19/10/2026
تعزیتی ریفرنس بیادِ ڈاکٹر نثار احمد ملک مرحوم | ہفتہ، 17 اکتوبر 2026
الفلاح سکالرشپ سکیم کے زیرِ اہتمام ہر دلعزیز، مخلص اور ممتاز سماجی شخصیت ڈاکٹر نثار احمد ملک مرحوم کی یاد میں ایک پروقار تعزیتی ریفرنس کا انعقاد کیا گیا، جس میں ان کی دینی، سماجی اور فلاحی خدمات کو شاندار الفاظ میں خراجِ تحسین پیش کیا گیا۔
تقریب کے دوران مرحوم کے ساتھ وابستہ خوشگوار یادیں تازہ کی گئیں اور ان کی زندگی کے روشن پہلوؤں کو اجاگر کیا گیا۔ مقررین نے اس بات کو بھرپور انداز میں سراہا کہ ڈاکٹر صاحب ہمیشہ نیکی، بھلائی اور فلاحی کاموں میں بڑھ چڑھ کر حصہ لیتے تھے اور ان کا اخلاص اور جذبۂ خدمتِ خلق سب کے لیے ایک بہترین نمونہ تھا۔
تعزیتی ریفرنس سے ڈاکٹر خرم نثارملک،ڈاکٹر آفتاب احمد، ڈاکٹر خالد محمود ثاقب، میاں محمد عبدالشکور، مجید احمد چوہدری, محمد ابوذر اور دیگر ممتاز مقررین نے خطاب کرتے ہوئے مرحوم کے اوصافِ حمیدہ اور دینی و سماجی خدمات کو یاد کیا۔ تقریب میں مرحوم کے صاحبزادگان، الفلاح بورڈ ممبران اور مختلف شعبہ جات بشمول ڈاکٹرز کمیونٹی کی کثیر تعداد نے خصوصی شرکت کی۔
تقریب کے اختتام پر مرحوم ڈاکٹر نثار احمد ملک کی مغفرت و بخشش اور پسماندگان کے صبرِ جمیل کے لیے خصوصی دعائیں کی گئیں۔
