21/09/2026
ငိမ်ꩻချံꩻရေꩻကရိုꩻနဝ်ꩻ ခမ်းသားမွိုးဖါသီး မဲဲဉ်ဖွင်ꩻအဓိပ္ပါယ်ႏနုဲင်းမုဲင်ꩻဟောင်း?
ဟန်ႏသနီꩻ လာစက်တင်ဘာ ၂၁ နီꩻနဝ်ꩻ ထွာဒျာႏ "ငိမ်ꩻချံꩻရေꩻမွူးနီꩻနဝ်ꩻသွူ..
“ယံꩻလူးတဲ့ တကြွုံႏတဝ်း၊ တနတ်ငဝ်းတဲ့ တဟွိုန်ဗာႏတဝ်း၊ လိုꩻဖုံႏတဲ့ သွီႏထွတ်ꩻလီ ဆာသီဗာႏတဝ်း ပေါႏနုဲင်းနဝ်ꩻနဝ်ꩻ ရိုꩻနွောင်ꩻလဲဉ်း အငိမ်ꩻချံꩻနဲ့?”
"နုဲင်းနဝ်ꩻလွုမ်ꩻတကာႏတဝ်ႏ လိုꩻအချင်ꩻချင်ꩻ ဖခေါ်သွုပ်သံႏဝင်ꩻတအဝ်ႏတဝ်း ထီႏထွားချာငါဝင်ꩻလူႏလုဲင်ႏဝင်ꩻအတာႏ တဲ့ꩻခဝ်းသွီႏထီꩻ မဉ်ႏအုံအဝ်ႏငီꩻနွောင်ꩻဒျာႏဝင်ꩻ လိုꩻမုꩻအဝွိုင်ꩻအဝဲင်ꩻတဗာႏကိုနဝ်ꩻမꩻ ရိုꩻဗာႏအငိမ်ꩻချံꩻနဝ်ꩻသွူ”
နီလိုႏသီးဖုံႏကဲဉ်းအာအာယို တယ်ႏစွဉ်ႏကလွူးလွဉ်ခါကာႏ ဗꩻတွိုႏကဖြားသီထံ အရိုꩻသာꩻသွတ်ꩻ သꩻဆန္ဒအဝ်ႏတစွိုး.. နဝ်ꩻနဝ်ꩻတမုဲင်ꩻနဲးကရိုꩻနဝ်ꩻ ထွာဒျာႏ မဲဉ်အုံအဝ်ႏလွေꩻသဲင်ꩻငိမ်ꩻငိမ်ꩻချံꩻချံꩻထာꩻနဝ်ꩻသွူ…
သွဉ်ပညာႏ၊ ထွုမ်ႏကျံႏလုပ်ꩻမာꩻ၊ ဖြေꩻစာကူꩻကား ၊ လွေꩻသဲင်ꩻချာငါ တယ်ႏဆို့ꩻလမ်းပါႏ၊ မာꩻကုသိုလ်ႏတရာꩻ စစွဉ်ႏ မာႏခန်းထာꩻမာꩻအမျိုꩻမုဲင်ꩻခန်းတဲ့ယဝ်း အယားဖေႏကအဝ်ႏတဝ်း မဲဉ်အုံအဝ်ႏလုပ်မာꩻလွေꩻသဲင်ꩻဒျာႏ ခွꩻခွꩻသꩻသꩻနဝ်ꩻသွူ။ ယိုနဝ်ꩻ နီလိုꩻဖုံႏလွုမ်ꩻတမွေးတဝ်း ကမ္ဘာႏလောင်းကအဝ်ႏဒါႏ သꩻသားတွိုင်ꩻ သတ္တဝါႏ ကမဲဉ်ထွာဒါႏ အဆုံးယော့ꩻသွတ်ꩻ သꩻဆန္ဒတဗာႏနဝ်ꩻသွူ။
ဘာႏသာႏရေꩻအလꩻတဲ့နဝ်ꩻ နီမျတ်ဗုဒ္ဓ ဗွေႏဘုရာꩻ သွဉ်သင်ဆွုံꩻမꩻ ဟော်ꩻသေꩻခါꩻ နီထာꩻယူႏ၊ ထာꩻဒေါ့ꩻ၊ အအုံအအဝ်ႏ ထာꩻမာꩻဖုံႏယို မဉ်ႏခွိုက်ဆာသွူဝင်ꩻနဝ်ꩻ အဝ်ႏလိုႏဆင်ႏချင်ႏချာနီနမ်းထွူ အဝ်ႏလိုႏဖျင်ချာခန်းနမ်း၊ ထီႏချာခန်းနမ်းအမာႏနဝ်ꩻမꩻ ဝင်ꩻဟဲ့ꩻ လိုꩻဟဝ်လိုꩻယံ
မဉ်ႏထွားလွေꩻဒျာႏတွမ်ႏ လိုꩻအခွင်ꩻအရေꩻထာꩻထီႏဖဲ့ꩻတဲ့နဝ်ꩻ လိုꩻတဖြာꩻအနေႏ သွဉ်ပညာႏ၊ ထွုမ်ႏဥစ္စာႏပစ္စေꩻ၊ နီသꩻကဝါႏသနာႏရာꩻ ထာꩻမာꩻဖုံႏယို ပေါႏတခွိုက်ဆာတဝ်းဝင်ꩻနဝ်ꩻ လိုꩻရာꩻဆန္ဒအလွောက်ꩻ ခွုမ်မာꩻနွောင်ꩻဒျာႏရိုꩻကီလဲ့ ပေါႏမဉ်ႏခွိုက်ဆာသွူ လိုꩻတဖြာꩻဖြာꩻ (မွေးတဝ်းလဲ့) လိုꩻအစွိုꩻအဗူႏတဗာႏဗာႏနဝ်ꩻ နီယိုထွာဒျာႏ ယားကုဲင်လွေꩻလဲဉ်း လိုꩻအခွင်ꩻအရေꩻသားတဖြာꩻနဝ်ꩻသွူ။
ပီနုဲင်းနဝ်ႏနေနေ ရိုꩻယာႏကွက်ꩻဗွာ (သမင်ဖြူ) ရောႏဂါႏအဝ်ႏတဲင် ယိုခါ ဝေင်ꩻနယ်ꩻကျောက်တလွုံꩻ ဆောင်ႏဖိုး ဒုံတခေါ့ꩻမွူးကို ရပ်သားအမျာꩻ ကဝါးထန်ႏထိုꩻဒါႏ ဖါဖြားဗောယိုအတာႏ တရာꩻတွောင်းတရျားမုꩻအဝ်ႏနေဟောင်း?
နီပအိုဝ်ႏထွုံꩻစံႏ ယေန်ႏငဲးမုꩻကိုတဲ့နဝ်ꩻ
ရွယ်ႏပေႏသားယို ရိုႏသေႏအံႏသွင်ꩻရောင်လွဒျာႏ သက်တန်ရွယ်ႏကီꩻဒါႏ လိုꩻဖြားသီးဖုံႏမွော့နဲး... ယိုနဝ်ꩻ ထွာဒျာႏ ဖုဲင်ႏရက်ဗွို့ꩻမဲ့ခရာႏ နီပအိုဝ်ႏ ယိုꩻယာႏယေန်ႏငဲးမုꩻထွုံꩻစံႏတဗာႏသနယ်.
မဉ်ႏထွားခန်းစွဉ်ႏ လိုꩻအခွင်ꩻအရေႏထာꩻထီႏဖဲ့ꩻတဲ့နဝ်ꩻ ရိုꩻဒုံစီꩻကန်ꩻဒျာႏတဲင် ဝါးထန်ႏထိုꩻဖါဖြားနုဲင်းယိုအတာႏ တရျာႏတွောင်းတရျာႏမုꩻအဝ်ႏနေဟောင်း?
ရောႏဂါႏယိုနဝ်ꩻ ကူငါရတေားဒါႏ ရောႏဂါႏတဲ့တမွေးတဝ်း ဖါဖြားဗွေႏနမ်းချာဒျာႏ လွိုက်ရွေꩻတွော့ꩻ အထွာလွဉ်ဒျာႏတဲ့ တမွေးတဝ်း ကွပ်စွဉ်ႏသွီႏသားယာႏတသဉ်တဲင် ကထွာလွဉ်ဗာႏနုဲင်းယိုနဝ်ꩻ ပိုလီꩻဖုံႏတဲ့ တစင်းမာꩻဒျာႏတဝ်း ခွိုင်းကနွောင်ꩻရာꩻအာႏ အဝ်ႏကုꩻယာလွမ်ꩻလာꩻဖေႏဒျာႏတဲ့ အတထိုꩻမားထိုꩻတဝ်း အဝ်ႏယပ်ꩻသꩻဒျာႏနဝ်ꩻသွူ..
ဖာဖြားနဝ်ꩻ ယာႏကွက်ဗွာလွုမ်ꩻတကာႏတဝ်း ယာႏကွက်ꩻဗွာ (သမင်ဖြူ) ရောႏဂါႏ သမ်းအဝ်ႏခံႏစာꩻဗာႏ တလီꩻဒူ (လေဖြတ်) ရောႏဂါႏ နီစွိုးနီမျိုꩻတဲင် အဝ်ႏယူႏပက်ခံႏစာꩻဗာႏသွူတကာႏတဝ်း ယိုခါ ဒုံသားအမျာꩻ သမ်းအဝ်ႏဝါးထန်ႏထိုꩻကဒွိုန်းဒျာႏဒုံဆောင်ႏနဝ်ꩻ ဆာꩻသꩻဗာႏတခွိုင်းမုဲင်ꩻ?
နီꩻလိုꩻသီး ကလꩻလွဉ်ဗာႏလိုꩻဖဝနဝ်ꩻ အမဲဉ်ႏအမာႏ၊ အဟဝ်အကုဲင်၊ တရာꩻနဲ့ တရာꩻတဝ်းနဲ့ ခွဲꩻချာꩻဖန်းဖြယ်နွောင်ꩻဒါႏဉာဏ်ႏအဝ်ႏပါလွဉ်ဒျာႏမွော့ ရိုꩻဒုံစီꩻကန်ꩻတဲင် ဖခေါ်သွုပ်သံႏလွေꩻလိုꩻတဖြာꩻနုဲင်းယိုနဝ်ꩻ ထွာထွိုက်ထွာသင်ꩻနေဟောင်း?
စီꩻကန်ꩻ(တဖွောင်ꩻ) ကရိုꩻယို အွဉ်ႏအီခင်ႏမွဉ် နီလိုꩻသီးယို အုံတဖြာꩻဒျာႏဒါႏတဝ်း အုံငီꩻအဝ်ႏရဝ်းတွမ်ႏ လိုꩻအာ အဆင်ႏယံကရော့ꩻတဲင် လိုꩻအစွိုꩻအဗူႏယို ဖေႏတိုꩻတက်ထင်ႏထိုအီအတာႏ ထိန်ꩻကမ်းရဲးခါꩻဖေႏ တဖွောင်ꩻတဗာႏဒျာႏမွော့နဲး တွိုႏယိုခါမွော့ꩻ ထွာတေားဒျာႏ လိုꩻတဖြာꩻ ဖေႏကပေႏသꩻတနဲင်းအီအတာႏ အကျောင်ꩻအွဉ်ႏနယ်ချက် တခွေါင်ခံႏတဝ်း ဝါႏထန်ႏထိုꩻဗာႏတွိုႏဒုံဟောင်း?
ဖါဖြားနဝ်ꩻ ခင်ႏလမ်း မဉ်ႏထွာနီမွိုး၊နီဖါ၊နီနမ်းနဝ်ꩻ နီအီႏပေႏသꩻတနဲင်းဗာႏတခွုင်းမုဲင်ꩻကရိုꩻနဝ်ꩻ လွူးဖေႏနွောင်ꩻတဝ်းဒွုမ် သꩻစာႏနာႏနဲ့?
“ငိမ်ꩻချံꩻရေꩻကရိုꩻဒါႏ ငဝ်းယို ဆဲင်ႏတဝ်းတွမ်ႏ လလိုႏတွိုင်ꩻစွုမ်ႏဖြာꩻနဲ့ ဖူႏဝေးမွိုးဖါသီးထာꩻထီႏအဝ်ႏနုဲင်းမုဲင်ꩻ ဖြုဲင်ꩻနယ်စံꩻဖေႏ အွိုး comment ကို လꩻနေဟောင်း ?”
-O
