13/12/2025
1. Somalia, dhalinyarada xoogga leh ee dalka dhisi lahayd badaha iyo saxaraha ayay naftooda ku biimeeyaan (Tahriib), halka shisheeye aan dalka u dhalan ay u soo shaqo tagaan oo ay lacag ka sameeyaan.
2. Somalia, waa dalka leh xeebta ugu dheer Afrika iyo xoolo nool oo tiro badan, haddana dadkiisu waxay u dhintaan gaajo, harraad, iyo nafaqo-xumo.
3. Somalia, dadka qurbaha ku nool waxay lacagta ugu badan ku bixiyaan in qabiil walba uu yeesho TV iyo Idaacad u gaar ah, halkii ay lacagtaas ku dhisi lahaayeen Isbitaalo iyo Iskuulo ka dhexeeya bulshada oo dhan.
4. Somalia, dadka danyarta ah qabiil dartiis ayay isku laayaan oo dhiigga isaga daadiyaan, halka odayaasha iyo siyaasiyiinta ay u dagaalamayaan ay hoteelada qaaliga ah ku wada qaxweeyaan, heshiis-na yihiin.
5. Somalia, qofka daacadda ah ee sharciga ilaaliya waxaa loo arkaa doqon aan nolosha la jaan-qaadi karin, halka qofka tuugga ah ama xoolaha dadweynaha lunsada loo arko geesi "far-dheer" oo reerka anfacay.
6. Somalia, heesta calanka iyo wadaninimada marka ay baxayso dadku way ku ooyaan jaceyl ay dalka u qabaan dartiis, laakiin marka ficilka la joogo, guryahooda iyo maalgashigooda waxay ka sameystaan Turkey, Kenya, ama Yurub.
7. Soomaaliya waa dal ay dadkiisa ladan (Taajiriinta) ka cararaan inta ay nool yihiin, balse maydkooda loo soo celiyo si loogu aaso. Noolashooda waxay siiyeen shisheeye, geeridoodana dalka.
8. Waa dal ay aqoonyahannadiisu xooggooda iyo maskaxdooda cusub ku bixiyaan qurbaha, balse marka ay gaboobaan oo 'Garaadkoodu daalo' ay dib ugu soo laabtaan dalkii, iyagoo wada jirkii oo tamar beelay.
9. Waa dal ay kuwa u dhabar-adaygay gaajada, qorraxda, iyo dhibaatada gudaha—kuwaas oo ah tiir-dhexaadka bulshada—ay yihiin kuwa ugu awoodda yar, talada dalkana aysan waxba ku lahayn.
10. Soomaaliya waa dal lagu tartamo dhismaha daaraha dhaadheer iyo guryaha qurxoon, balse aan lagu tartamin dhismaha garaadka dadka iyo tayaynta waxbarashada ubadka gali doona guryahaas.
11. Waa dal leh xeebta ugu dheer Afrika iyo xoolo nool oo tiro beel ah, haddana dadkiisu ay u dhintaan macaluul, kuna tiirsan yihiin gargaar shisheeye iyo raashin dhacay.
12. Waa dal ay inta badan madaxdiisa iyo hoggaamiyeyaashiisu haystaan "Dhalasho iyo Baasaboor Ajnabi" si ay u baxsan karaan haddii xaaladdu xumaato, halka shacabka masaakiinta ah aysan haysan meel ay u ciirsadaan aan ka ahayn dalkooda gubanaya.
