30/04/2026
عوامی فلاح و بہبود اور دکھی انسانیت کی خدمت کے جذبے کے تحت گزشتہ روز الخدمت فاؤنڈیشن مری اور جماعتِ اسلامی مری کے ذمہ داران و اراکین کا ایک اہم اجلاس منعقد ہوا، جس میں مجوزہ رازی ہسپتال کے قیام، اس کے انتظامی امور اور جلد از جلد عملی کام کے آغاز کے حوالے سے تفصیلی مشاورت کی گئی۔ اجلاس میں اس عزم کا اظہار کیا گیا کہ علاقے کے عوام کو معیاری، بروقت اور بااعتماد طبی سہولیات فراہم کرنے کے لیے ہر ممکن اقدامات کیے جائیں گے۔
اجلاس کی صدارت صدر الخدمت فاؤنڈیشن مری جاوید اکرام عباسی نے کی، جبکہ اجلاس میں سفیان عباسی، رضوان عباسی ،حماد المحمود عباسی، راجہ امتیاز عباسی، ظفر اقبال، نوید عباسی، فہد نجیب عباسی، حماد عباسی، شاکر حسین،صفی اللہ عباسی نے شرکت کی ۔ شرکاء نے رازی ہسپتال کے مختلف پہلوؤں پر اپنی تجاویز پیش کرتے ہوئے اس منصوبے کو علاقے کی ایک اہم ضرورت قرار دیا۔
اجلاس میں اس بات پر زور دیا گیا کہ مری اور گردونواح کے عوام خصوصاً غریب اور مستحق افراد کو معیاری طبی سہولیات کی فراہمی وقت کی اہم ضرورت ہے۔ شرکاء نے اس امر پر اتفاق کیا کہ رازی ہسپتال کا منصوبہ صرف ایک طبی مرکز نہیں بلکہ خدمتِ انسانیت، اخوت، ہمدردی اور عوامی خدمت کے جذبے کی عملی تعبیر ہوگا۔
اجلاس کے دوران ہسپتال کے ابتدائی ڈھانچے، دستیاب وسائل، عوامی ضروریات اور آئندہ کے لائحہ عمل پر تفصیلی گفتگو کی گئی۔ تمام اراکین نے اس نیک مقصد کی تکمیل کے لیے باہمی تعاون، مسلسل جدوجہد اور اپنی ذمہ داریوں کو احسن انداز میں ادا کرنے کے عزم کا اعادہ کیا۔
اجلاس کے اختتام پر دعا کی گئی کہ اللہ تعالیٰ اس عظیم منصوبے کو جلد پایۂ تکمیل تک پہنچائے اور اسے مری کے عوام کے لیے امید، سہارا اور شفا کا ذریعہ بنائے۔
ان شاء اللہ، رازی ہسپتال خدمتِ انسانیت کی ایک روشن اور مثالی پہچان ثابت ہوگا۔ 🌿
