18/05/2026
**مدرسہ جواہر القرآن ناغہ رباط میں الفجر ٹرسٹ کے زیرِ اہتمام شاندار "تدریب المعلمین ورکشاپ" کا انعقاد**
**ناغہ رباط (رپورٹ: خالد محمود عامر):** الفجر ٹرسٹ لتعلیم القرآن کے زیرِ نگرانی مدرسہ جواہر القرآن ناغہ رباط میں گزشتہ روز (17 مئی، بروز اتوار) ایک روزہ "تدریب المعلمین ورکشاپ" کا کامیاب انعقاد کیا گیا۔ ورکشاپ کا آغاز قاری نور اللہ صاحب کی تلاوتِ کلامِ پاک سے ہوا۔
تقریب کے پہلے سیشن سے خطاب کرتے ہوئے صدرِ ٹرسٹ مولانا قاری معاذ اللہ صاحب نے تعلیم و تعلم کی اہمیت پر روشنی ڈالی۔ انہوں نے کہا کہ بچوں کی تعلیم میں سب سے اہم چیز بنیاد ہے، جو مضبوط بھی ہونی چاہیے اور مخفی بھی۔ انہوں نے حضرت تھانوی رحمہ اللہ کے حوالے سے بتایا کہ تصحیحِ قرآن، تعظیمِ قرآن اور تعظیمِ حاملِ قرآن کامیابی کے لیے لازمی ہیں۔ انہوں نے استاد اور شاگرد کا فرق واضح کرتے ہوئے کہا کہ استاد وہ ہے جو طالب علم کو اس کے اصل مقصد پر لگا دے۔ انہوں نے زور دیا کہ مدارس میں خود ساختہ نظام کے بجائے نبوی نظامِ تعلیم نافذ ہونا چاہیے، جہاں نصاب قدیم ہو مگر طریقہِ تدریس جدید ہو۔
تفریح کے وقفے کے بعد مدارس کی کمزوریوں اور "وژن کی کمی" پر تفصیلی گفتگو ہوئی۔ قاری معاذ اللہ صاحب نے سیرتِ نبوی سے عکاظ کے میلے اور سراقہ بن مالک کے واقعات سے وژن کی اہمیت ثابت کی۔ انہوں نے وژن کے فوائد بتاتے ہوئے کہا کہ اس سے کم وقت میں زیادہ کام، دلی اطمینان اور کام میں ترقی حاصل ہوتی ہے۔ انہوں نے اساتذہ کو قاعدہ، ناظرہ اور حفظ پڑھانے کے جدید و نبوی طریقوں سے بھی روشناس کرایا۔
ورکشاپ کے آخری سیشن میں سرپرستِ ٹرسٹ حضرت مولانا قاری نصیب اللہ منیر صاحب نے "طلبہ کے ساتھ استاد کا رویہ" اور حضرت مولانا مفتی شفیع اللہ صاحب نے "طلبہ کی تربیت" کے عنوان پر فکر انگیز خطابات کیے۔ پروگرام کا اختتام رقت آمیز دعا پر ہوا۔
علاقے کی علمی و عوامی حلقوں نے اس کامیاب ورکشاپ کے انعقاد پر صدرِ ٹرسٹ اور تمام اراکین کو مبارکباد پیش کرتے ہوئے ان کی خدمات کو دلی طور پر سراہا ہے۔
