28/08/2024
حیربیار قلندرانی کا خضدار کے علاقے توتک میں سرکاری اساتذہ کی غیر حاضری پر حکومت سے فوری نوٹس لینے کا مطالبہ۔ ان کا کہنا تھا کہ ہم توتک کے تعلیمی معیار پر کسی قسم کا سمجھوتا نہیں کریں گے۔ اگر حکومت نے کچھ دنوں میں یہ مسئلہ حل نہیں کیا تو عدلیہ کے پاس جائیں گے۔
پچھلے دنوں خضدار کے علاقے توتک میں سرکاری سکول کے طلباء نے احتجاج ریکارڈ کرایا کہ ان کے سکول میں اساتذہ اکثر غیر حاضر رہتے ہیں یا پھر 11 بجے کے بعد آ کر صرف حاضری لگا کر چلے جاتے ہیں۔ طلباء کا کہنا تھا کہ ان کا مستقبل خطرے میں ہے اور وہ تعلیم حاصل کرنا چاہتے ہیں۔
اس صورتحال پر حیربیار قلندرانی نے تشویش کا اظہار کرتے ہوئے کہا کہ اگر بلوچستان میں امن و امان کی صورتحال کو بہتر بنانا ہے تو سب سے پہلے تعلیم کے معیار کو بلند کرنا ہوگا، خصوصاً بلوچستان کے دور دراز علاقوں میں۔
انہوں نے حکومت سے مطالبہ کیا کہ وزیر اعلیٰ بلوچستان، وزیر تعلیم بلوچستان اور سیکرٹری ایجوکیشن بلوچستان فوری طور پر غیر حاضر اساتذہ کو فارغ کریں اور ایسے اساتذہ کو تعینات کریں جو اپنی ڈیوٹی کو سنجیدگی سے لیں اور طلباء کی تعلیم کو یقینی بنائیں۔
حیربیار قلندرانی نے مزید کہا کہ حکومت کو اس مسئلے کو سنجیدگی سے لینا چاہیے کیونکہ توتک کے تعلیمی معیار پر کوئی سمجھوتہ قابل قبول نہیں ہوگا۔
