Independent Federation of Myanmar Seafarers

Independent Federation of Myanmar Seafarers A new independent trade union for Myanmar seafarers.

အာတိတ်စက်ဝိုင်းမြောက်ပိုင်းပင်လယ်လမ်းကြောင်းမှတစ်ဆင့် ဥရောပသို့ ခရီးစဉ်စတင်လိုက်သည့် တရုတ်ကုန်သေတ္တာတင်သင်္ဘော။—————————...
16/08/2026

အာတိတ်စက်ဝိုင်းမြောက်ပိုင်းပင်လယ်လမ်းကြောင်းမှတစ်ဆင့် ဥရောပသို့ ခရီးစဉ်စတင်လိုက်သည့် တရုတ်ကုန်သေတ္တာတင်သင်္ဘော။
—————————————————————————

တရုတ်နိုင်ငံ၏ ကုန်သေတ္တာတင်သင်္ဘောတစ်စီးသည် အာတိတ်စက်ဝိုင်းမြောက်ပိုင်းပင်လယ်လမ်းကြောင်း (Northern Sea Route - NSR) ကို အသုံးပြု၍ ဥရောပတိုက်သို့ ခရီးစတင်ထွက်ခွာသွားပြီဖြစ်သည်။

အဆိုပါ လမ်းကြောင်းသစ်သည် ပုံမှန်ရေကြောင်းခရီးစဉ်များထက် ကြာမြင့်ချိန် ထက်ဝက်မျှ လျှော့ချပေးနိုင်မည်ဖြစ်သော်လည်း အာတိတ်စက်ဝိုင်းဒေသ၏ ရေခဲပြင်များ ပိုမိုမြန်ဆန်စွာ အရည်ပျော်ကျလာမည်ကို သဘာဝပတ်ဝန်းကျင်ထိန်းသိမ်းရေးအဖွဲ့များက စိုးရိမ်မကင်း ဖြစ်လျက်ရှိကြသည်။

'Dubai Tower' အမည်ရှိ ထိုသင်္ဘောသည် အရှေ့ပိုင်း ဆိပ်ကမ်းမြို့ဖြစ်သော နိင်ဘို (Ningbo) မှ စတင်ထွက်ခွာခဲ့ခြင်းဖြစ်ပြီး မြောက်ဘက်သို့ ဦးတည်ခုတ်မောင်းကာ (Bering Strait) ကို ဖြတ်သန်းပြီးနောက် ရုရှားနိုင်ငံ မြောက်ဘက်ကမ်းလွန်ရှိ အေးခဲနေသော ရေပြင်များအတိုင်း အနောက်ဘက်သို့ ဆက်လက်ထွက်ခွာမည်ဖြစ်သည်။

ပို့ဆောင်ရေးလုပ်ငန်းဆောင်ရွက်သည့် Sea Legend ကုမ္ပဏီ၏ ထုတ်ပြန်ချက်အရ ယခုစက်တင်ဘာလ ၇ ရက်နေ့တွင် ဗြိတိန်နိုင်ငံ ဖီးလစ်စတိုး (Felixstowe) ဆိပ်ကမ်းသို့ ရောက်ရှိမည်ဖြစ်ကာ ထိုသီတင်းပတ်အတွင်း၌ပင် ဂျာမနီနိုင်ငံ ဟမ်းဘတ် (Hamburg) နှင့် ပိုလန်နိုင်ငံ ဂဒင်းနီးယား (Gdynia) မြို့များသို့ ဆက်လက် ထွက်ခွါမည်ဖြစ်သည်။

စူးအက်တူးမြောင်းကို ဖြတ်သန်းရသည့် ပုံမှန်လမ်းကြောင်းနှင့် နှိုင်းယှဉ်ပါက အာတိတ်မြောက်ပိုင်းလမ်းကြောင်းသည် ခရီးစဉ်ကြာမြင့်ချိန်ကို သိသိသာသာ မြန်ဆန်စေသည့်အပြင် ယီမင်နိုင်ငံမှ ဟူသီလက်နက်ကိုင်များ၏ တိုက်ခိုက်မှုအန္တရာယ်ရှိသော ပင်လယ်နီရေပြင်ကိုလည်း ရှောင်ရှားနိုင်မည်ဖြစ်သည်။

မရှေးမနှောင်းကာလများကဖြစ်ပွားခဲ့သည့် စစ်ပွဲများနှင့် ပဋိပက္ခများကြောင့် ကမ္ဘာ့ရေကြောင်းကုန်သွယ်ရေးစနစ်တွင် အနှောင့်အယှက်များ ကြုံတွေ့နေရချိန်၌ ယခုလမ်းကြောင်းသည် အစားထိုးစရာဖြစ်လာခဲ့ခြင်းဖြစ်သည်။ သို့သော်လည်း အဆိုပါလမ်းကြောင်းကို ရေခဲခွဲသင်္ဘောများ မလိုအပ်ဘဲ ဖြတ်သန်းနိုင်ရန်အတွက် ရေခဲများလုံလောက်စွာ အရည်ပျော်သည့် ရာသီဥတုကာလ အကန့်အသတ်အတွင်း၌သာ အသုံးပြုနိုင်မည်ဖြစ်သည်။

အာတိတ်ပင်လယ်လမ်းကြောင်းကို ယခင်ကလည်း အခြားသင်္ဘောလိုင်းများ ဖြတ်သန်းဖူးခဲ့ပြီး ဒိန်းမတ်နိုင်ငံအခြေစိုက် Maersk ကုမ္ပဏီက ၂၀၁၈ ခုနှစ်တွင် ပထမဆုံးအကြိမ် စတင်ဖြတ်သန်းခဲ့ခြင်းဖြစ်သည်။ Allianz Commercial ၏ ရေကြောင်းဆိုင်ရာ သုံးသပ်ချက်များအရ ၂၀၂၄ ခုနှစ်တွင် ကုန်သေတ္တာတင်သင်္ဘော ၁၅ စီးသာ ဖြတ်သန်းခဲ့ရာမှ လွန်ခဲ့သည့်နှစ်အတွင်း ၂၃ စီးအထိ တိုးတက်လာခဲ့ကြောင်း သိရသည်။ ထိုသို့ ကုန်သင်္ဘောများ ပိုမိုဖြတ်သန်းမောင်းနှင်လာခြင်းသည် ကမ္ဘာ့အပူချိန်မြင့်မားမှုကြောင့် ထိခိုက်လွယ်နေပြီးဖြစ်သော အာတိတ်ရေခဲပြင်များ ပြိုပျက်မှုကို ပိုမိုမြန်ဆန်လာစေနိုင်ကြောင်း ပတ်ဝန်းကျင်ထိန်းသိမ်းရေးအဖွဲ့များက သတိပေးထားသည်။

ထို့ကြောင့် ပြင်သစ်နိုင်ငံမှ CMA CGM ၊ စလစ်ဇာလန်မှ MSC နှင့် ဂျာမနီမှ Hapag-Lloyd ကဲ့သို့သော အဓိကသင်္ဘောလိုင်းကြီးအချို့က အာတိတ်ရေကြောင်းလမ်းကြောင်းကို ရှောင်ရှားကြရန် ကတိပြုထားကြသည်။ သို့ရာတွင် တရုတ်နိုင်ငံက 'ပိုးလမ်းမကြီး' (Polar Silk Road) စီမံကိန်းမှတစ်ဆင့် ထိုဒေသသို့ ဝင်ရောက်ရန် လမ်းခင်းနေသဖြင့် လေ့လာသူအကဲခတ်များကမူ အာတိတ်လမ်းကြောင်းသည် အနာဂတ်ကုန်သွယ်ရေးအတွက် အရေးပါသော လမ်းကြောင်းတစ်ခု ဖြစ်လာနိုင်ကြောင်း သုံးသပ်ထားကြသည်။

.
.
.

အာတိတ်သမုဒ္ဒရာအတွင်း ရေခဲခွဲသင်္ဘော လိုက်ပါစောင့်ရှောက်ပေးနေသည့်ကြားမှ တရုတ်သို့ ဦးတည်ခုတ်မောင်းနေသော ရုရှားရေနံတင်သင်္ဘ...
15/08/2026

အာတိတ်သမုဒ္ဒရာအတွင်း ရေခဲခွဲသင်္ဘော လိုက်ပါစောင့်ရှောက်ပေးနေသည့်ကြားမှ တရုတ်သို့ ဦးတည်ခုတ်မောင်းနေသော ရုရှားရေနံတင်သင်္ဘောတစ်စီး ထိခိုက် ပျက်စီးမှု ကြီးမားစွာ ကြုံတွေ့။
——————————————————————————
ရုရှားနိုင်ငံမှ တရုတ်နိုင်ငံသို့ ရေနံစိမ်းများ တင်ဆောင်လာသည့် ရုရှားရေနံတင်သင်္ဘောတစ်စီးသည် အာတိတ်သမုဒ္ဒရာအတွင်း ရေခဲခွဲသင်္ဘောတစ်စီး၏ အကူအညီဖြင့် လိုက်ပါခုတ်မောင်းနေခဲ့သော်လည်း သင်္ဘောဝမ်းဗိုက်ပိုင်း၌ ပြင်းထန်သော ထိခိုက်ပျက်စီးမှု နှင့် ကြုံတွေ့ခဲ့ရကြောင်း သိရှိရသည်။

ဖြစ်စဉ်နှင့် ပတ်သက်၍ ရုရှားအာမခံကုမ္ပဏီ AlfaStrakhovanie က လျော်ကြေးငွေ ရူဘယ် ၅၃ သန်း (အမေရိကန်ဒေါ်လာ ၆၃၈,၀၀၀ ခန့်) ပေးလျော်ခဲ့ရကြောင်း သတင်းရင်းမြစ်များအရ သိရသော်လည်း အာမခံကုမ္ပဏီဘက်မှ အသေးစိတ်အချက်အလက်များကို ထုတ်ပြန်ခြင်းမရှိသည့်အတွက် ပျက်စီးသွားသည့် သင်္ဘောအမည်နှင့် ဖြစ်ပွားခဲ့သည့် အတိအကျနေ့ရက်တို့ကိုမူ မသိရှိရသေးပေ။

ထို့အပြင် ၂၀၂၆ ခုနှစ်မှစ၍ ရုရှားအစိုးရအေဂျင်စီများသည် အာတိတ်ရေပြင်အတွင်း ဖြစ်ပွားသည့် ဘေးအန္တရာယ်ဆိုင်ရာ တရားဝင်သတိပေးချက် ထုတ်ပြန်မှုများအား သိသိသာသာ လျှော့ချ ရပ်ဆိုင်းထားခဲ့သည်။

ယခုဖြစ်စဉ်သည် တရုတ်နိုင်ငံသို့ ရေနံတင်ပို့သည့် သင်္ဘောများ အာတိတ်ရေပြင်၌ ဒုက္ခကြုံတွေ့ရသည့် ဒုတိယမြောက် ဖြစ်စဉ်တစ်ခုဖြစ်ပြီး လွန်ခဲ့သည့် ၁၅ နှစ်အတွင်း ထိုဒေသ၌ စတုတ္ထမြောက် ဖြစ်ပွားခဲ့သော မတော်တဆမှုလည်း ဖြစ်သည်။

လွန်ခဲ့သည့်နှစ်ကလည်း ရုရှားရေနံစိမ်း စည်ပေါင်း ၁ သန်းခန့် တင်ဆောင်လာသည့် Lynx အမည်ရှိ ရေနံတင်သင်္ဘောသည် အရှေ့ဆိုက်ဘေးရီးယားပင်လယ်အတွင်း ရေခဲပြင်များကြား ပိတ်မိခဲ့သဖြင့် နျူကလီးယားစွမ်းအင်သုံး ရေခဲခွဲသင်္ဘောတစ်စီး လာရောက်ကူညီမှသာ ခရီးဆက်နိုင်ခဲ့သည်။ ထို့အပြင် ၂၀၁၅ ခုနှစ်က Laptev ပင်လယ်အတွင်း Svyatoy Petr နှင့် Svyatoy Pavel သင်္ဘောနှစ်စီး တိုက်မိခဲ့ဖူးသလို ၂၀၁၀ ပြည့်နှစ်ကလည်း ဒီဇယ်တန်ချိန် ၂၆,၀၀၀ တင်ဆောင်လာသည့် Indiga နှင့် Varzuga သင်္ဘောတို့ တိုက်မိခဲ့ကြဖူးသော်လည်း ရေနံယိုစိမ့်မှုများ မရှိခဲ့ပေ။

လက်ရှိတွင် ရုရှားနိုင်ငံသည် အာရှဈေးကွက်သို့ ရေနံပိုမိုတင်ပို့နိုင်ရန် အာတိတ်ရေကြောင်းလမ်းကို ပိုမိုအသုံးပြုလာနေကြသည်။ မြောက်ပိုင်းရေကြောင်းလမ်း (Northern Sea Route) သည် ၅,၆၀၀ ကီလိုမီတာခန့် ရှည်လျားပြီး အာရှနှင့် ဥရောပကြား ရေကြောင်းခရီးစဉ်ကို ၇ ရက်မှ ၁၀ ရက်အထိ လျှော့ချပေးနိုင်သည်။ ပြီးခဲ့သည့် နွေရာသီတွင် ရုရှားသည် အာတိတ်သမုဒ္ဒရာမှတစ်ဆင့် အာရှသို့ ရေနံစည်ပေါင်း ၈ သန်းခန့် တင်ဆောင်ထားသည့် သင်္ဘောအုပ်စုကို စေလွှတ်ခဲ့ရာ ယင်းသည် ရေနံတင်သင်္ဘောတစ်စီးတည်းသာ အဆိုပါလမ်းကြောင်းကို အသုံးပြုခဲ့သည့် ၂၀၂၅ ခုနှစ် ဇူလိုင်လနှင့် နှိုင်းယှဉ်ပါက သိသိသာသာ တိုးတက်လာခဲ့ခြင်းဖြစ်သည်။

ရုရှားအစိုးရသည် ၂၀၁၈ ခုနှစ်တွင် အဆိုပါလမ်းကြောင်းမှ ကုန်စည်ပို့ဆောင်မှုကို ၂၀၂၄ ခုနှစ်၌ တန်ချိန် သန်း ၈၀ နှင့် ၂၀၃၀ ပြည့်နှစ်၌ တန်ချိန် သန်း ၂၀၀ အထိ တိုးမြှင့်ရန် ပစ်မှတ်ထားခဲ့သော်လည်း လွန်ခဲ့သည့်နှစ်များက ကုန်စည်စီးဆင်းမှုမှာ တန်ချိန် ၃၇ သန်းနှင့် ၃၈ သန်းခန့်သာ ရှိခဲ့သည်။

တစ်ဖက်တွင်လည်း ဥရောပသမဂ္ဂ၏ ပိတ်ဆို့အရေးယူမှုများကို ရှောင်ရှားနိုင်ရန် ရုရှားသည် (shadow fleet) သင်္ဘောအုပ်စု ကို တည်ဆောက်ထားကြောင်း ယူကရိန်နိုင်ငံခြားရေး ထောက်လှမ်းရေးဌာနက ယခင်က သတင်းထုတ်ပြန်ခဲ့ဖူးသည်။

ရုရှားသည် ရှုပ်ထွေးသော ပိုင်ဆိုင်မှုလမ်းကြောင်းများနှင့် အမည်မသိ ကုမ္ပဏီများအား အသုံးပြု၍ နိုင်ငံတကာဈေးကွက်မှ သင်္ဘောဟောင်းများကို ဝယ်ယူခဲ့ရာ LNG သဘာဝဓာတ်ငွေ့တင် သင်္ဘောပေါင်း ၂၃ စီးအထိ ရှိလာခဲ့သည်။

၂၀၂၆ ခုနှစ် ပထမသုံးလပတ်တွင်ပင် အရှေ့အလယ်ပိုင်းပိုင်ရှင်ထံမှ ORION, KOSMOS, MERKURYY နှင့် LUCH အမည်ရှိ Carrier သင်္ဘောလေးစီးကို ဝယ်ယူ၍ ဓာတ်ငွေ့သယ်ယူပို့ဆောင်ရေးတွင် ချက်ချင်းအသုံးပြုခဲ့သည်။ သို့သော် အဆိုပါ LNG သဘာဝဓာတ်ငွေ့တင် သင်္ဘောအုပ်စုမှာ ယခု အာတိတ်ရေပြင်တွင် မတော်တဆမှုဖြစ်ပွားခဲ့သည့် ရေနံတင်သင်္ဘော နှင့် သီးခြားစီဖြစ်ကြောင်း သိရှိရသည်။

.
.
.

အိန္ဒိယဆိပ်ကမ်းတွင် ပြုပြင်ထိန်းသိမ်းရေးလုပ်ဆောင်နေသည့် ကုန်တင်သင်္ဘောပေါ်၌ သင်္ဘောသားတစ်ဦး ဂတ်စ်ငွေ့ပူလောင်ကျွမ်းပြီး ဒ...
15/08/2026

အိန္ဒိယဆိပ်ကမ်းတွင် ပြုပြင်ထိန်းသိမ်းရေးလုပ်ဆောင်နေသည့် ကုန်တင်သင်္ဘောပေါ်၌ သင်္ဘောသားတစ်ဦး ဂတ်စ်ငွေ့ပူလောင်ကျွမ်းပြီး ဒဏ်ရာရရှိ။
—————————————————————————

အိန္ဒိယနိုင်ငံ၊ ကွတ်လမ် (Kollam) ဆိပ်ကမ်း၌ ပြုပြင်ထိန်းသိမ်းရေး လုပ်ငန်းများ လုပ်ဆောင်နေသည့် IOL Sapphire အမည်ရှိ ကုန်တင်သင်္ဘောပေါ်တွင် ဩဂုတ် ၁၂ ရက်နေ့ မွန်းလွဲ ၁ နာရီ ၂၀ မိနစ်အချိန်ခန့်က အပူငွေ့များ ထွက်ရှိမှုကြောင့် သင်္ဘောသားတစ်ဦး မီးလောင်ဒဏ်ရာရရှိခဲ့သည့် မတော်တဆမှုတစ်ခု ဖြစ်ပွားခဲ့သည်။

အဆိုပါ မတော်တဆမှုကြောင့် ဒဏ်ရာရရှိခဲ့သူမှာ သင်္ဘော၏ တတိယစက်ပြင်အရာရှိ (Third Engineer) ဖြစ်ပြီး၊ သင်္ဘောကြမ်းပြင်ပေါ်ရှိ လေဝင်လေထွက်ပေါက် (air vent) ထဲမှ ထွက်လာသော ဂတ်စ်ငွေ့များနှင့် တိုက်ရိုက်ထိတွေ့ခဲ့ရသဖြင့် မျက်နှာနှင့် ဝမ်းဗိုက်တို့တွင် မီးလောင်ဒဏ်ရာများ ရရှိခဲ့ခြင်းဖြစ်သည်။ ဖြစ်စဉ်ဖြစ်ပွားပြီးနောက် ကမ်းခြေစောင့်ရဲတပ်ဖွဲ့ပိုင် ကင်းလှည့်ရေယာဉ်များမှ ချက်ချင်းလာရောက်ကူညီခဲ့ပြီး အဆိုပါသင်္ဘောသားအား ဆေးရုံသို့ အမြန်ဆုံး ပို့ဆောင်ပေးခဲ့ရသည်။

St Kitts and Nevis အလံလွှင့်ထူထားသည့် IOL Sapphire သင်္ဘောသည် အိန္ဒိယနိုင်ငံ ခကိနဒ (Kakinada) ဆိပ်ကမ်းမှ အာဖရိကတိုက်ရှိ ဂီနီနိုင်ငံသို့ ထွက်ခွာလာစဉ် လမ်းခရီး၌ အင်ဂျင်ခန်းရှိ Generator စက် ၂ လုံး မှာ ချို့ယွင်းမှုဖြစ်ပွါးခဲ့ရသည်။ ထို့ကြောင့် ဇွန်လ ၂၃ ရက်နေ့ကတည်းက Kollam ဆိပ်ကမ်း၌ ကျောက်ချ ရပ်နားကာ ပြင်ဆင်မှုများ လုပ်ဆောင်နေခဲ့ပြီး ယင်းသို့ ပြင်ဆင်နေစဉ်အတွင်း ခုလို မတော်တဆမှုနှင့် ကြုံတွေ့ခဲ့ရခြင်းဖြစ်သည်။

IOL Sapphire သင်္ဘောသည် ၂၀၀၉ ခုနှစ်တွင်တည်ဆောက်ခဲ့သော အလျား ၉၀.၇ မီတာ၊ အနံ ၁၄.၆ မီတာနှင့် စုစုပေါင်းတန်ချိန် (Gross Tonnage) ၂,၆၁၈ တန်ရှိသည့် ကုန်တင်သင်္ဘောတစ်စီး ဖြစ်သည်။

.
.
.

15/08/2026

News Headline:
News 1: ရန်ကုန်မြိုနယ်အသီးသီးမှာ ပြင်းထန်ဝမ်းပျက်ဝမ်းလျှောရောဂါ ကူးစက်ဖြစ်ပွားသူဦးရေ ဆက်တိုက်မြင့်တက်
News 2: ဟော်မုဇ် ရေလက်ကြား ဖြတ်သန်းသွားလာနေတဲ့ ကူးသန်းရောင်းဝယ်ရေး ရေနံတင်သင်္ဘော နှစ်စီးကို ဒရုန်းနဲ့ တိုက်ခိုက်ခဲ့မှု

ဟော်မုဇ်ရေလက်ကြားတွင် ADNOC ပိုင် သင်္ဘော တိုက်ခိုက်ခံရမှုအပေါ် အာရပ်စော်ဘွားများပြည်ထောင်စု ပြင်းထန်စွာ ပြစ်တင်ရှုတ်ချ။...
15/08/2026

ဟော်မုဇ်ရေလက်ကြားတွင် ADNOC ပိုင် သင်္ဘော တိုက်ခိုက်ခံရမှုအပေါ် အာရပ်စော်ဘွားများပြည်ထောင်စု ပြင်းထန်စွာ ပြစ်တင်ရှုတ်ချ။
——————————————————————————
အာရပ်စော်ဘွားများပြည်ထောင်စု (UAE) ၏ အစိုးရပိုင် ရေနံကုမ္ပဏီကြီးဖြစ်သော ADNOC သည် ယမန်နေ့ သြဂုတ်လ ၁၄ ရက် သောကြာနေ့ညပိုင်းက ဟော်မုဇ်ရေလက်ကြား (Strait of Hormuz) ကို ဖြတ်သန်း မောင်းနှင်နေစဉ် ၎င်းတို့ပိုင် သင်္ဘောတစ်စီး တိုက်ခိုက်ခံခဲ့ရကြောင်း သတင်းထုတ်ပြန်ခဲ့သည်။ အဆိုပါ ဖြစ်စဉ်တွင် လူထိခိုက်ဒဏ်ရာရရှိမှု မရှိကြောင်း သိရှိရပြီး UAE နိုင်ငံခြားရေးဝန်ကြီးဌာနကမူ ယင်းဖြစ်စဉ်သည် အီရန်၏ ရန်လိုသော တိုက်ခိုက်မှုဖြစ်ကြောင်း စွပ်စွဲကာ ပြင်းထန်စွာ ပြစ်တင်ရှုတ်ချလိုက်သည်။

လွန်ခဲ့သော ဖေဖော်ဝါရီလအတွင်း အမေရိကန်နှင့် အီရန်တို့စစ်ပွဲ စတင်ခဲ့ပြီးနောက်ပိုင်း အီရန်သည် ကမ္ဘာ့စွမ်းအင် ပို့ဆောင်ရေးတွင် အဓိကကျသော ဟော်မုဇ်ရေလက်ကြားကို ပိတ်ဆို့ထားကာ ကုန်သွယ်ရေးသင်္ဘောများကို ပစ်မှတ်ထား တိုက်ခိုက်လျက်ရှိသည်။ အီရန်ဘက်က ရေလက်ကြားကို ဖြတ်သန်းအသုံးပြုခ ကောက်ခံလိုသော်လည်း ဝါရှင်တန်က ပြင်းထန်စွာ ကန့်ကွက်ထားသည်။ ADNOC အနေဖြင့် ယခုသီတင်းပတ်အတွင်း ရေလက်ကြား၌ သင်္ဘောများ ဆက်တိုက် တိုက်ခိုက်ခံနေရခြင်းဖြစ်ပြီး ပင်လယ်ရေကြောင်းဆိုင်ရာ လုံခြုံရေး၊ လွတ်လပ်စွာ ရေကြောင်းသွားလာခွင့် နှင့် သင်္ဘောသားများ၏ ဘေးကင်းလုံခြုံရေးကို ကာကွယ်ပေးရန် အလေးအနက် တောင်းဆိုထားသည်။

အဆိုပါ ရေလက်ကြားအတွင်း ဆက်တိုက်ဆိုသလို ဖြစ်ပွားနေသည့် တိုက်ခိုက်မှုများကြောင့် ဧပြီလက ရရှိခဲ့သော အမေရိကန်နှင့် အီရန်တို့ကြား အပစ်အခတ်ရပ်စဲရေး ပျက်ပြားသွားခဲ့ရသည်။ ဇွန်လအတွင်းက ရေလက်ကြားအနာဂတ် စီမံခန့်ခွဲရေးအတွက် ဒေသတွင်းနိုင်ငံများနှင့် အီရန်တို့ ညှိနှိုင်းရန် သဘောတူညီမှု ရရှိခဲ့သော်လည်း အီရန်လုံခြုံရေးအရာရှိချုပ် မိုဟာမက် ဘာဂါ ဇိုလ်ကာဒါက စစ်ပွဲများရပ်တန့်ရေး၊ ပိတ်ဆို့မှုများ ရုပ်သိမ်းရေးနှင့် စစ်ဒဏ်ရာရရှိမှုများအတွက် လျော်ကြေးပေးရေး စသည့် လိုအပ်ချက်များ တောင်းဆိုထားသည်။ လက်ရှိတွင်မူ အီရန်နိုင်ငံခြားရေးဝန်ကြီး အက်ဘတ်စ် အရတ်ချီက အမေရိကန်နှင့် ဆွေးနွေးပွဲများ ပြန်လည်စတင်ရန် မည်သည့်ဆုံးဖြတ်ချက်မျှ မချရသေးကြောင်း ပြောကြားထားသဖြင့် ဒေသတွင်း တင်းမာမှုများ ဆက်လက် မြင့်တက်လျက်ရှိသည်။

.
.
.

အိန္ဒိယနိုင်ငံ ဟူးဂလီးမြစ်အတွင်း စင်ကာပူအလံတင် ကွန်တိန်နာသင်္ဘော တစ်စီး မောင်းနှင်မှု စနစ်ချို့ယွင်းကာ သောင်တင်မှုဖြစ်ပွ...
15/08/2026

အိန္ဒိယနိုင်ငံ ဟူးဂလီးမြစ်အတွင်း စင်ကာပူအလံတင် ကွန်တိန်နာသင်္ဘော တစ်စီး မောင်းနှင်မှု စနစ်ချို့ယွင်းကာ သောင်တင်မှုဖြစ်ပွား။
——————————————————————————-
မလေးရှားနိုင်ငံ ပို့ကလန်း (Port Klang) ဆိပ်ကမ်းမှ အိန္ဒိယနိုင်ငံ ကာလကတ္တားမြို့ရှိ Syama Prasad Mookerjee ဆိပ်ကမ်းသို့ မောင်းနှင်လာသည့် စင်ကာပူအလံတင် “MV Nawata Bhum" ကွန်တိန်နာသင်္ဘောသည် သြဂုတ်လ ၁၂ ရက် ဒေသစံတော်ချိန် နံနက် ၁၁ နာရီခန့်တွင် အနောက်ဘင်္ဂလားပြည်နယ်၊ ဒိုင်းမွန်းဟားဘား (Diamond Harbour) အနီး ဟူးဂလီးမြစ် (Hooghly River) ကွေ့၌ ရုတ်တရက် ကွေ့ ၍မရဘဲ မြစ်ကမ်းပါးကို ဝင်တိုက်မိကာ သောင်တင်မှု ဖြစ်ပွားခဲ့သည်။

အလျား ၁၄၇ မီတာရှိသည့် အဆိုပါသင်္ဘောသည် ဆိပ်ကမ်းမှ ကီလိုမီတာ ၅၀ ခန့်အကွာ မြစ်ကွေ့အရောက်တွင် ရေစီးသန်မှု၊ လှိုင်းလေထန်းမှုတို့အပြင် ထိန်းချုပ်မောင်းနှင်မှုစနစ် (Steering gear) နည်းပညာပိုင်းဆိုင်ရာ ချို့ယွင်းချက်ကြောင့် သင်္ဘောကို ထိန်းသိမ်းနိုင်ခြင်း မရှိဘဲ မြစ်ကမ်းပါးကို ဝင်တိုက်မိခဲ့ခြင်းဖြစ်သည်။

သင်္ဘောကပ္ပတိန်သည် မောင်းနှင်မှုစနစ် အဆင်မပြေသည်ကို သိရှိချိန်တွင် အနီးနားရှိ လူများနှင့် ရေယာဉ်များကို သတိပေးရန် ဥသြဆွဲခဲ့ပြီး ရိုက်ကူးထားသော ဗီဒီယိုများအရ တိုက်မိသည့်အချိန်၌ လမ်းကြောင်းပေါ်တွင် အခြားကူးတို့သင်္ဘော သို့မဟုတ် လှေများ မရှိခဲ့ကြောင်း သိရသည်။

ပရဂနက်စ်ခရိုင်ရှိ နူးပူးရ် (Noorpur) ကူးတို့ဆိပ်အနီး မြစ်ကမ်းပါးအား ဝင်တိုက်ခဲ့မှုကြောင့် ကမ်းပါးအချို့ အက်ကွဲသွားခဲ့သော်လည်း သင်္ဘောပေါ်ပါရှိသော သင်္ဘောသား ၂၂ ဦးစလုံး ထိခိုက်ဒဏ်ရာရရှိခြင်း မရှိခဲ့ပေ။

စင်ကာပူ ရေကြောင်းနှင့် ဆိပ်ကမ်းအာဏာပိုင်အဖွဲ့ (MPA) ၏ ထုတ်ပြန်ချက်အရ သင်္ဘောသားများထဲတွင် စင်ကာပူနိုင်ငံသား ပါဝင်ခြင်းမရှိသလို ပတ်ဝန်းကျင် ရေထုညစ်ညမ်းမှုလည်း မရှိခဲ့ကြောင်း အတည်ပြုထားသည်။

အဆိုပါ မတော်တဆမှုကို သင်္ဘော ပေါ်ရှိ လမ်းပြရေယာဉ်မှူး (pilot) က ဆိပ်ကမ်းအာဏာပိုင်များထံ ချက်ချင်းအကြောင်းကြားခဲ့သဖြင့် တွန်းသင်္ဘောများ စေလွှတ်ကာ ရေတက်ချိန်တွင် ပြန်လည်ဆွဲထုတ်နိုင်ရန် စောင့်ဆိုင်းခဲ့ကြသည်။ ထို့နောက် သြဂုတ်လ ၁၂ ရက် ည ၁၀ နာရီခွဲခန့်တွင် သင်္ဘောကို သောင်တိုင်မှ ဆွဲထုတ်နိုင်ခဲ့ပြီး သြဂုတ် ၁၃ ရက် နံနက်ပိုင်းတွင် အဆိုပါသင်္ဘောသည် ဒိုင်းမွန်းဟားဘားအနီး၌ ဘေးကင်းစွာ ဖြင့် ကျောက်ချ ရပ်နားခွင့် ရရှိခဲ့သည်။

အဆိုပါ ဖြစ်စဉ်နှင့်ပတ်သက်၍ စင်ကာပူ MPA က ရေကြောင်းဆိုင်ရာ အပြည်ပြည်ဆိုင်ရာ သဘောတူညီချက်များနှင့်အညီ စုံစမ်းစစ်ဆေးမှုများ ပြုလုပ်သွားမည်ဖြစ်သလို အိန္ဒိယ ဆိပ်ကမ်းအာဏာပိုင်များကလည်း သင်္ဘောသားများ၏ အခြေအနေ၊ သင်္ဘော၏ ကြံ့ခိုင်မှုနှင့် ကာလကတ္တားသို့ ဆက်လက်ထွက်ခွာနိုင်ခြင်း ရှိ/မရှိ တို့ကို စစ်ဆေးလျက်ရှိသည်။

.
.
..

အရှေ့အလယ်ပိုင်းစစ်ပွဲကြောင့် ပိတ်ဆို့မှုများပြားနေချိန် ကွန်တိန်နားသင်္ဘောတစ်စီး ပနားမားတူးမြောင်းကို ဦးစားပေးဖြတ်သန်းခွ...
13/08/2026

အရှေ့အလယ်ပိုင်းစစ်ပွဲကြောင့် ပိတ်ဆို့မှုများပြားနေချိန် ကွန်တိန်နားသင်္ဘောတစ်စီး ပနားမားတူးမြောင်းကို ဦးစားပေးဖြတ်သန်းခွင့်ရရှိရန် ဒေါ်လာ ၄ သန်းပေးချေခဲ့ရ။
——————————————————————————
အမေရိကန်နှင့် အီရန်တို့စစ်ပွဲကြောင့် ကမ္ဘာ့အဓိကရေကြောင်းလမ်းကြောင်းများတွင် ကုန်စည်ပို့ဆောင်မှုများ ပိတ်ဆို့နေချိန်၌ ပနားမားတူးမြောင်းတွင် တန်းစီစောင့်ဆိုင်းနေရသည့် သင်္ဘောများကို ကျော်လွန်ကာ ဦးစားပေးဖြတ်သန်းခွင့်ရရှိနိုင်စေရန်အတွက် ကွန်တိန်နားသင်္ဘောတစ်စီးက အမေရိကန်ဒေါ်လာ ၄ သန်းအထိ ပေးချေခဲ့ရကြောင်း သိရသည်။

အဆိုပါစံချိန်တင် ပမာဏပေးချေခဲ့ရသည့် သင်္ဘောမှာ Seaspan Benefactor ဖြစ်သည်ဟု လုပ်ငန်းခွင်နှင့်နီးစပ်သည့် သတင်းရင်းမြစ်များက ပြောကြားခဲ့သော်လည်း ပနားမားတူးမြောင်း၏ လေလံအောင်စာရင်းများမှာ လျှို့ဝှက်သီးသန့် ဖြစ်သောကြောင့် သတင်းရင်းမြစ်မှာ မည်သူမည်ဝါဖြစ်ကြောင်းကို ထုတ်ဖော်ပြောဆိုထားခြင်းမရှိပေ။

Bloomberg သတင်းဌာနက မြင်တွေ့ခဲ့ရသည့် စာရွက်စာတမ်းများအရ အဆိုပါ ဒေါ်လာ ၄ သန်းပေးချေမှုမှာ လွန်ခဲ့သော ၇ ရက်အတွင်း ဖြစ်ပေါ်ခဲ့သည့် ပျမ်းမျှလေလံကြေးထက် ၂ ဆကျော် ပိုမိုများပြားနေကြောင်း တွေ့ရှိရသည်။

စတုန်းနိူင်းနှင့် ဗာဗာအယ်လ်မန်ဒက် (Bab el-Mandeb) ရေလက်ကြားအပါအဝင် အရှေ့အလယ်ပိုင်း ရေကြောင်းလမ်းကြောင်းများ၌ ပို့ဆောင်ရေး အတားအဆီးများ ဖြစ်ပေါ်နေသောကြောင့် အာရှဒေသမှ ရေနံ၊ သဘာဝဓာတ်ငွေ့၊ ဓာတ်မြေဩဇာနှင့် ဓာတုပစ္စည်း ရောင်းဝယ်သူများသည် အခြားအခြားသော လမ်းကြောင်းများအား ရှာဖွေခဲ့ကြရာ အတ္တလန္တိတ်နှင့် ပစိဖိတ်သမုဒ္ဒရာတို့ကို ဆက်သွယ်ပေးထားသည့် ပနားမားတူးမြောင်းမှာ အဓိက အစားထိုးရာ ရေကြောင်းလမ်းကြောင်းတစ်ခု ဖြစ်လာခဲ့သည်။

လက်ရှိအချိန်တွင် ကြိုတင်နေရာရယူထားခြင်းမရှိသည့် Neopanamax အရွယ်အစား သင်္ဘောများမှာ ပစိဖိတ်ဘက်မှ အတ္တလန္တိတ်ဘက်သို့ ဖြတ်သန်းရန်အတွက် ၁၀ ရက်ခန့်အထိ စောင့်ဆိုင်းနေရပြီး မေလနောက်ပိုင်း အရှည်ကြာဆုံး စောင့်ဆိုင်းရသည့် ကာလဖြစ်ကြောင်း Argus Media ၏ အချက်အလက်များက ဖော်ပြသည်။
ထိုသို့ စောင့်ဆိုင်းနေရသည့် သင်္ဘောများထဲတွင် Liquefied Petroleum Gas (LPG)၊ Liquefied Natural Gas (LNG)၊ ရေနံစိမ်းနှင့် သန့်စင်ပြီး ရေနံထွက်ပစ္စည်းများ တင်ဆောင်ထားသည့် သင်္ဘောများလည်း ပါဝင်နေသည်။

အဆိုပါ Seaspan Benefactor သင်္ဘောသည် တန်းစီစောင့်ဆိုင်းနေရမှုကို ကျော်လွန်နိုင်ရန်အတွက် တနင်္လာနေ့တွင် ဒေါ်လာ ၄ သန်းကို လေလံစနစ်မှတစ်ဆင့် ပေးချေခဲ့ခြင်းဖြစ်သည်။ အဆိုပါသင်္ဘောကို တောင်ကိုရီးယားနိုင်ငံတွင် နောက်ဆုံးတွေ့ရှိခဲ့ရပြီး ပနားမားတူးမြောင်းဘက်သို့ ဦးတည်မောင်းနှင်ခဲ့ရာ အင်္ဂါနေ့တွင် ပနားမားတူးမြောင်း၏ ပစိဖိတ်ဘက်ခြမ်း၌ ရောက်ရှိနေခဲ့ပြီး မြောက်ဘက်သို့ ဖြတ်သန်းသွားလာရန် စောင့်ဆိုင်းနေသည့်ပုံစံ တွေ့ရှိရကြောင်း Bloomberg က ဖော်ပြထားသည်။

ပုံမှန်အားဖြင့် သင်္ဘောများသည် ကြိုတင်နေရာရယူကာ ပုံသေနှုန်းထားဖြင့် ဖြတ်သန်းကြသော်လည်း ပနားမားတူးမြောင်းအာဏာပိုင်အဖွဲ့ (Panama Canal Authority) က အမြန်ဖြတ်သန်းလိုသည့် သုံးစွဲသူများအတွက် လေလံစနစ်ကို ခွင့်ပြုပေးထားခြင်းဖြစ်သည်။

အာဏာပိုင်အဖွဲ့က ကမ္ဘာ့ကုန်သွယ်ရေး ဝယ်လိုအားနှင့် ရောင်းလိုအား အပြောင်းအလဲများကြောင့် လေလံကြေးများ မြင့်တက်လာရခြင်းဖြစ်ကြောင်းနှင့် အချို့သော လေလံကြေးများမှာ ဒေါ်လာ ၁ သန်းကျော်လွန်နေကြောင်း ပြောကြားခဲ့သော်လည်း ယခု ဒေါ်လာ ၄ သန်း ပေးချေမှု သို့မဟုတ် သင်္ဘောပိုင်ရှင်နှင့် ပတ်သက်၍ မှတ်ချက်ပေးရန် ငြင်းဆိုခဲ့သလို Seaspan ကုမ္ပဏီဘက်ကလည်း မှတ်ချက်တစ်စုံတစ်ရာ ပေးခဲ့ခြင်းမရှိပေ။

ထို့ပြင် ပနားမားတူးမြောင်း၏ ရေတံခါးများတွင် ပြုပြင်ထိန်းသိမ်းရေး လုပ်ငန်းများ လုပ်ဆောင်နေခြင်းကလည်း ပြည့်ကြပ်မှုများကို ပိုမိုဆိုးရွားစေလျက်ရှိသည်။ စက်တင်ဘာလအထိ ကြာမြင့်မည်ဟု မျှော်လင့်ရသည့် အဆိုပါ ပြုပြင်ထိန်းသိမ်းရေး လုပ်ငန်းများသည် Neopanamax အရွယ်အစား သင်္ဘောများ ၏ ရေတံခါးများကို အသုံးပြုနိုင်ရန် ကြန့်ကြာစေလျက်ရှိသည်။ El Nino ရာသီဥတု ဖြစ်စဉ်ကြောင့် မိုးရေချိန် နည်းပါးခဲ့သဖြင့် လာမည့်သီတင်းပတ်များတွင် Neopanamax ရေတံခါးများ၌ သင်္ဘောများ ၏ အမြင့်ဆုံး ရေစူးအနက် ပမာဏ (draft) ကိုလည်း အာဏာပိုင်များက လျှော့ချထားသည်။ အစားထိုး လမ်းကြောင်းများအတွက် ဝယ်လိုအား အဟုန်မြင့်တက်လာခြင်း၊ တူးမြောင်း ပြုပြင်ထိန်းသိမ်းရေး လုပ်ငန်းများ ဆောင်ရွက်နေခြင်းနှင့် ရေစိမ်ဝင်နိုင်သည့် အနက်ကန့်သတ်ချက်များ စသည့် အကြောင်းအရင်းများ ပေါင်းစပ်လိုက်ခြင်းကြောင့် ပနားမားတူးမြောင်း၏ ဖြတ်သန်းသွားလာနိုင်သည့် အရေအတွက် ပမာဏ လျှော့ကျသွားစေကာ ဖိအားများ ပိုမိုကြီးထွားလာရခြင်း ဖြစ်သည်။

.
.
.

အီကွေဒေါ၏ ဂွာယာကေး (Guayaquil) ဆိပ်ကမ်း၌ ကတ်ထူဘူးများအတွင်း လျှို့ဝှက်သယ်ယူလာသည့် ဒေါ်လာ သန်း ၅၀ ကျော်တန်ဖိုးရှိ ကိုကင်း...
13/08/2026

အီကွေဒေါ၏ ဂွာယာကေး (Guayaquil) ဆိပ်ကမ်း၌ ကတ်ထူဘူးများအတွင်း လျှို့ဝှက်သယ်ယူလာသည့် ဒေါ်လာ သန်း ၅၀ ကျော်တန်ဖိုးရှိ ကိုကင်း ကီလို ၁,၂၅၀ ကျော် ဖမ်းဆီးရမိ။
—————————————————————————-

အီကွေဒေါနိုင်ငံ၏ အဓိကကုန်သွယ်ရေးဆိပ်ကမ်းတစ်ခုဖြစ်သော ဂွာယာကေးဆိပ်ကမ်း၌ စပိန်နိုင်ငံသို့ တင်ပို့ရန် ပြင်ဆင်ထားသည့် ကိုကင်း မူးယစ်ဆေးဝါး ကီလိုဂရမ် ၁,၂၅၂.၈ အား အီကွေဒေါ အမျိုးသားရဲတပ်ဖွဲ့က အောင်မြင်စွာ သိမ်းဆည်းရမိခဲ့သည်။

ဥရောပနိုင်ငံများသို့ မူးယစ်ဆေးဝါးမှောင်ခိုကူးမှုကို တားဆီးရန် "Operation Fénix – 0414" စစ်ဆင်ရေး၏ အစိတ်အပိုင်းတစ်ခုအဖြစ် ဆောင်ရွက်နေစဉ် အဆိုပါ မူးယစ်ဆေးဝါးများအား ဖမ်းဆီးရမိခဲ့ခြင်းဖြစ်ပြီး၊ ပို့ကုန်သေတ္တာများကို စစ်ဆေးစဉ် ရဲတပ်ဖွဲ့ဝင်များသည် သံသယဖြစ်ဖွယ် ဘူးပေါင်း ၁,၀၈၀ ပါဝင်သော ကွန်တိနားတစ်ခုအား အထူးလေ့ကျင့်ထားသော ရဲခွေးများဖြင့် ရှာဖွေစစ်ဆေးခဲ့ရာမှ မူမမှန်မှုများကို တွေ့ရှိခဲ့ကြခြင်း ဖြစ်သည်။

ဓာတ်ခွဲစစ်ဆေးချက်များအရ မူးယစ်ဆေးမှောင်ခိုသမားများသည် စစ်ဆေးမှုများအား ရှောင်လွှဲနိုင်ရန်အတွက် ကိုကင်းဆေးဝါးများကို ကတ်ထူစက္ကူ၏ အတွင်းလွှာများကြားထဲသို့ စိမ့်ဝင်အောင်ပြုလုပ်ကာ လျှို့ဝှက်သယ်ဆောင်လာခဲ့ကြခြင်းဖြစ်ကြောင်း သိရသည်။

သိမ်းဆည်းရမိခဲ့သည့် ကိုကင်းပမာဏမှာ တစ်ကြိမ်သုံးပမာဏ ၁၂,၅၂၈,၀၀၀ ကြိမ်ခန့်အထိ သုံးစွဲနိုင်ပြီး၊ ၎င်း၏တန်ဖိုးမှာ အီကွေဒေါပြည်တွင်းဈေးကွက်၌ အမေရိကန်ဒေါ်လာ ၂,၈၅၀,၁၂၀ ကျော်၊ အမေရိကန်ပြည်ထောင်စုတွင် ဒေါ်လာ ၃၇,၅၈၄,၀၀၀ ကျော်နှင့် ဥရောပဈေးကွက်တွင် ဒေါ်လာ ၅၈,၅၆၈,၄၀၀ အထိ ရှိကြောင်း အာဏာပိုင်များက ထုတ်ပြန်ထားသည်။

ယခုကဲ့သို့ ဖမ်းဆီးရမိမှုမှာ နိုင်ငံတကာ မူးယစ်ဆေးဝါးဈေးကွက်သို့ ရောက်ရှိသွားမည့် မူးယစ်ဆေးဝါး တစ်တန်ကျော်ခန့်အား တားဆီးနိုင်ခဲ့ခြင်းဖြစ်ပြီးမူးယစ်မှောင်ခိုဂိုဏ်းများအတွက်လည်း ကြီးမားသော ထိုးနှက်ချက် တစ်ခုဖြစ်စေခဲ့သည်။

အီကွေဒေါ အမျိုးသားရဲတပ်ဖွဲ့ကလည်း မူးယစ်ဆေးဝါး ရောင်းဝယ်ဖောက်ကားမှုများအား အမြစ်ပြတ်ချေမှုန်းနိုင်ရေးအတွက် ရေကြောင်းဆိပ်ကမ်းများတွင် စစ်ဆေးမှုများ နှင့် အထူးရှာဖွေရေးနည်းလမ်းများကို ပိုမိုတိုးမြှင့်
လုပ်ဆောင်သွားမည်ဖြစ်ကြောင်းပြောကြားခဲ့သည်။

ထို့ပြင် ဂွါယာကေးဆိပ်ကမ်းမှာ မြို့တော် ကီတို၏ အနောက်တောင်ဘက် ၂၇၅ ကီလိုမီတာအကွာ ဂွာယက်စ်မြစ်နှင့် အက်စ်တီရိုဆာလာဒို ရေလက်ကြားတွင် တည်ရှိပြီး၊ အီကွေဒေါနိုင်ငံ၏ စုစုပေါင်း သွင်းကုန် ၉၀ ရာခိုင်နှုန်းနှင့် ပို့ကုန် ၅၀ ရာခိုင်နှုန်းကျော်ကို ကိုင်တွယ်ဆောင်ရွက်ပေးနေရသည့် အဓိက ရေကြောင်းကုန်သွယ်ရေး ပင်မတံခါးပေါက်တစ်ခုလည်း ဖြစ်ကြောင်း သိရှိရသည်။

.
.
.

ဇင်ဘာဘွေရှိ မိကျောင်းပေါများသော ကာရီဘာရေကန်ကြီးအတွင်း ကူးတို့သင်္ဘောတိမ်းမှောက်မှုကြောင့် လူ ၁၅ ဦးထက်မနည်း သေဆုံးပြီး ၂၇...
13/08/2026

ဇင်ဘာဘွေရှိ မိကျောင်းပေါများသော ကာရီဘာရေကန်ကြီးအတွင်း ကူးတို့သင်္ဘောတိမ်းမှောက်မှုကြောင့် လူ ၁၅ ဦးထက်မနည်း သေဆုံးပြီး ၂၇ ဦး ပျောက်ဆုံးနေ။
----------------------------------------------------
​ကမ္ဘာ့အကြီးဆုံး လူလုပ်ရေကန်ကြီးတစ်ခုဖြစ်သည့် ဇင်ဘာဘွေနိုင်ငံရှိ ကာရီဘာ (Kariba) ရေကန်အတွင်း အင်္ဂါနေ့ (ဩဂုတ် ၁၁ ရက်) က ကူးတို့သင်္ဘောတစ်စီးတိမ်းမှောက်နစ်မြုပ်ခဲ့မှုကြောင့် အနည်းဆုံး လူ ၁၅ ဦး သေဆုံးကာ ၂၇ ဦး ပျောက်ဆုံးနေကြောင်း သိရသည်။

ထိုရေကန်သည် နိုင်းမြစ်ဝှမ်း မိကျောင်းများနှင့် ရေမြင်းများ အများအပြား ကျက်စားရာနေရာလည်း ဖြစ်သည်။
​ဇင်ဘာဘွေ အမျိုးသား သဘာဝဘေးအန္တရာယ် စီမံခန့်ခွဲရေးအဖွဲ့၏ အတည်ပြုချက်အရ ခရီးသည် အများအပြား လိုက်ပါလာသည့် အဆိုပါ သင်္ဘောတိမ်းမှောက်မှုအတွင်းမှ လူ ၇၇ ဦးကို ကယ်တင်နိုင်ခဲ့ကြောင်း သိရသည်။

ကယ်ဆယ်ရရှိသူများသည် ရေကန်အတွင်းရှိ ကျွန်းငယ်တစ်ခုပေါ်သို့ ရောက်ရှိအောင် သွားရောက်နိုင်ခဲ့ကြခြင်းဖြစ်ပြီး ကယ်ဆယ်ရေး လှေများဖြင့် အန္တရာယ်ကင်းရာသို့ ပြန်လည်ခေါ်ဆောင်ပေးခဲ့ရသည်။

​အဆိုပါ သင်္ဘောသည် ခရီးသည် ၉၀ သာ တင်ဆောင်နိုင်သည့် ပမာဏရှိသော်လည်း လက်မှတ်ရောင်းချထားသည့် စာရင်းများအရ လူကြီး ခရီးသည် ၁၁၄ ဦးနှင့် သင်္ဘောအဖွဲ့ဝင် ၅ ဦးတို့ လိုက်ပါသွားခဲ့ကြောင်း မြို့နယ်ဆိုင်ရာ ကာကွယ်ရေးအဖွဲ့ (Civil Protection Unit) က အတည်ပြုထားသည်။ ထို့အပြင် လက်မှတ်ဝယ်ယူရန် မလိုအပ်သည့် ကလေးငယ် အများအပြားလည်း ပါဝင်နိုင်ပြီး လက်ရှိတွင် ထိုကလေးငယ်များ ပျောက်ဆုံးနေဆဲ ဖြစ်သည်။

​လက်ရှိတွင် ရေအောက် ရှာဖွေကယ်ဆယ်ရေး အဖွဲ့များ စေလွှတ်ထားပြီး ဒေသတွင်း ရုပ်သံလိုင်းတစ်ခုဖြစ်သည့် ZBC ၏ ထုတ်လွှင့်ချက်များတွင် မှောက်ခုံဖြစ်နေသော သင်္ဘောအနီးသို့ အမြန်ရေယာဉ်များ သွားရောက်နေသည်ကိုလည်းကောင်း၊ ရဟတ်ယာဉ်တစ်စီး ကောင်းကင်ထက်၌ ပျံသန်းနေသည်ကိုလည်းကောင်း တွေ့မြင်ခဲ့ရသည်။

​ဇင်ဘာဘွေနှင့် ဇမ်ဘီယာနိုင်ငံ နယ်စပ်တွင် တည်ရှိသော ကာရီဘာရေကန်သည် ရေထုထည်ပမာဏအားဖြင့် ကမ္ဘာ့အကြီးဆုံး လူလုပ်ရေကန်ကြီးတစ်ခုလည်း ဖြစ်ပြီး ဒေသခံ လွှတ်တော်အမတ် Mutsa Murombedzi ၏ အဆိုအရ ကျေးလက်ဒေသခံများသည် ကာရီဘာမြို့သို့ သွားရောက်ရန်အတွက် ၅ နာရီခန့် ကြာမြင့်သည့် အဆိုပါ သင်္ဘောခရီးစဉ်ကိုသာ အဓိက အားထားအားပြုနေကြရခြင်း ဖြစ်သည်။

​မတော်တဆမှု မဖြစ်ပွားမီ အသက်အရွယ်ရနေပြီဖြစ်သော ထိုကူးတို့သင်္ဘောကြီး ထွက်ခွာသွားစဉ်က ကမ်းခြေမှ လူများ နှုတ်ဆက်ကျန်ရစ်ခဲ့သည့် ရုပ်သံမှတ်တမ်းများကိုလည်း လွှတ်တော်အမတ်က လူမှုကွန်ရက်တွင် မျှဝေခဲ့သည်။ ထိုရုပ်သံထဲတွင် သင်္ဘောပေါ်ပါသူအချို့က ရေကန်၏ လှိုင်းလေကြမ်းတမ်းမှုကို သင်္ဘောအနေဖြင့် ကြံ့ကြံ့ခံနိုင်ပါ့မလားဟု စိုးရိမ်တကြီး ပြောဆိုနေကြသံများကိုပါ ကြားရသည်။

​လက်ရှိတွင် ရှာဖွေရေးလုပ်ငန်းများ ဆက်လက်လုပ်ဆောင်နေဆဲဖြစ်ပြီး သေဆုံးသူအရေအတွက် မကြာမီ ထပ်မံမြင့်တက်လာနိုင်ကြောင်း ဒေသတွင်း သတင်းဌာနများက ဖော်ပြထားကြောင်း သိရှိရသည်။


.
.

ဒယ်လာဝဲပြည်နယ် ဝီးလ်မင်တန်ဆိပ်ကမ်း (Port of Wilmington) ၌ ငှက်ပျောသီးများတင်ဆောင်လာသော ကုန်တင်သင်္ဘောတစ်စီး မီးလောင်မှုဖ...
13/08/2026

ဒယ်လာဝဲပြည်နယ် ဝီးလ်မင်တန်ဆိပ်ကမ်း (Port of Wilmington) ၌ ငှက်ပျောသီးများတင်ဆောင်လာသော ကုန်တင်သင်္ဘောတစ်စီး မီးလောင်မှုဖြစ်ပွား။
————————————————————————

၂၀၂၆ ခုနှစ် သြဂုတ်လ ၁၀ ရက်နေ့က အမေရိကန် ပြည်ထောင်စု၊ ဒယ်လာဝဲပြည်နယ် ဝီးလ်မင်တန်ဆိပ်ကမ်း (Port of Wilmington) ၌ ဘာဟားမားနိုင်ငံအလံလွှင့်ထူထားသော Dole Colombia အမည်ရှိ အအေးခန်း ကုန်တင်သင်္ဘောတစ်စီး ၏ အင်ဂျင်စက်ခန်းအတွင်း မီးလောင်မှုတစ်ခု ဖြစ်ပွါးခဲ့ပြီး အရေးပေါ်ကူညီကယ်ဆယ်ရေးအဖွဲ့များ စေလွှတ်ကာ မီးငြှိမ်းသတ်ခဲ့ရကြောင်း သိရှိရသည်။

အလျား ပေ ၆၀၀ ကျော်ရှည်လျားပြီး ငှက်ပျောသီးများ တင်ဆောင်လာသော အဆိုပါ သ​င်္ဘော၏ စက်ခန်းအတွင်းရှိ ဂျင်နရေတာတစ်ခုမှ စတင်ကာ မီးလောင်ကျွမ်းခဲ့ရခြင်းဖြစ်သည်။

မီးလောင်မှု သတင်းရရှိပြီးနောက် ဝီးလ်မင်တန် မီးသတ်ဌာနမှ တပ်ဖွဲ့ဝင်များသည် အခင်းဖြစ်ပွားရာသို့ ချက်ချင်းသွားရောက်ခဲ့ကြကာ သင်္ဘောကပ္ပတိန်နှင့် တွေ့ဆုံခဲ့ပြီးနောက် မီးလောင်မှုအခြေအနေမှာ အကူအညီများ ထပ်မံရယူရန် လိုအပ်သဖြင့် ဒုတိယအဆင့် အရေးပေါ်အချက်ပေးစနစ်အား ထုတ်ပြန်ခဲ့ကြသည်။

ထို့နောက် သင်္ဘော၌ ပါရှိသော ကာဗွန်ဒိုင်အောက်ဆိုက် မီးငြှိမ်းသတ်စနစ် (CO2 fire suppression system) အား စတင်အသုံးပြုခဲ့ပြီး မီးကူးစက်ပြန့်ပွားမှုကို ထိန်းချုပ်နိုင်
ရန်အတွက် စက်ခန်းတစ်ခုလုံးကို အလုံပိတ်ထားခဲ့ကြရသည်။

အဆိုပါ မီးလောင်မှု၌ သင်္ဘောပေါ်ရှိ သင်္ဘောသားများအားလုံးကို ဘေးလွတ်ရာသို့ အန္တရာယ်ကင်းစွာ ရွှေ့ပြောင်းပေးနိုင်ခဲ့သော်လည်း မီးသတ်သမားတစ်ဦးမှာ မီးခိုးအမြောက်အမြား ရှူရှိုက်မိပြီး မေ့လဲလုနီးပါး ဖြစ်ခဲ့ရသဖြင့် ဆေးရုံသို့ ပို့ဆောင်ကုသပေးခဲ့ရသည်။

၎င်းနောက် မီးငြှိမ်းသတ်ရေး လုပ်ငန်းစဉ်များအပြီး ဝီးလ်မင်တန် မီးသတ်ဌာန၊ အမေရိကန် ကမ်းခြေစောင့်တပ်ဖွဲ့နှင့် သင်္ဘောသားများ သည် သင်္ဘော၏ စက်ခန်းအတွင်း အပူချိန်နှင့် လေထုအခြေအနေများအား တစ်နေကုန် စောင့်ကြည့်လေ့လာစစ်ဆေးခဲ့ကြသည်။

မီးလောင်မှုဖြစ်ပွါးခဲ့သော Dole Colombia သင်္ဘောသည် ၁၉၉၉ ခုနှစ်တွင် စတင်တည်ဆောက်ခဲ့သည့် အအေးခန်း ကုန်တင်သင်္ဘောတစ်စီးဖြစ်ပြီး သစ်သီးဝလံများ (အထူးသဖြင့် ငှက်ပျောသီး) သယ်ယူပို့ဆောင်ရန် သီးသန့်ထုတ်လုပ်ထားခြင်းလည်းဖြစ်သည်။

ယင်းသင်္ဘောသည် ကုန်ပစ္စည်းများအား ကိုယ်တိုင် တင်/ချ ပြုလုပ်နိုင်သည့် စနစ်ပါရှိပြီး ဆိပ်ကမ်း စစ်ဆေးမှုများ (PSC) ၌လည်း မှတ်တမ်းကောင်းများရရှိခဲ့သော သင်္ဘောတစ်စင်းလည်းဖြစ်သည်။ သို့ရာတွင် အဆိုပါ သင်္ဘောသည် လွန်ခဲ့သည့် ၂၀၂၁ ခုနှစ်က ဆိပ်ကမ်းမှ မထွက်ခွာမီ မီးလောင်မှုတစ်ခု ဖြစ်ပွါးခဲ့သဖြင့် မီးငြှိမ်းသတ်ရန် ဆိပ်ကမ်းသို့ ပြန်လည်လှည့်ပြန်ခဲ့ရသည့် ဖြစ်စဉ်တစ်ခုလည်း ရှိခဲ့ဖူးသည်။

သင်္ဘောများ၏ စက်ခန်းအတွင်း ဂျင်နရေတာများ၊ လောင်စာဆီစနစ်များ၊ ချောဆီများ၊ လျှပ်စစ်ပစ္စည်းများ၊ အိတ်ဇောစနစ်များနှင့် ပိုက်လိုင်းများစွာ တပ်ဆင်ထားသည်ဖြစ်ရာ မီးလောင်မှုများအား ပိုမိုကြီးထွားစေနိုင်သည့်အပြင် အနီးကပ်သွားရောက်ငြိမ်းသတ်နိုင်ရန်မှာလည်း လွန်စွာခက်ခဲလှပေသည်။

သို့ဖြစ်ပါ၍ အင်ဂျင်ခန်းအတွင်း ၌ တာဝန်ထမ်းဆောင်နေကြရသော ညီအစ်ကို သင်္ဘောသားများအနေဖြင့် မိမိတို့၏ အင်ဂျင်စက်ခန်းအတွင်း စစ်ဆေးပြုပြင်ထိန်းသိမ်းမှုများအား စနစ်တကျ ပုံမှန်လုပ်ဆောင်ပေးခြင်း၊ လောင်စာဆီနှင့် ချောဆီ ယိုစိမ့်မှုများအား အချိန်မီစစ်ဆေးပြင်ဆင်ခြင်း၊ အပူချိန်လွန်ကဲနိုင်သော အိတ်ဇောပိုက်လိုင်းများ၏ အပူကာစနစ်များ (Insulation) ကောင်းမွန်မှု ရှိ/မရှိ အမြဲမပြတ်ကြည့်ရှုခြင်းတို့အပြင် မီးဘေးအန္တရာယ်ကင်းရှင်းရေး စည်းကမ်းချက်များနှင့် အရေးပေါ် လေ့ကျင့်ခန်း ဆိုင်ရာ (Fire Drill) များအား တိကျသေချာစွာ လိုက်နာဆောင်ရွက်ထားကြပါရန် IFOMS အဖွဲ့ချုပ် မှ ထပ်မံ သတိပေး နှိုးဆော်လိုက်ရပါသည်။

.
.
.

ที่อยู่

56/27 Ramkhamhaeng 156 Alley, Rat Phatthana, Saphan Sung
Bangkok
10240

เว็บไซต์

,

แจ้งเตือน

รับทราบข่าวสารและโปรโมชั่นของ Independent Federation of Myanmar Seafarersผ่านทางอีเมล์ของคุณ เราจะเก็บข้อมูลของคุณเป็นความลับ คุณสามารถกดยกเลิกการติดตามได้ตลอดเวลา

ติดต่อ องค์กรนั้น

ส่งข้อความของคุณถึง Independent Federation of Myanmar Seafarers:

ทางลัด

แชร์

ประเภท