08/08/2026
ایک گزارش، ایک امید — رکھ جملیرا جنگل کے نام 🌿
کمشنر ملتان ڈویژن عامر کریم خاں کا وہاڑی ملتان روڈ کا دورہ، شجرکاری مہم کا افتتاح، پودوں کی دیکھ بھال اور بروقت پانی کی فراہمی کی ہدایات یقیناً خوش آئند اور قابلِ تحسین اقدامات ہیں۔ اسی طرح کمشنر صاحب نے بورے والا میں جاری ورلڈ بینک کے منصوبے کے متعدد کاموں کا بھی جائزہ لیا اور متعلقہ افسران کو ضروری ہدایات جاری کیں۔
یہ سب اقدامات اس بات کی امید دلاتے ہیں کہ انتظامیہ علاقے کی ترقی اور ماحول کی بہتری کے لیے سنجیدہ ہے۔
لیکن ایک گزارش ہے۔
جب کمشنر ملتان ڈویژن، ڈپٹی کمشنر وہاڑی، سیکرٹری جنگلات جنوبی پنجاب اور محکمہ جنگلات کے افسران ایک ہی علاقے میں موجود ہوں تو دل چاہتا ہے کہ رکھ جملیرا جنگل بھی ان کی ترجیحات میں شامل ہو۔
کاش اسی دورے کے دوران رکھ جملیرا جنگل کا بھی مختصر سا دورہ ہو جاتا، وہاں کی صورتحال اپنی آنکھوں سے دیکھی جاتی اور اس کی بحالی، شجرکاری، پانی، بجلی، ٹیوب ویل اور جنگلاتی عملے کو ضروری وسائل فراہم کرنے کے حوالے سے بھی عملی احکامات جاری ہوتے۔
یہ وہی جنگل ہے جس کی موجودہ صورتحال کے بارے میں متعلقہ حکام کو متعدد مرتبہ خطوط کے ذریعے آگاہ کیا جا چکا ہے اور اس کی حفاظت و بحالی کے لیے توجہ کی درخواست کی گئی ہے۔
ہم کسی ادارے یا شخصیت کے خلاف نہیں۔ ہم تو صرف یہ چاہتے ہیں کہ جہاں شجرکاری ہو رہی ہے، وہاں ضرور ہو؛ لیکن جہاں جنگل اجڑ چکا ہے، وہاں بھی دوبارہ سبزہ لوٹانے کی سنجیدہ کوشش ہو۔
اور سچ کہیے تو اگر سڑک کنارے شجرکاری کے اس خوبصورت منظر کے ساتھ رکھ جملیرا جنگل میں بھی ایک ایسا ہی فوٹو سیشن ہوتا—جہاں کمشنر صاحب، ڈپٹی کمشنر صاحب، سیکرٹری جنگلات اور محکمہ جنگلات کے افسران اجڑے ہوئے جنگل میں ایک پودا لگاتے اور اس کی بحالی کے احکامات جاری کرتے—تو یہ تصویر صرف ایک یادگار تصویر نہ ہوتی، بلکہ اہلِ علاقہ کے لیے امید اور عملی تبدیلی کی ایک خوبصورت علامت بن جاتی۔
فوٹو سیشن اپنی جگہ، تصاویر بھی ضروری ہیں، مگر اصل خوبصورتی اس وقت ہوگی جب ان تصاویر کے ساتھ عملی کام بھی نظر آئے؛ جب رکھ جملیرا کے اجڑے ہوئے حصوں میں دوبارہ پودے لگیں، موجود درخت محفوظ ہوں، ٹیوب ویل چلیں، عملے کو وسائل ملیں اور کچھ عرصے بعد یہی ویران زمین دوبارہ سرسبز دکھائی دے۔
ہماری گزارش صرف اتنی ہے کہ رکھ جملیرا جنگل کو بھی وہی توجہ ملے جس کا وہ حق دار ہے۔
کاش اگلا دورہ رکھ جملیرا جنگل کا ہو، اگلا فوٹو سیشن وہاں ہو، اور اگلی خبر اس جنگل کی بحالی کے عملی آغاز کی ہو۔
رکھ جملیرا جنگل — ہماری مشترکہ امانت، ہماری مشترکہ ذمہ داری ہے ۔
