25/09/2026
ڈاکٹر غلام مصطفیٰ خان
تاریخِ پیدائش: یکم جولائی 1912ء' بمقام: جبل پور' برطانوی ہندوستان
محقق' نقاد' ماہر تعلیم' ماہر لسانیات اور مذہبی عالم۔ آپ ناگپور یونیورسٹی اور جامعہ سندھ کے شعبہ اُردو کے صدر رہے۔ ناگپور یونیورسٹی نے آپ کو 1959ء میں ڈاکٹر آف لیٹرز (ڈی لٹ) کی ڈگری عطا کی۔ آپ نے قرآنیات' مذہب اور اُردو ادب میں کئی تصانیف تحریر کیں۔ آپ کی سب سے مقبول تصنیف "اقبال اور قرآن" ہے۔ اِس کتاب میں ڈاکٹر غلام مصطفیٰ خان نے علامہ اقبال کے فارسی اور اُردو اشعار کو قرآن کی آیات کے ساتھ جوڑا۔ اقبالیات میں یہ کام اپنی نوعیت کا منفرد اور تحقیقی کام تھا۔ آپ کی کتاب کے مطالعہ سے یہ بات واضح ہو جاتی ہے کہ شاعرِ مشرق کے کون کون سے اشعار قرآن مجید کی کن کن آیات کا مفہوم بیان کرتے ہیں۔ آپ کی اِس کاوش کو پہلا صدارتی اقبال ایوارڈ دیا گیا تھا۔ اِس کے علاوہ آپ نے "عارفِ اقبال" بھی تحریر کی۔ آپ کی علمی و ادبی خدمات کے اعتراف میں حکومتِ پاکستان نے آپ کو صدارتی تمغہ برائے حسنِ کارکردگی اور ستارۂ امتیاز سے نوازا۔ اس کے علاوہ نقوش ایوارڈ اور انجمن ترقی اُردو کی جانب سے نشانِ سپاس بھی عطا کیا گیا۔ ڈاکٹر غلام مصطفیٰ خان کا انتقال 25 ستمبر 2005ء کو حیدرآباد' پاکستان میں ہوا اور آپ احاطہ مسجد غفوریہ نزد ٹول پلازہ سپرہائی وے بائی پاس' حیدرآباد میں آسودۂ خاک ہیں۔
(تحریر و تحقیق: ڈاکٹر میاں ساجد علی' علامہ اقبال سٹمپ سوسائٹی)
https://whatsapp.com/channel/0029Vb6BGvIJkK7HtPieeI1d
