Alsharq University Medical Students Association - AUMSA

05/05/2026

21/04/2026

20/04/2026

*بسم الله الرحمن الرحيم*
*جامعة الشرق للعلوم والتكنولوجيا*
*عمادة شؤون الطلاب*
*رابطة طلاب كلية الطب*
نود أن نحيطكم علمًا بأنه وبفضل الله أولًا، تم بفضل وحدة الصف وتكاتف الجهود، تم صباح اليوم فتح التسجيل التمهيدي لطلاب الدفعة الأولى ومعالجة الإشكال بصورة كاملة.
وعليه، تعلن رابطة طلاب الطب 🛑إلغاء الوقفة الاحتجاجية التي كان مقررًا قيامها اليوم، وذلك بعد تحقق الهدف الأساسي منها والوصول إلى حل عادل يُنصف الطلاب ويعيد الأمور إلى نصابها الصحيح.
كما تعبّر الرابطة عن بالغ ارتياحها وسعادتها بهذا التقدم، وتثمّن وعي طلاب طب والتزامهم ، الذين كانوا دومًا على قدر المسؤولية، مؤكدين أن اتحادهم كان ولا يزال القوة الحقيقية وراء تحقيق هذا الإنجاز.
📌ونؤكد استمرارنا في متابعة كافة القضايا الطلابية بكل جدية، والعمل على معالجتها بروح المسؤولية والتعاون، بما يضمن بيئة تعليمية عادلة ومستقرة للجميع.
ختامًا، نبارك لطلاب الدفعة الأولى هذا الحل، ونسأل الله التوفيق والسداد للجميع.
والله ولي التوفيق،،،

19/04/2026

#بيان

17/04/2026

| ما وراء الحروف |
| قصة خريجي الدفعة الاولى بكلية الطب جامعة الشرق |
| بين الواقع و الاقاويل |
4

بنهاية اليوم و بعد التشاور بين المكتب التنفيذي و المجلس الثلاثيني تم التوصل لقرار بتجميد نشاط الرابطة بمختلف اجهزتها حتى اشعار اخر في حال عدم حل المشكلة او سيرها لجانب ايجابي تضامننا مع طلاب الدفعة الاولى.

المكتب التفيذي ايّد موضوع التجميد و اترفع للمجلس الثلاثيني و رئيس المجلس عرضو عليكم كجمعية عمومية و فتح تصويت لمدة 48 ساعة ما لم يتم حل الموضوع او اتخاذ خطوة جادة فسيتم التجميد. ينتهي التصويت بانتهاء الزمن المحدد من قبل المدير و بالتالي ي اما مشينا لي قدام و يعتبر القرار لاغي او المشكلة مستمرة و بالتالي تجمد انشطة جميع اجهزة الرابطة حتى اشعار آخر و يبدأ جدول تصعيد يومي امام بوابة الجامعة بمشاركة كل طلاب الكلية.
الدفعة الاولى قامت بوقفتها يوم التلات و في يوم الاربعاء دخلو اجتماع مع عميد الكلية و مدير الجامعة و طلعو منو بي انه العميد ح يسافر بورتسودان يوم السبت في حال اساميهم م نزلت في السستم باقي يوم الخميس و يشوف باقي التفاصيل متوقفة لشنو من هناك، و خلال الفترة دي ح يوقفو التصعيد، بالتالي الرابطة راجعت موقفها بناء على ما ذكر أعلاه مافي تصعيد ح يحصل و بقينا مترقبين اليحصل شنو في الايام القادمة.

في الختام
الرابطة اتختت في موقف صعب جدا كان متطلب حكمة و صبر و تأنٍ و مشوارة قبل اي خطوة او تصرف، كل الطرق كانت مقفلة و كان لا بد من شق طريق جديد قاسي جدا لكنه الاسلم لتفادي كل ما لا يحمد عقباه او ممكن يؤثر سلبا على القضية او طلاب كلية الطب.
ما منعنا زول من المشاركة في الوقفة في اليومين الفاتو لكن من باب "درء المفاسد مقدم على جلب المصالح" و ابراء لزمتنا وضحنا موقف كل الاطراف و الحاجات الممكن تترتب علي مشاركة الطلاب في الوقفة حفاظا على حقوق زملاننا، ابدا ما عملنا حاجة تخجل ولا اتخاذلنا عن سنايرنا.
لامن تكون على حق و تتصرف بطريقة خاطئة انت بتضعف من موقفك و اي سلوك غير مدروس بتحسب سلبا عليك ، نص البيان النزل كان واضح جدا بعكس ابعاد كل الموضوع و موضح سبب تحفظنا عن المشاركة في الوقفة و تضامننا التام مع الدفعة الاولى.

دا كل اللزم توضيحه عن الموضوع كااامل
و الله من وراء القصد

رابطة طلاب الطب جامعة الشرق للعلوم والتكنولوجيا
دورة اثر 2025-2026

17/04/2026

| ما وراء الحروف |
| قصة خريجي الدفعة الاولى بكلية الطب جامعة الشرق |
| بين الواقع و الاقاويل |
3

طلاب الدفعة الاولى رفضو فكرة انهم يأجلو الموضوع لحد الخميس و قالو انو الوقفة في نفس زمنها.
في نفس اليوم (مساء الاحد) اتعمل اجتماع طارئ للمكتب التنفيذي و اسر الدفعات بخصوص الموضوع مع توضيح الموقف كاامل و كان رايهم بالاجماع انو نحن متضامنين تماما مع سنايرنا و قادرين نخت روحنا مكانتهم لكن برضو عايزينهم هم يختو روحهم مكاننا حاليا و يقدرو ظرفنا انو لو لا قدر الله اي طالب حصلت ليه حاجة او اتطبقت فيه اي عقوبة دي لوائح و في جامعة خاصة و لامن جا قدم فيها اقر بي موافقتو عليها، و هنا الناس رجحت صوت الحكمة و العقل على صوت قلوبهم و انو نحن هدفنا نحل مشكلة ما نخلق مشاكل تانية كايسين ليها حل، بالتالي و من باب انو "درء المفاسد مقدم على جلب المصالح" نحن ح نعتذر عن المشاركة في يومي الثلاثاء و الاربعاء و ندعو الخريجين انهم ينتظرو معانا اليومين ديل.
بعد الاجتماع رجعنا اتواصلنا تاني مع ممثلين الدفعة مع توضيح موقفنا بكل احترام و مترجينهم انو طالما الموضوع ماشي لاتجاه ايجابي يأجلو الوقفة لحد الخميس اذا الموضوع لا قدر الله فضل الحال في حالو يكون كل زملانهم معاهم و صوتهم واحد بي طريقة مرتبة و منظمة تعكس اخلاق و سلوكيات الطبيب و بي مطالب واضحة، لكنهم رفضو و اصرو على يوم التلات، اتقبلنا رايهم و وجهة نظرهم و انهم واقع عليهم ظلم كبير لو كنا مكانهم برضو كنا ح نتضايق بالشكل دا، وضحنا ليهم انو يعذرونا ما بنقدر نجي نقيف معاهم خلال يوم التلات و الاربعاء و اننا معاهم في كل الخيارات التانية.
رغم دا كلو رجعنا تااني في اليوم البعده ( الاثنين ) اتواصلنا مع ادارة الجامعة و حاولنا بكل الطرق معاهم انو يتنازلو هم شويه عشان نقدر نضمن الوقفة تطلع بشكل ايجابي و ما تتحسب خصما علينا كطلاب او خريجين ولا على سمعة الكلية، لكن الرد كان رفض قاطع و انو الحاجة دي ممكن تأثر سلبا على سير الموضوع.
رجعنا تاني اتواصلنا مع نائب العميد و انو حاليا موقف الرابطة تجاه الموضوع صعب جدا و نخشى انو الموضوع ياخد ابعاد و منحنيات اسوء قد ما يكون بعدها في رابطة ذاتو. في النهاية كلا الطرفين مافي واحد فيهم قبل انو يقدم تنازل و لو بسيط و اصرّوا على مواقفهم ( الخريجين شايفين روحهم سمعو وعود كتيرة و ادارتهم شايفة الموضوع ماشي ببطئ لكن ما وقف فالناس تصبر).

17/04/2026

| ما وراء الحروف |
| قصة خريجي الدفعة الاولى بكلية الطب جامعة الشرق |
| بين الواقع و الاقاويل |
2

بعد خلصت اجازة العيد المسجل و العميد بقو الاتنين برا كسلا و في من ينوب عنهم لكن اي اجراء منوط بحضورهم، بالتالي بقينا راجين وصولهم و كل يوم في الليلة و بكرا.
الخميس الفات سمعنا خبر انو ناس الدفعة الاولى عايزين يعملو وقفة احتجاجية و اتواصلنا مع ممثلينهم قالو انهم لسه بتشاورو في الموضوع، يوم السبت قابلناهم في الجامعة جو قعدو مع المدير و طلعو متضايقين قالو انو الوقفة يوم التلات و اكدنا موقفنا اننا معاهم فيها و لازم نتفق على آليه الوقفة و الشعارات بالطريقة التخدم مصلحتنا و تأثر ايجابا على القضية.
و فعلا في صباح اليوم البعدو (الاحد) اتحركنا بي خطاب لي شؤون الطلاب انو نحن عندنا وقفة تضامنية مع زملاننا في الدفعة الاولى و نأكد تنظيمنا التام ليها بطريقة ما تأثر على سير المحاضرات او سمعة الطلاب و الجامعة سلبا لكن الخطاب اتقابل بالرفض مع التنبيه على ان الطلاب المشاركين فيها عرضة للمحاسبة حسب لوائح الجامعة و المحاسبة فردية لانو الموضوع ماشي تحل و تعيده للراي العام بأثر سلبا على سيره، و الخريجين ما بتسري عليهم اللوائح الادارية بالتالي حصل اي تفلت بتعاملو معاهم بي قوة نظاميةاذا لزم الامر نسبة لخطورة الوضع الامني بالولاية، و بالنسبة للمدير طالبناه بي توضيح قال انو الموضوع ماشي تجاه انو يتحل الناس م تستبق الاحداث و تأجل موضوع الوقفة لحد الخميس لو م اتحل من حقكم انكم تقيفو بعديها.

16/04/2026

| ما وراء الحروف |
| قصة خريجي الدفعة الاولى بكلية الطب جامعة الشرق |
| بين الواقع و الاقاويل |
1

السادة اعضاء الجمعيةالعمومية، تحية فخر و اعتزاز.
اما بعد، قد يكون الحديث شوية طويل في الموضوع مما يتطلب تقسيمه على اكتر من رسالة، بالتالي الزول العايز يقيف مع الحق و يعرف الاقاويل و الاتهامات الباطلة من الواقع الحقيقي للقصة يتابع الكلام في الرسايل الجاية.

بداية القصة:
اتخرجت الدفعة الاولى في ابريل من العام الماضي و اصطدمو بي واقع مرير انهم ما قادرين يقدمو للتسجيل التمهيدي لانو في مشكلة حاصلة. من هنا بدو في رحلة طويلة في محاولة معرفة المشكلة و سبل معالجتها، قعدو كتير جدا مع عميد الكلية و مدير الجامعة و الزمن ماشي و المشكلة لسه.
قبل رمضان ناس الدفعة بي مساهمات منهم رسلو زول منهم بورتسودان يعرف الحاصل بنفسه من المجلس، بس رفضو يتعاملو معاه و قالو ليه اجراءاتكم بتتابعها معانا ادارتكم ما بنقبل نتعامل معاكم انتو كطلاب. بعديه اتواصلنا مع الادارة كان ردهم انو المسجل متواصل معاهم و كل ما يسألهم بجيه الرد بي " قيد الاجراء" و بعدو عرض عليهم يتدخل و رفضو وسيط بينهم كمجلس طبي و بين التعليم العالي، لحد هنا كانت الرابطة متابعة اول بي اول و بتسأل من الموضوع علما بي انو ما هم الطلبو منها الحاجة دي لكن شايفين الموضوع و عارفين انو بهمنا كلنا و اثرو علينا كلنا ما بس على الدفعة الاولى.
لامن الموضوع طول على نفس الحال طلبنا من احد المتواصلين معانا منهم شخصين يمثلو الدفعة و نقعد معاهم و مع ادارة الجامعة في اجتماع رسمي نقدر من خلالو نخت نقاط على حروف و نقدر نحدد موقفنا من الموضوع بطريقة واضحة فكان الرد بالحرف " ما تشتغل بيهم (يقصد ناس الجامعة) و الشغلة بالتي هي احسن ابت" و ما تمت افادتنا بي اي اسماء ولا اتواصل معانا تاني و حتى بعد اتواصلنا معاه نحن قال انو مشغول و اول م يفضى برجع بي مكالمة و ما رجع.
بعديه دخل علينا العيد و قلنا بعد العيد الناس تكون نزلت من الاجازة و نشوف اليحصل شنو من قريب.

16/04/2026

في قضية خريجي الدفعة الأولى…
في استفهامات كتيرة و حاجات ما واضحة بشكل كافي:

- أصل المشكلة شنو؟
- الحصل فعلياً بين الخريجين والإدارة شنو؟
- دور الرابطة كان شنو من البداية؟
- ليه الرابطة ما شاركت في وقفة الثلاثاء؟
- ⁠هل فعلاً في تقصير… ولا في تفاصيل ما اتقالت؟

الحقيقة كاملة ما بتتجزأ…
وعشان كدا حنقدم ليكم كل التفاصيل خطوة بخطوة.

📌 تابعوا سلسلة "ما وراء الحروف"
🕒 البداية اليوم الساعة 5:30pm