22/07/2026
സി.വി. മുഹമ്മദലി അനുസ്മരണ യോഗം സംഘടിപ്പിച്ചു
_______________________________________________________________________
ദോഹ: ഖത്തറിലെ പ്രമുഖ വ്യവസായിയും മലപ്പുറം ജില്ല പ്രവാസി അസോസിയേഷൻ – മജെസ്റ്റിഖ് മലപ്പുറം ഉപദേശക സമിതി അംഗവുമായിരുന്ന ശ്രീ. സി.വി. മുഹമ്മദലിയുടെ നിര്യാണത്തിൽ മജെസ്റ്റിഖ് മലപ്പുറം ഐസിസിയിൽ അനുസ്മരണ യോഗം സംഘടിപ്പിച്ചു.
സംഘടനയുടെ ഉപദേശക സമിതി ചെയർമാൻ ശ്രീ അഷറഫ് ചിറക്കൽ അധ്യക്ഷത വഹിച്ച ചടങ്ങിൽ ഖത്തറിലെ വിവിധ സാമൂഹിക, സാംസ്കാരിക, പ്രവാസി സംഘടനകളുടെ പ്രമുഖ പ്രതിനിധികളും നേതാക്കളും പങ്കെടുത്തു. ഐസിസി പ്രസിഡന്റ് എ.പി. മണികണ്ഠൻ, OTC ഗ്രൂപ്പ് ചെയർമാൻ വി.എസ്. നാരായണൻ, ഖത്തർ കേരള ഇസ്ലാമിക് സെന്റർ വൈസ് പ്രസിഡന്റ് ഇസ്മായിൽ ഉദൈവി, ഇൻകാസ് ഖത്തർ മലപ്പുറം ജനറൽ സെക്രട്ടറി കെ.വി. ബോബൻ, കെ.എം.സി.സി ഖത്തർ മലപ്പുറം ജനറൽ സെക്രട്ടറി അക്ബർ വെങ്ങാശ്ശേരി, സംസ്കൃതി ഖത്തർ ജോയിന്റ് സെക്രട്ടറി ബിജു പി. മംഗലം, കൾച്ചറൽ ഫോറം ഖത്തർ പ്രസിഡന്റ് ചന്ദ്രമോഹൻ ആർ. പിള്ളൈ, WMC ഖത്തർ പ്രസിഡന്റ് സിയാദ് ഉസ്മാൻ, അമാനുള്ള വടക്കാങ്ങര, DOM ഖത്തർ വൈസ് പ്രസിഡന്റ് അബ്ദുൾ അസീസ് എന്നിവർ അനുസ്മരണ പ്രഭാഷണം നടത്തി.
ഉപദേശക സമിതി അംഗങ്ങളായ ഹുസൈൻ കടന്നമണ്ണ, റൗഫ് കൊണ്ടോട്ടി, ഹബീബ് റഹ്മാൻ, കോയ കൊണ്ടോട്ടി എന്നിവരും ശ്രീ. സി.വി. മുഹമ്മദലിയുടെ സ്നേഹപൂർണ്ണമായ വ്യക്തിത്വവും സാമൂഹിക പ്രതിബദ്ധതയും വ്യവസായ രംഗത്തെ സംഭാവനകളും അനുസ്മരിച്ചു.
മജെസ്റ്റിഖ് മലപ്പുറം ജനറൽ സെക്രട്ടറി വിനോദ് പുത്തൻവീട്ടിൽ സ്വാഗതം ആശംസിച്ച ചടങ്ങിൽ ട്രഷറർ ജിതിൻ ചാക്കോത്ത് നന്ദി രേഖപ്പെടുത്തി. സംഘടനയുടെ പ്രസിഡന്റും പരേതന്റെ മകനുമായ നിഹാദ് അലി, ചടങ്ങിൽ പങ്കെടുത്ത എല്ലാവർക്കും, കുടുംബത്തിന്റെ ദുഃഖത്തിൽ പങ്കുചേർന്നവർക്കും പ്രാർത്ഥനകളും അനുശോചനങ്ങളും അറിയിച്ചവർക്കും ഹൃദയം നിറഞ്ഞ നന്ദി അറിയിച്ചു.
ശ്രീ. സി.വി. മുഹമ്മദലിയുടെ ജീവിതത്തിലെ പ്രധാന സംഭവങ്ങളും ഓർമ്മകളും ഉൾപ്പെടുത്തിയ അനുസ്മരണ വീഡിയോ ഷാഫി പാറക്കലിന്റെയും മുനീഷ് എ.സി.യുടെയും നേതൃത്വത്തിൽ പ്രദർശിപ്പിച്ചു.
വിവിധ സംഘടനാ പ്രതിനിധികളുടെയും സുഹൃത്തുക്കളുടെയും സാന്നിധ്യത്തിൽ നടന്ന അനുസ്മരണ യോഗം, അദ്ദേഹത്തിന്റെ മഹത്തായ ജീവിതത്തിനും സമൂഹത്തിന് നൽകിയ സംഭാവനകൾക്കും ആദരവ് അർപ്പിച്ചുകൊണ്ട് സമാപിച്ചു.
Photo Courtesy : Ayanikunnath
