16/08/2016
DAMIEN KINGSBURY PENSEHAT YANG KEUNOENG KHIANAT
“‘oh lheueh nyan ureueng nyan (Malik, Zaini, dan Nur Djuli) geutanyong pakriban peundapat lon teuntang peukara nyan, dan lon peugah bak ureueng nyan lon han jeuet bi peundapat sapeue le.” – Damien Kingsbury
Damien Kingsbury nakeuh sidroe ureueng Australia nyang jeuet keu peunasehat GAM yoh na peurundingan Helsinki nibak thon 2005. Kingsbury, meunan chit William Nessen, sampoe ‘an uroe nyoe mantong han dibi izin untok tamong u nanggroe Indonesia, salah saboh sabab jih nakeuh keuteurlibatan ureueng nyan dalam peurjuangan GAM.
Nan Damien Kingsbury chit hana that taturi le geutanyoe ureueng Acheh. Beuthat pih meunan, droe geuh sebetoi jih that teurlibat seucara langsong dalam peurjanjian Helsinki. Dudoe yoh masa-masa akhe peurundingan, droe geuh hana le seunang deungon asoe nibak MoU Helsinki lam peukara TNI, teuma jinoe droe geuh ka hana meukeunong le chit ngon parte Malik Mahmud.
Tulesan nyoe ulon tuleh sabab lon kalon peuranan Damien Kingsbury (ureueng internasional) nakeuh that rayek dalam peurjuangan GAM yoh masa di Helsinki. Sabab nyan keuh, seujarah nyan beujeuet keu peulajaran keu geutanyoe teuntang arti nibak beunantu ureueng ‘international’ dan pakriban cara tacok manfaat dari beunantu ureueng nyan.
Tulesan nyoe Insya Allah akan lon peugot dalam meupadum boh artikel nyang lam tiep-tiep artikel akan lon bahaih saboh-saboh peukara nyang lon rasa peunteng dan patot geuteupeue le ureueng rame. Untok artikel keu phon, lon keumeung tuleh seujarah Damien Kingsbury jeuet keu peunasehat GAM.
…………………………………..
Peunasehat GAM
Meunurot Kingsbury, droe geuh phon that geumeuturi ngon ureueng-ureueng GAM dari buet peuneulitian droe geuh teuntang teuntra Indonesia. Kingsbury chit that geuturi le masyarakat donya sibagoe salah sidroe ureueng nyang anti keu politek teuntra Indonesia. Meunurot droe geuh keudroe, sampoe ‘an jinoe pih gop nyan mantong yakin bahwa TNI nyan nakeuh salah saboh institusi nyang korup dan brutal nyang hana patot roh dalam donya politek nyang takheun manosiawi dan demokratik. Meunan keuh geurasa teuntang hubongan droe geuh deungon GAM yoh masa phon geumeuturi nyan, musoh nibak musoh droe geuh nakeuh rakan geuh, atawa lam basa Inggreh takheun, “the enemy of my enemy is my friend.”
Hubongan Kingsbury deungon GAM yoh masa nyan, maken si-uroe nakeuh maken toe laju, seuhingga nibak thon 2001 gop nyan geuteumeueng keuseumpatan untok meurumpok ngon pasukan GAM pimpenan Teungku Jamaica lam uteuen Acheh. Teuma ‘oh lheueh geujak kunjong pasukan Teungku Jamaica nyan, ureueng GAM laju geubi keupeurcayaan nyang maken rayek keu si Kingsbury nyoe. Meunan keuh dudoe, nibak akhe buleuen siploh thon 2004, peumimpen GAM di Swedia geu-undang Kingsbury untok meurumpok ngon ureueng nyan di Stockholm, Swedia.
Na peukara-peukara nyang that meunarek untok tateupeue yoh watee Kingsbury meurumpok ngon pimpenan GAM yoh masa nyan. Kingsbury geupeugah, bahwa watee geumeurumpok deungon pimpenan GAM, ureueng nyan hana that le geumeuceukot teuntang ideologi Acheh Mardehka dan pakriban cara ureueng nyan keuneuk peujak buet peumardehka Acheh. Meulaenkan, leubeh le geumeuceukot teuntang buet peumakmu/peusijahtra rakyat Acheh dan buet peuseulamat hase bumoe Acheh deungon cara peumeukleh droe (Acheh) dari Indonesia. Teuma meunurot Kingsbury, meunyo chit keuneuk peuseulamat hase bumoe mantong, nyan hana payah tamuprang (mardehka) pih jeuet chit. Yoh masa nyan keuh Kinsbury geuthee bahwa na keumungkinan GAM akan geupeugot keuseupakatan ngon Indonesia.
Kingsbury geutuleh:
“Assuming the goal was to improve the lives of the people of Aceh by altering their relationship with Jakarta, and not separatism for its own sake, it became possible to consider alternative approaches to ending the conflict.”
Meumakna:
“Meunyo takheun tujuan jih nakeuh untok tapeumakmu udep rakyat Acheh deungon cara ta-ubah hubongan deungon Jakarta, dan kon bit-bit untok peumeukleh (peumardehka) Acheh keu droe, maka ka teuntee jeuet tamita cara laen untok tapeupiyoh konflik.”
Mantong lam rapat nyoe chit, peumimpen GAM teuma geupeutroh haba bak Kingsbury bahwa ureueng nyan ka na meuhubong ngon pihak Indonesia teuntang keumungkinan untok meuduek runding lom, dan sira geutanyong, peue keuh Kingsbury na jeuet geubantu beurangkapeue ntreuk meunyo na jadeh geupeugot peurundingan nyan? Teuma bak watee nyan keuh laju ka na pakat dari Kingsbury untok jak bantu GAM dan seucara hana resmi ka jeuet droe geuh keu peunasehat GAM.
Dudoe, undangan reusmi untok peungon peumimpen GAM sibagoe peunasehat dalam rapat Helsinki pih trok bak jaroe droe geuh bak akhe buleuen sa thon 2005. Beuthat pih meunan, undangan reusmi dari CMI (Crisis Management Initiative, organisasi nyang peugot acara duek pakat Helsinki) keu GAM dan pihak Indonesia untok jak meurunding di Helsinki nyan ka teupeuteubiet dari tanggai 24 buleuen 12 thon 2004 kon (dua uroe sigohlom teuka bala geumpa dan tsunami u Acheh).
Meunan keuh calitra Prof. Damien Kingsbury dari Australia jeuet keu Peunasehat Peurwakilan GAM dalam peurundingan Helsinki nibak thon 2005.
…………………………………..
Dari fakta seujarah nyoe, na keusimpulan-keusimpulan nyang jeuet tatuleh nakeuh:
nibak akhe buleuen siploh 2004 (dua buleuen sigohlom teuka bala geumpa dan tsunami u Acheh), politek luwa nanggroe GAM pimpenan Malik Mahmud chit ka kon le untok peudong Nanggroe Acheh meulaenkan untok peuseulamat ubena hareuta deungon daleh untok “peumakmu rakyat”.
peumimpen GAM dimuyup koasa Malik Mahmud hana keumampuan untok peubuet buet diplomasi luwa nanggroe. Kon lagee almarhum Teungku Hasan dan ureueng-ureueng toe droeneuh nyan nyang ka awai geupeucat le Malik, nyang mampu geupeuyakin ureueng luwa bahwa peurjuangan bansa Acheh nakeuh buet nyang mutlak sibagoe buet peudong deelat bansa nyang ka leubeh awai mardehka nibak dum bansa laen lam donya, nyang ka dipeuprang le Beulanda, dan dudoe ka dijajah le Indonesia. That sayang, peumimpen GAM dimuyup Malik Mahmud hanya mampu geupeuyakin peunasehat droe geuh bahwa peurjuangan bansa Acheh nakeuh peurjuangan jak peuseulamat hareuta, chit peureuseh lagee nyang deuh takalon jinoe geupeubuet buet di Nanggroe teuh nyoe.
peunasehat GAM ka geuteurimong haba nyang salah teuntang ideologi peurjungan bansa Acheh dan ka teuntee geujak lam peurundingan deungon peumikiran nyang salah chit. Ka lagee ureueng teungeuet geubi bu, ureueng deuek geubi bantai, meunan keuh buet sidroe-droe ureueng meunyo hana meuphom keuadaan nyang seubeutoi jih.
peurundingan Helsinki geupeuphon kon keuh sabab na troh bala geumpa dan tsunami u Acheh. Jeu-oh uroe sigohlom nyan, rancangan untok peugot peurundingan nyan ka lheueh geupeujak. TSUNAMI ka geupeungui sibagoe alat untok peulikot tanggong jaweueb droe geuh (pimpenan GAM) ateuh bansa Acheh nyang ka geumeujuang meuploh-ploh thon untok geupeudong deelat Nanggroe endatu geuh.
Meunan keuh saboh lapeh seujarah bansa geutanyoe Acheh. Tulesan nyoe Insya Allah akan meusambong lom ukeue teuntang keuteurlibatan Kingsbury dalam peurundingan Helsinki. Untok jinoe ka jeuet tateupeue dilee pakriban calitra Kingsbury nyan jeuet keu peunasehat GAM. Teuma, lon lakee komentar dari ureueng droe neuh mandum nyang na neubaca tulesan nyoe, beujeuet keu bahan diskusi geutanyoe.
Sumber:Peace in Aceh, A Personal Account of the Helsinki Peace Process, oleh: Damien Kingsbury.
Geunaseh: Keu rakan nyang na ban sigom donya nyang ka neutem bloe buku-buku teuntang Acheh keu lon dan ka neu support perjuangan loen. Thank you very much. [Munzir bin Muntasir]
Sumber : Su Atjèh Meudéhka | Bulletin
