15/06/2026
بینظیر بھٹو شہید یونیورسٹی لیاری میں سمر سمسٹر کے حوالے سے طلبہ شدید کنفیوژن اور بے یقینی کا شکار ہیں۔ یونیورسٹی انتظامیہ کی جانب سے یہ مؤقف اختیار کیا جا رہا ہے کہ HEC نے سابقہ پالیسی ختم کر دی ہے، جس کے تحت اب سپلیمنٹری کورسز اور GPA Improvement صرف سمر سمسٹر میں ہی کیے جا سکیں گے۔ دوسری جانب مختلف ذرائع سے یہ بھی کہا جا رہا ہے کہ سمر سمسٹر مکمل طور پر آپشنل ہے۔
اگر واقعی HEC نے پرانی پالیسیاں ختم کر دی ہیں تو یونیورسٹی انتظامیہ اس حوالے سے HEC کی جانب سے جاری کردہ نوٹیفکیشن یا ہدایات طلبہ کے سامنے کیوں نہیں لا رہی؟ اگر HEC کی طرف سے کوئی باضابطہ پالیسی یا نوٹیفکیشن موصول ہوا ہے تو اسے یونیورسٹی کے آفیشل سوشل میڈیا اکاؤنٹس، واٹس ایپ گروپس اور دیگر ذرائع کے ذریعے طلبہ تک پہنچایا جائے تاکہ تمام طلبہ حقائق سے آگاہ ہو سکیں اور افواہوں کا خاتمہ ہو۔
مزید یہ کہ جب طلبہ نے اس مسئلے پر احتجاج کیا تھا تو انتظامیہ کی جانب سے واضح طور پر کہا گیا تھا کہ سمر سمسٹر آپشنل ہوگا۔ اس وقت طلبہ کو یقین دہانی کرائی گئی تھی کہ کسی بھی طالب علم کو سمر سمسٹر لینے پر مجبور نہیں کیا جائے گا۔ بعد ازاں مختلف شعبہ جات کی طرف سے یہ مؤقف سامنے آیا کہ جب ڈپارٹمنٹ آفر کرے گا تب طلبہ پیپر دے سکتے ہے۔
تاہم اب صورتحال اس کے برعکس نظر آ رہی ہے۔ بعض شعبوں میں سمر سمسٹر شروع کر دیا گیا ہے اور طلبہ کو کلاسز میں شرکت کے لیے دباؤ ڈالا جا رہا ہے۔ اگر سمر سمسٹر واقعی آپشنل ہے تو پھر طلبہ کو زبردستی کلاسز لینے یا سمر میں کورسز رجسٹر کروانے پر کیوں مجبور کیا جا رہا ہے؟ اس حوالے سے انتظامیہ کا مؤقف واضح ہونا چاہیے۔
جب طلبہ انتظامیہ یا متعلقہ دفاتر سے رابطہ کرتے ہیں تو انہیں ایک دفتر سے دوسرے دفتر بھیج دیا جاتا ہے، مگر کوئی واضح اور تحریری جواب فراہم نہیں کیا جاتا۔ اس طرزِ عمل سے طلبہ میں مزید بے چینی اور غلط فہمیاں پیدا ہو رہی ہیں۔
لہٰذا یونیورسٹی انتظامیہ سے پُرزور مطالبہ ہے کہ سمر سمسٹر، سپلیمنٹری کورسز اور GPA Improvement سے متعلق تمام پالیسیوں کی فوری، واضح اور باضابطہ وضاحت نوٹیفکیشن کی صورت میں جاری کی جائے۔ اگر HEC نے سابقہ پالیسیوں میں کوئی تبدیلی کی ہے تو اس کے سرکاری ثبوت اور نوٹیفکیشن بھی طلبہ کے سامنے رکھے جائیں تاکہ ہر طالب علم درست معلومات کی بنیاد پر اپنی تعلیمی منصوبہ بندی کر سکے۔
شفافیت، بروقت معلومات اور واضح پالیسی طلبہ کا حق ہے، اور انہیں فراہم کرنا یونیورسٹی انتظامیہ کی ذمہ داری ہے۔
