29/03/2026
خبرِ غم: گلگت بلتستان کے نامور مؤرخ و براڈکاسٹر اور علمی و ثقافتی حلقوں کے ایک معتبر نام وزیر حمایت حسین انتقال کر گئے۔ مرحوم گزشتہ کئی سالوں سے پھیپھڑوں کے عارضے میں مبتلا تھے اور اس دوران راولپنڈی میں مقیم رہے۔ آج رات وہ راولپنڈی میں وفات پا گئے۔
وزیر حمایت حسین نے اپنے علمی کیریئر کا آغاز اُستاد کے طور پر کیا، مگر جلد ہی براڈکاسٹنگ کو اپنی زندگی کا مقصد بنا لیا۔ وہ ریڈیو پاکستان کے مختلف اسٹیشنز سے وابستہ رہے اور پروڈیوسر، سینیئر پروڈیوسر، پروگرام مینیجر، ڈپٹی کنٹرولر اور بالآخر سکردو اسٹیشن کے ڈائریکٹر کے عہدے تک پہنچے۔
اپنے کیریئر میں اُنہوں نے تحقیقی دستاویزی پروگرامز تیار کیے اور ملک کے اہم شخصیات کے انٹرویوز کیے۔ جنگِ آزادی کے بہادر غازیان کے انٹرویوز ریڈیو پر "غازیانِ صف شکن" کے نام سے پیش کیے جاتے رہے۔ ریڈیو سے نشر ہونے والا ان کا پروگرام "قراقرم کی وادیوں میں" ملکی سطح پر بےحد مقبول ہوا۔
ریٹائرمنٹ کے بعد بھی وزیر حمایت حسین تحقیق اور تالیف میں سرگرم رہے۔ ان کی پہلی تصنیف "بلتستان کے تاریخی ورثے" کے نام سے شائع ہوئی اور وہ دو مزید کتابوں کی تحقیق و تالیف میں مصروف تھے۔ مرحوم گلگت بلتستان کی ثقافت، ادب اور موسیقی پر عبور رکھتے تھے۔
مرحوم کی میت آج صبح 7 بجے راولپنڈی سے سکردو روانہ کر دی گئی ہے۔ نماز جنازہ اور تدفین کے اوقات کا اعلان بعد میں ہوگا۔
بشکریہ : سیاچن ٹائمز
