17/06/2026
قرآن و سنت کے علمی اعجاز پر مبنی مجلے کا مالے، انگریزی، چینی اور ہندی زبانوں میں اجرا
رابطہ عالم اسلامی کے سیکرٹری جنرل نے ملائیشیا میں ’’ایمان: علم اور معاصر دلائل کی روشنی میں‘‘ بین الاقوامی کانفرنس کا افتتاح کیا
کوالالمپور:
رابطہ عالم اسلامی کے سیکرٹری جنرل اور چیئرمین مسلم علماء کونسل، عزت مآب شیخ ڈاکٹر محمد بن عبد الكريم العيسي نے ملائیشیا کے دارالحکومت کوالالمپور میں منعقدہ بین الاقوامی کانفرنس "ایمان: علم اور معاصر دلائل کی روشنی میں" کا افتتاح کیا۔ کانفرنس میں ممتاز علماء، محققین، دانشوروں اور علمی شخصیات کی بڑی تعداد نے شرکت کی۔
کانفرنس کے دوران عزت مآب شیخ ڈاکٹر محمد العیسی نے "قرآن کریم اور سنتِ نبویہ شریفہ میں علمی اعجاز " کے عنوان سے شائع ہونے والے مجلے کے اجراء کی تقریب میں بھی شرکت کی۔ یہ مجلہ ملایو، انگریزی، چینی اور ہندی زبانوں میں شائع کیا گیا ہے، جس کا مقصد قرآنِ کریم اور سنتِ نبویؐ کے علمی پہلوؤں کو مختلف لسانی حلقوں تک پہنچانا ہے۔
کانفرنس کے ضمن میں چار علمی نشستیں منعقد کی گئیں، جن میں ایمان، سائنس اور معاصر فکری چیلنجز سے متعلق مختلف موضوعات پر تفصیلی بحث ہوئی۔ پہلے اجلاس میں "کائنات اور حیات: تخلیق و تشکیل، سائنس اور وحی کے تناظر میں" کے موضوع کا جائزہ لیا گیا، جبکہ دوسرے اجلاس میں "علمی و تہذیبی مکالمہ اور ایمان کے استحکام و شبہات کے ازالے میں اس کی اہمیت" پر گفتگو ہوئی۔ تیسرے اجلاس میں "ایمان کی جانب سفر: دنیا بھر کے روشن تجربات" پیش کیے گئے، جبکہ چوتھی نشست "مصنوعی ذہانت کے دور میں ایمان سے متعلق سوالات" کے عنوان سے منعقد ہوئی، جس میں جدید ٹیکنالوجی اور دینی فکر کے باہمی تعلق پر تبادلۂ خیال کیا گیا۔
کانفرنس کے اختتام پر ایک مشترکہ اعلامیہ جاری کیا گیا، جس میں متعدد سفارشات پیش کی گئیں۔ اعلامیے میں خاص طور پر فکری شبہات اور الحادی اعتراضات کے مؤثر جواب کے لیے جدید اسالیب اور ذرائع اختیار کرنے، ان سے متعلق پروگراموں اور اقدامات کو منظم انداز میں آگے بڑھانے، اور ان کی مؤثریت کا باقاعدہ جائزہ لینے پر زور دیا گیا۔اعلامیے میں ایمان کے دلائل کو مؤثر انداز میں اجاگر کرنے کی اہمیت بھی بیان کی گئی، اور اس سلسلے میں رابطہ عالم اسلامی کے اُس مجوزہ رصدگاہ سے استفادہ کرنے کی سفارش کی گئی، جسے "دلائلِ ایمان اور شبہات کا مقابلہ" کے عنوان سے قائم کرنے پر کام جاری ہے۔
