18/06/2026
مرڪزي تاجر اتحاد ٺٽو پاران ڦر جي واقعي جي سخت لفظن ۾ مذمت
اڄ صبح لڳ ڀڳ 9:00 وڳي ايڪسيلسيئر اسڪول، هاشم آباد سوسائٽي فيز 2، مڪلي سامهون هڪ غريب محنتي واپاري شير محمد ڪوري، جيڪو برتنن جو گاڏو هلائي پنهنجي گهرڀاتين جو گذر سفر ڪري ٿو، ٻن هٿياربند جوابدارن جي ڦر جو شڪار بڻيو. جوابدارن هٿيارن جي زور تي سندس محنت جي جمع پونجي 8,000 رپيا روڪ رقم ۽ موبائل فون ڦري فرار ٿي ويا.
مرڪزي تاجر اتحاد ضلع ٺٽو هن افسوسناڪ واقعي جي سخت لفظن ۾ مذمت ڪندي مڪلي پوليس کان پرزور مطالبو ڪري ٿو ته واقعي ۾ ملوث جوابدارن کي فوري طور گرفتار ڪري قانون جي ڪٽهڙي ۾ آندو وڃي ۽ متاثر واپاري شير محمد ڪوري کي انصاف فراهم ڪيو وڃي.
مرڪزي تاجر اتحاد ضلع ٺٽو جو واضح موقف آهي ته اسان جي تنظيم صرف وڏن واپارين جي نمائندگي نٿي ڪري، پر ھر ننڍي کان ننڍي واپاري، ريڙهي، گاڏا يا فٽ پاٿ تي روزگار ڪندڙ محنتي تاجر جي حقن جو تحفظ، ساڻس گڏ بيهڻ ۽ هر ڏکئي وقت ۾ سندس آواز بڻجڻ اسان جي بنيادي ذميواري ۽ اهم مقصد آهي.
اسان هر ان واپاري سان گڏ آهيون، جيڪو پنهنجي محنت سان حق حلال روزي ڪمائي رهيو آهي، ۽ ڪنهن به قسم جي ظلم، ڦر يا ناانصافي خلاف هر فورم تي سندس ڀرپور حمايت جاري رکنداسين.
مرڪزي تاجر اتحاد ضلع ٺٽو