18/08/2026
Urur Siyaasadeedka SOYPA, wuxuu si weyn u bogaadinayaa geesinnimada ay muujiyeen labada dhallinyaro ee reer Ruunirgood, kuwaas oo khaarijiyay mid kamid ah horjoogayaasha khawaarijta Alshabaab, Waa tallaabo mudan in lagu daydo, waxayna caddeyn u tahay in shacabka Soomaaliyeed ay leeyihiin karti iyo dhiirranaan ay dalkooda ku difaacaan.
Hase yeeshee, dowladda waxaa laga doonayaa inay geesinnimada shacabka u beddesho awood qaran oo nidaamsan, ayna ka faa'iidaysato aqoonta iyo fahamka ay dadka deegaannadu u leeyihiin dhulkooda.
Afartii sano ee la soo dhaafay, dowladda waxay ku guuldarreysatay inay keento natiijo waarta oo lagu ciribtirayo Khawaarijta; deegaanno badan oo la xoreeyeyna mar kale ayay gacantooda galeen. Halganka aan lahayn istaraatiijiyad cad iyo qorshe lagu sugayo deegaannada la xoreeyo, wuxuu sababayaa in naf hurka ciidamadeennu uusan dhalin natiijadii laga filayey.
Maanta, dalka waxaa ka weyn xoreynta deegaanada, in la dhowro sharciyadda dowladnimada, lana helo heshiis siyaasadeed oo loo dhan yahay iyo doorasho loo dhan yahay. Dagaalka Khawaarijta looma adeegsan karo marmarsiiyo lagu hareer maro xal siyaasadeed, sharci iyo doorasho ay Soomaalidu ku wada qanacsan tahay.
SOYPA waxay ugu baaqaysaa dhinacyada siyaasadda inay dalka ka badbaadiyaan khilaaf kale, ayna mudnaanta siiyaan heshiis siyaasadeed oo loo dhan yahay, doorasho loo dhan yahay iyo dowladnimo ku dhisan sareynta sharciga.
