15/07/2026
Waxaa Hotel Jazeera ee magaalada Muqdisho lagu soo gabagabeeyay Madasha 3-aad ee Horumarinta Soomaaliya SDF2026, taas oo si wada jir ah u soo agaasimeen Machadka Heritage iyo Jaamacadda City ee Muqdisho, iyada oo sannadkaan diiradda lagu saarayay, “Soomaaliya oo Maraysa Marxalad Xasaasi ah; Xoojinta Xasilloonida, Midnimada iyo Horumarka”.
Madasha oo shalay Muqdisho uu ka furay Ra’iisul Wasaare ku xigeenka dalka, Mudane Saalax Axmed Jaamac, waxaa lagu soo bandhigay sagaal hadaljeedin, oo ay sameeyeen Wasiirka Arrimaha Gudaha Soomaaliya, Agaasimaha Machadka Heritage iyo Prof. Afyare Cabdi Cilmi oo ku hadlay afka agaasinka Madasha.
Maalinta labaad, madasha waxaa furay Wasiirka Arrimaha Dibadda Soomaaliya, Mudane Cabdisalaan Dhaay, waxaa lagu soo bandhigay 14 Cilmi-baaris, 6 doodcilmiyeed uu qeyb ka ahaa, Wasiirka Ganacsiga iyo Warshadaha, Mudane Jamaal Xasan, sidoo waxaa lagu soo bandhigay Hadaljeedin ku saabsan Mustaqbalka Heshiiska Siyaasadeed ee Soomaaliya.
Ka qeyb galayaasha oo gaaraya in ka badan 300 - oo qof, ayaa waydiimo ka dhiibtay doodaha ay soo bandhigeen aqoonyahaannada lagu casuumay Madasha.
Sidoo kale, Intii lagu jiray xiritaanka Madasha, Madaxda Machadka ayaa shahaado guddoonsiisay ardayda ka faa’ideystay Barnaamijka intern-ka uu Machadka sannad walba siiyo ardayda soo dhamaysa Jaamacadaha dalka.
Guddoomiye ku xigeenka Machadka Heritage Dr. Cabdirishiid oo ka hadlay xiritaanka Madasha, ayaa ka qeyb galayaasha iyo madaxda la wadaagay nuxurka ka soo baxay Madasha 3-aad ee SDF2026; halka, Agaasimaha Machadka, Mudane Mursal Saney oo kalmadda jeediyay xiritaanka ayaa Madaxda iyo Martida uga mahadceliyay ka soo qeyb galka shirka.
Madaxweynihii h**e ee dalka, Mudane Shariif Sheekh Axmed oo si rasmi ah u soo xiray Madasha 3-aad ee Horumarinta Soomaaliya SDF2026, ayaa Machadka Heritage iyo Jaamacadda City ku bogaadiyay qabashada Madashaan oo sannadkaan ku soo aaday xilli loo baahnaa.
.
