင်သည့် အတားအဆီးမဲ့ ပညာရေး အခွင့်အလမ်းများကို ဖန်တီးပေးလျက်ရှိသည်။
အလားတူ အင်ဒိုနီးရှားနိုင်ငံတွင်လည်း ILO ၏ Skills for Prosperity အစီအစဉ်အရ TVET သင်တန်းကျောင်းများ၌ လိင်ပိုင်းဆိုင်ရာ အကြမ်းဖက်မှုနှင့် စော်ကားမှုများကို ကိုင်တွယ်ဖြေရှင်းရန် စံလုပ်ထုံးလုပ်နည်းများ (SOPs)၊ လမ်းညွှန်စာအုပ်များနှင့် စုံစမ်းစစ်ဆေးရေး အဖွဲ့များ ဖွဲ့စည်းပေးနိုင်ခဲ့သည်။ နမီးဘီယာနိုင်ငံတွင် UNESCO ၏ ပံ့ပိုးမှုဖြင့် မသန်စွမ်းသူ သင်ယူသူများအပေါ် ခွဲခြားဆက်ဆံမှုများကို ဖော်ထုတ်ကာ သင့်လျော်သော အထောက်အကူပြု ကိရိယာများနှင့် လိုက်လျောညီထွေရှိသော သင်ကြားရေး အခင်းအကျင်းများကို ဖန်တီးပေးခဲ့သည်။ ဤအောင်မြင်မှုများအားလုံးသည် "ကျွန်ုပ်တို့အကြောင်း ကျွန်ုပ်တို့မပါဘဲ မဆုံးဖြတ်ရ" (Nothing about us without us) ဟူသည့် မူအတိုင်း ဘေးဖယ်ခံထားရသော အုပ်စုများကိုယ်တိုင် ဆုံးဖြတ်ချက်များတွင် ပါဝင်ဆောင်ရွက်ခြင်းဖြင့် ပိုမိုခိုင်မာ၍ ရေရှည်တည်တံ့သော လူ့အဖွဲ့အစည်းကို တည်ဆောက်နိုင်ကြောင်း မီးမောင်းထိုးပြနေပေသည်။

11/08/2026

စစ်မီးလျှံများကြားမှ ဒစ်ဂျစ်တယ် တော်လှန်ရေး
(ယူကရိန်း၏ Diia.Education နှင့် အဝေးရောက် အသက်မွေးဝမ်းကျောင်းဆိုင်ရာ အသွင်ကူးပြောင်းမှု)
———-

၂၀၂၂ ခုနှစ် ဖေဖော်ဝါရီလတွင် ဖြစ်ပွားခဲ့သော ရုရှား-ယူကရိန်း စစ်ပွဲသည် ယူကရိန်းနိုင်ငံ၏ မြို့ပြ အခြေခံအဆောက်အအုံများ၊ စက်ရုံများနှင့် ပုံမှန် စီးပွားရေးလည်ပတ်မှုများကို အကြီးအကျယ် ပျက်စီးစေခဲ့သည်။ စစ်ပွဲကြောင့် သန်းပေါင်းများစွာသော ပြည်သူများသည် ပြည်တွင်းနေရပ်စွန့်ခွာသူများ (IDP) ဖြစ်လာခဲ့ကြရ၏။ အလုပ်အကိုင်ပေါင်း မြောက်မြားစွာ ဆုံးရှုံးခဲ့ရ၏။ သို့သော်လည်း ယူကရိန်းအစိုးရသည် စစ်မီးတောက်လောင်နေဆဲ အချိန်၌ပင် ပြည်သူများ၏ စီးပွားရေးအရ ရပ်တည်နိုင်မှုကို မပျက်စီးစေရန်နှင့် ကျွမ်းကျင်မှုသစ်များ အလျင်အမြန် လေ့ကျင့်ပေးနိုင်ရန်အတွက် Diia.Education ခေါ် အမျိုးသားအဆင့် ဒစ်ဂျစ်တယ် သက်မွေးဝမ်းကျောင်းဆိုင်ရာ သင်တန်းနှင့် အလုပ်အကိုင် ချိတ်ဆက်ရေး ပလက်ဖောင်းကို ထူထောင်ကာ စံနမူနာပြ မော်ဒယ်တစ်ခုကို ဖန်တီးခဲ့၏။
◾️Diia.Education ပလက်ဖောင်း၏ စမတ်ကျသော သင်ကြားရေး မော်ဒယ်

Diia.Education သည် ယူကရိန်း ဒစ်ဂျစ်တယ် အသွင်ကူးပြောင်းရေး ဝန်ကြီးဌာန (Ministry of Digital Transformation) က Google.org နှင့် နိုင်ငံတကာ အဖွဲ့အစည်းများ၏ ပံ့ပိုးမှုဖြင့် တည်ဆောက်ထားသော Edutainment ပလက်ဖောင်း ဖြစ်၏။ စစ်ဘေးရှောင်နေရသူများ အချိန်ကြာမြင့်စွာ တက်ရောက်ရန် ခက်ခဲ‌ေစသည့် သမားရိုးကျ သင်တန်းများကို ရှောင်ရှားပြီး၊ စမတ်ဖုန်း သို့မဟုတ် Laptop ရှိရုံဖြင့် ၁ ပတ်မှ ၄ ပတ်အတွင်း တတ်မြောက်နိုင်သည့် Micro-credentials (အသက်မွေးဝမ်းကျောင်း သင်တန်းတိုများ) ကို အခမဲ့ သင်ယူနိုင်အောင် စီမံထားခဲ့သည်။ သင်ကြားရေး စနစ်တွင် စာတွေ့ သက်သက် မဟုတ်ဘဲ ရုပ်ရှင်/စီးရီး ကြည့်ရသကဲ့သို့ ပျော်ရွှင်စွာ သင်ယူနိုင်သည့် Edutainment format ကို သုံးထား၏။ လက်တွေ့ လုပ်ငန်းခွင် အခြေအနေများကို စမ်းသပ်နိုင်သည့် Simulators (တကယ့် လုပ်ငန်းခွင် ပုံစံအတုပြုလုပ်ထားသော စနစ်များ) ကို ပါဝင်ထည့်သွင်းထား၏။
◾️သင်ကြားပေးသော ခေတ်မီ သက်မွေးဝမ်းကျောင်း ကဏ္ဍများ

Diia.Education တွင် အဓိကအားဖြင့် စစ်ပွဲအတွင်း နယ်မြေမရွေး ဘေးကင်းစွာ လုပ်ကိုင်နိုင်သည့် Digital & Remote Skill များကို ဦးစားပေး သင်ကြားပေးပါသည်။ ဥပမာအားဖြင့် Graphic Design၊ Social Media Marketing (SMM)၊ Data Entry & Analysis၊ Copywriting၊ Python Programming၊ UI/UX Design နှင့် Software Testing (QA) စသည့် သင်တန်းပေါင်း ၂၃၀ ကျော်နှင့် သီးသန့် အသက်မွေးဝမ်းကျောင်း လမ်းကြောင်းပေါင်း ၅၀ ကျော်ကို လေ့ကျင့်ပေးနိုင်စွမ်းရှိ၏။ ထို့ပြင် Digigram ဟုခေါ်သော ဒစ်ဂျစ်တယ် ကျွမ်းကျင်မှု စစ်ဆေးသည့် ဥရောပစံချိန်မီ အွန်လိုင်း စာမေးပွဲစနစ် ပါဝင်ပြီး စာမေးပွဲအောင်မြင်ပါက ကိုယ်ရေးအကျဉ်း (CV) တွင် တရားဝင် ထည့်သွင်းအသုံးပြုနိုင်သော လက်မှတ်များ ထုတ်ပေးပါသည်။
◾️အလုပ်အကိုင်နှင့် တိုက်ရိုက် ချိတ်ဆက်ပေးခြင်း (Employment Integration)

Diia.Education ၏ အဓိက ထူးခြားချက်မှာ သင်တန်းပေးရုံဖြင့် ရပ်တန့်မနေဘဲ ယူကရိန်းနိုင်ငံ၏ အကြီးဆုံး လုပ်ငန်းခွင် ရှာဖွေရေး ပလက်ဖောင်းများနှင့် တိုက်ရိုက် ချိတ်ဆက်ပေးထားခြင်း ဖြစ်သည်။ သင်တန်းဆင်းသူများသည် ပလက်ဖောင်းပေါ်မှတစ်ဆင့် ပြည်တွင်း/ပြည်ပ IT ကုမ္ပဏီများ၊ ပုဂ္ဂလိက လုပ်ငန်းများနှင့် တိုက်ရိုက် ချိတ်ဆက်၍ Remote Jobs (အဝေးရောက် အလုပ်အကိုင်များ) နှင့် Freelance အလုပ်များကို စစ်ဘေးရှောင်စခန်းများ သို့မဟုတ် ဘေးကင်းသည့် ဒေသများမှနေ၍ ချက်ချင်း လျှောက်ထား ဝင်ငွေရှာဖွေနိုင်ခဲ့ကြသည်။

ရရှိခဲ့သော ရလဒ်များနှင့် စံနမူနာပြ သက်ရောက်မှု
အဆိုပါ စီမံကိန်းမှတစ်ဆင့် ယူကရိန်း ပြည်သူ သန်းပေါင်းများစွာ၏ ဒစ်ဂျစ်တယ် ကျွမ်းကျင်မှုကို အောင်မြင်စွာ မြှင့်တင်ပေးနိုင်ခဲ့ပြီး၊ အလုပ်အကိုင် မရှိတော့သော IDP များနှင့် အမျိုးသမီးများအား အဝေးရောက် အလုပ်အကိုင်များဆီသို့ ချိတ်ဆက်ကူးပြောင်းပေးနိုင်ခဲ့ပါသည်။ စစ်ပွဲအတွင်း တိုင်းပြည်၏ စီးပွားရေး လည်ပတ်မှုကို ဒစ်ဂျစ်တယ်နည်းပညာဖြင့် ထိန်းသိမ်းထားနိုင်ခဲ့ရုံမျှမက၊ နိုင်ငံတကာ နဂိုစံနှုန်းများအတိုင်း ပြည်သူများ၏ Human Capital (လူသားအရင်းအမြစ်) ကို စစ်မီးကြားမှ အောင်မြင်စွာ ကာကွယ်မြှင့်တင်နိုင်ခဲ့သည့် ခေတ်သစ် ပဋိပက္ခအတွင်း သင်တန်းနှင့် အလုပ်အကိုင် ဖန်တီးရေး Success Story တစ်ခု ဖြစ်ပါသည်။
References
၁။ Diia.Education Official Website

Link: https://osvita.diia.gov.ua/en

၂။ Ministry of Digital Transformation of Ukraine

Link: https://thedigital.gov.ua/projects/govtech/diia-education

၃။ East Europe Foundation (EEF) – Diia.Education Project Description

Link: https://eef.org.ua/en/platforma-diya-osvita/

08/08/2026

ယီမင်နိုင်ငံ၏ အကျပ်အတည်းကြားမှ အရေးပေါ် အလုပ်အကိုင်နှင့် ပြန်လည်ထူထောင်ရေး မော်ဒယ်
--------------
ကမ္ဘာ့အဆိုးဝါးဆုံးသော ပဋိပက္ခဒဏ်ကို ခံစားနေရပြီး စီးပွားရေးစနစ်တစ်ခုလုံး ပြိုကျကင်းမဲ့သွားခဲ့သည့် ယီမင်နိုင်ငံ၏ စစ်ပွဲအတွင်းကာလများသည် ပြည်သူများအတွက် ရှင်သန်ရပ်တည်ရန် အလွန်ခက်ခဲသော အခြေအနေတစ်ရပ် ဖြစ်ခဲ့ပါသည်။ သို့ရာတွင် ဤကဲ့သို့သော အကျပ်အတည်းကာလအတွင်း၌ ကုလသမဂ္ဂ ဖွံ့ဖြိုးမှုအစီအစဉ် (UNDP) မှ ဦးဆောင်အကောင်အထည်ဖော်ခဲ့သည့် ERRY (Enhanced Rural Resilience in Yemen) စီမံကိန်းသည် အရေးပေါ် အလုပ်အကိုင်ဖန်တီးပေးခြင်းနှင့် လုပ်အားခချက်ချင်းပေးစနစ် (Cash-for-Work) တို့ကို အောင်မြင်စွာ ပေါင်းစပ်နိုင်ခဲ့သည့် အကောင်းဆုံး စံနမူနာပြ မော်ဒယ်တစ်ခု ဖြစ်လာခဲ့ပါသည်။ ဤစီမံကိန်းသည် စစ်မီးတောက်လောင်နေဆဲ အချိန်၌ပင် ပြည်သူများ၏ ဝမ်းစာရေးနှင့် ဒေသတွင်း ပြန်လည်ထူထောင်ရေးကို တစ်ပြိုင်နက်တည်း ဖြေရှင်းပေးနိုင်ခဲ့သည့် ထူးခြားသော အစီအစဉ်တစ်ခု ဖြစ်ပါသည်။
အဆိုပါ စီမံကိန်း၏ အဓိက လုပ်ဆောင်ချက်အနေဖြင့် ပဋိပက္ခဖြစ်ပွားနေသည့် ကြားမှပင် ဒေသခံ လူငယ်များနှင့် အမျိုးသမီးများကို လက်တွေ့အသုံးကျမည့် အသက်မွေးဝမ်းကျောင်း သင်တန်းများ စနစ်တကျ ပို့ချပေးခဲ့ပါသည်။ အထူးသဖြင့် လျှပ်စစ်မီး ပြတ်တောက်နေမှုကို အစားထိုးနိုင်ရန် နေရောင်ခြည်စွမ်းအင် (Solar Energy) တပ်ဆင်ခြင်းနှင့် ထိန်းသိမ်းခြင်းဆိုင်ရာ နည်းပညာများကို သင်ကြားပေးခဲ့ပါသည်။ ထို့အပြင် စစ်ပွဲကြောင့် ပျက်စီးသွားသော လမ်းပန်းဆက်သွယ်ရေးနှင့် အဆောက်အအုံများအတွက် အရေးပေါ် အခြေခံ ဆောက်လုပ်ရေးနှင့် လမ်းပြင်ဆင်နည်းများကိုလည်း လေ့ကျင့်သင်ကြားပေးခဲ့သည့်အပြင် ဒေသခံ တောင်သူများအတွက် စိုက်ပျိုးရေး ထုတ်ကုန်များ လွယ်ကူစွာ မပျက်စီးစေရန် စမတ်နည်းပညာများအသုံးပြု၍ စနစ်တကျ သိုလှောင်ထိန်းသိမ်းနည်းများကိုပါ ပံ့ပိုးကူညီ သင်ကြားပေးနိုင်ခဲ့ပါသည်။
စီမံကိန်း၏ ရလဒ်အနေဖြင့် လူငယ်များနှင့် အမျိုးသမီးများအား ကာလတိုသင်တန်းများ ပေးရုံသက်သက်ဖြင့် ရပ်တန့်မနေဘဲ သင်ယူတတ်မြောက်ထားသော ကျွမ်းကျင်မှုများကို အသုံးပြု၍ ဒေသတွင်းရှိ ပျက်စီးသွားသော အခြေခံအဆောက်အအုံများကို ကိုယ်တိုင် ပြန်လည်ပြင်ဆင်တည်ဆောက်စေခဲ့ပါသည်။ ထိုသို့ ပြင်ဆင်တည်ဆောက်ရာတွင် Cash-for-Work ဟုခေါ်သော လုပ်အားခ ချက်ချင်းပေးသည့် စနစ်ကို ကျင့်သုံးခဲ့သောကြောင့် ပြည်သူများအနေဖြင့် ၎င်းတို့၏ လုပ်အားအတွက် ဝင်ငွေကို ချက်ချင်းရရှိစေကာ မိသားစု စားဝတ်နေရေးကို အချိန်မီ ဖြေရှင်းနိုင်ခဲ့ကြပါသည်။ ပိုမို၍ ထူးခြားထင်ရှားသော အောင်မြင်မှုတစ်ခုမှာ သင်တန်းဆင်းများမှတစ်ဆင့် နေရောင်ခြည်စွမ်းအင်သုံး လျှပ်စစ်ဖြန့်ဝေမှုစနစ် (Solar Micro-grid) များကို အကောင်အထည်ဖော်နိုင်ခဲ့ပြီး အဆိုပါစနစ်ကို ဦးဆောင်လည်ပတ်မည့် အသေးစား စီးပွားရေးလုပ်ငန်းရှင်ပေါင်း ထောင်ပေါင်းများစွာကို အောင်မြင်စွာ မတည်ထူထောင်ပေးနိုင်ခဲ့ခြင်းပင် ဖြစ်ပါသည်။
References
UNDP Yemen – ERRY (Enhanced Rural Resilience in Yemen) Program https://www.undp.org/yemen/projects/enhanced-rural-resilience-yemen-erry
UNDP Yemen – Solar Micro-Grids Transformation Story https://www.undp.org/yemen/stories/solar-micro-grids-transforming-lives-yemen
International Labor Organization (ILO) – Emergency Employment & Cash-for-Work in Yemen https://www.ilo.org/resource/news/ilo-and-undp-support-emergency-employment-and-livelihoods-yemen

06/08/2026

စစ်ပွဲများကြားမှ မျှော်လင့်ချက်နှင့် ကျွမ်းကျင်မှု လေ့ကျင့်ရေး
(ဆီးရီးယား စစ်ဘေးသင့်ဒေသများနှင့် ဒုက္ခသည်စခန်းများ၏ သက်မွေးဝမ်းကျောင်းကျွမ်းကျင်မှုဆိုင်ရာ မော်ဒယ်များ)
------------
၂၀၁၁ ခုနှစ်မှစတင်၍ ဖြစ်ပွားခဲ့သော ဆီးရီးယားပဋိပက္ခသည် ခေတ်သစ်သမိုင်းတွင် အဆိုးဝါးဆုံး လူသားချင်းစာနာထောက်ထားမှုဆိုင်ရာ အကျပ်အတည်းများအနက် တစ်ခုဖြစ်ခဲ့သည်။ စစ်ပွဲ၏ ရလဒ်အဖြစ် နိုင်ငံ၏ အခြေခံအဆောက်အအုံများနှင့် စက်မှုကဏ္ဍများ အကြီးအကျယ် ပျက်စီးခဲ့၏။ ပြည်သူသန်းပေါင်းများစွာသည် ပြည်တွင်းစစ်ဘေးရှောင်များ (IDPs) နှင့် ဘေးလွတ်ရာ ဒုက္ခသည်စခန်းများသို့ ထွက်ပြေးခဲ့ကြရသည်။ သို့သော်လည်း အဆိုးဝါးဆုံး ပဋိပက္ခအတွင်း ကာလများ၌ပင် ကုလသမဂ္ဂ အဖွဲ့အစည်းများ (UNHCR, ILO, UNIDO) နှင့် နိုင်ငံတကာ NGO များ (Mercy Corps, ACTED) တို့သည် စစ်ဘေးသင့်ပြည်သူများ၏ အလုပ်အကိုင်ဆိုင်ရာကျွမ်းကျင်မှု မြှင့်တင်ပေးနိုင်စေရန်နှင့် သက်မွေးဝမ်းကျောင်းပြုနိုင်ရန်အတွက် ဆန်းသစ်သော သက်မွေးဝမ်းကျောင်းကျွမ်းကျင်မှုဆိုင်ရာ ပြန်လည်သင်ကြားပေးရေး (Vocational Reskilling) အစီအစဉ်များကို စနစ်တကျ အကောင်အထည်ဖော်ခဲ့ကြသည်။
👉 ၁။ ပဋိပက္ခအတွင်း အဓိက အကောင်အထည်ဖော်ခဲ့သည့် မော်ဒယ်များ
ဆီးရီးယား ပဋိပက္ခအတွင်း ဆောင်ရွက်ခဲ့သည့် သက်မွေးဝမ်းကျောင်း ကျွမ်းကျင်မှုလေ့ကျင့်ရေးစီမံကိန်းများသည်သမားရိုးကျ ပုံမှန်သင်တန်းပေးခြင်းထက် အရေးပေါ် အခြေအနေနှင့် ကိုက်ညီသည့် နည်းလမ်းများကို အသုံးပြုခဲ့ကြသည်။
✅ ဒစ်ဂျစ်တယ်နှင့် နည်းပညာအခြေပြု ကျွမ်းကျင်မှုများ (3𝘿 𝙋𝒓𝙞𝒏𝙩𝒊𝙣𝒈 & 𝑻𝙚𝒄𝙝 𝙍𝒆𝙨𝒌𝙞𝒍𝙡𝒊𝙣𝒈) - ဂျော်ဒန်နိုင်ငံရှိ ဆီးရီးယားဒုက္ခသည်စခန်း Zaatari Camp တွင် Mercy Corps အဖွဲ့သည် ဒုက္ခသည်များအား 3D Printing နည်းပညာနှင့် စကန်ဖတ်စနစ်များကို အသုံးပြုနိုင်ရန် သင်တန်းပေးခဲ့သည်။ စစ်ပွဲကြောင့် အကူအညီပစ္စည်း ရရှိရန် ခက်ခဲချိန်၌ စခန်းအတွင်းရှိ ဒုက္ခသည်များသည် 3D Printer ကို အသုံးပြု၍ မသန်စွမ်းကလေးများအတွက် အထောက်အကူပြု ကိရိယာများ (Assistive Tools)နှင့် ခြေတုလက်တု အစိတ်အပိုင်းများကို ဒေသတွင်း၌ပင် ကိုယ်တိုင် ထုတ်လုပ်နိုင်ခဲ့ကြ၏။
✅ စက်မှုနှင့် နည်းပညာကဏ္ဍ ပြန်လည်ထူထောင်ခြင်း (𝙐𝑵𝙄𝑫𝙊 𝙄𝒏𝙙𝒖𝙨𝒕𝙧𝒊𝙖𝒍 𝑹𝙚𝒔𝙠𝒊𝙡𝒍𝙞𝒏𝙜) - UNIDO သည် ဒမတ်စကပ်နှင့် အလက်ပို မြို့ကြီးများရှိ ပျက်စီးသွားသော စက်မှုသင်တန်းကျောင်းများကို ပြန်လည် ပြင်ဆင်ပြီး Hydraulics, Pneumatics နှင့် PLC (Automation) ဆိုင်ရာ သင်တန်းများကို သင်ကြားပေးခဲ့သည်။ သင်တန်းသားများ၏ ၃၀% မှာ အမျိုးသမီးများ ဖြစ်ကြ၏။ စစ်ပွဲအတွင်း စက်ရုံများနှင့် ရေ၊ လျှပ်စစ် အခြေခံ အဆောက်အအုံများ ပြန်လည်ပြင်ဆင်ရေးအတွက် လိုအပ်သော ကျွမ်းကျင်လုပ်သားများကို လျင်မြန်စွာ မွေးထုတ်ပေးနိုင်ခဲ့၏။
✅ စခန်းအတွင်း သန့်ရှင်းရေးနှင့် ပြုပြင်ထိန်းသိမ်းရေးဆိုင်ရာ 𝑪𝙖𝒔𝙝-𝙛𝒐𝙧-𝙒𝒐𝙧𝒌 - ACTED စသည့် NGO များသည် စစ်ဘေးရှောင်စခန်းများနှင့် ဒေသတွင်း အသိုင်းအဝိုင်းများ၌ ဆေးသုတ်ခြင်း၊ အဆောက်အအုံ ပြန်လည်ပြင်ဆင်ခြင်းနှင့် ရေ/သန့်ရှင်းရေး အသုံးအဆောင်များ ထုတ်လုပ်ခြင်းဆိုင်ရာ သင်တန်းတိုများပေး၍ လုပ်အားခ ချက်ချင်းပေးသည့် (Cash-for-Work) စနစ်ဖြင့် ဝင်ငွေတိုက်ရိုက် ဖန်တီးပေးခဲ့ပါသည်။

👉၂။ စီမံကိန်းများ၏ အဓိက အောင်မြင်မှုနှင့် သက်ရောက်မှုများ
✅ ဒေသတွင်း ကိုယ်ထူကိုယ်ထ စီးပွားရေး (𝘾𝒂𝙢𝒑 𝑬𝙘𝒐𝙣𝒐𝙢𝒚) ဖြစ်ထွန်းလာခြင်း - ပြင်ပမှ ကူညီထောက်ပံ့ရေး ပစ္စည်းများကို အားပြုနေခြင်းမဟုတ်ဘဲ စခန်းအတွင်းရှိ ဒုက္ခသည်များ၏ ကျွမ်းကျင်မှုဖြင့် ဖုန်းပြင်ခြင်း၊ စက်ပစ္စည်း ပြင်ဆင်ခြင်း၊ အဝတ်အထည်နှင့် သန့်ရှင်းရေး ပစ္စည်းများ ထုတ်လုပ်ခြင်းဖြင့် မိသားစု ဝမ်းစာကို ရပ်တည်နိုင်ခဲ့ကြ၏။

✅ အမျိုးသမီးများနှင့် လူငယ်များ၏ အခန်းကဏ္ဍ မြင့်တက်လာခြင်း - အိမ်ထောင်ဦးစီး အမျိုးသားများ တိုက်ပွဲအတွင်း ပျောက်ဆုံး/သေဆုံးခဲ့ရသည့် မိသားစုများတွင် အမျိုးသမီးများကို နည်းပညာနှင့် စက်မှုဆိုင်ရာ သင်တန်းများ ပေးနိုင်ခဲ့သဖြင့် မိသားစုကို ဦးဆောင်နိုင်သည့် ဝင်ငွေရလမ်းများ ပွင့်သွားခဲ့သည်။
✅ စိတ်ပိုင်းဆိုင်ရာ ပြန်လည်ကုစားနိုင်ခြင်း (𝙋𝒔𝙮𝒄𝙝𝒐𝙨𝒐𝙘𝒊𝙖𝒍 𝑰𝙢𝒑𝙖𝒄𝙩) - စစ်ပွဲအတွင်း စိတ်ဒဏ်ရာ (Trauma) ရရှိထားသူများအတွက် အလုပ်အကိုင်နှင့် ကျွမ်းကျင်မှု သင်တန်းများတွင် ပါဝင်ရခြင်းသည် ကိုယ်တိုင်တန်ဖိုး ပြန်လည်တွေ့ရှိစေပြီး လူမှုအသိုင်းအဝိုင်းအတွင်း ပူးပေါင်းဆောင်ရွက်မှုကို အားကောင်းစေခဲ့သည်။
ဆီးရီးယားနိုင်ငံ၏ သက်မွေးဝမ်းကျောင်းဆိုင်ရာ အထောက်အကူပြုရေးမော်ဒယ်သည် "အကြပ်အတည်း(crisis) ကာလများ၌ အရေးပေါ် အကူအညီများ (Emergency Relief) ပေးရုံဖြင့် မလုံလောက်ဘဲ ပြည်သူများ၏ ကျွမ်းကျင်မှုကို မြှင့်တင်ပေးခြင်း (Vocational Reskilling) ဖြင့် လျင်မြန်စွာ ပြန်လည်ထူထောင်နိုင်မည့် ဒေါက်တိုင်တခုကို တည်‌ေဆာက်နိုင်မည်ဖြစ်‌ေကြာင်းပြသနိုင်ခဲ့သည်" ဆိုသည့် အချက်ကို သက်သေပြနေခဲ့ပါ၏။ စစ်မီးလျှံများကြား၌ပင် နည်းပညာနှင့် လက်တွေ့ကျသော သင်တန်းများကို ပညာပေးနိုင်ခဲ့ခြင်းကြောင့် စစ်ပွဲအလွန် တိုင်းပြည် ပြန်လည်ထူထောင်ရေးအတွက် အဖိုးတန်သော လူသားအရင်းအမြစ် (Human Capital) ကို ထိန်းသိမ်းနိုင်ခဲ့ခြင်း ဖြစ်ပါသည်။

References
၁။ UNHCR - Technical and Vocational Education and Training (TVET)
Website Link: https://www.unhcr.org/what-we-do/build-better-futures/education/higher-education-and-skills/technical-vocational-education-training
၂။ Mercy Corps - 3D Printing in Syrian Refugee Camp Case Study
Website Link: https://www.mercycorps.org/blog/3d-printing-syrian-refugee-camp
၃။ UNIDO - Improving Industrial Vocational Training in Syria
Website Link: https://www.unido.org/stories/syria-improving-industrial-vocational-and-technical-training-accelerate-re-establishment-sustainable-livelihoods

08/07/2026

𝐅𝐚𝐜𝐢𝐥𝐢𝐭𝐚𝐭𝐢𝐨𝐧 အခြေခံသဘောတရားများ (၃) - 𝐅𝐨𝐮𝐧𝐝𝐚𝐭𝐢𝐨𝐧𝐬 𝐨𝐟 𝐅𝐚𝐜𝐢𝐥𝐢𝐭𝐚𝐭𝐢𝐨𝐧
⬛️ သင်တန်းသားများ၏ တုံ့ပြန်မှုကို ကိုင်တွယ်ခြင်း (Navigating Group Dynamics)
သင်တန်းခန်းမတစ်ခုအတွင်းသို့ လူပုဂ္ဂိုလ်မျိုးစုံ စုဝေးရောက်ရှိလာသည့်အခါ မတူညီသော စရိုက်လက္ခဏာများ၊ စိတ်ခံစားမှုများနှင့် အပြုအမူများ ပေါင်းစပ်ပြီး အဖွဲ့အစည်းဆိုင်ရာ ရွေ့လျားမှုစွမ်းအား (Group Dynamics) တစ်ခု ဖြစ်ပေါ်လာသည်။ ကျွမ်းကျင်သော Facilitator တစ်ဦးသည် သင်တန်းသားများ၏ အပြုအမူများကို ကြည့်ပြီး သင်တန်းတစ်ခုလုံးကို လိုအပ်သလို ထိန်းကျောင်းမောင်းနှင်နိုင်စွမ်း ရှိရပါမည်။
🔳 ၁။ သင်တန်းကို အကဲခတ်ခြင်း (Reading the Room)
Facilitator တစ်ဦးသည် သင်ခန်းစာပို့ချနေစဉ်အတွင်း သင်တန်းသားများ၏ ကိုယ်အမူအရာ (Body Language) ကို အမြဲမပြတ် စောင့်ကြည့်ဆန်းစစ်နေရပါမည်။ အဓိကအားဖြင့် အောက်ပါ အခြေအနေ (၂) မျိုးကို သတိပြုရပါမည် -
(က) စွမ်းအင် ကျဆင်းနေသော အခြေအနေ (Low Energy / Boredom)
☑️ လက္ခဏာများ: သင်တန်းသားများ ထိုင်ခုံတွင် လျှောကျထိုင်နေခြင်း၊ သမ်းဝေခြင်း၊ ဖုန်းများကို ခိုးကြည့်နေခြင်း၊ မေးခွန်းမေးလျှင် ပြန်မဖြေခြင်း။
☑️ တုံ့ပြန်ရန်နည်းလမ်း: သင်ခန်းစာကို ချက်ချင်းရပ်ပြီး ၃ မိနစ်ခန့်ကြာမည့် စွမ်းအင်မြှင့်လှုပ်ရှားမှု (Energizer) တစ်ခု ပြုလုပ်ပါ သို့မဟုတ် ကိုယ်လက်လှုပ်ရှားရန် အနားပေးပါ။
(ခ) တင်းမာမှု မြင့်မားနေသော အခြေအနေ (High Tension / Friction)
☑️ လက္ခဏာများ: အဖွဲ့လိုက် ဆွေးနွေးမှုများအတွင်း အသံကျယ်လာခြင်း၊ အငြင်းပွားမှု ပြင်းထန်လာခြင်း၊ ကိုယ်အမူအရာများ တင်းမာလာခြင်း။
☑️ တုံ့ပြန်ရန်နည်းလမ်း: ခေတ္တခဏ လက်ဖက်ရည်သောက် အနားပေးလိုက်ပါ (Bio-break)။ သို့မဟုတ် ချမှတ်ထားသော Ground Rules (သင်တန်းစည်းကမ်းချက်များ) ကို ပြန်လည်ရည်ညွှန်းပြီး ဆွေးနွေးမှုကို အပြုသဘောဆောင်သော လမ်းကြောင်းသို့ ပြန်လည်ပို့ဆောင်ပါ။
🔳 ၂။ စိန်ခေါ်မှုရှိသော သင်တန်းသားစရိုက်များကို ကိုင်တွယ်ခြင်း (Managing Difficult Participants)
သင်တန်းတိုင်းတွင် စိန်ခေါ်မှုရှိသော သင်တန်းသား စရိုက်လက္ခဏာများကို ကြုံတွေ့ရလေ့ရှိသည်။ ထိုသူများကို ရန်လိုသောနည်းလမ်းဖြင့် မဟုတ်ဘဲ ဗျူဟာမြောက်စွာ ကိုင်တွယ်ရန် လိုအပ်ပါသည် -
(က) စကားအလွန်ပြောသူ (The Talker / Dominator)
ဤသင်တန်းသားသည် မေးခွန်းတိုင်းကို ဖြေဆိုပြီး အုပ်စုလိုက်ဆွေးနွေးမှုများကို ၎င်းတစ်ဦးတည်းကသာ လွှမ်းမိုးထားလိုသူ ဖြစ်သည်။
☑️ မလုပ်သင့်သောအရာ: စိတ်ဆိုးမာန်ဆိုးဖြင့် စကားဖြတ်ခြင်း။
☑️ ဗျူဟာမြောက်ကိုင်တွယ်နည်း: ၎င်းစကားပြောပြီးနောက် "ကျေးဇူးတင်ပါတယ်... အရမ်းကောင်းတဲ့ အမြင်ပါပဲ။ အခု တခြားတစ်ယောက်ယောက်ဆီက အသံကိုလည်း နားထောင်ကြည့်ရအောင်" ဟု ပြောကာ အခြားသူများဘက်သို့ မျက်နှာမူလိုက်ပါ။ သို့မဟုတ် "ဒီတစ်ခါတော့ စကားမပြောရသေးတဲ့သူတွေဆီက အမြင်ကို ဦးစားပေး နားထောင်ကြည့်ချင်ပါတယ်" ဟု ပြောပါ။
(ခ) အမြဲသံသယရှိသူ/ဝေဖန်သူ (The Skeptic / Complainer)
ဤသင်တန်းသားသည် သင်ကြားသမျှ အကြောင်းအရာတိုင်းကို အဆိုးမြင်တတ်ပြီး လက်တွေ့မကျဟု ဝေဖန်လေ့ရှိသည်။
☑️ မလုပ်သင့်သောအရာ: Facilitator ကိုယ်တိုင် ပြန်လည်အငြင်းပွားပြီး ရန်ဖြစ်ခြင်း။
☑️ ဗျူဟာမြောက်ကိုင်တွယ်နည်း: ၎င်း၏ဝေဖန်မှုကို မငြင်းပယ်ဘဲ အသိအမှတ်ပြုပါ - "စိတ်ဝင်စားစရာ စိန်ခေါ်မှုတစ်ခုပါပဲ။ ဒါဆိုရင် ဒီပြဿနာကို လုပ်ငန်းခွင်မှာ တကယ်ကြုံရရင် ကျွန်တော်တို့ ဘယ်လိုဖြေရှင်းကြမလဲ၊ အားလုံး ဝိုင်းစဉ်းစားကြည့်ရအောင်" ဟု ဆိုကာ မေးခွန်းကို တစ်ခန်းလုံးရှိ သင်တန်းသားများထံသို့ ပြန်လည်လွှဲပြောင်းပေးလိုက်ပါ။
(ဂ) ငြိမ်လွန်းသူ (The Silent Participant / Introvert)
ဤသင်တန်းသားသည် အသိပညာရှိသော်လည်း လူကြားထဲတွင် ထုတ်ဖော်ပြောဆိုရန် ရှက်ရွံ့နေသူ ဖြစ်သည်။
☑️ မလုပ်သင့်သောအရာ: လူအများရှေ့တွင် နာမည်ခေါ်ပြီး ရုတ်တရက် မေးခွန်းထုတ်ကာ စိတ်ဖိစီးစေခြင်း။
☑️ ဗျူဟာမြောက်ကိုင်တွယ်နည်း: အုပ်စုငယ်လေးများခွဲ၍ ဆွေးနွေးခိုင်းခြင်း (Group Work) သို့မဟုတ် Think-Pair-Share (နှစ်ယောက်တွဲ ဆွေးနွေးခြင်း) ကို သုံးပါ။ လူဦးရေနည်းသွားသည့်အခါ ၎င်းတို့ ပိုမိုပွင့်လင်းလာပါလိမ့်မည်။
(ဃ) ဘေးချင်းကပ် စကားပြောနေသူများ (The Side-Talkers)
Facilitator စကားပြောနေစဉ် ဘေးနားရှိလူနှင့် ကိုယ်ပိုင်ကိစ္စများကို တိုးတိုးတိုးတိုး ပြောနေသူများ ဖြစ်သည်။
☑️ မလုပ်သင့်သောအရာ: "စကားမပြောပါနဲ့" ဟု ကျောင်းဆရာကဲ့သို့ အော်ဟစ်ငေါက်ငမ်းခြင်း။
☑️ ဗျူဟာမြောက်ကိုင်တွယ်နည်း: စကားပြောနေသူများ၏ အနီးအနားသို့ ဖြည်းဖြည်းချင်း လမ်းလျှောက်သွားရင်း သင်ခန်းစာကို ဆက်လက်ပို့ချပါ။ Facilitator က ၎င်းတို့အနီးသို့ ရောက်သွားသည့်အခါ ၎င်းတို့ဘာသာ သတိပြုမိပြီး စကားပြောခြင်းကို ရပ်တန့်သွားပါလိမ့်မည်။ သို့မဟုတ် စက္ကန့်အနည်းငယ်မျှ စကားပြောခြင်းကို ရပ်ပြီး တိတ်ဆိတ်စွာ စောင့်ကြည့်လိုက်ပါ။
🔳 ၃။ တိတ်ဆိတ်ခြင်း၏ စွမ်းအားကို အသုံးပြုခြင်း (The Power of Silence / The 5-Second Rule)
Facilitator အများစုသည် မေးခွန်းတစ်ခုမေးပြီးနောက် သင်တန်းခန်းမ တိတ်ဆိတ်သွားပါက စိုးရိမ်စိတ်ဝင်ကာ ကိုယ်တိုင်ချက်ချင်း ပြန်ဖြေလေ့ရှိကြသည်။ ၎င်းသည် မှားယွင်းသော လုပ်ဆောင်ချက် ဖြစ်သည်။
☑️ The 5-Second Rule: မေးခွန်းတစ်ခုမေးပြီးပါက အနည်းဆုံး ၅ စက္ကန့်မှ ၁၀ စက္ကန့်အထိ တိတ်ဆိတ်စွာ စောင့်ဆိုင်းပေးပါ။ သင်တန်းသားများသည် စကားလုံးများကို ဦးနှောက်ထဲတွင် ပြန်လည်စီစဉ်ရန်နှင့် စဉ်းစားရန် အချိန်လိုအပ်သည်။
☑️ တိတ်ဆိတ်မှုကို ခွင့်ပြုပေးခြင်းဖြင့် သင်တန်းသားများသည် မိမိကိုယ်ကိုယ် ယုံကြည်မှုရှိရှိဖြင့် လက်ညှိုးထောင်ကာ ဖြေဆိုလာကြပါလိမ့်မည်။
🔳 ၄။ အပြုသဘောဆောင်သော ပတ်ဝန်းကျင်ကို ထိန်းသိမ်းခြင်း (Maintaining Positive Dynamics)
အုပ်စု၏ စွမ်းဆောင်ရည်ကို မြှင့်တင်ရန်အတွက် အောက်ပါ လုပ်ဆောင်ချက်များကို စဉ်ဆက်မပြတ် လုပ်ဆောင်ပါ -
☑️ အပြုသဘောဆောင်သော အားဖြည့်မှု (Positive Reinforcement): တုံ့ပြန်မှုတိုင်းကို အကောင်းမြင်ပေးပါ - "မှန်ပါတယ်" ဟု ပြောမည့်အစား "စိတ်ဝင်စားစရာ အိုင်ဒီယာပဲ"၊ "တော်တော်လေး စဉ်းစားမိထားတာပဲ" စသဖြင့် အားပေးပါ။
☑️ မျှတစွာ နေရာပေးခြင်း (Equal Opportunity): ရှေ့ဆုံးတန်းမှ လူများသာမက နောက်ဆုံးတန်းနှင့် ဘေးဘက်ရှိ လူများကိုပါ မျက်လုံးချင်းဆုံပြီး ဆွေးနွေးမှုတွင် ပါဝင်လာအောင် ဖိတ်ခေါ်ပါ။

ที่อยู่

Chiang Mai
50300

เบอร์โทรศัพท์

+66970365858

เว็บไซต์

https://www.vsb-myanmar.org/

แจ้งเตือน

เป็นคนแรกที่รู้ข่าว: เราจะส่งอีเมลแจ้งเมื่อ VSB Myanmar โพสต์ข่าวสารและโปรโมชั่น อีเมลของคุณจะไม่ถูกนำไปใช้เพื่อวัตถุประสงค์อื่น และคุณสามารถยกเลิกการรับข่าวสารได้ทุกเมื่อ