Sindh Graduates Association - Markaz

22/09/2026

سنڌ گريجوئيٽس ائسوسيئيشن (سگا) جي ڊسمبر 2024 جي چونڊن ۾ ميمبر آف ڪائونسل جي ٿورن سان جئين مون کي سيڪريٽري اطلاعات جي اهم ذميواري ڏني وئي، ته مون پنهنجي پوري صلاحيت ۽ ايمانداريءَ سان اها ڪوشش ڪئي آهي ته هن شعبي کي جديد تقاضائن موجب نه صرف بهتر بڻايو وڃي پر ان کي وڌيڪ فعال پڻ ڪيو وڃي. سگا جي مرڪزي ساٿين جا لک قرب جن مون کي "ڊاڪٽر محمد سليمان شيخ ريسرچ اينڊ ڊولپمينٽ سينٽر" جو ڪنوينر پڻ مقرر ڪيو، جنهن سان هن تنظيم لاءِ منهنجن خدمتن جو دائرو وڌيڪ وسيع ڪري ڇڏيو.
ذميواري سنڀالڻ کان پوءِ سڀ کان پهريان رامپا پلازا ڪراچي جي 10 هين منزل تي واقع آفيس کي نئين سر بهتر بڻايو ويو. اتي سالن کان پيل تاريخي رڪارڊ کي انتهائي سليقي ۽ ترتيب سان رکيو ويو، جنهن سان هڪ اعليٰ معياري ۽ فعال آفيس قائم ٿي. ان کان پوءِ جديد دور جي تقاضائن کي سامهون رکندي، ساٿين سان جلد رابطي ۽ تنظيم جي سرگرمين کي عوام تائين پهچائڻ لاءِ سوشل ميڊيا پليٽ فارمز جهڙوڪ فيس بوڪ ۽ واٽس اپ جو اثرائتو استعمال شروع ڪيو ويو.
ڊجيٽل آرڪائيو ۽ جديد ميڊيا جو استعمال
سگا جي 54 سالن جي طویل تاريخ ۽ رڪارڊ کي هميشه لاءِ محفوظ ڪرڻ لاءِ هڪ وڏو قدم کنيو ويو آهي. هن سلسلي ۾ سڄي تاريخي رڪارڊ جي اسڪيننگ ڪرائي پئي وڃي. ان سان گڏوگڏ، پراڻن وڊيوز کي جديد MP4 فارميٽ ۾ ڪنورٽ ڪرائي پنهنجو يوٽيوب چينل ٺاهيو ويو آهي، جتي اهي تاريخي وڊيوز اپلوڊ ڪيون پيون وڃن. ان کانسواءِ، تنظيم جي سرگرمين کي دنيا جي سامهون بهترين انداز ۾ آڻڻ لاءِ انسٽاگرام ۽ ايڪس (X / Twitter) اڪائونٽ پڻ ڪاميابيءَ سان ٺاهيا ويا آهن.
هن سموري ڪم جي دوران سيڪريٽري جنرل سائين علي حسين بروهي جو خاص طور تي شڪرگذار آهيان، جن هر قدم تي رهنمائي ۽ ڀرپور سهڪار فراهم ڪيو. اڄ آفيس ۾ سينئر مئنيجر سيف الله ڀٽو سان انهن سمورن معاملن ۽ جديد تقاضائن تي تفصيلي ڪچهري ٿي، جن کي جديد معلومات ۽ ٽیڪنالوجي تي مڪمل عبور حاصل آهي.
انشاءَ الله! هي سڀ اسڪين ٿيل رڪارڊ ۽ قيمتي وڊيوز جلد ئي سگا جي سڀني ساٿين ۽ عام ماڻهن تائين پهچنديون، جيڪو سنڌي ادب، تعليم ۽ تاريخي تحقيقات جي ميدان ۾ هڪ اهم سنگميل ثابت ٿيندو.

احمد حسن پنهور
سيڪريٽري اطلاعات سگا

22/09/2026

****** ن سي تڙ ھوڙاڪ ، نه سي وايون وڻجارن جون ********
****** نه سي وسڻ وڻن ۾ ، نه سي ڪاتيارون
!!!! پسي بازارون هينئڙو منھنجو لوڻ ٿئي
موري جو مڻيادار ماڻھو ، بھترين انسان ، سماج سڌارڪ ۽ سگا موري جو سينئر اڳواڻ ڊاڪٽر ممتاز علي ميمڻ ڪالھ ھن فاني جھان کي ڇڏي ويو . سندس جنازي نماز رات ٻارھين وڳي مرڪزي امام بارگاھ موري ۾ ادا ڪرڻ کانپوء کيس موري جي قديم مقام خليفي عبدالواحد مورائي ۾ پنھنجي عزيزن قريبن سان گڏ دفن ڪيو ويو...
ڊاڪٽر ممتاز علي ميمڻ ھڪ بھترين انسان ھڪ بھترين سماج سڌارڪ ھيو . پاڻ سنڌ گريجوئيٽس ايسوسيئيشن موري جو سينئر اڳوان ھيو . ڊاڪٽر صاحب 1985 ۾ سگا موري جي ڪاروباري ڪاميٽيءَ جو ميمبر رھڻ کانپوءِ کيس 87-1986 ۾ موري شاخ جو صدر چونڊيو ويو جنھن کانپوء به مختلف وقتن ۾ پاڻ سگا جو عھديدار رھندو آيو . سال 27-2024 م يعني وفات تائين سگا موري شاخ جي ڪاروباري ڪاميٽيءَ جو ميمبر ھيو.
ڊاڪٽر صاحب جون ڪيل سماجي خدمتون ڪڏھن به اسان موري وارا وساري نه سگھنداسين. پموري شاخ پاران لڳندڙ ميڊيڪل ڪيمپن ۾ ڊاڪٽر ممتاز صاحب جو ليڊنگ رول ھيو . ڪرونا ۽ ٻوڏن جي دوران ڊاڪٽر صاحب اسان سان گڏ جي وڏو رولپلي ڪيو. ھن غريبن مسڪينن ماروئڙن جي بھترين خدمت ڪئي پوء اھامالي مدد جي صورت ۾ ھجي ، راشن جي صورت ۾ ھجي يا ميڊيسن جي صورت ۾ ھجي....
ڊاڪٽر ممتاز صاحب کي اسان سدائين متحرڪ سماجي خدمتون ڪندي ڏٺو . اسان کان اسان جو وڏو بڀاء بھترين ۽ متحرڪ سماجي اڳواڻ وڇڙي ويو آھي .. مون کي ھن وقت لفظ ساٿ نٿا ڏين جو آء سندس لاء لکي سگھان ..
الله پاڪ سندس درجات بلند فرمائيندو ۽ کيس جنت الفردوس ۾ اعلي مقام عطا فرمائيندو...
ھنن ڏک جن گھڙين ۾ اسان سنڌ کريجوئيٽس ايسوسيئيشن موري جا سڀ ساٿي ڊاڪٽر صاحب جي سڄي خاندان سندن اولاد سان ڏک ۾ گڏ آھيون ۽ تعزيت ڪريون ٿا ...
پروفيسر شمشاد احمد سومرو
صدر سنڌ گريجوئيٽس ايسوسيئيشن مورو سنڌ @

19/09/2026

سگا گڏاپ شاخ جو 51ھون تعليمي ليڪچر: سائين ميان داد جوکيو صاحب جو يادگار تدريسي سفر

سنڌ گريجوئيٽس ائسوسيئيشن (سگا) شاخ گڏاپ جي تعليمي سلسلي تحت 19 سيپٽمبر 2026ع تي 51ھون ليڪچر منعقد ڪيو ويو، جنهن جو موضوع "پرائمري کان ايليمينٽري تائين جو سفر" هو ۽ ليڪچرار سائين ميان داد جوکيو صاحب هئا. سائين ميان داد جوکيو صاحب 1989ع کان 1999ع تائين پرائمري استاد طور پنهنجي پيشيوراڻي سفر جي شروعات ڪئي. سال 2000ع ۾ سائين محمد حنيف بلوچ جي سهڪار سان گورنمنٽ پرائمري اسڪول راڌو جوکيو جو 1954ع کان 2000ع تائين جو تاريخي ريڪارڊ ترتيب ڏنو، جڏهن ته 2001ع ۾ لوئر اسڪول ۾ بدلي دوران محترم استاد محمد صالح گبول، سائين عبدالحميد گبول ۽ شير علي گبول جي رهنمائيءَ ۾ ريڪارڊ سازي ۽ نظام کي وڌيڪ فعال بڻايو. سال 2007ع ۾ عبدالوحيد جوکيو جي عرض تي ٻيهر پرائمري اسڪول ۾ بدلي ڪرائي هيڊماستر جو عهدو سنڀاليائون ۽ اسڪول ۾ قومي و تعليمي ڏينهن ملهائڻ سان گڏ ٻارن جي همت افزائيءَ لاءِ انعامي سلسلو شروع ڪيو. CETC پرائيويٽ اسڪول جي دوري بعد اتان جي مثبت تعليمي سڌارن کي سرڪاري اسڪول ۾ لاڳو ڪندي هنن پهرين ئي واري "ٽيچر ڊائري" جو نظام متعارف ڪرايو جنهن تدريسي عمل تي نهايت مثبت اثر وڌا. ايڇ ايس ٽي (HST) جي عهدي تي ترقيءَ بعد گورنمنٽ بوائز سيڪنڊري اسڪول سائين رکيو جوکيو ڳوٺ ۾ خدمتون سرانجام ڏنائون ۽ 2021ع ۾ سنڌ ليول تي 20 پروجيڪٽس پيش ڪيا، جن تحت تعليمي کاتي ۽ جاپاني تنظيم JICA پڻ اسڪول جا دورا ڪيا. هنن ۽ سندن ساٿي استادن جي اڻٿڪ محنتن سان 23 جولائي 2026ع تي اهو اسڪول پرائمري مان اپگريڊ ٿي گورنمنٽ ايليمينٽري اسڪول راڌو جوکيو بڻجي ويو، جتي کين ٻيهر انچارج هيڊماستر جون ذميواريون سونپيون ويون. استاد صرف علم ناهي ڏيندو پر پوري نسل ۽ اداري جي تعمير ڪندو آهي، ۽ سائين ميان داد جوکيو صاحب جو هي اڻٿڪ سفر ان ڳالهه جو روشن ثبوت آهي ته مسلسل محنت ۽ سچي نيت سان سرڪاري اسڪولن کي به ماڊل اسڪول بڻائي سگهجي ٿو.۔۔

پاران
سگا گڏاپ شاخ

19/09/2026

*سگا گهوٽڪي جي جوائنٽ سيڪريٽري سيد عبدالخالق شاهہ
سان بي ايم سي گهوٽڪي سٿ جي ملاقات* !

سنڌ گريجوئيٽس ايسوسيئيشن شاخ گهوٽڪي جي صدر ڊاڪٽر محمد نواز ڪلوڙ،نائب صدر سيد اقرار حسين شاھه،جنرل سيڪريٽري اياز لطيف دايو، فنانس سيڪريٽري رئوف پارس دايو ۽ بي ايم سي جي ميمبرن استاد سيد جمال شاهہ،منظور احمد خان گهوٽو،حق نواز سومرو،سڪندر مگسي ۽ وجيش ڪمار گذريل ڏينهن سگا گهوٽڪي جي جوائنٽ سيڪريٽري ۽ روشن تارا اسڪول گهوٽڪي جي بي او جي جي ميمبر سيد عبدالخالق شاهہ سان سندس رهائشگاهہ تي تفصيلي ملاقات ڪري قتل ڪيس ۾ انهي خلاف من گهڙت، بي بنياد ۽ ڪوڙي ايف آئي آر داخل ٿيڻ جي سخت لفظن ۾ مذمت ڪئي، سگا جي ساٿين کيس يقين ڏياريو تہ ڏکئي مرحلي ۾ هو سڀ ساڻس جاني، اخلاقي ۽ مالي طور گڏ آهن ڇاڪاڻ تہ سگا جا ساٿي هڪ گهر جا ڀاتي آهن، انهي موقعي تي سيد عبدالخالق شاهہ من گهڙت ايف آئي آر جي پس منظر کان آگاهي ڏني ۽ سگا سٿ پاران هر ممڪن ساٿ ڏيڻ تي سندن ٿورا ادا ڪيا، هن چيو تہ قانوني طرح ڪيس مضبوط آهي، ﷲ پاڪ انهي بي بنياد ڪيس مان سرخرو ڪندو، هن چيو تہ سگا مرڪز ۽ شاخ سان گڏ سنڌ جي وڏين بار ايسوسيئيشن طرفان اخلاقي حمايت ڪرڻ تي منهنجا حوصلا بلند آهن ۽ جن به منهنجي خلاف سازش ڪئي آهي، انهن کي ناڪامي ڏسڻي پوندي،انھي موقعي تي سگا جا ساٿي لالو صاحبڏنو خان پٺاڻ،ايڊووڪيٽ سيد ڪاشف شاهہ جيلاني ۽ ٻيا پڻ موجود هئا.

*اياز لطيف دايو*
جنرل سيڪريٽري سگا شاخ گهوٽڪي

19/09/2026

اڄ تاريخ 18 سيپٽمبر 2026ع تي سنڌ گريجوئيٽس ايسوسيئيشن (سگا) ڪوٽڙي شاخ ۽ بزمِ غالب ملڪاڻي جي گڏيل سهڪار سان نامياري پبلشر، ڪهاڻيڪار، شاعر، اديب ۽ مترجم احسان آڪاش سان هڪ شاندار ادبي رهاڻ رچائي وئي، جنهن ۾ اديبن، شاعرن، سگهڙن، فنڪارن ۽ ادب دوستن وڏي انگ ۾ شرڪت ڪئي.
ادبي رهاڻ جي صدارت سنڌ ساگر پارٽي جي ڊپٽي سيڪريٽري سارنگ مهر ڪئي، جڏهن ته صاحبِ رهاڻ احسان آڪاش هو. تقريب جي مهمانن ۾ بزمِ غالب ملڪاڻي جي سرواڻ الطاف ملڪاڻي، سگا ڪوٽڙي شاخ جي صدر عبدالستار ڀٽو، سرفراز ملڪاڻي، سگا ڪوٽڙي شاخ جي جنرل سيڪريٽري غفار خان جمالي، سنڌي ادبي سنگت جي سيڪريٽري محبوب سنڌي، شاعر ۽ آرٽسٽ عبدالغفور ڏيپر ۽ نوجوان شاعر لونگ ملاح سميت ڪيترن ئي ادبي شخصيتن شرڪت ڪئي.
پروگرام جي شروعات تلاوتِ ڪلام پاڪ سان ڪئي وئي، جنهن کان پوءِ شاهه عبداللطيف ڀٽائي جي وائي ۽ بيتن سان ادبي محفل جو باقاعده آغاز ٿيو. ننڍڙي سگهڙ مهرالنساءِ منگلو ۽ علي عباس منگلو پنهنجي انداز ۾ بيت پڙهي محفل کي خوبصورت ادبي رنگ ڏنو. صدر سگا ڪوٽڙي شاخ عبدالستار ڀٽو پاران آجياڻو پيش ڪيو ويو ۽ آيل مهمانن کي ڀليڪار ڪيو.
محفل دوران نعتِ رسول ﷺ فقير عبدالعزيز جلباڻي پيش ڪئي، جڏهن ته عبدالستار ملوکاڻي منقبت پيش ڪئي. صوفي راڳين پيار علي پيار، نياز حسين خاصخيلي، محبوب کونهارو ۽ علي اڪبر خاصخيلي صوفياڻا ڪلام پيش ڪري محفل کي روحاني ۽ ثقافتي رنگ بخشيو. چنگ نواز استاد ولي محمد خاصخيلي پنهنجي چنگ جي وڄت سان شرڪت ڪندڙن کان ڀرپور داد حاصل ڪيو.
صاحبِ رهاڻ احسان آڪاش جي ادبي، فڪري ۽ علمي سفر تي غلام اصغر گاڏهي، فياض قمبراڻي، اشفاق جانوري ۽ ٻين مقررَين مقالا ۽ ويچار پيش ڪيا. شاعرن ۽ سگهڙن قاضي بدرالدين، خادم حسين منگلو، علي گل رند، عبدالغفور ڏيپر، علي نواز تيوڻو ۽ ٻين بيتن ۽ شاعريءَ ذريعي احسان آڪاش جي فن ۽ شخصيت کي ڀيٽا پيش ڪئي.
ان موقعي تي بزمِ غالب جي سرواڻ الطاف ملڪاڻي خطاب ڪندي چيو ته دنيا ۾ اهڙا ماڻهو به اچن ٿا، جيڪي پنهنجي چالاڪي ۽ هوشياري سان اڳتي وڌن ٿا، پر ڪي ماڻهو پنهنجي ڪردار سبب سڃاتا وڃن ٿا ۽ سندن وڃڻ کان پوءِ به سندن ڪردار جي خوشبو باقي رهي ٿي. هن احسان آڪاش جي زندگي ۽ ادبي سفر کي گلاب جي خوشبو سان تشبيهه ڏيندي چيو ته هو هڪ سٺو شاعر ۽ ڪهاڻيڪار هجڻ سان گڏ سنڌي ادب لاءِ اهم خدمتون سرانجام ڏئي رهيو آهي.
محبوب سنڌي چيو ته احسان آڪاش فني ۽ فڪري حوالي سان پختو ڪهاڻيڪار آهي، جڏهن ته لونگ ملاح کيس روشن خيال ليکڪ قرار ڏيندي سندس ادبي خدمتن کي ساراهيو. ذوالفقار هالار سومرو احسان آڪاش جي علمي ۽ ادبي خدمتن کي ساراهيندي چيو ته سندس ڪم سنڌي ادب لاءِ قابلِ قدر آهي. سگا اڳواڻ عبدالستار ڀٽو چيو ته احسان آڪاش وٽ سنڌيت سان گهرو عشق آهي، جيڪو سندس لکڻين ۾ نمايان نظر اچي ٿو. سرفراز ملڪاڻي پڻ صاحبِ رهاڻ جي ادبي خدمتن کي ساراهيندي کيس مبارڪباد ڏني.
صدارتي خطاب ڪندي سارنگ مهر چيو ته ڌرتي اسان جي ماءُ آهي ۽ سنڌ جي تاريخ، ثقافت ۽ سڃاڻپ کي محفوظ رکڻ لاءِ ادبي ۽ سماجي ادارن جو ڪردار انتهائي اهم آهي. هن چيو ته قومن وارن چوڪن ۽ ٻين اهم هنڌن تي سنڌ جي تاريخي ڪردارن جي نالن وارا بورڊ لڳائڻ گهرجن. هن احسان آڪاش جي ادبي ۽ قومي خدمتن کي ساراهيندي چيو ته سنڌ کي اڄ پنهنجي تاريخ، ثقافت ۽ سڃاڻپ سان مضبوط وابستگي جي وڌيڪ ضرورت آهي.
صاحبِ رهاڻ احسان آڪاش پنهنجي خطاب ۾ سگا ڪوٽڙي شاخ، بزمِ غالب ملڪاڻي ۽ سمورن شرڪت ڪندڙن جو ٿورو مڃيندي چيو ته ”توهان جي تخليق ئي توهان جي سڃاڻپ بڻجي وڃي ٿي.“ هن چيو ته ڪوٽڙي ادبي لحاظ کان هڪ زرخيز ڌرتي آهي ۽ هتي ٿيندڙ اهڙيون ادبي ڪچهريون سنڌي ادب جي واڌ ويجهه لاءِ اهم آهن. هن سگا ۽ بزمِ غالب جي گڏيل ادبي سرگرمين کي ساراهيندي چيو ته هر جمعي تي ٿيندڙ ادبي ڪچهري هڪ سٺو ۽ ساراهه جوڳو سلسلو آهي. هن ٻڌايو ته هيءَ سگا ڪوٽڙي ۽ بزمِ غالب جي گڏيل ادبي ڪچهريءَ جو 276 هون پروگرام آهي.
احسان آڪاش پاران پيغام لائبريري لاءِ پنهنجي پبلشنگ اداري طرفان ڪتابن جو تحفو بزمِ غالب جي سرواڻ الطاف ملڪاڻي ۽ سگا ڪوٽڙي شاخ جي صدر عبدالستار ڀٽو وصول ڪيو.
تقريب دوران صاحبِ رهاڻ احسان آڪاش کي اجرڪن، سنڌي ٽوپين، لنگين، گلن جي هارن، گلدستن ۽ ڪتابن جا تحفا پيش ڪري سندس ادبي خدمتن کي مڃتا ڏني وئي. بزمِ غالب جي سرواڻ الطاف ملڪاڻي پاران بزمِ غالب جي ساٿين کي ٽوپين ۽ گيڙو رومال جا تحفا ڏنا ويا. ان سلسلي ۾ الطاف ملڪاڻي پاران فقير نياز حسين ۽ ٻين ساٿين کي، جڏهن ته عبدالستار ڀٽو پاران عبدالستار ملوکاڻي کي ۽ سگا ڪوٽڙي شاخ جي جنرل سيڪريٽري غفار خان جمالي پاران سگهڙ علي گل رند کي سنڌي ٽوپي ۽ گيڙو رومال پيش ڪيو ويو.
محفل کي مزاحيه فنڪار منظور چانڊيو پنهنجي منفرد مزاحيه انداز سان کلائي کيرو ڪري ڇڏيو ۽ شرڪت ڪندڙن کان ڀرپور داد حاصل ڪيو.
ادبي رهاڻ ۾ فياض ٻگھيو، علي نواز تيوڻو، حسنين سومرو، سعد چانڊيو، محمد شريف قمبراڻي، ساجد علي قمبراڻي، امتياز علي قمبراڻي، اعجاز قمبراڻي، نجف علي لغاري، نذير علي لغاري، حسنين گاڏهي، شير محمد جمالي، محمد رمضان لاھوتي، علي اڪبر خاصخيلي، خان مڱريو، غلام مصطفيٰ ڪابورو، مصور چانڊيو ۽ ٻين ڪيترن ئي شاعرن، اديبن، سگهڙن ۽ ادب دوستن وڏي انگ ۾ شرڪت ڪئي.
تقريب جي ڪارروائي بزمِ غالب جي سيڪريٽري ذوالفقار هالار سومرو نهايت سهڻي انداز سان هلائي. آخر ۾ سگا ڪوٽڙي شاخ جي جنرل سيڪريٽري غفار خان جمالي سمورن مهمانن، شاعرن، اديبن، سگهڙن، فنڪارن ۽ شرڪت ڪندڙن جا ٿورا مڃيندي ادبي رهاڻ جي پڄاڻي جو اعلان ڪيو.
ڪوٽڙي جي هن ادبي شام ۾ ادب، شاعري، صوفي راڳ، سگهڙائپ، چنگ ۽ مزاح جي حسين سنگم محفل کي يادگار بڻائي ڇڏيو ۽ احسان آڪاش جي ادبي خدمتن کي ڀرپور نموني ڀيٽا پيش ڪئي وئي.

رپورٽ
غفار خان جمالي
جنرل سيڪريٽري سنڌ گريجوئيٽس ايسوسيئيشن (سگا) ڪوٽڙي شاخ

19/09/2026

19/09/2026

گيڙوءَ رتي گودڙي — هڪ خوبصورت ادبي سوکڙي

رياض حسين ڪلهوڙي سان تعزيت لاءِ آيل، وحدت الوجود جي فڪر سان وابسته، محترم پروفيسر عبدالرحمٰن ”اطهر“ کهڙي سان ٿيل ملاقات، ادبي دوستن لاءِ هڪ خوبصورت ياد بڻجي وئي.
اطهر کهڙو صاحب رڳو علم ۽ ادب سان گهرو ناتو رکندڙ شخص ئي نه، پر پنهنجي فڪري سڃاڻپ ۽ تخليقي اظهار سبب به هڪ منفرد حيثيت رکن ٿا. سندن تازو ڇپيل ڪتاب ”گيڙوءَ رتي گودڙي“ ادب سان محبت ڪندڙن لاءِ هڪ خوبصورت سوکڙي آهي، جنهن ۾ شاعريءَ جي مختصر پر گهري صنف ٽيڙو تي سندن طبع آزمائي نظر اچي ٿي.
ڪتاب جي ظاهري پيشڪش به دلڪش آهي ۽ جڏهن ان جا ورق ورائجن ٿا ته اندر موجود فڪري، معنوي ۽ تخليقي مواد پڙهندڙ کي پنهنجي طرف ڇڪي ٿو. ٽيڙو جهڙي مختصر صنف ۾ خيال کي نئين انداز سان پيش ڪرڻ، لفظن جي چونڊ ۽ معنائن جي وسعت، ليکڪ جي مطالعي، مشاهدي ۽ تخليقي سگهه جو پتو ڏئي ٿي.
اطهر کهڙو صاحب جن محبت ۽ پنهنجائپ سان هي ڪتاب ڊاڪٽر غلام مصطفيٰ کهڙو، محمد شريف ڀرچونڊ، اظهر علي ڪلهوڙو، توفيق احمد ڀٽو ۽ ڊاڪٽر ذيشان اظهر ڪلهوڙو کي تحفي طور ڏنو، تنهن لاءِ اسان سڀئي ساٿي سندن دل جي گهراين سان ٿورائتا آهيون.
ڪتاب ڪنهن ليکڪ جي فڪري سفر جو دستاويز هوندو آهي، ۽ ”گيڙوءَ رتي گودڙي“ اطهر کهڙي صاحب جي ادبي ذوق، فڪري پختگي ۽ تخليقي سڃاڻپ جو خوبصورت اظهار محسوس ٿئي ٿو.
دعا آهي ته اطهر کهڙو صاحب پنهنجي قلم جي هن سفر کي اڳتي وڌائيندا رهن ۽ سنڌي ادب جي آڪاش تي پنهنجي فڪر ۽ فن جا وڌيڪ خوبصورت ڏيئا روشن ڪندا رهن.
صاحب ڪتاب جي شاعري!!!

ويو سجدو و سجود
ٿيا هڪ جڏهن
عبد ۽ معبود

هيس آءُۡ اڌورو
پرين آيو پاڻ
پوءِ ٿيس پورو

دوئي جو ٿي دور
سڀ ڀانيم ساڳيا
سور ۽ سرور

پاران:
عبداللطيف ڪرٽيو
ميمبر ڪاروباري ڪاميٽي سگا
نئون ديرو

17/09/2026

سنڌ گريجوئيٽس ائسوسيئيشن ڪورنگي شاخ پاران سماج سڌارڪ اکين جي ماهر ڊاڪٽر بهترين انسان ڊاڪٽر محمد خان شيخ جي سالگره جو ڪيڪ ڪٽيو ويو ۽ کيس لفظن جي ڀيٽا ڏني وئي

هن گڏجاڻي جي صدارت شاخ جي صدر ڊاڪٽر غلام اڪبر ڏاهاڻي ڪئي ۽ ڪاروائي جنرل سيڪريٽري ڊاڪٽر لياقت علي تنيو هلائي ،
ڪاروائي شروعات قرآن پاڪ جي تلاوت سان ٿي جنهن شاهه عبداللطيف ڀٽائي جا بيت پڙهيا ويا
هن تقريب ۾ جن معزز مهمانن شرڪت ڪئي انهن ۾
ڊاڪٽر محمد خان شيخ مھمان خاص محمد اسلم بلوچ، افسرالدين ٽالپر، آفتاب ميمڻ ، فتح محمد شيخ، نظر حسين ملاح نائب صدر، غضنفر علي ٿھيم جوائنٽ سيڪريٽري، اعجاز علي چوھاڻ انفارميشن سيڪيٽري
سگا ڪورنگي جي ڪاروباري ڪميٽيء جا ميمبر محمد اسحاق پنهور،، نصراللہ ڪورائي، محمد مانجھي ميمڻ، محمد يعقوب چنو
ڪريم بخش شيخ ان سان گڏ جن معزز ساٿين شرڪت ڪئي انهن ۾ اشرف علي کھاوڙ، محمد اسلم شيخ، عبداللطيف صديقي، پرويز علي جاگيراڻي، آغا صفت علي ان سان گڏ علائقي جي معزز شخصيتن پڻ شرڪت ڪئي،
هن تقريب ۾ ڊاڪٽر جي سالگره جو ڪيڪ ڪٽيو ويو ۽ کيس اجرڪ گلن جا هار تحفي طور ڏنا ويا،
جنهن کان پوءِ سڀني دوستن کيس لفظن جي ڀيٽا پيش ڪندي چيو ته ڊاڪٽر محمد خان شيخ پاران پنهجي شعبي سان گڏ جيڪو هن وقت تعليم جي شعبي لاءِ ڪم ڪري رهيا آهن اهو تعريف جوڳو آهي سندن جون سڄي سنڌ ۾ ڪيل خدمتون خاص ڪري اکين ڪئمپون ساراهه جوڳو عمل آهي ﷲ پاڪ کين خضري حياتي ڏيندو ۽ هي خدمتن جو سلسلو جاري رهندو،

13/09/2026

احمد حسن پنهور
سيڪريٽري اطلاعات سگا

16/09/2026

سگا ڍٽ شاخ جي صدر محترم اوڀايو جوڻيجو کي دل جي گهراين سان جنم ڏينهن جون مبارڪون ،

ارباب خالد محمود
ميمبر مرڪزي ڪاروباري ڪاميٽي سگا