18/11/2024
ՇՈՒՇԻ ՊԱՐԱԽՈՒՄԲԻ ՓՈՔՐԵՐԸ ՀԱՆԴԻՍԱՏԵՍԸ ԱՌԱՋՆՈՐԴԵՑԻՆ ԴԷՊԻ ՀԵՔԻԱԹՆԵՐՈՒ ԱՇԽԱՐՀ
Համազգայինի «Ն. Աղբալեան» մասնաճիւղի «Շուշի» մանկապատանեկան պարախումբը, պարուսոյցներ Լիլիթ Նալպանտեանի եւ Ալիսա Լախոյեանի ղեկավարութեամբ, 40 փոքրերու եւ պատանիներու մասնակցութեամբ յաջորդաբար ելոյթ ունեցաւ 16 եւ 17 Նոյեմբեր 2024-ին, «Գ. Եսայեան» սրահէն ներս, արուեստասէր բազմութեան ներկայութեան։
Պարախումբը յաջողեցաւ ժամանակաւորապէս հանդիսատեսը անջատել առօրեայ մտահոգութիւններէն:
Ձեռնարկը կը վայելէր հովանաւորութիւնը Բերիոյ Հայոց Թեմի Առաջնորդին։ Ձեռնարկի կազմակերպչական աշխատանքը տարած էր մասնաճիւղի Պարարուեստի Յանձնախումբը։ Ձեռնարկին ներկայ էին Բերիոյ Հայոց Թեմի Առաջնորդի ներկայացուցիչ հոգշ․ Տէր Մանուկ Վրդ. Պարիխանեան, Բերիոյ Կաթողիկէ Հայոց Առաջնորդի ներկայացուցիչ Հոգշ․ Տէր Կոմիտաս Վրդ․ Տատաղլեան, Հայ Աւետարանական Համայնքի պետ Վերապատուելի Դոկտ. Յարութիւն Սելիմեան, ՀՀ Հիւպատոսութեան խորհրդական Դաւիթ Թադեւոսեան, Ազգ․ իշխանութեան, Պատկան Մարմինի, Համազգայինի Սուրիոյ Շրջ. Վարչութեան, հալէպահայ միութիւններու ներկայացուցիչներ եւ արուեստասէր բազմութիւն մը։
Սուրիոյ եւ Հայաստանի զոյգ քայլերգերով յայտարարուեցաւ ելոյթին բացումը:
Մարիա Մոմճեան-Աղպապեան հայերէն բացման խօսքով անդրադարձաւ հայ ժողովուրդի արուեստասէր էութեան, աւելցնելով, որ հայ ազգը հայրենիքէն հեռու՝ սփիւռքի մէջ ապրելով, տարիներու ընթացքին հայաշունչ հոգին պահած է շնորհիւ հայ մշակոյթին, իսկ Համազգայինը հայ սերունդները մշակութային գործունէութեան շուրջ համախմբելով ձգտած է անոնց հետաքրքրութիւնը շարժել հայ երգի, պարի, գրականութեան եւ մշակոյթի տարբեր ճիւղերուն նկատմամբ: Իր խօսքի աւարտին Աղպապեան շեշտեց, որ «Շուշի» մանկապատանեկան պարախումբի փոքրիկները տքնաջան աշխատանքէ եւ երկար փորձերէ ետք բեմ պիտի բարձրանան ներկայացնելու իրենց աշխատանքին արգասիքը:
Արաբերէն բացման խօսքով Արարատ Մազլումեան յայտնեց, որ պարարուեստը արտայայտութիւնն է ուրախութեան, մանաւանդ երբ կը ներկայացուի փոքրիկներու կողմէ: Ան դիտել տուաւ, որ փոքրերու ներաշխարհին զարգացումը մեր վզին պարտքն է, որովհետեւ անոնք են ազգին ապագան: Մազլումեան իր խօսքին աւարտին շնորհակալութիւն յայտնեց բոլոր անոնց, որոնք նեցուկ կանգնեցան այս ելոյթին: Երբ բեմահարթակին վարագոյրը բացուեցաւ, հեքիաթներու աշխարհ մը բացուեցաւ հանդիսատեսին դիմաց։
Հանդիսավար Մարիա Մոմճեան-Աղպապեան Սինտրելլայի պատմութիւնը կը պատմէր, որուն զուգահեռ փոքրիկները պարերով կը կենդանացնէին պատմութիւնը: Յայտագիրը կը բաղկանար երկու մասերէ, որոնք կ'ընդգրկէին հետեւեալ պարերը․ Ա. մաս
Lavender's Blue, So This Is Love, La Valse de L'amour, «Գայանէ»-Ա. Խաչատուրեան, La Valse D'amelie․ Բ. Մաս
Cha Cha (lets get loud), հայկական պար «Կիւմրի», արաբական պար, հայկական պար «Կէօզալ», խառն պար «Beggin» - «Մոկաց Հարսներ», հայկական պար «Արցախ», մանուկներու պար, հնդկական պար (chinki chameli), Նազ պար «Սարի Աղջիկ», եզրափակիչ պար «Աշխարհի Հայեր»:
Փոքրերը իրենց շարժուձեւերով, գեղեցիկ տարազներով, ժպիտով եւ աշխուժութեամբ զուարճալի պահեր ստեղծեցին: Բոլոր պարերն ալ յոյս եւ ուրախութիւն ներշնչեցին ներկաներուն, ի մասնաւորի եզրափակիչ պարը, որուն ընթացքին բոլոր փոքրերը համախմբուած ներկայացուցին հայկական մեր գեղեցիկ աւանդական պարը, եւ աւարտին բեմին վրայ ծածանեցուցին եռագոյն դրօշը:
Հանդիսութիւնը աւարտին հասաւ Տէր Մանուկ Վրդ. Պարիխանեանի «Պահպանիչ» աղօթքով:
Քաղուած պաշտօնաթերթէն
