01/02/2022
ISBEDDEL dawladnimo, dhaqaale iyo bulsho u soo degaya sidii Xeedhadii reer Banii Israa'iil oo kale ma jiro!
Isbedel dhanka togan ah si joogto ah ayuu ugu baahanyahay Aadamuhu, wuxuuna ku yimaaddaa wadarta jiritaanka (1)garasho ama baraarug tebaya oo tilmaamaya isbedel in loo baahanyahay iyo nooca isbedel ee loo baahanyahay, iyo (2)xulashada cidda ugu habboon ee baahidaa isbedel dabooli karta ama dhaqaaq fiican u samayn karta dhankiisa.
Biyo meel godan bay isugu tagaan ee isbedelka ugu ballaadhan uguna dhaw dhamaystirnaan waa isbedelka ay dhasho DAWLADNIMADA hesha HOGGAAN ku HABBOON.
Hoggaanka dawladaha dimuqraadiga ahi wuxuu ka yimaaddaa doorasho dadwayne, dadwaynaha ayaana xula cidda ay aayahooda nololeed ku aaminayaan, oo dabcan noqonaysa cid aqoon, xirfad iyo waayo aragnimo u leh shaqada loo cuganayo, misana leh hufnaan shaqo iyo daacadnimo.
Akhriste, muwaadin, ha noqon isbedel suge ee noqo isbedel curiye, naftaadana ka bilaw isbedelka.
