04/04/2025
اے گنبدِ خضریٰ کے مکیں وقتِ مدد ھے
اے تاجِ نبوت کے نگیں وقتِ مدد ھے
اے بدرِ اَتم ماہِ مُبیں وقتِ مدد ھے
اے فتح نشاں عرش نشیں وقتِ مدد ھے
اے حَامد و اے اَحمد و مَحمود و مُحمد
اے بادشہہِ دینِ متیں وقتِ مدد ھے
محبوبِ خدا ، بہرِ خدا لائیـے تشریف
لے کر علمِ فتحِ مُبیں وقتِ مدد ھے
ہے اُمتِ مرحومہ تیری بے کس و لاچار
تسکین دہِ قلبِ حزیں وقتِ مدد ھے
نرغے میں شیاطیں کے ہیں شاہا تیرے خُدام
سُلطانِ زماں ، شاہِ زمیں وقتِ مدد ھے
تیار ہے گرنے کو فلک سر پہ ہمارے
آمادہ ہے پھٹنے کو زمیں وقتِ مدد ھے
جینے کا سہارا ہے نہ مرنے کا ٹھکانہ
بـے موت نہ مرجائیں کہیں وقتِ مدد ھے
جز تیرے نہیں کوئی ہمیں پوچھنے والا
ہے دُور فلک تنگ زمیں وقتِ مدد ھے
اوہام پرستوں کی غلامی سے بچالے
اے قبلۂ اربابِ یقیں وقتِ مدد ھے
اے ہادیٔ کل ، فخرِ رُسل صاحبِ معراج
شاہِ دوجہاں سرورِ دیں وقتِ مدد ھے
آقاتیری سرکار میں حاضر ہیں گنہگار
اے اُمتِ عاصی کے مُعیں وقتِ مدد ھے
للہ نگاہِ کرم و جُود و عطا ہو
اے حق کی امانت کے امیں وقتِ مدد ھے
سُن اپنے ولیؔ عاشقِ شوریدہ کی فریاد
"اے گنبدِ خضریٰ کے مکیں وقتِ مدد ھے "
--------------
یَا مُحَمَّدُ یَارَسُولَ اللہِ اَلْمَدَدْ ۔۔۔۔ عَلَیْکَ الصَّلٰوۃُ وَالسَّلَام ْ