29/07/2026
حق اور انصاف کی خاطر ہماری آواز بلند کرنے پر ہم آپ کے ممنون ہیں 🍁🚩
پریس ریلیز
گلگت بلتستان اسٹوڈنٹس کونسل (GBSC) کا کشمیر میں حالیہ واقعات پر اظہارِ مذمت، افسوس اور یکجہتی
گلگت بلتستان اسٹوڈنٹس کونسل (GBSC) پاکستان کے زیرِ انتظام کشمیر میں حالیہ پیش آنے والے افسوسناک واقعات، پرامن احتجاج کے دوران قیمتی انسانی جانوں کے ضیاع، متعدد افراد کے زخمی ہونے اور عوام کو درپیش مشکلات پر گہرے دکھ، افسوس اور تشویش کا اظہار کرتی ہے۔
گلگت بلتستان سٹوڈنٹس کونسل جاں بحق افراد کے لواحقین سے دلی تعزیت اور ہمدردی کا اظہار کرتے ہوئے دعا گو ہے کہ اللہ تعالیٰ مرحومین کی کامل مغفرت فرمائے، ان کے درجات بلند کرے، زخمیوں کو جلد صحتِ کاملہ عطا فرمائے اور متاثرہ خاندانوں کو صبرِ جمیل اور استقامت نصیب فرمائے۔
گلگت بلتستان اسٹوڈنٹس کونسل اس اصول پر یقین رکھتی ہے کہ آئینِ پاکستان ہر شہری کو پرامن احتجاج، آزادیٔ اظہارِ رائے اور اپنے جائز حقوق کے حصول کے لیے آواز بلند کرنے کا حق دیتا ہے۔ اس لیے تمام متعلقہ اداروں کی ذمہ داری ہے کہ وہ عوام کے جان و مال، عزت، وقار اور بنیادی انسانی حقوق کے تحفظ کو ہر صورت یقینی بنائیں اور ایسے اقدامات سے گریز کریں جن سے مزید کشیدگی، بداعتمادی یا انسانی جانوں کے نقصان کا اندیشہ ہو۔
جی بی ایس سی حکومتِ پاکستان، حکومتِ آزاد جموں و کشمیر اور تمام متعلقہ اداروں سے مطالبہ کرتی ہے کہ حالیہ واقعات کی شفاف، غیر جانبدار اور بروقت تحقیقات کرائی جائیں، ذمہ دار عناصر کا قانون کے مطابق تعین کیا جائے، متاثرہ خاندانوں کو فوری انصاف اور مناسب معاوضہ فراہم کیا جائے، جبکہ زخمیوں کو بہترین طبی سہولیات اور متاثرہ علاقوں میں فوری امدادی اقدامات کو یقینی بنایا جائے۔
کونسل اس امر پر بھی زور دیتی ہے کہ موجودہ صورتحال کا پائیدار حل صرف آئین و قانون کی پاسداری، جمہوری اقدار، بامعنی مذاکرات اور عوامی اعتماد کی بحالی کے ذریعے ہی ممکن ہے۔ تمام متعلقہ فریقین کو تحمل، بردباری اور ذمہ داری کا مظاہرہ کرتے ہوئے ایسے فیصلے کرنے چاہییں جو عوام کے وسیع تر مفاد، قومی یکجہتی اور خطے میں امن و استحکام کو فروغ دیں۔
گلگت بلتستان اسٹوڈنٹس کونسل اس مشکل گھڑی میں اپنے کشمیری بھائیوں اور بہنوں کے ساتھ مکمل یکجہتی کا اظہار کرتی ہے اور اس عزم کا اعادہ کرتی ہے کہ انسانی جان، انصاف، آئین کی بالادستی اور بنیادی حقوق کا تحفظ ہر مہذب معاشرے کی مشترکہ ذمہ داری ہے۔
آخر میں ہم دعا گو ہیں کہ اللہ تعالیٰ پاکستان، بالخصوص کشمیر اور گلگت بلتستان سمیت ملک بھر میں امن، استحکام، انصاف، بھائی چارے اور خوشحالی قائم فرمائے، شہداء کے درجات بلند فرمائے، زخمیوں کو شفائے کاملہ عطا کرے اور وطنِ عزیز کو ہر قسم کے انتشار اور آزمائش سے محفوظ رکھے۔
جاری کردہ:
سیکرٹری اطلاعات
گلگت بلتستان اسٹوڈنٹس کونسل وفاقی اردو یونیورسٹی اسلام آباد
