26/12/2025
بھارت: کرسمس کے موقع پر مسیحی برادری پر انتہا پسندوں کے حملے
کرسمس کے تہورا کے موقع پر بھارت کے متعدد علاقوں میں عیسائی برادری پر حملوں میں اضافہ ہوا، جس پر تنقید کی جا رہی ہے۔ کانگریس پارٹی نے بی جے پی پر تہواروں کے دوران 'نفرت کا تحفہ' دینے کا الزام لگایا ہے۔
گزشتہ چند روز کے دوران بھارت کی متعدد ریاستوں میں سخت گیر ہندؤ تنظیموں سے وابستہ افراد نے مسیحی برادری کے لوگوں کو تشدد کا نشانہ بنایا، جس پر مسیحی کمیونٹی اور سیاسی جماعتوں نے تشویش کا اظہار کیا ہے۔
اس دوران بھارت میں بشپس کی ایک اہم تنظیم نے مرکزی وزیر داخلہ امت شاہ سے اپیل کی ہے کہ وہ عیسائیوں کے تحفظ کے لیے قانون کو سختی سے نافذ کریں۔
حزب اختلاف کی جماعت کانگریس کے جنرل سکریٹری کے سی وینوگوپال نے سوشل میڈیا پلیٹ فارم ایکس پر اپنی پوسٹ میں لکھا، "یہ عیسائیت کے خلاف بھارتیہ جنتا پارٹی کی شدید نفرت کا اصل چہرہ ہے۔ ان کے رہنما بھارت میں اقلیتوں کی توہین کرنے کے لیے کسی بھی حد تک جائیں گے، چاہے اس کا مطلب کسی نابینا خاتون پر حملہ کرنا ہی کیوں نہ ہو۔"
کانگریسی رہنما نے ان حملوں کے لیے ہندو قوم پرست جماعت بی جے پی کی قیادت والی دہلی، مدھیہ پردیش، چھتیس گڑھ اور اڈیشہ جیسی ریاستی حکومتوں کو مورد الزام ٹھہرایا اور کہا کہ ان کی پشت پناہی میں یہ واقعات رونما ہوئے ہیں۔
وینوگوپال نے مزید کہا، "آر ایس ایس کے کارکنوں نے کیرالہ کے پلکاڈ میں بچوں کے کیرول کوئر پر بھی حملہ کر دیا، جہاں بی جے پی آئے دن یہ ثابت کر رہی ہے کہ وہ بھیڑوں کے لباس میں بھیڑیا کے سوا کچھ نہیں ہے۔"
