عيادة الاستشارات العاطفية

24/07/2026

24/07/2026

22/07/2026

متوفر لدينا في متجر Give Point ورد طبيعي 🌹 جملة وقطاعي..
متوفر توصيل داخل ولاية الخرطوم
والتوصيل مجاناً للكميات❤️
للحجز والطلب : 0122862020
(واتساب+ إتصال)
موقعنا 📍: أمدرمان-شارع السيسي-غرب مستشفى مكة

16/07/2026

استشاره رقم 458307
اقسم بالله العظيم اقول الحق ولا شي غير الحق

انا بت عمري ٣٠ سنه مغتربه من بعد الحرب
ابوي كان هنا من زمان بعد الحرب جينا قعدنا معاه
يللا بديت اشتغل والحمدلله الأمور مشت
اتعرفت على شريك المالك في الشركه وهو سوداني بس شاب ما كبير شديد عمرو ٣٨ سنه
بدت العلاقه في الشغل وزادت لطلعات وفسح وكده
قال لي انه متزوج وعندو طفلين وقالها بصراحه مرتو كويسه وهما متفقين مافي مشاكل
لكن لانه بتسافر كتير داير يعرس وحده تسافر معاه لان مرتو صعب تسافر معاه بالاولاد
وقلت ليه تمام للامانه انا بقيت بحاول احسسو اني احسن من مرتو ووعدتو بحاجات كتير
بس قال لي لما نتزوج مايكلم مرتو عشان مايخسر بيتو ولكن ماحيقصر معاي وبدينا نتفق لكن هو كان متردد ومطول الموضوع
والموضوع مر عليه سنتين
يللا فجأه كده عمل لي بلوك ونقلني على فرع تاني وماقدرت اصل ليه
بعدين وصلتني رساله من المحكمه انه مرفوع علي قضيه
طلعت قضيه تخبيب من زوجتو
وانا خفت ما حكيت لزول لكن والله العظيم خايفه
والجلسة قريب وماعندي حق محامي
ونوم غلبني
بحاول اصل ليها واعتذر منها لكن ماعارفه كيف
ضربت ليه من رقم غريب
اول ماسمع صوتي قفل الخط
وانا احترت والله

لما بحثت طلع حتى لو مواعدني بزواج وبينا تواصل يعتبر تخبيب لانها علاقه غير شرعيه اصلا

16/07/2026

استشاره رقم 458306
اقسم بالله العظيم اقول الحق ولا شي غير الحق
انا اتزوجت راجل مره وانا والله ماكنت عارفه انه متزوج
ماقال لي انه متزوج في منطقه تانيه وعندو اولاد كمان
بعد واجهتو بالكلام قال لي صحيح انا متزوج لكن ما متفق معها وطلع فيها عيوب
قدرت اصل ليها
والله ماشاءالله المره نظيفه وجميله شديد الله يحفظها وأولادها حلوين ونظيفين وبيتها يفتح النفس عكس القالو لي
دخلت وقعدت معاها وحكيت ليها وقلت ليها انا حطلق منو عشان مااخرب عليك
قالت لي كلام غريب قالت لي عليك الله ماتطلقي انا ماصدقت لقيت لي سبب اتطلق واخلي اهلي يدعموني ويقتنعو وقالت لي انا بعد مااطلق انتي براحتك اطلقي
قلت ليها ليه فيه شنو
قالت مافي حاجه بس ماتستعجلي على الولاده اصبري اتعرفي عليه
وفعلا اتطلقت وبعدها رحلت وغيرت رقمها ماقدرت اصل ليها ...والراجل الى الان كويس بس خوفتني منو
رايكم شنو؟

16/07/2026

استشاره رقم 458305
اقسم بالله العظيم اقول الحق ولا شي غير الحق انا عمري٢٧ سنه عندي ولد عمره ٤ سنوات زوجي اتوفى قبال السنه وكنت مغتربه معاه بعد اتوفى اضطريت طبعا اشتغل واشيل نفسي واربي ولدي والحمدلله الله سهلها علي كتير
جبت امي معاي هنا قلت ترتاح هنا مستشفيات احسن وخدمات افضل وعندي اخوي عمرو ٣٢ سنه
كان شغال وساب الشغل في البدايه كنت برسل ليه مصاريف وعادي
بعدين حسيت الموضوع فيه اتكال واعتماد علي بشكل كبير
قلت ليه قوم اشتغل قال مافي شغل والله كلمت ليه ناس يساعدو وجابو ليه شغل لكن بقى مابرد عليهم او لما بديه الرقم مابيضرب ليهم
زهجني
قررت خلاص ماارسل شي وقلت خليه يجوع عشان يتحرك
انا هنا عندي التزامات برضو وما ممكن يرمي حملو علي
قلت لامي والله العظيم لو هو شغال كان ماعندي مشكله اساعدو وارسل لان الوضع هناك صعب و الدنيا غاليه.لكن زول ماداير يتحرك ولاقي كل شي جاهز اكيد ماحيتحرك
انا مليت منو والله
وهو زعلان وبحاول يحرش امي علي
وامي طبعا واقفه في صفو
وبتحاول تضغطني انو راجعه لولدها
طيب انا البحس بي منو؟؟انا بربي في يتيم وبدفع اجار وحضانه واكل وشرب ومستشفيات وزول اداني قرش مافي وانا اصلا الحمدلله ماطلبت ولا اتكلت على زول
لكن الضغط العلي ماهين ومافي زول بيحس والله
اعمل شنو عليكم الله؟؟

16/07/2026

استشاره رقم 458304

اقسم بالله العظيم اقول الحق ولا شي غير الحق
انا بت عمري ٢٥ سنه
امي وابوي انفصلوا وانا عمري ٧ وعندي اخوي عمرو كان ٥
امي خلتنا مع ابوي ومشت عرست لان ابوي كان وضعو المادي صعب ومااتحملت
عدت الايام وابوي اشتغل وتعب ووضعو بقى ممتاز الحمدلله وعرس والمره كانت من اسره كبيره وغنيه لكن اسره طيبه شديد شديد وكانت امنا التانيه وخافت الله فينا ..حتى اسرتها والله ما في يوم حسسونا انحنا غريبين.. المغترب منهم لو جا البلد زياره كان بجيب لينا
هدايا زي باقي الاسره..والحمدلله الله رزقني باخوان اكتر وبيتنا كان سعيد وابوي اتوفى وانا عمري ١٧ سنه والحمدلله الوضع مااتغير اتربيت مع اخواني وزوجه ابوي كملت في تربيتنا وخلصت انا واخوي الجامعه وشغلتنا والأمور تمام
يللا عندها اخوها أكبر منها عندو ولد واخوها وضعو ممتاز شديد وعندو استثمارات وقال دايرني لولدو..زوجه ابوي رفضت قالت الولد ده عاطل وعايش ع قروش ابوه ويسافر ويتفسح من قروش ابوه وبتاع مخد***** وشراب. وبنات الاسره كلهم مستحيل يرضو بيه عشان كده جا قال دايرني لولدو
انا قلت لزوجه ابوي خلاص لو انتي ماموافقه انا برضو مادايراه
واخوها عمل معاها مشكله وقال القرار ماعندك عند امها
وفعلا قدر يصل امي وكلمها
وامي جتني وقالت لي تعرسيه
قلت ليها مادايره وبدت تعمل بيني وبين مرت ابوي مشاكل وانها هي غيرانه وما دايره لي الخير
مرت ابوي ماشاءالله عينها ملانه وماماديه واتزوجت ابوي رغم انه اقل منها
امي اسي عامله مشاكل كل يوم مع زوجه ابوي نبز وقله ادب
وانا مليت والله وغيرت رقمي بسببها
ان اعمل شنو ؟

16/07/2026

استشاره رقم 458303

اقسم بالله العظيم اقول الحق ولا شي غير الحق
انا جيت السعوديه الرياض بعد الحرب انا واختي واولادنا جينا قعدنا مع اخوي متزوج وعندو طفلين بنت وولد
مرتو دلوعه شويه ومامتعوده ع الضيوف والخدمه واخوي ماشاءالله وضعو كويس مريحها وجايب لها وحده تخدمها مع انها ماشغاله هي مولوده في السعوديه وكانت ساكنه في المنطقه الشرقيه وأهلها ماشاءالله وضعهم كويس وبتقول لينا انا مااتعودت على البهدله..يعني لو خرب اي شي بسيط في البيت مابتتصرف تضرب لأخوي يتصرف حتى لو هو في الشغل
ولو دخل الصيف مابتطلع من البيت بتقول حر ومابتشيل كيس كلو اخوي بعملو بس بتهتم بروحها وتهتم باولادها وزوجها لكن شغل البيت ده مابتقرب منه ولو عندها وقت بتمشي تعمل حمام مغربي ولا تعمل اضافرها ومساج او النادي وكده
يعني مدلعه شديد
اول ماجينا مااتفقنا في موضوع المطبخ والاكل بتحب الاكل البلدي عادي بس ماتحب تاكلو كل يوم بتعمل اكل صحي بنسبه لينا ماسخ
اخوي واولادو اتعودو
بدت المشكله انها بتقول انو احنا خربنا اجهزتها حقت المطبخ
بعدين قالت انو أولادنا مزعجين ومابنامو بدري وبيزعجوها هي واولادها وقت النوم
لأنهم بينام بدري
بعدين قالت أولادنا مامأدبين ووسخو ليها الكنب والجدران وقالت جبنا ليها الصراصير من الوسخ
وكل يوم في مشاكل
اخوي بحبها ولو هي سافرت لأهلها كم يوم هو مابيقعد في البيت ولو هي موجوده بيرجع من الشغل بيقعد معانا شويه وبيمشي يقعد معاها لغايه وقت النوم
اسي هي مشت لأهلها وقالت ماراجعه
اخوي كلم رجالنا انه خلاص لازم نرجع
وانحنا ماعندنا مشكله لكن بيوتنا ماجهزت
قلت لأخوي طيب ساعدنا نجهز البيوت
قال ماعندي وانا بصراحه خايفه من الرجعه والكهربا القاطعه وماعارفه الوضع هناك حيكون كيف
ومرت اخوي رافضه ترجع وقعدت عند اهلها

11/07/2026

استشاره رقم 458302

اقسم بالله العظيم اقول الحق ولا شي غير الحق
انا عمري ٣٧ سنه وزوجتي اتوفت ف الولاده وخلت لي طفلين..الكبيره اسي عمرها ١٠ والصغير عمرو ٥ سنوات

يللا بعد وفاه زوجتي رشحولي مره ارمله مواليد ٩٣ لكن اتزوجت بدري صغيره ولما اتزوجها كان عندها ٣ اولاد كان اكبرهم وقتها ١٠ سنوات
وهي زوله ماشاءالله متدينه وحافظه لكتاب الله وكان أولادها برضو بدو يحفظو القرآن
الحمدلله تم الزواج .لينا ٥ سنوات اسي وربت لي أولادي مع أولادها وكانت حريصه تعلميهم الدين وربتهم تربيه جميله واولادي حبوها جدا الحمدلله..واسي عندي منها طفل
اسي هي فتحت معاي موضوع
ان بنتي كبرت وولدها الكبير برضو بقى مراهق مايجوز يتعودو على الاختلاط
وقالت مادايره تتحمل ذنب الاولاد
هي ماشاءالله ابوها كانت مخلي ليها ورث كويس
قالت لي اسمع..(انا دايره ابني جزء كبير برا ليك انت مع الاولاد..وانا والبنات نكون جوا وفي اللي اجي انوم عندها لكن الاولاد ينومو برا)
بس انا ماحابي الفكره..حاب فكره جمعتنا دي لان ماشاءالله عيلتي بقت كبيره
وبرجع من الشغل بنقعد سوا نتونس ونحكي
انا قلت ليها خير ان شاءالله
بس محتاج نصايح منكم
ماخاب من استشار

05/07/2026

الاسطورة فوزينيا حارس مرمى منتخب الراس الاخضر