01/11/2022
Kʉyʉka'ŋ a̱ttɨ bʉllɨŋ'íŋ júrgólóŋaŋ na belé
"da̱a̱mɨ waarkʉoŋo"
A̱ttɨŋ:
In a̱ttɨ ayéŋ sabbaŋ-ii , ná A̱bdʉ Kʉyʉka'ŋ daara bʉllɨŋ'íŋ na dʉldɨŋkwěŋ gʉʉda'ŋ, ra̱yŋel na jurgólóŋaŋ tulleŋa ɨɨs-ii inni, ki la âl poora'ŋ bʉllɨŋ'íŋ risíŋá na dɨ́eŋ beléŋ ,na daara jurgólóŋaŋ kormi ra̱yŋel killa asa kʉyʉkaŋ daara-si kééŋ aaríŋa appaŋa-sí na dééŋ domoŋ -sis jopeli
Ki-sí-ii ná kʉndɨya áláŋ in tarrîg-lé ká̱rɨ?
Kwa âl jʉrgólóŋa kwǎ ge , ka̱nɨ na keya , na kwa kɨd âl poora'ŋ belé na dɨ́eŋ bʉllɨŋ putto tɨyɨ̌el na jʉrgólóŋa sí kí gʉʉd'ɨ́ŋ koraŋa káwé, nyéttiŋ nisel-si ka̱ɨŋ aláŋ in tarrig-lé ka̱rɨ́yâl .Marraŋ jʉrgóloŋa al kí pooríŋ belé ge yɨeŋ-si soŋŋá koel .
In a̱ttɨŋ'íŋ ááreŋa :
- Poor'íŋ bʉllɨŋ'ɨ́ŋ rim na dééŋ ta̱bɨ̂d áláŋ ájʉ́ŋoba .
-na asáŋ jʉrgʉ́loŋa kaiŋ poor'íŋ bele'ŋ na bʉllɨŋ'íŋ
- na asáŋ poor'íŋ bele'ŋ jʉrgʉ́loŋa kí gʉʉd'ɨ́ŋ dorá soŋŋa kaiŋ , na kwa kɨd ǎl poor kírsiŋa áláŋ jʉ́rgʉ́loŋa gʉʉd'ɨ́ŋ doraŋ-sí pʉ́tton kiyal na áláŋ bele'ŋ rim-lé asara kaare.
- na aláŋ kʉgʉr na jʉrgʉloŋa gʉʉd'ɨ́ŋ dorá'ŋ bisaraŋa-sí pooríŋ beléŋ kʉgʉr-lé ka̱bɨyâl.
Jʉrgʉloŋaŋ kormi da̱mɨ waarkʉoŋo'ŋ:
-aadéŋa na ósoma'ŋ táári pooríŋ bʉllɨŋ-lé
-weél'íŋ na taáŋ sǔbu(sa̱gʉr kɨrrô, aa̱gʉr puttâ) dɨ́eŋ tin na áádéŋa asá kawe.
-dogólaŋ tawra jaa'ŋ sǔbu'ŋ áádéŋa
-jawílíŋ útáŋá poora'n bʉllɨŋ-lé : inná úríŋá kí ayéŋá'ŋ daaraŋa ay si tɨɨlɨ sooŋa'ŋ eré in na weél'iŋ eré na kwa'ŋ jaiŋ'íŋ eré.
Ʉʉtóŋa âl kwoel aláŋ jɨrɨ́mó in tarrig-lé:
-aláŋ kɨ́ɨ́ŋ jorgoloŋáŋ kormi-si ba̱gɨ jáá ǎl daara jáá.
- na aláŋ dɨ́ɨ́ŋ jʉrgʉ́ĺ kila jʉrgʉ́loŋá'ŋ ʉʉŋa appáŋa -si nyét ayti nás teréére pia .
-na áláŋ jurgolo kí dora ɨd eeŋ inná jolgoloŋa gʉʉdɨŋ âl Akaadɨmeŋa-lé na jurgólŋá'ŋ daaraŋa-lé ɨndelíŋ kí gʉʉdɨŋ dora nas domboreŋa wala kagʉra al kí dɨ́ɨ́ŋ jurgólo jeélel atti in lóŋ ná nema-ii wala jírsíŋo asáŋ jarraŋ abá in lóŋ nas dɨɨŋ juroglo-lé nyéŋíti.
-na dɨɨŋ jurgóló in lóŋ aláŋ tóórig ákawareba atti in loŋ na dééŋ sabba-ii wala nyéttiŋ , na tóórig dog tarríg keer-lé koos ábawaba.
-na jurgolo in áloŋba asáŋ kwa-si assɨtɨ asáŋ kóór kɨŋɨ wala gâl áláŋ kwa-si ŋéérel nás kergel pii.
-jurgóloŋa atti in lóŋ ná kí poori wala kí soloŋ-ii nyéttiŋ keél marraŋ ɨd ǎl kí pooriŋ belé-ii ; yé-sí soŋŋá kʉrro kanni.
-na dog as kɨnel-ba áláŋ á̱y dʉó kí jurgolo tog-lé soŋŋá ká̱rɨ in tarrig-lé.
-na jurgolo in lóŋ aláŋ sangala 50-lé ittí áy-ba .
-na áláŋ dɨ́ɨ́ŋ jurgóló-si Kʉyʉ́ka'ŋ daara'ŋ Ɨmɨêl-lé jamiŋi.
-na a̱yɨ jurgóló ná liya êla asá tiin jamíŋíŋ aagíŋí, ba possuŋa ɨndélíŋa .
-
Utóŋá ǎl in kwoél áláŋ kí jurgóloŋ arrá áddeŋ jáá:
-dɨɨŋ dɨɨréŋ gaar
-na domoŋ ǎl gîs in pláálíti in jurgúló álbá délliŋ in tarrig'íŋ-ŋii .
-na domoŋ asá jɨɨna áláŋ Kʉyʉka'ŋ daara dɨ́ɨ́ŋ jurgóló-sí iwar atti inlóŋ nás koos élla.
Te**es jaaŋ daara:
Kʉyʉkaŋ daara kwa kɨd-sí síŋ êll asá jurgólóŋa'ŋ koraŋa taraas kalŋa na poor'íŋ belé'ŋ arde'ŋ na rim-lé kakɨ́ré gé na jurgólóŋa-sis karre na dɨ́eŋ dɨó tullélla karól .
Tiin'íŋ sidab :
2022/1/11-lé ásáŋ tʉ́sʉ́ ká̠wlɨ nás jurgólóŋa kéél.
- 2023/1/1-lé nás jurgólóŋá'ŋ ja̱ɨ̌ kurrɨ́
-2023/2/21-lé nás a̱ttɨ'ŋ tawrá jaraŋ'íŋ sǔbu káa
A̱ttɨ'ŋ ɨwɨlɨŋ:
-Taar waarkʉoŋo- sí 100 líri sʉdân'íŋ sóŋgoŋa-lé
-Taar a̱wkʉoŋo- sí 70 líri sʉdân'íŋ sóŋgoŋa-lé
-Taar ɨɨskʉoŋo- sí 50 líri sʉdân'íŋ sóŋgoŋa-lé
-
Na jurgólóŋa kila asá koos éle kʉyʉ́ka'ŋ daara domboré-lé ra̱ɨ́ŋel ná ewerel.
Jurgoúlóŋá-sí a̠bdʉ kʉyʉ́ka'ŋ daara'ŋ ɨmêl-lé áddeŋ kawe, na ɨmêl ɨni : [email protected]
