Karachi Human Rights Society

08/09/2026

کراچی: شہر کی تاریخی عمارتیں تیزی سے اپنی اصل شناخت کھو رہی ہیں، کہیں مبینہ طور پر توڑ پھوڑ، کہیں غیر قانونی تعمیرات اور کہیں تاریخی عمارتوں کو کمرشل مقاصد کے لیے تبدیل کرنے کی شکایات سامنے آ رہی ہیں۔
مگر سوال یہ ہے کہ کراچی کے تاریخی ورثے کی حفاظت کی ذمہ داری کس کی ہے؟
اسسٹنٹ کمشنر سے سوال ہے کہ ان کے زیرِ انتظام علاقوں میں اگر تاریخی عمارتوں میں غیر قانونی تبدیلیاں ہو رہی ہیں تو انتظامیہ کو اس کا علم کیوں نہیں؟
ڈی جی ہیریٹیج اور متعلقہ حکام سے سوال ہے کہ تاریخی عمارتوں کی حفاظت کے لیے قوانین اور ادارے موجود ہونے کے باوجود یہ صورتحال کیوں پیدا ہو رہی ہے؟
کیا تاریخی عمارتوں کی باقاعدہ مانیٹرنگ کی جاتی ہے؟
اگر کی جاتی ہے تو پھر مبینہ غیر قانونی تعمیرات اور توڑ پھوڑ حکام کی نظروں سے کیسے اوجھل رہتی ہے؟
سوال یہ بھی ہے کہ اگر سرکاری ادارے ہی کراچی کے تاریخی ورثے کو تحفظ نہیں دے سکتے تو گڈ گورننس کے دعوے کیسے درست ثابت ہوں گے؟
شہریوں کا مطالبہ ہے کہ تاریخی عمارتوں کے تحفظ کے لیے صرف کاغذی کارروائی نہیں بلکہ عملی اقدامات کیے جائیں، ذمہ داروں کا تعین کیا جائے اور کراچی کے تاریخی ورثے کو مزید نقصان سے بچایا جائے۔

20/08/2026

# پریس ریلیز

**کراچی ہیومن رائٹس سوسائٹی کے تعاون سے کراچی یونیورسٹی کے طلبہ و طالبات کا انصاف کے لیے پُرامن احتجاج**

**کراچی:** کراچی ہیومن رائٹس سوسائٹی کے تعاون سے جامعہ کراچی کے طلبہ و طالبات نے **بدھ، 19 اگست 2026 کو دوپہر 12 بجے سے 1 بجے کے درمیان** جامعہ کراچی کے مسکن گیٹ کے مقام پر ایک پُرامن احتجاجی مظاہرہ کیا۔

احتجاج کا مقصد **میر رضا، ایزل اور دیگر متاثرہ افراد کے لیے انصاف، شفاف تحقیقات اور قانون کے مطابق کارروائی** کا مطالبہ کرنا تھا۔ مظاہرے میں طلبہ و طالبات نے پلے کارڈز اور بینرز اٹھا رکھے تھے جن پر **"Justice for All"، "Raise Your Voice for Justice"** اور **"Silence is Not an Option"** جیسے نعرے درج تھے۔
اس موقع پر طلبہ و طالبات کا کہنا تھا کہ آئے دن کراچی کے عوام کسی نہ کسی وجہ سے مر رہے ہیں کبھی ڈمپر مافیا کبھی ڈکیتی کی وارداتیں کبھی قتل کبھی معصوم بچیوں کے ساتھ جنسی درندگی کبھی گٹر کے ڈھکن نہ ہونے کی وجہ سے بچے مر رہے ہیں اس سب کی ایک ہی وجہ ہے کہ معاشرے میں عدل نہیں ہے اور جہاں عدل نہیں ہوتا وہاں یہی سب ہوتا ہے ان کا مزید کہنا تھا میر رضا اور ایزل کے قاتلوں کو جلد از جلد گرفتار کر کے عبرت ناک سزا دی جائے تاکہ مجرم جرم کرنے سے پہلے دس بار سوچے طالبات کا کہنا تھا کہ جب اٹھارہ ماہ کی بچی محفوظ نہیں تواس کا مطلب ہم بھی غیر محفوظ ہیں ہم روزانہ پڑھنے آتی ہیں کل کو ہمارے ساتھ بھی اس طرح کے واقعات ہوسکتے ہیں ان سب کا ایک ہی علاج ہے کہ مجرموں کو عبرت ناک سزائیں دی جائیں-
اس موقع پر کراچی ہیومن رائٹس سوسائٹی نے کہا کہ معاشرے میں انصاف، انسانی حقوق اور قانون کی بالادستی کے لیے آواز اٹھانا ہر شہری کی ذمہ داری ہے۔ کسی بھی متاثرہ شخص یا خاندان کو انصاف کی فراہمی میں تاخیر نہیں ہونی چاہیے اور تمام معاملات کی **غیر جانب دار، شفاف اور میرٹ پر تحقیقات** ہونی چاہئیں۔

سوسائٹی نے مطالبہ کیا کہ **میر رضا، ایزل اور دیگر متعلقہ کیسز میں حقائق سامنے لائے جائیں، ذمہ دار عناصر کے خلاف قانون کے مطابق کارروائی کی جائے اور متاثرین کو فوری انصاف فراہم کیا جائے۔**

کراچی ہیومن رائٹس سوسائٹی نے طلبہ و طالبات کے پُرامن اور ذمہ دارانہ احتجاج کو سراہتے ہوئے کہا کہ نوجوان نسل کا انسانی حقوق اور انصاف کے لیے آواز بلند کرنا ایک بہتر، محفوظ اور منصفانہ معاشرے کی جانب اہم قدم ہے۔

**کراچی ہیومن رائٹس سوسائٹی**
*انسانی حقوق، انصاف اور عوامی آواز کے لیے جدوجہد*

18/08/2026

دعوت نامہ

**کراچی ہیومن رائٹس سوسائٹی** اور **جامعہ کراچی کے طلبہ** کی جانب سے

✊ انصاف کے لیے آواز بلند کریں!

کراچی میں حالیہ **ناانصافی اور مبینہ زیادتی کے واقعات**، بالخصوص **میر رضا کیس، ایزل کیس** اور دیگر عوامی اہمیت کے معاملات کے خلاف ایک پُرامن احتجاجی مظاہرہ منعقد کیا جا رہا ہے۔

📅 **کل، بدھ 19 اگست 2026**
🕛 **وقت: دوپہر 12:00 بجے**
📍 **مقام: مسکن گیٹ، جامعہ کراچی**

ہم تمام طلبہ، سول سوسائٹی، انسانی حقوق کے کارکنان، صحافیوں اور باشعور شہریوں سے اپیل کرتے ہیں کہ **انصاف، قانون کی بالادستی اور مظلوموں کی آواز بننے کے لیے** اس پُرامن احتجاج میں بھرپور شرکت کریں۔

**آئیں، خاموشی توڑیں — انصاف کے لیے آواز اٹھائیں!**

**کراچی ہیومن رائٹس سوسائٹی**

03/08/2026

"سانحۂ گل پلازہ کے باوجود مبینہ غیر قانونی تعمیرات پر خاموشی؟ ڈینی کرافٹ ٹاور پر ڈی سی ساوتھ کے احکامات کے 10 روز بعد بھی کارروائی نہ ہو سکی۔"

کراچی میں سانحۂ گل پلازہ کے بعد غیر قانونی تعمیرات کے خلاف سخت کارروائی کے دعوے کیے گئے، مگر شہر کے مصروف تجارتی علاقے میں واقع **ڈینی کرافٹ ٹاور، پلاٹ نمبر 16، PR-2** کے حوالے سے نئے سوالات سامنے آ رہے ہیں۔ شہریوں کا دعویٰ ہے کہ **24 جولائی 2026** کو ڈپٹی کمشنر ساوتھ کی جانب سے کارروائی کے احکامات جاری کیے گئے تھے، تاہم **10 روز گزرنے کے باوجود** سندھ بلڈنگ کنٹرول اتھارٹی (SBCA) کی جانب سے کوئی عملی کارروائی نظر نہیں آئی۔

سانحۂ گل پلازہ نے کراچی میں عمارتوں کی حفاظت اور تعمیراتی قوانین پر سنگین سوالات کھڑے کیے تھے۔ اس واقعے کے بعد توقع کی جا رہی تھی کہ خلافِ ضابطہ تعمیرات کے خلاف بلاامتیاز کارروائی ہوگی۔

تاہم شہریوں اور سماجی حلقوں کا دعویٰ ہے کہ گل پلازہ کے سامنے واقع **ڈینی کرافٹ ٹاور، پلاٹ نمبر 16، PR-2** کے معاملے میں تاحال مؤثر کارروائی نہیں کی گئی۔ ان کے مطابق ڈپٹی کمشنر ساوتھ کے احکامات کے باوجود مبینہ طور پر متعلقہ ادارے خاموش ہیں۔

شہریوں کا مطالبہ ہے کہ اس منصوبے کی قانونی حیثیت، منظور شدہ نقشوں اور تمام متعلقہ این او سیز کا شفاف جائزہ لیا جائے۔ اگر کسی قسم کی خلاف ورزی موجود ہو تو قانون کے مطابق فوری کارروائی عمل میں لائی جائے تاکہ مستقبل میں کسی بھی ممکنہ حادثے سے بچا جا سکے۔

23/07/2026

01/05/2026

کراچی ہیومن رائٹس سوسائٹی کی جانب سے ڈائریکٹر جنرل ایس بی سی اے سے مطالبہ کیا گیا ہے کہ ضلع جنوبی کے علاقے باتھ آئی لینڈ میں زیرِ تعمیر پلاٹ نمبر D-10/A پر جاری کثیر المنزلہ تعمیرات کا فوری نوٹس لیا جائے۔

سوسائٹی کے مطابق کراچی بلڈنگ اینڈ ٹاؤن پلاننگ ریگولیشنز (KB&TPR) 2002 کے تحت 1000 سے 1500 گز کے پلاٹ پر صرف B+G+12 کی منظوری 1:5 کے تناسب سے دی جا سکتی ہے، جبکہ مذکورہ پلاٹ کا رقبہ 1168 گز ہے۔ اس کے باوجود سندھ بلڈنگ کنٹرول اتھارٹی (SBCA) نے 13 اگست 2025 کو اس پلاٹ پر B+G+20 کی منظوری دے دی، جو قواعد و ضوابط کے سراسر خلاف اور غیر قانونی اقدام قرار دیا جا رہا ہے۔

ذرائع کے مطابق مذکورہ پلاٹ پر تقریباً B+G+20 تک تعمیر مکمل ہو چکی ہے اور تعمیراتی کام تاحال زور و شور سے جاری ہے۔ کراچی ہیومن رائٹس سوسائٹی نے مؤقف اختیار کیا ہے کہ اس نوعیت کے غیر قانونی منصوبوں میں سرمایہ کاری کے باعث شہریوں کا قیمتی سرمایہ ضائع ہونے کا شدید خدشہ موجود ہے۔

مزید یہ کہ تعمیرات میں ناقص اور کم معیار کا خام مال استعمال کیا جا رہا ہے جبکہ عمارت میں مناسب فائر سیفٹی سسٹم بھی موجود نہیں، جو مستقبل میں کسی بڑے سانحے کا سبب بن سکتا ہے۔

سوسائٹی نے الزام عائد کیا ہے کہ ڈائریکٹر ساؤتھ، جناب نیاز حسین لغاری، مذکورہ بلڈر کو سہولت فراہم کر رہے ہیں، جس کے باعث غیر قانونی تعمیرات بلا روک ٹوک جاری ہیں۔

کراچی ہیومن رائٹس سوسائٹی نے ڈائریکٹر جنرل ایس بی سی اے، چیف سیکریٹری سندھ، اور دیگر متعلقہ اداروں سے مطالبہ کیا ہے کہ فوری طور پر اس غیر قانونی منظوری کو منسوخ کیا جائے، تعمیراتی کام رکوایا جائے، ذمہ دار افسران کے خلاف کارروائی کی جائے، اور شہریوں کے جان و مال کے تحفظ کو یقینی بنایا جائے۔

01/05/2026

پہلے ایس بی سی اے (SBCA) کے افسران صرف بلڈر مافیا کو سہولت فراہم کرتے تھے، لیکن اب صورتحال اس نہج پر پہنچ چکی ہے کہ خود ایس بی سی اے کے افسران غیر قانونی تعمیرات کی سرپرستی کرتے ہوئے نظر آتے ہیں۔

اسی تناظر میں ضلع ایسٹ کے ڈائریکٹر سمیع جبلانی پنجاب سوداگران سٹی فیز 2 میں واقع پلاٹ نمبر LS-48 پر گراؤنڈ(دوکانیں) + میزنائن + تھرڈ فلور پر مشتمل غیر قانونی تعمیرات کی سرپرستی کرتے ہوئے دکھائی دے رہے ہیں۔

اس بات کا واضح ثبوت یہ ہے کہ اگر سمیع جبلانی صاحب کا اس غیر قانونی تعمیرات سے کوئی تعلق نہیں، تو پھر آخر کیا وجہ ہے کہ انہوں نے اب تک اس غیر قانونی تعمیرات کے خلاف کوئی کارروائی نہیں کی؟

متعلقہ پلاٹ پر تعمیراتی کام تیزی سے جاری ہے، جبکہ ایس بی سی اے کے ذمہ دار افسران خاموش تماشائی بنے ہوئے ہیں، جو کئی سوالات کو جنم دیتا ہے۔ شہریوں کا کہنا ہے کہ اگر بروقت کارروائی نہ کی گئی تو یہ غیر قانونی تعمیر مستقبل میں سنگین مسائل کا سبب بن سکتی ہے۔

کراچی ہیومن رائٹس نے ایس بی سی اے کے ڈائریکٹر جنرل اور متعلقہ اداروں سے پرزور اپیل کی ہے کہ اس غیر قانونی تعمیر کے خلاف فوری کارروائی عمل میں لائی جائے، سب سے پہلے تعمیراتی کام کو فوری طور پر رکوایا جائے، مکمل انکوائری کی جائے، غیر قانونی تعمیر کو مسمار کیا جائے، اور اس میں ملوث افسران کے خلاف سخت قانونی کارروائی کی جائے تاکہ آئندہ کسی کو قانون کی خلاف ورزی کی جرات نہ ہو۔

02/02/2026

ڈسٹرکٹ ساؤتھ میں SBCA کی چھتری تلے غیرقانونی بینک تعمیر،
قانون خاموش، تعمیر جاری! غیرقانونی بینک کی تعمیر پر سوالیہ نشان؟

ڈسٹرکٹ ساؤتھ کے علاقے غلام حسین قاسم کوارٹرز میں واقع پلاٹ نمبر GK-3/49 پر مبینہ طور پر غیرقانونی بنیادوں پر بینک کی تعمیر جاری ہے، جو متعلقہ اداروں کی پیشگی منظوری کے بغیر کی جا رہی ہے۔

علاقہ مکینوں اور ذرائع کے مطابق اس تعمیر کے لیے سندھ بلڈنگ کنٹرول اتھارٹی (SBCA) سے کسی قسم کی باضابطہ اجازت یا منظور شدہ نقشہ حاصل نہیں کیا گیا، اس کے باوجود تعمیراتی سرگرمیاں تیزی سے جاری ہیں۔

ذرائع کا یہ بھی الزام ہے کہ SBCA کے افسر عبدالعاصم خان اس غیرقانونی تعمیر میں مبینہ طور پر سہولت کاری کر رہے ہیں، جس کے باعث قانون کی کھلی خلاف ورزی ہو رہی ہے۔ مقامی رہائشیوں کا کہنا ہے کہ اس غیرقانونی تعمیر سے علاقے میں ٹریفک، سیکیورٹی اور دیگر شہری مسائل جنم لے سکتے ہیں۔

شہری حلقوں نے اعلیٰ حکام سے مطالبہ کیا ہے کہ معاملے کی شفاف تحقیقات کر کے ذمہ داران کے خلاف فوری کارروائی کی جائے اور غیرقانونی تعمیر کو فی الفور روکا جائے۔

اس حوالے سے جب SBCA حکام سے مؤقف لینے کی کوشش کی گئی تو تاحال کوئی جواب موصول نہیں ہو سکا۔

کراچی ہیومن رائٹس سوسائیٹی متعلقہ اداروں سے اپیل کرتی ہے کہ اس غیرقانونی کو فلفور روکا جائے اور ملوث افسران کے خلاف محکمہ جاتی کاروائی عمل میں لائی جائے-

#کراچی

21/01/2026

کراچی ہیومن رائٹس سوسائٹی گل پلازہ، کراچی میں پیش آنے والے افسوسناک واقعے پر گہری تشویش اور دکھ کا اظہار کرتی ہے۔ یہ واقعہ نہ صرف شہریوں کے جان و مال کے تحفظ پر سنگین سوالات اٹھاتا ہے بلکہ بنیادی انسانی حقوق کی واضح خلاف ورزی بھی ہے۔

کراچی ہیومن رائٹس سوسائٹی متاثرہ افراد اور ان کے اہلِ خانہ سے دلی ہمدردی اور یکجہتی کا اظہار کرتی ہے اور اس بات پر زور دیتی ہے کہ انسانی جان اور عزت کا تحفظ ریاست کی اولین ذمہ داری ہے۔ ایسے واقعات معاشرے میں عدم تحفظ اور خوف کو فروغ دیتے ہیں، جو کسی صورت قابلِ قبول نہیں۔

سوسائٹی حکومتِ سندھ، قانون نافذ کرنے والے اداروں اور متعلقہ حکام سے مطالبہ کرتی ہے کہ:

گل پلازہ کے واقعے کی فوری، شفاف اور غیر جانبدارانہ تحقیقات کی جائیں

واقعے میں ملوث تمام ذمہ داران کو قانون کے مطابق جوابدہ بنایا جائے

متاثرہ افراد کو فوری انصاف، تحفظ اور قانونی معاونت فراہم کی جائے

مستقبل میں ایسے واقعات کی روک تھام کے لیے موثر اقدامات کیے جائیں

کراچی ہیومن رائٹس سوسائٹی واضح کرتی ہے کہ انسانی حقوق پر کوئی سمجھوتہ نہیں کیا جا سکتا۔ شہریوں کا تحفظ، انصاف کی فراہمی اور قانون کی بالادستی ہر صورت یقینی بنائی جائے۔







#کراچی

18/12/2025

🚨 عوامی حقوق کی کھلی خلاف ورزی — MB ICON میں غیر قانونی ریٹس میں اضافہ 🚨

کراچی ہیومن رائٹس سوسائٹی کی جانب سے شدید تشویش کا اظہار کیا جاتا ہے کہ پروجیکٹ
MB BUILDERS & DEVELOPERSکے بلڈر MB ICON
نے متعلقہ اداروں کی جانب سے منظور شدہ ریٹس کے برخلاف الاٹیوں اور خریداروں سے من مانی اور اضافی رقم وصول کرنا شروع کر دی ہے۔

❌ منظور شدہ نرخوں سے زائد وصولی
❌ بغیر کسی نوٹیفکیشن ریٹس میں اضافہ
❌ عوام کو گمراہ کرنا
❌ شہری و انسانی حقوق کی سنگین پامالی

📜 قوانین کے مطابق کوئی بھی بلڈر متعلقہ اتھارٹی کی منظوری کے بغیر ریٹس میں اضافہ کرنے کا مجاز نہیں۔

📢 کراچی ہیومن رائٹس سوسائٹی مطالبہ کرتی ہے کہ متعلقہ ادارے فوری نوٹس لیتے ہوئے ذمہ داران کے خلاف قانونی کارروائی کریں اور متاثرہ عوام کو انصاف فراہم کیا جائے۔

⚠️ عوام سے اپیل ہے کہ ادائیگی سے قبل منظور شدہ ریٹس اور دستاویزات کی تصدیق ضرور کریں۔

—
Karachi Human Rights Society