02/10/2026
شمس و قمر فاؤنڈیشن کے ہفتہ وار فری دستر خوان کے 4 سال مکمل
جنرل ہسپتال میانوالی میں بلاتعطل و بلا تفریق خدمتِ خلق کا شاندار سفر کامیابی سے جاری
رپورٹ: نعمت اللہ خان نیازی
میانوالی: شمس و قمر فاؤنڈیشن (یونٹ میانوالی سٹی) کے زیر اہتمام جنرل ہسپتال میانوالی میں قائم ہفتہ وار فری دستر خوان نے بلا التوا اور بے لوث انسانی خدمت کے 4 سال مکمل کر لیے ہیں۔ اس تاریخی و فلاحی سنگ میل کی مکمل یابی پر آج ہسپتال کے احاطے میں بالخصوص ایک پروقار اور بڑے پیمانے پر فری دستر خوان کا اہتمام کیا گیا، جس میں مریضوں، ان کے تیمارداروں اور مستحق افراد کو مکمل عزت و احترام کے ساتھ طعام پیش کیا گیا۔
گزشتہ 4 سالوں سے مسلسل جاری اس بابرکت منصوبے کے ذریعے اب تک ہزاروں غریب اور ضرورت مند افراد مستفید ہو چکے ہیں۔ جنرل ہسپتال میں دور دراز علاقوں سے آنے والے مریضوں اور ان کے لواحقین کے لیے یہ ہفتہ وار دستر خوان پچھلے چار سالوں سے ایک عظیم سہارا ثابت ہو رہا ہے۔
4 سال مکمل ہونے کی اس مبارک موقع پر شمس و قمر فاؤنڈیشن کے عہدیداران اور رضاکاروں نے بانیان، انتظامیہ اور تمام عطیہ دہندگان (ڈونرز) کا شکریہ ادا کیا جن کے تعاون سے یہ سلسلہ چار سال سے بلا ناغہ کامیابی کے ساتھ چل رہا ہے۔ اس موقع پر ملک و قوم کی سلامتی، فاؤنڈیشن کی پیش رفت اور ڈونرز کی برکت کے لیے خصوصی اجتماعی دعا بھی کی گئی۔
شمس و قمر فاؤنڈیشن یونٹ میانوالی سٹی کے ذمہ داران نے اس موقع پر گفتگو کرتے ہوئے کہا:
"چار سال قبل خدمتِ خلق کا جو پودا لگایا گیا تھا، وہ آج الحمدللہ ایک تناور درخت بن چکا ہے۔ ہمارا عزم ہے کہ ان شاء اللہ اس فلاحی مشن کو نا صرف جاری رکھا جائے گا بلکہ آنے والے دنوں میں اس کے دائرہ کار کو مزید وسعت دی جائے گی تاکہ کوئی بھی مجبور شخص ہسپتال کے احاطے میں بھوکا نہ رہے۔"
شہر کی سیاسی، سماجی اور عوامی شخصیات نے شمس و قمر فاؤنڈیشن کے تمام عہدیداران اور رضاکاروں کی 4 سالہ مسلسل خدمات کو زبردست خراجِ تحسین پیش کیا اور اس کارِ خیر کی پائیداری کو سراہا۔
