23/08/2026
تھانہ روشن والا پولیس کی بڑی کامیابی، دوست کے ہاتھوں دوست کے قتل کا مرکزی ملزم گرفتار
فیصل آباد: تھانہ روشن والا پولیس نے اندھے قتل کے ایک اہم مقدمے کا سراغ لگا کر بڑی کامیابی حاصل کرلی۔ پولیس نے دوست کے ہاتھوں قتل ہونے والے علی ریحان کے قتل میں مبینہ طور پر ملوث مرکزی ملزم نعیم عرف بگا کو گرفتار کرلیا۔
سی پی او فیصل آباد تنویر حسین کی ہدایات پر ایس پی اقبال ڈویژن سعید احمد کی نگرانی و سربراہی میں ایس ایچ او تھانہ روشن والا رائے شاہد پرویز نے اپنی ٹیم کے ہمراہ دن رات محنت کرتے ہوئے جدید ٹیکنیکل ذرائع، شواہد اور پیشہ ورانہ تفتیشی صلاحیتوں کو بروئے کار لایا اور بالآخر مرکزی ملزم تک رسائی حاصل کرکے اسے گرفتار کرلیا۔
پولیس رپورٹ کے مطابق مقتول علی ریحان کو فائرنگ کرکے قتل کیا گیا تھا، جس کے بعد تھانہ روشن والا پولیس نے مقدمہ درج کرکے ملزم کی گرفتاری کے لیے تفتیش کا آغاز کیا۔ ایس ایچ او رائے شاہد پرویز کی قیادت میں پولیس ٹیم نے انتھک محنت اور جدید تفتیشی طریقہ کار کے ذریعے قتل کے مرکزی ملزم کو قانون کی گرفت میں لے لیا۔
یہ کارروائی تھانہ روشن والا پولیس کی پیشہ ورانہ مہارت، بہترین تفتیش اور بروقت کارروائی کا واضح ثبوت قرار دی جا رہی ہے۔ قتل جیسے سنگین مقدمے میں مرکزی ملزم کی گرفتاری پولیس کی ایک بڑی کامیابی ہے۔
پولیس حکام کے مطابق ملزم سے مزید تفتیش جاری ہے، جس کے دوران قتل کے اصل محرکات، واردات کے دیگر پہلوؤں اور اہم شواہد کے حوالے سے مزید معلومات سامنے آنے کی توقع ہے۔
سی پی او فیصل آباد تنویر حسین اور ایس پی اقبال ڈویژن سعید احمد نے تھانہ روشن والا پولیس کی اس کامیاب کارروائی پر ایس ایچ او رائے شاہد پرویز اور ان کی پوری ٹیم کو شاباش دی ہے جبکہ بہترین کارکردگی پر نقد انعام اور تعریفی اسناد دینے کا بھی اعلان کیا گیا ہے۔
شہری حلقوں نے ایس پی اقبال ڈویژن سعید احمد کی نگرانی میں تھانہ روشن والا پولیس کی اس کامیاب کارروائی اور ایس ایچ او رائے شاہد پرویز کی پیشہ ورانہ کارکردگی کو سراہتے ہوئے کہا ہے کہ مرکزی ملزم کی گرفتاری پولیس کی بروقت، مؤثر اور انتھک تفتیش کا نتیجہ ہے۔
ایس ایچ او رائے شاہد پرویز کا کہنا ہے کہ جرائم پیشہ عناصر کے خلاف بلاامتیاز کارروائیاں جاری رہیں گی اور شہریوں کے جان و مال کے تحفظ کے لیے تمام دستیاب وسائل بروئے کار لائے جائیں گے۔
