Spirit Of Islam - CPS

15/09/2026

۱۳ اگست کو جب کہ ہم طرابلس سے بہت دور ایک غیر ملک (یونان) میں تھے۔ ہوائی اڈہ کی ایک خاتون آئیں اور ہمارا تعارف حاصل کرنے کے بعد ہم کو خوش آمدید کہا۔ ان کو حکومت لیبیا کی طرف سے ٹیلکس پر ہدایت دی گئی تھی کہ وہ ہم سے ملیں اور ہماری مدد کریں۔ چنانچہ وہ ہم کو عام ہوائی مسافروں کی صف سے نکال کر ایک خصوصی مہمان خانہ میں لے گئیں۔ یہاں کھانے اور دوسری ضروریات کا اعلی انتظام تھا۔جب اگلے جہاز کا وقت آیا تو خاتون دوبارہ آئیں اور عام مسافروں سے الگ ایک خصوصی گاڑی پر سوار کر کے ہم کو طرابلس جانے والے جہاز تک پہنچایا ۔
یہ منظردیکھ کر مجھے آخرت کا معاملہ یاد آگیا جنت میں کسی آدمی کا داخلہ اگر چہ حشر میں حساب کتاب کے بعد ہوگا ۔ مگر حدیث میں بتایا گیا ہے کہ آدمی کا اخروی انجام اس کی موت کے بعد ہی شروع ہو جاتا ہے ۔ اس پر کچھ لوگ اعتراض کرتے ہیں کہ جب آدمی کے ابدی انجام کا فیصلہ قیامت کے بعد ہو گا تو قیامت سے پہلے کسی آدمی کے لئے اس کا تجربہ کیسے ممکن ہے ۔ مذکورہ واقعہ تمثیلی انداز میں اس کا ایک جواب ہے ۔۔۔
ہماری میز بانی کا اصل مقام اگرچہ براعظم افریقہ کے ایک ملک لیبیا میں تھا۔ مگر چونکہ یہ سرکاری میزبانی تھی اس لئے اس کا آغاز بہت پہلے براعظم یورپ کے ایک ملک (یونان ) سے شروع ہو گیا جب کہ ابھی ہم میز بان ملک کی سرحد میں داخل بھی نہیں ہوۓ تھے ۔
سفر نامہ غیر ملکی ۔۔صفحہ 36 مولانا وحیدالدین خان

15/09/2026

یہ انسان

پهول کی ایک پنکهڑی یا چڑیا کا ایک پر کتنی حسین چیزیں ہیں- مگر اسی کے ساتھ وه بے حد نازک ہیں- ان کو ہاتھ سے چهونے کی کوشش بهی ان کی حسین ترکیب کو بگاڑ دیتی ہے- اس کا مطلب یہ ہے کہ ان کا خالق بے حد لطیف ذوق والی ہستی ہے- وه چاہتا ہے کہ آدمی اس کے تخلیقی حسن کو دیکهے مگر وه اس کو ہاتھ نہ لگائے- وه اس سے اپنی روح کی غذا لے مگر اپنے جسم کی کثافت سے اس کو آلوده نہ کرے-

خدا کی دنیا میں ایک چیز ایسی ہے جو چڑیا کے پر اور پهول کی پنکهڑی سے بهی زیاده نازک ہے- یہ انسان کا دل ہے- ہماری معلوم دنیا میں انسان کے دل سے زیاده نرم و نازک کوئی چیز نہیں- ایسی حالت میں جو شخص کسی انسان کے دل کو دکهاتا ہے وه خدا کی دنیا میں سب سے بڑا جرم کرتا ہے- کسی ارٹسٹ کے نازک ترین آرٹ کو جو شخص اپنے پیروں سے مسل دے وه اس آرٹسٹ کی نظر میں کتنا بڑا مجرم هو گا- اس سے کہیں زیاده وه شخص اللہ کی نظر میں مجرم ہے جو ایک نازک دل کو مسلتا ہے- جو ایک انسان کے سکوں پر ڈاکہ ڈالتا ہے- جو ایک انسان کے آشیانہ کو اجاڑنے کے منصوبے بناتا ہے-

اس معاملہ میں وه لوگ اس سے کم مجرم نہیں ہیں جو یہ سب کچهہ هوتے هوئے دیکهتے ہیں مگر وه " گونگے شیطان " بنے رہتے ہیں- وه ظالم کا ہاتھ روکنے کے لیے نہیں اٹهتے- وه اپنی ممکن کوشش سےاس کو دفع کرنے میں نہیں لگاتے- پهر اس سے بهی زیاده بڑے مجرم وه لوگ ہیں جو ملت کو مظلومی سے نکالنے کے نام پر قیادت کرتے ہیں مگر جب ملت کا ایک مظلوم فرد ان کے سامنے آتا ہے تو اس کو مظلومی سے نکالنے کے لیے ان کے اندر کوئی تڑپ پیدا نہیں هوتی- وه تقریر میں کہتے ہیں کہ ملت کا یہ حال هونا چاہئے کہ جب ایک ستم زده شخص وامعتصماہ پکارے تو ملت اس کی مدد کے لیے دوڑ پڑے اور اس وقت تک اس کو چین نہ آئے جب تک اس شخص کو ظلم سے نجات حاصل نہ هو جائے- مگر جب ایک ستم زده انسان وامعتصماه کی آواز بلند کرتا ہے تو اس کی آواز پر دوڑنے کا کوئی جذبہ ان کے اندر پیدا نہیں هوتا-

حکمت اسلام
مولانا وحیدالدین خان

12/09/2026

12/09/2026

اور لوگوں میں کوئی ہے جو کنارے پر رہ کر اللہ کی عبات کرتا ہے۔ پس اگر اس کو کوئی فائدہ پہنچا تو وہ اس عبادت پر قائم ہوگیا۔ اور اگر کوئی آزمائش پیش آئی تو الٹا پھر گیا۔ اس نے دنیا بھی کھودی اور آخرت بھی، یہی کھلا ہوا خسارہ ہے۔..سورہ الحج آیت 11

ایک شخص وہ ہے جو دین کو کامل صداقت کے طورپر دریافت کرتاہے۔ دین اس کے دل ودماغ پر پوری طرح چھا جاتا ہے۔ وہ کسی تحفظ کے بغیر اپنے آپ کو دین کے حوالے کردیتاہے۔ اس کی نظر میں ہر دوسری چیز ثانوی بن جاتی ہے۔ یہی شخص خدا کی نظر میں سچا مومن ہے۔
دوسرے لوگ وہ ہیں جو بس اوپری جذبہ سے دین کو مانیں۔ ایسے لوگوں کی حقیقی دلچسپیاں اپنے مفادات سے وابستہ ہوتی ہیں۔ البتہ سطحی تأثر کے تحت وہ اپنے آپ کو دین سے بھی وابستہ کرلیتے ہیں۔ ان کی یہ وابستگی صرف اس وقت تک کے ليے ہوتی ہے جب تک دین کو اختیار کرنے سے انھیں کوئی نقصان نہ ہورہا ہو۔ ان کے مفادات پر اس سے کوئی زد نہ پڑتی ہو۔ جیسے ہی انھوں نے دیکھا کہ دین اوران کا مفاد دونوں ساتھ ساتھ نہیں چل سکتے وہ فوراً ذاتی مفاد کو اختیارکر لیتے ہیں اور دین کوچھوڑ دیتے ہیں۔
یہی دوسري قسم کے لوگ ہیں، جن کو منافق کہاجاتا ہے۔ منافق انسان آخرت کو پانے میں بھی ناکام رہتا ہے اور دنیا کو پانے میں بھی۔ اس کی وجہ یہ ہے کہ دنیا اور آخرت دونوں معاملہ میں کامیابی کے لیے ایک ہی لازمی شرط ہے، اور وہ یکسوئی ہے، اور یہی وہ قلبی صفت ہے جس سے منافق انسان ہمیشہ محروم ہوتا ہے۔ وہ اپنے دو طرفہ رجحان کی وجہ سے نہ پوری طرح آخرت کی طرف یکسو ہوتااور نہ پوری طرح دنیا کی طرف۔اس طرح وہ دونوں میں سے کسی کی بھی لازمی قیمت نہیں دے پاتا۔ ایسے لوگ دو طرفہ محرومی کی علامت بن کر رہ جاتے ہیں۔

تذکیر القرآن مولانا وحیدالدین خان

07/09/2026

۲۲ اکتو بر ۱۹۸۹

مغل حکمراں اور رنگ زیب نے کہا تھا کہ دنیا میں صرف انسان ہی ایک ایسی مخلوق ہے کہ بہت زیادہ ہے، پھر بھی کوئی نہیں :
نیست جز آدم دریں عالم که، بسیار است و نیست
دنیا ایسے انسانوں سے بھری ہوئی ہے جو انٹرسٹ کے لئے متحرک ہوتے ہیں۔ مگر ساری دنیا میں ایک انسان بھی شاید ایسا موجود نہیں جو پرنسپل کے لئے متحرک ہوتا ہو۔ ذاتی مفاد کے لئے ہر آدمی دوڑ رہا ہے، مگر اصول حق کے لئے دوڑنے والا کوئی شخص نظر نہیں آتا۔
دنیا میں سب سے زیادہ بھیڑ سطحی انسانوں کی ہے۔ دنیا میں بیشتر انسان وہ ہیں جو صحیح۔معنوں میں اپنی ذات کے لئے بھی کرنا نہیں جانتے۔ کچھ انسان ایسے ہیں جو اپنی ذات کے لئے کرنا جانتے ہیں، اور ایسا انسان تو شاید آج کی دنیا میں نایاب کے درجہ میں ہے جو صحیح معنی میں حق کے لئے کرنا جانتا ہو۔ دنیا میں سب کچھ ہے مگر ایک سچا انسان نہیں ۔ دنیا میں ہر چیز ہے مگر وہی ایک چیز نہیں جس کے لئے یہ دنیا تخلیق کی گئی تھی۔

ڈائری مولاناوحیدالدین

02/09/2026

آج زمین پر بے شمار سرگرمیاں جاری ہیں مگر وہی کام نہیں ہو رہا ہے جو سارے تخلیقی منصوبہ کا اصل مطلوب ہے۔ یعنی حمد خداوندی ۔ موجودہ انسانی دنیا اپنے وجود کا جواز کھو چکی ہے ۔ اب آخری طور پر وہ لمحہ آچکا ہے جب کہ موجودہ امتحانی دنیا کو ختم کر دیا جائے اور وہ معیاری دنیا شروع ہو جہاں خدا کے سوا کسی اور کی حمد نہ کی جاسکے ۔ جوحقیقی بھی ہو اور اس کے ساتھ ابدی بھی ۔
اس کے باوجود موجودہ دنیا کیوں ختم نہیں کی جارہی ہے ۔ اس کی وجہ یہ ہے کہ خدا کو ایک آخری عمل کا انتظار ہے جو ابھی تک ان ہوا پڑا ہے ۔ یہ عمل ہے آج کے انسانوں کے اوپر اتمام حجت ۔ جب تک یہ نہ ہو کہ دعوت حق اٹھائی جائے اور اس کو ابلاغ تام کی حد تک پہنچا دیا جاۓ ۔ اس وقت تک موجودہ دنیا کا خاتمہ ممکن نہیں ۔ اس عمل کی تکمیل تک قیامت معلق پڑی رہے گی۔ خدا کو آج سب سے زیادہ اعلان حق کا انتظار ہے۔ مگر دین کے نام پر بے شمار سرگرمیوں کے با وجو د یہی وہ کام ہے جس کا کرنے والا کوئی نہیں۔ ہر آدمی خود ساختہ دین کی تبلیغ میں مصروف ہے نہ کہ حقیقتہ خدا کے دین کی تبلیغ میں ۔

سفر نامہ غیر ملکی۔۔مولانا وحیدالدین

01/09/2026

۲۱ اکتوبر ۱۹۸۹
ایک صاحب کے سوال کے جواب میں میں نے کہا کہ عشق رسول“ ایک مبتدعانہ لفظ ہے۔ قرآن و حدیث میں کہیں بھی یہ لفظ استعمال نہیں کیا گیا ہے۔ رسول اللہ کے معالمہ میں اتباع مطلوب ہے نہ کہ عشق
انھوں نے کہا کہ مگر محبت کا لفظ تو رسول اللہ کے لئے استعمال ہوا ہے۔ میں نے کہا کہ محبت سے مراد عشق نہیں ہے۔ محبت رسول دراصل اتباع رسول ہی کا اگلا درجہ ہے۔ اس کا مطلب یہ ہے کہ رسول کی اتباع مشینی انداز کی نہیں ہونا چاہئے ۔ بلکہ والہانہ اتباع کے انداز میں ہونا چاہئے ۔

ڈائری مولاناوحیدالدین خان

31/08/2026

طرابلس میں ہما را قیام ہوٹل الکبیر (کمرہ نمبر ۴۰۸ ) میں تھا۔ جب میں اس کمرہ میں داخل ہوا تو یہ کمرہ مجھے بالکل اجنبی معلوم ہوا تھا۔ مگر دو ہفتے بعدم جنوری ۱۹۸۳ کو جب میں اس کمرہ سے رخصت ہوکر نکلا تو مجھے ایسا لگا جیسے میں اور کمرہ دونوں ایک دوسرے سے مانوس ہو چکے ہیں۔ یہی انسان کی بنیادی کمزوری ہے ۔ وہ نئی چیز سے بھڑکتا ہے اور جس چیز سے زیادہ عرصہ تک وا بستہ رہے اس کو حقیقی سمجھنے لگتا ہے۔ سچائی کو پانے کے لئے آدمی کا یہ مزاج اس کی راہ میں سب سے بڑی رکاوٹ ہے۔ وہ قدیم چیز کو محض اس کی بنا پر پکڑے رہتا ہے ،خواہ وہ کتنی ہی بے حقیقت ہو۔ وہ نئی چیز کو صرف عدم انس کی بنا پر اختیار نہیں کر پاتا ، خواہ وہ کتنی ہی بڑی سچائی ہو۔ حتی کہ دلائل جب اس کے ذہن کو مفتوح کر لیتے ہیں اس وقت بھی وہ اقدام کرنے سے ہچکتا ہے۔ آدمی اکثر حالات میں اپنے مانوس گھروندوں کو حقیقی سمجھ لیتا ہے۔ حالانکہ حقیقت وہ ہے جو دلیل سے ثابت ہو نہ کہ وہ جس سے مانوسیت کی بناپر ادمی کا تعلق ہو جائے ۔

سفرنامہ غیرملکی۔۔۔۔ مولاناوحیدالدین خان