12/05/2026
Հոգեւոր Ճամբորդութիւն մը Դամասկոսի Մէջ։
Վերջերս Դամասկոսի Հ.Ե.Ը. -ի Գործադիր մամինը կազմակերպեց մշակութային եւ հոգեւոր խորունկ ձեռնարկ մը՝ «Նարեկացի» վաւերագրական ֆիլմի մասնաւոր ցուցադրութիւնը։
Երեկոն սկիզբ առաւ Հ.Ե.Ը. -ի Գործադիր Մարմնի ատենապետուհի՝ Տիկ. Լիլա Պօղոսեանի բացման խօսքով, որ բարի գալուստ մաղթեց ներկաներուն եւ պատրաստեց անոնց երեւակայութիւնը՝ թեւածելու դէպի 10-րդ դարու Վանայ լիճն ու Նարեկավանքը, ուր ապրած ու գործած էր Սուրբ Գրիգոր Նարեկացին: Իր խօսքի աւարտին, Տիկ. Պօղոսեան հրաւիրեց Պրն. Շանթ Քէշիշեանը՝ փոխանցելու համառօտ ներածական մը Գ. Նարեկացիի՝ Տիեզերական Եկեղեցւոյ Վարդապետ հռչակուելու պատմական կարեւորութեան մասին։ Ան նաեւ իր յարգանքի տուրքը մատուցեց հոգեւորական եւ մեծանուն մտաւորական Հայր Սահակ Քէշիշեանին, որ ձեռնարկած էր «Նարեկ»ը ֆրանսերէնի թարգմանելու վսեմ գործին:
Ձեռնարկը սկիզբ առաւ խորհրդաւոր մթնոլորտի մը մէջ, երբ սրահին մէջ հնչեց Սուրբ Գրիգոր Նարեկացիի հեղինակած «Յաւուն Յաւուն» տաղը։ Աշխարհահռչակ ջութակահար Սերկէյ Խաչատրեանի վիրտուոզ կատարմամբ հնչած այս երաժշտութիւնը դարձաւ վսեմ ներածական մը՝ ծանօթանալու համար այն ճգնաւորին, որ թէ՛ Հայաստանեայց Առաքելական Եկեղեցւոյ սիւներէն է եւ թէ՛ Ֆրանչիսկոս Պապին կողմէ հռչակուած է Տիեզերական Եկեղեցւոյ Վարդապետ։
Հեղինակ Ռուզաննա Մանուկեանի նպատակն է այս վաւերագրականով արթնցնել գիտակցութիւնը Նարեկացիի փիլիսոփայութեան եւ աստուածաբանութեան հանդէպ։ Դարեր շարունակ «Մատեան Ողբերգութեան»ը (Նարեկը) պահուած է բարձերու տակ՝ որպէս բուժիչ կամ պահպանիչ մասունք։ Այս ֆիլմը կը ջանայ «Նարեկ»ը բարձին տակէն փոխադրել դէպի մարդոց միտքն ու հոգին՝ քաջալերելով հայորդիները սերտելու եւ ապրելու սուրբին պատգամները, փոխանակ զայն լոկ լուռ սբեղանի համարելու։
ֆիլմի Ցուցադրութենէն ետք, Դամասկոսի թեմի առաջնորդ Գերշ. Տ. Արմաշ Եպս. Նալպանդեան ներկայացուց Նարեկացիի կեանքի եւ 10-րդ դարու վանական հարուստ կեանքի մանրամասն վերլուծականը։ Մշակութային գեղեցիկ քայլով մը, ՀԲԸՄ -ի «Լեւոն Եագուպեան» գրադարանը ներկաներուն նուիրեց «Նարեկ»ի նիզար Խալիլիի կողմէ կատարուած արաբերէն թարգմանութեան օրինակներ ապա Սրբազան Հայրը յաւուր պատշաճի աղօթքով օրհնեց նուիրուած գիրքերը եւ Գործադիր Մարմնի կողմէ պատրաստուած յատուկ մոմերը, որոնց վրայ տպուած էր Նարեկեան աղօթքը։
Արժէ յիշել թէ ՀԲԸՄիութիւնը հանդիսացած է ֆիլմի հովանաւորներէն մէկը, Դամասկոսի անդամները ալ իրենց կարգին սատարեցին ֆիլմի յաջողութեան՝ գնելով այդ օրհնուած մոմերը։ Հաւաքուած ողջ հասոյթը փոխանցուեցաւ «Նարեկացի» ֆիլմի հիմնադրամին՝ սատարելու համար անոր տարածման աշխատանքները։
Երեկոն փակուեցաւ ներկաներու միջեւ ծաւալած խորունկ եւ բազմակողմանի զրոյցով, ուր հնչեցին անհատական գաղաբարներ, վերլուծումներ ու տպաւորութիւններ։
Ներկաներուն ու միութեան անունով մեր սրտագին շնորհակալութիւնը կը յայտնենք ֆիլմի հեղինակ եւ արտադրող Ռուզաննա Ղազարեանին, որ այս բացառիկ առիթը ընձեռեց վայելելու իր տեսլականով ստեղծուած այս աշխատանքը։
Վերջապէս, յատուկ շնորհակալութիւն Հ.Ե.Ը.-ին, որ միշտ կը կազմակերպէ ձեռնարկներ, ուր հայ մշակոյթը կը հանդիսանայ հիմնական նպատակակէտը՝ առիթ տալով մեր համայնքին հաղորդակից դառնալու իր հոգեւոր եւ մտաւոր արմատներուն։
Ruzanna Ghazaryan Նարեկացի/Narekatsi
