23/11/2025
As we go through these dark times because of corruption, injustice, and lies, let us all pray 𝐭𝐡𝐞 𝐇𝐨𝐥𝐲 𝐑𝐨𝐬𝐚𝐫𝐲, for we draw near to our Almighty God and to our Mother Mary.
Today, as we celebrate the Solemnity of Our Lord Jesus Christ, King of the Universe, may we be reminded of what He has done for us—His sacrifice, His truth, His mercy, and His victory over all darkness. May Christ our King remind us that no darkness can ever overcome His light.
PAHAYAG SA DIYOSESIS SA DUMAGUETE MAHITUNGOD SA KASAMTANGANG KRISIS MORAL UG ESPIRITUHANON SA PILIPINAS
Niining panahon sa pagsulay nga nasinati sa atong nasod karon, kita, nga mga Katawhan sa Diyos sa Diyosesis sa Dumaguete, nagpadayag sa atong tingog uban sa kabalaka ug paglaom. Ang Pilipinas nag-atubang sa usa ka lalom nga moral ug espirituhanon nga krisis nga dayag diha sa korapsyon, kawalay pagsalig sa gobyerno, ug nagkadako nga impluwensya sa pagpanglimbong sa atong katilingban.
Tungod sa hilabihang baha sa impormasyon—ilabi na pinaagi sa social media – daghan sa atong katawhan ang naglisod sa pag-ila sa unsay tinuod gikan sa bakak. Kini nga kalibog makapahuyang sa atong moral nga baruganan ug magdala kanato ngadto sa dugang pagkabahinbahin. Kinahanglan bantayan nato ang atong mga kasingkasing ug hunahuna aron dili kita malipat o manipulahon sa mga bakak nga maoy makaguba sa kaayohan sa atong katilingban. Gidasig nato ang atong mga kaigsuonan nga magmanggialamon, magmasinabuton ug ilhon ang atong madawat ug ipaambit nga impormasyon. Ang kultura sa bakak nagdaot sa atong pag-ila kung unsa ang matarung ug maayo; busa, atong Kristohanong obligasyon ang pagsusi sa atong madungog, paggamit sa kasaligang tinubdan sa impormasyon, ug pagdumili sa pagpakaylap sa sayop nga impormasyon. Sundon nato ang kamatuoran nga nakagamot sa Ebanghelyo, nga maoy atong dili matarog nga sukdanan.
Taliwala niining kasamtangang mga tensiyon, angay natong hinumduman nga ang emosyon kinahanglang dili maghalap sa atong pangatarungan. Hugot natong isalikway ang bisan unsang lakang sa pagbiya sa proseso sa konstitusyon o pagsulbad sa panagbangi sa paagi nga dili legal o dili moagi sa korte. Ang atong suporta kinahanglan magdapig sa atong nasud ug pinasubay sa demokratikanhong mga mithi—dili sa mga indibidwal, mga paksyon, o mga interesadong grupo nga nagtinguha pag-angkon ug gahom.
Niining mahinungdanong higayon, atong pilion ang pagsuporta ug pagpakighiusa sa tanan nga nag-alagad ug nagtuman sa Konstitusyon. Atong barugan ang pagpanalipod sa mga demokratikong institusyon, ang katumanan sa balaod, ug ang katungod sa matag Filipino. Nanawagan kita sa tanang mga opisyal ug mga kawani sa gobyerno nga magmatinud-anon sa ilang sagradong panumpa sa husto nga pagpangalagad sa nasud. Nangayo kita sa usa ka matinud-anon nga proseso sa imbestigasyon, ug ang pagpaningil sa mga mamatud-an nga nahilambigit sa korapsyon bisan unsa pay ilang politikal nga mga kolor o koneksyon. Ang atong pagbarug sa Konstitusyon—dili sa bisan unsang personal o politikanhong tumong—mao ang gikinahanglan alang sa pagpatunhay sa kalinaw, kahusay, ug panaghiusa nga pinasukad sa hustisya.
Sa katapusan, duyog sa tibuok Simbahan sa Pilipinas, kita maghiusa sa walay hunong nga pag-ampo alang sa pagbag-o ug pagpalambo sa nasud. Ang atong mga suliran sa katilingban nagkinahanglan, dili lamang sa politikanhon nga solusyon, kon dili, labaw sa tanan, nagkinahanglan sa lalom nga espirituhanong pagbag-o sulod sa tagsa-tagsa kanato ug sa atong mga institusyon. Pinaagi lamang sa pagbag-o sa kasingkasing nga molambo ang katarong, kaligdong, kamatuoran, ug hustisya. Ang atong nasud gitabonan sa kangitngit tungod sa pagpangilad ug korapsyon. Tungod niini mag-ampo kita sa Dios nga ipadan-ag niya ang Iyang kahayag nga magwagtang sa tanang kangitngit.
Busa, atong panawagan sa tanang Parokya, mga eskwelahan, mga Covenanted Communities ug mga Renewal Movements sa Diyosesis sa Dumaguete nga pahingusgan ang pag-ampo alang sa atong nasud. Mag-ampo kita atubangan sa Labing Balaan nga Sakramento ni Hesus. Adlaw-adlaw kitang mag-ampo sa Santos nga Rosaryo ug magpahigayon sa regular nga Holy Hour alang sa kalinaw ug kamatuoran. Atong iampo ang malinawon ug legal nga proseso sa pagsulbad sa panagbangi nga giatubang karon sa atong nasud. Hinaot unta nga si Kristong Hari—Ginoo sa kamatuoran, hustisya, kaangayan ug kalinaw—maggiya sa atong mga kapangulohan, maglig-on sa atong katilingban, ug magtultol sa atong nasud ngadto sa dalan sa pagkahiusa, kalinaw, ug kalamboan.
Kristong Hari, maghari ka sa among nasud!
Sincerely in Christ,
MOST REV. JULITO B. CORTES, D.D.
Bishop of Dumaguete
