22/03/2025
ကျောက်တော်တွင် စစ်ကျန်ဗုံးသီးနှင့် ဆော့ကစားရာမှ ပေါက်ကွဲမှုဖြစ်ပွားပြီး ဆယ်ကျော်သက်တစ်ဦး သေဆုံး၊ ၄ဦး ဒဏ်ရာရ
AK - မတ် ၂၀
ကျောက်တော်မြို့နယ်၊ မင်းသားတောင်ကျေးရွာတွင် စစ်ကျန်ဗုံးသီး တစ်လုံးကို ကောက်ယူ ဆော့ကစားရာမှ ပေါက်ကွဲမှုဖြစ်ပွားပြီး ယမန်နေ့ မတ်လ ၁၉ ရက်နေ့၊ ညနေ ၄နာရီခန့်အချိန်တွင် ဆယ်ကျော်သက်အရွယ် လူငယ်တစ်ယောက် သေဆုံးခဲ့ရပြီး ၄ဦး ဒဏ်ရာရရှိသည်ကို တွေ့ရှိခဲ့ရသည်။
သေဆုံးခဲ့သူမှာ မင်းသားတောင်ကျေးရွာမှ အသက် ၁၄နှစ်အရွယ် မောင်ဌေးဦး ဖြစ်ပြီး မင်းသားတောင်ကျေးရွာမှ အဖ ဦးမောင်ထွန်းအေး၏ သား မောင်ကျော်ဆန်းလင်း ၁၆နှစ်၊ အဖ ဦးထွန်းဝင်း၏ သား မောင်သန်းနိုင် ၁၄နှစ်၊ အဖ ဦးထွန်းတင်၏ သား မောင်နေပိုင်စိုး ၁၄နှစ်နှင့် အဖ ဦးကျော်သန်း၏ သား မောင်ခိုင်အောင်မျိုး ၁၅နှစ်တို့လည်း ဒဏ်ရာ ရရှိခဲ့သည်။
ယမန်နေ့ မတ်လ ၁၉ရက်နေ့တွင် မင်းသားတောင်ကျေးရွာမှ ဆယ်ကျော်သက်အရွယ် ၅ဦးသည် ရွာချောင်းမှ တွေ့ရှိသော စစ်ကျန်ဗုံးသီးကို ကောက်ယူပြီး မီးပုံထဲသို့ ထည့်ကြည့်ရာတွင် ပေါက်ကွဲမှုဖြစ်ပွားခဲ့ကြောင်း ဒဏ်ရာရရှိသူများနှင့် ဆွေမျိုးတော်စပ်သူ တစ်ဦးက AB News သို့ ပြောသည်။
“သူတို့ဟာ ရွားအနီးက ချောင်းမှာ ငါးရှာနေတုန်း ၄၀ မမ ဗုံးသီး တစ်လုံး ကောက်ယူခဲ့ကြပါတယ်။ အဲ့ဗုံးသီးကို ထုကြည့်ကြတယ်။ ထုကြည့်လို့ မပေါက်တဲ့ ဗုံးသီးကို မီးပုံထဲ ထည့်ရာ ပေါက်ကွဲပြီး တစ်ဦး သေဆုံးပြီး ၄ ဦး ဒဏ်ရာရရှိခဲ့ပါတယ်” ဟု ဆိုသည်။
ဗုံးသီး ပေါက်ကွဲပြီး သေဆုံးခဲ့သည့် လူငယ်တစ်ဦးနှင့် ဒဏ်ရာရရှိခဲ့သူ ၄ဦးမှာ ၇တန်းကျောင်းသားများ ဖြစ်ကြောင်း သိရှိရသည်။
လက်ရှိအချိန် ဒဏ်ရာရရှိခဲ့သည့် လူငယ်များမှာ အရေးပေါ်ဆေးကုသမှု ခံယူနေကြရသည်ကို တွေ့ရှိရသည်။
တိုက်ပွဲဖြစ်ပွားခဲ့သည့် နေရာများနှင့် နီးစပ်ရာ ပတ်ဝန်းကျင်များတွင် ကျန်ရှိနေသေးသည့် စစ်လက်နက်ပစ္စည်းများကို မထိတွေ့ကြရန်နှင့် တွေ့ရှိပါက သက်ဆိုင်ရာသို့ တိုင်ကြားရန် အာရက္ခတပ်တော်က မြို့၊ ရွာများတွင် အသိပေးနိုးဆော်ထားသည်ကို တွေ့ရှိရသည်။
စစ်ကျန်မိုင်းနှင့် လက်နက်များမှာ ဆော့ကစားရန်မဟုတ်သည့်အပြင် အသက်အန္တရာယ်ကို ထိခိုက်စေသည့် ပေါက်ကွဲစေတတ်သော ပစ္စည်းများဖြစ်သည်။
ဓာတ်ပုံ-ကျောက်တော်မြို့နယ်၊ မင်းသားတောင်ကျေးရွာမှ ဗုံးသီးပေါက်ကွဲ၍ ဒဏ်ရာရရှိခဲ့သည့် လူငယ်တစ်ဦးအား ဆေးကုသမှု ခံယူနေသည်ကို တွေ့ရစဥ်
Credit to Bay News
