17/04/2026
آج مورخہ 17 اپریل 2026 بروز جمعہ، آر بی پاکستان لمیٹڈ کی فیکٹری میں جناب محمد اسد، ڈائریکٹر ایچ آر پاکستان کا سی بی اے عہدیداران کی جانب سے پرتپاک اور شاندار استقبال کیا گیا۔ اس موقع پر انہیں روایتی اجرک اور یادگاری شیلڈ بھی پیش کی گئی۔
اس موقع پر سی بی اے رہنما مختار حسین اعوان نے اپنے خیالات کا اظہار کرتے ہوئے کہا کہ منیجمنٹ کے ساتھ ہمیشہ سے دوستانہ اور مثبت ورکنگ ریلیشن شپ رہی ہے۔ یونین نے ہر مشکل وقت میں ادارے کے ساتھ مل کر مسائل کے حل اور کمپنی کی ترقی کے لیے بھرپور جدوجہد کی ہے۔
انہوں نے مزید کہا کہ جناب محمد اسد کی دوبارہ پاکستان آمد ہمارے لیے باعثِ خوشی اور اعزاز ہے۔ ان کے ساتھ پہلے بھی کام کرنے کا موقع ملا ہے، اور بطور ایچ آر ڈائریکٹر ان کی موجودگی سے انتظامیہ اور مزدوروں کے درمیان روابط مزید مضبوط ہوں گے، جس سے مسائل کے حل میں مزید آسانی پیدا ہوگی۔
مختار حسین اعوان نے اس عزم کا اظہار کیا کہ مزدور برادری اور یونین انتظامیہ کے ساتھ مل کر ٹیم ورک کے جذبے کے تحت مستقبل کے چیلنجز کا مؤثر انداز میں مقابلہ کرے گی اور ادارے و ملازمین دونوں کے لیے بہتر نتائج حاصل کیے جائیں گے۔
اس موقع پر جناب محمد اسد نے مختار حسین اعوان اور یونین قیادت کا شکریہ ادا کرتے ہوئے کہا کہ کووڈ کے مشکل دور میں جس طرح ٹیم ورک کے ذریعے کمپنی کو بحران سے نکالا گیا، وہ قابلِ ستائش ہے۔
انہوں نے کہا کہ آئندہ بھی اسی جذبے کے ساتھ مل کر کام کیا جائے گا تاکہ ادارے کی ترقی اور بہتری کو یقینی بنایا جا سکے۔ انہوں نے مزید کہا کہ باہمی تعاون سے نہ صرف ادارہ مضبوط ہوگا بلکہ ملازمین کو بھی بہتر اور سازگار ماحول فراہم ہوگا۔
آخر میں انتظامیہ اور یونین کی جانب سے ایک دوسرے کا شکریہ ادا کیا گیا اور اس عزم کا اعادہ کیا گیا کہ ادارے کی ترقی کے لیے مشترکہ طور پر کام جاری رکھا جائے گا۔
