https://www.facebook.com/227220210477521/

Kumpas ng Kamay, Tagum City (2026)

27/02/2024

Sa mga minamahalnamingmambabasa.

Nais naming iparating ang aming taos-pusong pasasalamat sa inyong lahat. Hindi sapat ang mga salitang ito upang maipahayag ang aming lubos na kagalakan sa inyong walang sawang suporta at pagtangkilik sa lahating aming sinusulat.

Ang inyong pagtutok sa bawat kumpas ng aming akda ay nagsisilbing inspirasyon sa amin na patuloy na magbahaging kaalaman, magbigay ng kamalayan, at manguna sa mga hakbang tungo sapangangalaga sa kalikasan.

Ngayong araw man nagtatapos ang pahinang ito, sana y ipagpatuloy niyo pa rin ang ating adbokasiya para sa kalikasan.

Nagmamahal,

KumpasngKamay

23/02/2024

𝙐𝙨𝙤𝙠 𝙣𝙜 𝙆𝙖𝙥𝙖𝙗𝙖𝙮𝙖𝙖𝙣

Ang patuloy na pagtaas ng antas ng polusyon sa hangin sa pilipinas ay isang malubhang suliranin na nagdudulot ng malawakang epekto at seryosong banta hindi lamang sa kalikasan kundi pati na rin sa buhay at kabuhayan ng mga Filipino.

Ayon sa ulat ng World Health Organization WHO, ang Metro Manila ay isa sa mga lungsod na may pinakamalalang polusyon sa hangin sa buong mundo. Sa Karagdagan,
Ayon sa Department of Health (DOH), 120,000 Pilipino bawat taon ang namamatay dahil sa pagkalanghap ng hangin na may lason. Ayon pa sa report, pangtatlo ang Pilipinas sa mga bansa sa Asia na maraming namamatay sa air pollution. Nangunguna ang China sunod ang Mongolia.

Upang masolusyonan at mabigyan ng agarang pansin ang suliranin ng air polusyon sa Pilipinas, nagpatupad ang DENR ng Republic Act 8749 o kilala rin sa tawag na Philippine Clean Air Act of 1999, na isang polisiya at programa na layuning mapanatili ang malinis na hangin para sa mga Filipino at mapababa ang masamang epekto ng air pollution sa ekonomiya ng bansa. Sa pamamagitan ng pagtutulungan ng gobyerno, pribadong sektor, at lokal na komunidad, maaari nating magawa ang mga hakbang upang bawasan ang polusyon sa hangin at protektahan ang kalikasan at kalusugan ng mga Filipino. Sa pagpapatupad ng mga patakaran at programa para sa malinis na enerhiya, mas maiging pamamahala ng basura, at iba pang mga hakbang, magkakaroon tayo ng mas ligtas at mas malusog na kapaligiran para sa kasalukuyan at hinaharap.

21/02/2024

𝙃𝙪𝙣𝙞 𝙣𝙜 𝙆𝙖𝙧𝙖𝙜𝙖𝙩𝙖𝙣

Isipin mo ang malinis na dalampasigan ng El Nido at ang makukulay na coral reef sa Apo Island. Ang mga nabanggit ay iilan lamang sa mga magagandang likas na yaman ng Pilipinas. Subalit, paano mapapanatili ang kagandahan nito kung patuloy na nagaganap ang polusyon sa tubig?

Ang polusyon sa tubig ay isang isyu na nagdudulot ng malawakang pinsala sa ating kapaligiran at kalusugan. Sa kabila ng mga pagsisikap na magpatupad ng mga regulasyon at batas bilang solusyon, patuloy pa rin itong nagiging hamon na kailangang agarang tugunan. Sa pagsasaalang-alang nito, mahalagang unawain ang malubhang epekto nito sa ating kalikasan at kalusugan.

Una, isa sa mga pangunahing ebidensya ng polusyon sa tubig ay ang pagtaas ng bilang ng mga kemikal at basura na natatagpuan sa mga yamang tubig. Ayon sa ulat ng World Health Organization (WHO), ang pagdami ng mga kemikal tulad ng mga fertilizer, pesticide, at iba pang industrial chemicals sa mga ilog, lawa, at karagatan ay nagreresulta sa pagkawala ng mga uri ng isda at iba pang mga halaman sa tubig. Dahil dito, ang mga mamamayang nakasalalay sa nasabing likas na yaman ay mawawalan ng hanapbuhay o pinagkukunan ng kita.

Pangalawa, ang negatibong epekto nito sa ating kalusugan. Ayon sa Environmental Protection Agency (EPA), ang kontaminadong tubig ay maaaring magdulot ng iba't ibang mga sakit tulad ng cholera, diarrhea, typhoid, at iba pang mga waterborne diseases. Bukod dito, ang pagdami ng mga kemikal tulad ng mga heavy metals at mga organic pollutants ay maaaring magdulot ng mga sakit sa atay, bato, at iba pang mga organo sa katawan.

Sa kabuuan, mahalaga ang pagkilos upang labanan ang polusyon sa tubig. Dapat magkaroon ng mas matinding regulasyon at pagpapatupad sa pagtatapon ng mga kemikal mula sa mga iba’t ibang industriya o sektor. Bukod pa rito, kinakailangang magkaroon ng sapat na kaalaman ang bawat indibidwal at magkaroon ng kamalayan ang publiko hinggil sa kahalagahan ng pangangalaga sa ating mga likas na yaman. Sa ganitong paraan, mapapanatili natin ang kagandahan ng ating mga karagatan, maging ang kalusugan ng mga mamamayan.

19/02/2024

𝙏𝙖𝙬𝙖𝙜 𝙣𝙜 𝘼𝙠𝙨𝙮𝙤𝙣

Ang global warming ay hindi lamang isang malayong banta – ito ay nangyayari na ngayon, at kailangan nating kumilos agad. Ayon sa National Aeronautics and Space Administration o NASA, ang average na temperatura ng mundo ay umakyat ng mga 1.1 degree Celsius mula noong 1880. Ang pag-angat na ito ay nagreresulta sa mas mga matinding El Niño, mas mainit na mga karagatan, at mas nakapipinsalang mga bagyo tulad na lamang ng Super Bagyong Yolanda o Super Typhoon Haiyan, na itinalang pinakamalalang bagyo na tumama sa Pilipinas, na siyang kumitil sa mahigit anim na libong mamamayan at mga pinsalamang nagkakahalaga ng 95.5 bilyong piso.

Ang ebidensya ay malinaw: tunay ang pagbabago ng klima, at ang mga epekto nito ay nararamdaman na. Bukod sa pagtaas ng global na temperatura, ang pagkatunaw ng mga glacier na siyang nagbibigay ng banta sa pagtaas ng lebel ng karagatan, na siya ring nagbabanta sa mga komunidad sa baybayin at sa biodiversity. Ang mga ekstremong kaganapan sa panahon, mula sa mga bagyo hanggang sa mga sunog sa gubat, ay nagiging mas madalas at mas matindi, na nagdudulot ng pinsala sa mga tahanan, kabuhayan, at natural na tirahan.

Ang pagwawalang-bahala sa katotohanang ito ay hindi na opsyon. Kailangan nating agaran at kolektibong kumilos. Dapat bigyang-prayoridad ng mga pamahalaan ang mga mapagkukunan ng renewable energy tulad ng solar at wind, mamuhunan sa matibay na imprastruktura laban sa klima, at pamahalaan ng maayos ang industriya at korporasyon na siyang pangunahing nagpapakalat ng polusyon. Tayong mga simpleng indibidwal ay maaaring magsiklab din ng pagbabago, sa pamamagitan ng mga paggamit ng pampublikong transportasyon, pagtitipid ng enerhiya, at pagsuporta sa mga pananagutan na gawaing pang-kinabukasan.

Tandaan, bawat aksyon, gaano man kaliit, ay nag-aambag sa mas malaking alon ng pagbabago. Sumabay tayo sa alon ng pagbabago bago pa maging huli ang lahat.

18/02/2024

𝘽𝙖𝙨𝙪𝙧𝙖 𝙈𝙤, 𝙍𝙚𝙨𝙞𝙠𝙡𝙤 𝙈𝙤

Dahil sa patuloy na pagtaas ng populasyon at sa lumalalang suliranin ng polusyon sa ating kapaligiran, mahalaga na bigyan natin ng pansin ang papel ng pagre-resiklo sa pagtataguyod ng isang mas malinis at maayos na mundo. Hindi man natin tuluyang mareresolba ang problema sa basura, kaya naman natin itong mabawasan sa pamamagitan ng pagre-resiklo.

Ang patuloy na pagreresiklo ay may malaking epekto sa pagpapabuti ng kalidad ng hangin, tubig, at lupa. Sa halip na sunugin ang mga basura o itapon ito sa kung saan, maaari itong gamitin muli sa paggawa ng mga bagong produkto, na siyang makakatulong sa pagbawas ng ating pangangailangan sa mga likas na yaman. Halimbawa, ang paggamit ng recycled na papel ay nakakatulong sa pagpigil deforestation, habang ang pag-recycle ng plastik ay nakakatulong sa pagpigil sa paglala ng polusyon.

Ngunit sa kabila ng mga benepisyo ng pagre-resiklo, ang Pilipinas ay mayroong mababang porsiyento ng pagresiklo ng mga materyales. Batay sa isang pagsasaliksik ng World Bank, nasa 28 porsiyento lamang ng mga recyclable na materyales ang nire-recycle sa Pilipinas. kung saan ito ay malalim na suliranin sa pamamahala ng basura na dapat agarang tugunan upang maiwasan ang mas malubhang epekto nito sa ating kapaligiran at maging sa ating kalusugan.

Sa pangkalahatan, malinaw na napakahalaga ng pagre-resiklo sa ating lipunan. Hindi lamang ito naglalayong bawasan ang dami ng basura na nalalagay sa ating kapaligiran, ngunit ito rin ay nagbibigay ng positibong epekto sa kalikasan, ekonomiya, at ating sariling kalusugan. Kaya't tayo'y magsama-sama sa pagtutulungan at pagiging responsable sa pamamahala ng ating mga basura!

17/02/2024

𝙎𝙪𝙨𝙞 𝙣𝙜 𝙈𝙖𝙠𝙖𝙗𝙖𝙜𝙤𝙣𝙜 𝙃𝙞𝙣𝙖𝙝𝙖𝙧𝙖𝙥

Ang ating daigdig ay kasalukuyang nagdudurusa sa pangmatagalang epekto ng patuloy na paggamit ng fossil fuels. Dahil dito, kailangan nating lumipat sa renewable energy. Ang paggamit ng renewable energy ay may malaking potensyal na maging solusyon sa mga problemang kaugnay ng enerhiya at kapaligiran sapagkat ito ay nanggagaling sa mga likas na yaman at hindi basta-basta nauubos. Pero bukod pa rito, ano nga ba ang iba pang mga dahilan kung bakit mas dapat nating paboran ang renewable energy kaysa sa fossil fuels?

Una, ang paggamit ng renewable energy ay hindi naglalabas ng mga mapaminsalang greenhouse gases na nagiging isa sa mga pangunahing sanhi ng climate change. Sa halip, ang renewable energy sources ay nagmumula sa likas na mapagkukunan, tulad ng solar, wind, hydroelectric, at iba pa. Sa pamamagitan ng paggamit ng mga ito sa wastong paraan, nababawasan natin ang antas ng polusyon sa hangin, maging ang ating carbon footprint.

Ayon sa National Renewable Energy Program (NREP) 2020-2040 ng Pilipinas, layunin ng bansa na ang mga natamong renewables ay umabot ng tatlumpu’t limang porsiyento ng power generation sa paparating na 2030 at limampung porsiyento naman sa 2040. Nilalayon din ng gobyerno na ibaba ang halaga ng mga renewable energy projects at gawin itong mas accessible para sa publiko.

Pangalawa, ang renewable energy ay nagbibigay ng mas maraming mga pagkakataon para sa pag-unlad, lalo na sa mga marginalisadong sektor. Sa pamamagitan ng pagpapatakbo ng mga solar farms, wind turbines, at hydroelectric dams sa mga rural na lugar, nabibigyan ang mga lokal na mamamayan ng oportunidad na magkaroon ng mas magandang kinabukasan sa kanilang sariling mga lugar.

Pangatlo, ang renewable energy ay nagtataguyod ng mas malawak na access sa enerhiya para sa mga hindi nabibigyan ng sapat na kuryente o ang mga nakatira sa liblib na lugar. Kung tayo ay lilipat sa renewable energy, maaari nating maabot ang mga lugar na ito at makapagbigay ng mura at maaasahang mapagkukunan ng enerhiya.

Samakatuwid, ang renewable energy ay hindi lamang isang alternatibong anyo ng enerhiya, ito rin ay isang malaking hakbang tungo sa pagbangon ng ating kalikasan mula sa mga malupit na sinapit nito sa kamay ng mga tao. Sa ating pagsulong tungo sa isang makabagong hinaharap, ang renewable energy ay hindi lamang isang opsyon, kung hindi ito ay isang pangangailangan. Bilang tagapangalaga ng kalikasan, nararapat lamang na pagtuunan natin ng pansin ang isyung ito upang masiguro ang isang malinis at maunlad na mundo.

16/02/2024

𝙋𝙖𝙜𝙡𝙖𝙮𝙖𝙜 𝙣𝙜 𝘽𝙖𝙜𝙤𝙣𝙜 𝘿𝙖𝙖𝙣

Bunsod ng patuloy na pagdami ng mga alalahanin tungkol sa malubhang epekto ng labis na
paggamit ng single-use plastics, ito ay nagtutulak sa paghahanap ng mga alternatibong materyal. Isa na rito ang paper straws, na siyang kinokonsidera bilang pamalit sa straw na gawa sa plastik, sapagkat ito ay biodegradable, compostable, mas ligtas para sa mga hayop, at kung mayroon man, ito ay mayroong mas maliit na epekto sa kapaligiran.

Batay sa datos ng UK Environment Agency, tinatayang aabot lamang sa loob ng dalawa hanggang anim na linggo upang mabulok ang isang straw na gawa sa papel, samantalang maaaring tumagal sa dalawang daang taon bago tuluyang mabulok ang plastik na straw. Ang mga katangian nito, gaya ng pagiging biodegradable at compostable, ay nagpapahiwatig na mayroon itong mas malaking kakayahan na mapanatili ang kaayusan at kalinisan ng ating kapaligiran.

Bilang tugon, noong taong 2018, ang nangungunang food processing and packaging solutions company, Tetra Pak, ay naglunsad ng paper straw na angkop para sa kanilang maliliit na package na gawa sa karton. Ang programang ito ay kanilang isinagawa bilang bahagi sa kanilang layuning bawasan ang paggamit ng plastik at kinalaunan ay tuluyang itigil ang paggamit nito. Bukod pa rito, inanusyo rin ng iilang mga malalaki at sikat na kumpanya tulad ng Starbucks at Hyatt na ititigil na nila ang paggamit ng single-use plastics at lilipat na sa paper o metal straws bilang alternatibo.

Bilang kabuuan, ang straw na gawa sa papel ay iilan lamang sa mga magagandang alternatibo sa plastik. Subalit, hindi sapat na mag-isip at lumikha ng mga alternatibong materyal lamang; mahalaga rin na magkaroon tayo ng disiplina sa sarili at sapat na kaalaman tungkol sa paksang ito. Sa pamamagitan ng tamang paggamit at pag-dispose ng mga papel na straw, tulad ng pagtapon sa tamang basurahan at pagpili ng reusable na mga straw kung maaari, mataas ang tsansang mababawasan natin ang ating carbon footprint at makatulong sa pangangalaga ng ating kapaligiran. Hanggat tama ang paraan ng paggamit nito, malaki ang posibilidad na mababawasan natin ang mga negatibong epekto ng single-use plastic, gaya ng plastic straw, sa ating kalikasan.

15/02/2024

𝙆𝙖𝙪𝙣𝙩𝙞𝙣𝙜 𝙃𝙞𝙜𝙤𝙥, 𝙈𝙖𝙡𝙖𝙠𝙞𝙣𝙜 𝙎𝙖𝙠𝙪𝙣𝙖

Sa kasalukuyang panahon, isa sa mga isyu sa kalikasan na patuloy na nagpapakita ng malaking banta sa ating kapaligiran ay ang problema sa plastic pollution. Isa sa mga pangunahing kontribyutor sa suliraning ito ay ang paggamit ng plastic straws. Ang mga plastic straw ay karaniwang hindi biodegradable, kaya't mas matagal itong mabulok kumpara sa iba nating mga basura. Sa bawat paggamit nito, ito ay dumadagdag sa landfill, hindi lamang sa lupa kung hindi maging sa mga karagatan. Ayon sa mga pag-aaral, partikular na isinagawa ng organisasyong World Wildlife Fund (WWF), sinasabing libu-libong mga hayop sa dagat ay namamatay taon-taon dahil sa pagkakalunod o pagkakain ng mga plastik na basura tulad ng straw. Ang pagkakaroon ng malaking bilang ng mga plastik sa karagatan ay nagdudulot din ng mga pagbabago sa ekosistema, na maaaring makaapekto sa ating pagkain at hanapbuhay.

Inaprubahan ng National Solid Waste Management Commission (NSWMC) ang plastic softdrink straw at plastic coffee stirrer sa listahan ng mga non-environmentally acceptable products (NEAP), na maaaring ipagbawal sa lalong madaling panahon bilang bahagi ng pagpapatupad ng Republic Act (RA) 9003 o ang Ecological Solid Waste Management Act of 2000. Dagdag pa rito, ipinagbabawal ng RA 9003 ang pagbabawal sa mga NEAP maliban kung ang NSWMC ay makahanap ng mga alternatibong magagamit sa publiko sa mga gastos na hindi hihigit ng sampung porsyentong mas mataas kumpara sa kaukulang mga presyo ng mga bagay na papalitan nito.

Sa kabuuan, ang paggamit ng plastic straw ay hindi lamang nagdudulot ng pinsala sa ating kapaligiran, kung hindi pati na rin sa ating kalusugan. Dapat nating isaalang-alang ang mga alternatibong paraan tulad ng paggamit ng metal, papel, o mga straw na gawa sa ibang materyales na hindi nakakasama sa kalikasan at sa ating kalusugan. Sa ganitong paraan, hindi lamang natin pinoprotektahan ang ating kapaligiran, kung hindi pati na rin ang ating sarili.

13/02/2024

𝐒𝐚𝐤𝐚𝐥 𝐧𝐠 𝐊𝐚𝐠𝐢𝐧𝐡𝐚𝐰𝐚𝐚𝐧

Sa bawat apak sa lansangan, sa pagbili ng kakailanganin sa malapit na tindahan, at maging sa pagpunta sa mga pampublikong lugar, hindi maiwasang mapansin ang naglilipanang plastik sa paligid. Sa Pilipinas, ang problemang patungkol sa plastik ay madalas na naipapakita sa pamamagitan ng patuloy na paggamit ng single-use plastics, partikular na sa anyo ng maliliit na plastik na pakete o sachet. Bagamat ito’y praktikal dahil sa abot-kayang halaga, hindi maikakaila ang masama at pangmatagalang epekto nito sa ating kalusugan at kalikasan. Oras na para tuluyang itigil ang paggamit ng single-use plastic at tumahak sa mas ligtas na landas, na siyang makatutulong upang mapanatili ang maayos na estado ng ating katawan at kapaligiran.

Ang Pilipinas ay kabilang sa mga bansa mula sa Timog-Silangang Asya na binansagang “Sachet Economy”, bunsod ng hindi matapos-tapos na paggamit nito. Batay sa isinagawang pagsusuri ng The World Bank, tinatayang umaabot sa halos 163 milyong pirasong sachet ang kinokonsumo ng mga Pilipino sa pang araw-araw. Ang libo-libong toneladang basura na ito ay kadalasang napupunta at nakatambak sa mga bangketa, kanal, o ilog, na nagiging sanhi sa pagbaha sa tuwing mayroong malakas na pag-ulan. Ito rin ay nakasisira sa mga lupaing agraryo at mga pangisdaan, na siyang pinagkukunan ng kabuhayan ng maraming Pilipino.

Bukod pa rito, ayon sa isang pag-aaral ng Ocean Conservancy noong 2017, ang Pilipinas ay nasa ikatlong pwesto sa buong mundo pagdating sa maling pamamahala ng plastik na basura, kung saan malaking porsyento nito ay nauuwi sa sachet. Bunga nito, maaaring mapinsala ang kalusugan ng mga hayop na namumuhay sa dagat sa pamamagitan ng pagkain o pagkakapulupot ng nasabing plastik sa kanilang katawan. Maaari rin itong magresulta sa pagkamatay ng mga coral reef, na siyang nagbibigay ng tirahan at pagkain sa iba’t ibang uri ng marine life.

Sa huli, ang responsibilidad ay hindi lamang nakasalalay sa mga mamimili at maliliit na negosyo, kung hindi pati na rin sa malalaking korporasyon at policy makers. Ang mga kumpanya na may malawak na saklaw at maraming konsumer ay dapat lumipat tungo sa mas sustainable na packaging, kung saan maaari itong gamitin na higit sa isang beses ngunit hindi rin masakit sa bulsa ng bibili. Sa kabilang dako, ang mga mamimili ay nararapat na magkaroon ng sapat na kaalaman tungkol sa isyung ito upang sila’y makaisip ng ibang alternatibo bilang pamalit sa plastik, partikular na sa sachet. Sa pamamagitan ng edukasyon at pagbibigay ng alternatibong solusyon, kung hindi man natin tuluyang matigil, ay maaari nating mabawasan ang pagkalat ng plastik sa kapaligiran. Ito ay hindi lamang kapaki-pakinabang para sa atin, kung hindi pati na rin sa mga susunod na henerasyon.

12/02/2024

Isang Kumpas, Isang Mundo: Tayo’y maghawak-kamay tungo sa mas magandang kalikasan.

Maligayang pagdating sa Kumpas ng Kamay! Ang layunin ng pahinang ito ay magbahagi ng kaalaman, magbigay ng kamalayan, at manguna sa mga hakbang tungo sa pangangalaga sa kalikasan. Sa pamamagitan ng mga impormatibong post at pagpapalaganap ng mga solusyon sa mga hamon sa kalikasan, nais naming maging bahagi ng pagbabago para sa mas malinis at mas maayos na mundo para sa ating lahat.

Kasama ka namin sa paglalakbay tungo sa isang mas magandang kapaligiran. Kaya, sama-sama nating ipagpatuloy ang ating adbokasiya para sa kalikasan!

Tumutok at makiisa sa Kumpas ng Kamay. Itaas ang bandila ng kalikasan!

Kumpas ng Kamay

27/02/2024

23/02/2024

21/02/2024

19/02/2024

18/02/2024

17/02/2024

16/02/2024

15/02/2024

13/02/2024

12/02/2024

Address

Website

Alerts

Shortcuts

Share

Category