30/01/2026
“Lord, inaamin kong wala akong alam sa maraming bagay... Ang mayroon lang ako ay ang biyaya mo.”
Ang panalanging ito ay isang deklarasyon ng kababaang-loob. Kapag inaamin natin sa Diyos na hindi natin kontrolado ang lahat at hindi natin alam ang lahat ng mangyayari, doon nagsisimula ang tunay na pagtitiwala. Hindi hinahanap ng Panginoon ang taong perpekto, hinahanap Niya ang pusong marunong umasa sa Kanya.
Madalas iniisip natin na kailangan muna nating maging sapat, matalino, o handa bago tayo gamitin ng Diyos. Pero ang totoo, ang biyaya Niya ang nagiging sapat para sa atin. Sa ating kahinaan, mas nakikita ang lakas Niya. Sa ating kakulangan, mas lumalabas ang Kanyang provision.
Kung may mga bagay ngayon na hindi mo maintindihan, tandaan mo ito:
Hindi mo kailangang malaman ang lahat, kailangan mo lang hawakan ang biyaya ng Diyos. Dahil ang biyaya Niya kahapon ay sapat, ang biyaya Niya ngayon ay sapat, at ang biyaya Niya bukas ay hindi mauubos.
Minsan, ang pinaka-matapang na pananampalataya ay ang simpleng pagsasabi:
“Panginoon, hindi ko alam… pero nagtitiwala ako sa Iyo.”
2 Corinthians 12:9
"My grace is sufficient for you, for My power is made perfect in weakness."
Prayer:
Lord, turuan Mo akong magtiwala hindi sa sarili kong kakayahan kundi sa biyaya Mo. Kapag ako ay mahina, ipaalala Mo na Ikaw ang aking lakas. Amen!
