30/08/2025
Ika-29 ng Agosto 2025, muling umalab ang diwa ng pagiging Pilipino sa Mataas na Paaralang Pambansa ng Lalig nang ipagdiwang ang Buwan ng Wika na may temang “Paglinang sa Filipino at Katutubong Wika: Makasaysayan sa Pagkakaisa ng Bansa.”
Sa saliw ng masiglang tugtugin ng Lalig Drum and Lyre Corps, marangal na nagsimula ang pagdiriwang sa pamamagitan ng makulay na parada ng mga mag-aaral na nakabihis ng mga makukulay na kasuotang Pilipino. Kasama nila ang mga g**o na nagsilbing huwaran ng karunungan at dangal, maririkit ang mga ngiti at marubdob ang diwa ng pagkakaisa.
Bilang pagbubukas, nagbigay ng makabuluhang mensahe si Bb. Krystal Andal, na nagpaalala sa kahalagahan ng ating wika bilang haligi ng kultura at pagkakakilanlan. Sinundan ito ng pagbibigay-parangal sa mga nagwagi sa naunang mga paligsahan gaya ng paglikha ng poster at paglikha slogan.
Higit pang nagningning ang selebrasyon nang ipamalas ng mga mag-aaral ang kani-kanilang husay at talento sa interpretatibong pagbasa, masiglang sayaw, at makabagbag-damdaming pagtula. Kaagad na iginawad ang tropeo at medalya sa mga nagtagumpay, kasabay ng koronasyon sa mga napiling Lakan at Lakambini ng Wika, na kumakatawan sa ganda, talino, at dangal ng kabataang Pilipino.
Hindi lamang sa sining at talino umikot ang pagdiriwang, sapagkat sa hapon ay naging mas masigla ito sa pamamagitan ng mga palarong lahi tulad ng sack race, pukpok palayok, at Pinoy Henyo, mga larong nagpapaalala ng halakhak at samahan sa kulturang Pilipino.
Sa bawat ngiti at sigaw ng tuwa, dama ang walang kapantay na galak ng mga g**o at mag-aaral. Bilang pangwakas, nagbigay ng taos-pusong pasasalamat si G. Adelo G. Magnaye sa lahat ng mag-aaral, g**o, at kawani ng barangay na naging katuwang sa matagumpay na pagdiriwang.
At sa huli, nag-iwan ng isang makapangyarihang paalala ang buong pagdiriwang:
“Sa wika, may pagkakaisa; sa pagkakaisa, may pag-unlad.”
✍️: Angelica Mae K. Mote
🎨: Eljay O. Glorioso
📸: Jenna Claire R. Manalo at Angela Teñoso
