28/02/2026
Qofka Soomaaliga ah ee dhallinyarada ah wiil/gabar, si uu u noqdo qof nolosha ku guuleysta, maxay tahay inuu sameeyo? Waa maxay waxa maskaxdiisa ku soo ridaya inuu u baahanyahay guul nololeed inuu qofkaa gaaro? Muxuu yahay sawirka uu maskaxda ku heysto ee tusaya guusha? Yaa looga arkaa gudaha bulshada Soomaaliyeed inuu yahay qofka guuleystay?
Aragtidayda intaan oo su’aalood , waxaan ku koobaya jawaabahooda; si jiil dhallinyaro ah ay u noqdaan kuwa gaara guul nololeed, waxay u baahanyihiin anshax iyo caadooyin hagaya , guul laguma helo si kedis ah, lamana dhaxlo. Waxaa la gaaraa marka ay jirto jid la maro, iyo dad kaa horreeyay oo raad toosan ka tegay oo aad kaga dayan karto oo si fudud u noqonaysa maahmaahda Soomaaliyeed ee tiraahda; Ratiga dambe ratiga h**e saan-qaadkiisa ayuu leeyahay! Xilliyada qofka uu naftiisa la hadlayo oo go’aamo nololeed gaarayo , waa marka uu u baahanyahay wax dhiirrigelinaya iyo wax uu tusaale u adeegsado.
Bulshada Soomaaliyeed , waxay la dhibtoonayaan caadooyin iyo hab dhaqan nololeed oo ku hagaya xaalad burbur ah. Qofka Soomaaliga ah wuxuu doonayaa nolosha inay si iskiid ah u dhisanto , si fudud oo waddooyin laga boodey leh in lagu dhiso, qof kasta wuxuu dhexda uga jira riyo nololeed, laakin waa kuwa yar inta wax sax ah u qabanaysa si ay nolosha si sax ah ugu dhisaan, inta badan waxaan hiigsanayna nolosha inay si hadyad ah wax walba ku hesho, mana dooneyno si dabiici ah oo dadaal, hal-abuur iyo howl leh inaan nolosha ku dhisno.
Labo arrinba waa xaalad ay tahay in deg deg loo suuliyaa, middi waa nolosha iyada dhan musuqa lagu dhisayo, cidda la hiigsado ee guusha nolosha inay gaareen bulshadeena ay u arkaan, waa kuwa dhaca hantida dadweyne, mid awood dawladeed ay dhaceen ama hab kale oo naxariis darro ah ha umaraan e, tan labaad waa inaysan jirin wax mas’uuliyad iyo qiyam ah; qofkeen ma doonayo ficilkiisa inuu noqdo mid dan guud looga faa’iideysto, nolosheenna waa mid han gaaban oo qabyaalad , bahdil iyo mustaqbalkeeda loo daba fadhistay inta burburinaya karaamadeena.
Bulshada Soomaaliyeed, maanta waxay u baahanyihiin jiil waxgal ah oo maskaxda ka fakarta ee aan caloosha u fakarin, jiil wax u qabanaya si qiyam nololeed uu u dhiso, jiil diyaar u ah inay dhisaan wacyigooda, aqoontooda iyo aragtidooda. Ilaahay marka uu ina soo saarayay wuxuu inoo caddeeyay waddada loo qaado nolosha qiyamka leh oo si kooban u ah , waa in jidka khaldan laga leexdo oo aaminaad rabbi lagu dhisaa nolosha. Tan u dambeysa ummad ahaan waxaana u baahanay nafteena inaan ka saarno xaaladan qalafsan oo mid wadaniyad iyo aragtida qomiyadeed leh aan ka dhigno. Eeg 40-kii sanno ee u dambeysay ma jiro cid god gashay iyadoo xasuus qarameed ka tagtay, hadana ciddi meel kale inoogama imaan doonto haddii aanan iska leexin cid kasta oo aan lahayn wax looga daydo ee waddada saxan inagu haga, mustaqbal waarana ku hoggaamiya bulshada.
Ramaadan wanaagsan. Ilaahay tubta toosan ha inagu hago.
